Mga Pangutana Gikan sa mga Magbabasa
◼ Ang usa ka Kristohanon nga may yutan-ong paglaom matawag bang bahin sa “dakong panon” karon, tungod sa kamatuorang siya wala pa man maluwas sa “dakong kasakitan”?—Pinadayag 7:9, 14.
Oo, kana nahiangay tungod sa iyang palaaboton.
Ang Pinadayag kapitulo 7 nagahisgot sa duha ka pundok. Ang nahauna mao ang 144,000 nga “pinatikan gikan sa matag banay sa mga anak ni Israel.” (Pinadayag 7:4) Ang pagtandi sa Pinadayag 14:1-5 nagapakitang ang 144,000 “gipalit gikan sa yuta,” aron mahimong “unang mga bunga sa Diyos.” Busa, kini mao ang maghari sa langit uban kang Kristo. (Galacia 6:16; 2 Timoteo 4:18) Ang ikaduhang pundok mao ang “usa ka dakong panon, nga walay makaihap,” nga “nagagikan sa dakong kasakitan.”
Sa nahitaboan niini, ang Pinadayag 7:9-17 nagahulagway sa yutan-ong mga naluwas sa umaabot nga kasakitan. Busa ang usa nga sobra ka estrikto tingali maglimite sa terminong “dakong panon” ngadto sa mga tawong nakalabang nianang kasakitana. Apan kinahanglan bang ingon ka mapig-oton? Dili kami motuo sa ingon. Dayag, kadtong maluwas kinahanglang natigom na una pa sa “dakong kasakitan” aron sila takos luwason. Busa, among gipadapat ang terminong “dakong panon” ngadto sa maunongong mga Kristohanon si kinsa niining panahona nagaalagad kang Jehova nga Diyos uban ang kalaomang maluwas ug unya nga sila ‘pagatultolan ngadto sa mga tuboran sa mga tubig sa kinabuhi’ sa yuta. (Pinadayag 7:17) Kon usa sa “dakong panon” mamatay man karon, una sa “dakong kasakitan,” adunay bug-os nga katarongan sa pagpaabot sa iyang pagkabanhaw sa kinabuhi sa yuta.
Ang susamang mga punto ikapahayag mahitungod sa terminong “ubang mga karnero.” Sa Juan 10:7-16, si Jesus unang naghisgot sa iyang “mga karnero,” kinsa atong gisabot nga mao ang “gamayng panon” nga destinado sa langitnong kinabuhi. Si Jesus sunod miingon: “Ako adunay ubang mga karnero, nga wala niining [langitnong] torila; sila akong pagadad-on usab, ug sila magpatalinghog sa akong tingog, ug sila mahimong usa ka panon, usa ka magbalantay.” Kami subsob nagpresentar ug Kasulatanhong ebidensiya nga nagpaila sa “ubang mga karnero” ingon nga mao kadtong mga tawo kansang kalaoman mao ang kinabuhi sa yuta.—Lucas 12:32.
Tingali may mangatarongan: Si Jesus nagpunting sa umaabot nga pagtigom sa “ubang mga karnero,” busa ang termino mapadapat lamang ngadto niadtong si kinsa, tapos mamulong si Jesus, makadawat sa Biblikanhong paglaom sa kinabuhing walay kataposan sa yuta. Apan, mopatim-aw nga dili kinahanglang ilimite ang termino sa maong paagi, nga daw si Jesus nagbatbat sa mga butang sa kronolohikanhong paagi. Kami nagtuo nga siya nagpasiugda nga siya mao ang magbalantay sa nagkahiusa nga mga karnero. Ang pila ka karnerohong mga tawo mahisulod sa toril aron moadto sa langit. May lain usab nga ubang mga karnero nga modawat kaniya ingong magbalantay; kini sila mahiusa niadtong unang gihisgotan. Sa pagbaton niining hunahunaa, ang terminong “ubang mga karnero” nagaapil sa mga tawo sa pagtuo nga nangamatay una inagurahi ni Jesus ang dalan ngadto sa langit, sama kang Noe, Abraham, Job, David, ug Juan Bawtista. (Mateo 11:11; Buhat 2:29; Hebreohanon 10:19, 20) Dihang kini sila mabanhaw sa bag-ong sistema sa mga butang, sila makadawat sa Maayong Magbalantay ug makabaton sa kalaoman sa walay-kataposang yutan-ong kinabuhi uban sa nahibiling “ubang mga karnero” ni Jesus.