• Pinadayag—Unsay Kahulogan Niini Para sa mga Kaaway sa Diyos?
    Ang Bantayanang Torre (Tun-anan)—2022 | Mayo

    • GIPAILA KON KINSA ANG MGA KAAWAY SA DIYOS

      Ang pintas nga mananap nga pito ang ulo diha sa Pinadayag migimaw sa dagat. Naa ni 10 ka sungay ug 10 ka korona ug ang hitsura ani morag leopardo, ang tiil ani morag sa oso, ug ang baba ani morag sa leyon.

      PINTAS NGA MANANAP NGA NAAY PITO KA ULO

      Kini migimaw “sa dagat” ug naay pito ka ulo, 10 ka sungay, ug 10 ka korona. (Pin. 13:1-4) Kini nagsimbolo sa tanang gobyerno nga nagmando sa tawo sukad sa una hangtod karon. Ang pito ka ulo nagsimbolo sa pito ka gahom sa kalibotan nga dakog epekto sa katawhan sa Diyos (Tan-awa ang parapo 6-8)

      6. Unsay gisimbolohan sa pintas nga mananap nga naay pito ka ulo nga gihisgotan sa Pinadayag 13:1-4?

      6 Kinsa ang pintas nga mananap nga naay pito ka ulo? (Basaha ang Pinadayag 13:1-4.) Namatikdan nato nga kini nga mananap morag leopardo, pero ang mga tiil niini parehas nianang sa oso, ang baba niini parehas nianang sa leyon, ug naa ni 10 ka sungay. Kining tanan nga deskripsiyon makita pod diha sa upat ka mananap nga gihisgotan sa Daniel kapitulo 7. Pero sa Pinadayag, kini nga mga deskripsiyon makita diha sa usa lang ka mananap, dili sa upat ka lainlaing mananap. Kini nga pintas nga mananap wala magsimbolo sa usa lang ka gobyerno o gamhanan kaayong imperyo. Gihisgotan sa Pinadayag nga kini nagmando sa “matag tribo ug katawhan ug pinulongan ug nasod.” Busa masabtan nato nga dili ni usa lang ka gobyerno. (Pin. 13:7) Klaro nga kining pintas nga mananap nagsimbolo sa tanang gobyerno nga nagmando sa tawo sukad sa una hangtod karon.b​—Eccl. 8:9.