Unsay Imong Kahimtang Atubangan sa Hukmanan?

“Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono.”​—MATEO 25:31.

1-3. Unsang katarongan sa pagkapositibo ang atong nabatonan bahin sa hustisya?

‘SAD-AN O DILI?’ Daghan ang nagduhaduha sa dihang makadungog sila ug mga balita bahin sa usa ka kaso sa hukmanan. Ang mga huwes ug mga membro sa hurado tingali naningkamot nga magmatinud-anon, apan kanunay ba gayod nga mangibabaw ang hustisya? Wala ba kamo makadungog bahin sa inhustiya ug pagkawalay-katarongan sa hudisyal nga mga paagi? Ang maong inhustisya dili bag-o, sama sa atong makita sa ilustrasyon ni Jesus nga makaplagan diha sa Lucas 18:1-8.

² Bisag unsa pay imong naagian sa hustisya sa tawo, matikdi ang konklusyon ni Jesus: “Dili ba ipahinabo sa Diyos ang hustisya alang sa iyang mga pinili kinsa nagatuaw kaniya adlaw ug gabii . . . ? Ako magaingon kaninyo, Iyang ipahinabo ang hustisya ngadto kanila sa madali. Bisan pa, sa dihang ang Anak sa tawo moabot, makaplagan ba gayod niya ang pagtuo dinhi sa yuta?”

³ Oo, tinoon ni Jehova nga ang iyang mga alagad sa kataposan makadawat ug hustisya. Si Jesus nalangkit, usab, ilabina karon tungod kay kita nagkinabuhi na sa “kataposang mga adlaw” sa presente daotang sistema. Gamiton ni Jehova sa dili madugay ang iyang gamhanang Anak sa pagpapha sa pagkadaotan sa yuta. (2 Timoteo 3:1; 2 Tesalonica 1:7, 8; Pinadayag 19:11-16) Atong masabtan ang papel ni Jesus gikan sa usa sa kataposang mga ilustrasyon nga iyang gihatag, nga sagad gitawag nga ang sambingay sa mga karnero ug sa mga kanding.

4. Unsay atong pagsabot bahin sa panahon sa sambingay sa mga karnero ug sa mga kanding, apan nganong atong hatagag pagtagad ang sambingay karon? (Proverbio 4:18)

⁴ Dugay na natong nasabtan nga ang sambingay naglarawan kang Jesus nga naglingkod ingong Hari sa Gingharian niadtong 1914 ug sukad niadto nagapanghukom​—kinabuhing walay kataposan alang sa mga tawo nga mapamatud-an nga samag mga karnero, kamatayon hangtod sa hangtod alang sa mga kanding. Apan ang pagtimbangtimbang pag-usab sa sambingay nagpunting ug usa ka gibag-ong pagsabot bahin sa panahon niini ug kon unsay giilustrar niini. Kini nga pagpatin-aw nagpalig-on sa importansiya sa atong buluhatong pagsangyaw ug sa kahulogan sa pagsanong sa mga tawo. Aron makita ang basehanan alang niining mas lalom nga pagsabot sa sambingay, atong tagdon kon unsay gipakita sa Bibliya bahin kang Jehova ug Jesus, ingong mga Hari ug ingong mga Maghuhukom.

Si Jehova Ingong Supremong Maghuhukom

5, 6. Nganong husto ang paglantaw kang Jehova ingong Hari ug Maghuhukom?

⁵ Si Jehova nagmando sa uniberso nga adunay gahom ibabaw sa tanan. Sanglit walay sinugdanan ug walay kataposan, siya mao ang “Hari sa kadayonan.” (1 Timoteo 1:17; Salmo 90:2, 4; Pinadayag 15:3) Siya adunay awtoridad sa paghimog mga reglamento, o mga balaod, ug sa pagpatuman niini. Apan ang iyang awtoridad naglakip sa pagkahimong Maghuhukom. Ang Isaias 33:22 nag-ingon: “Si Jehova mao ang atong Maghuhukom, si Jehova ang atong Maghahatag-ug-balaod, si Jehova ang atong Hari; siya magaluwas kanato.”

⁶ Ang mga alagad sa Diyos dugay nang miila kang Jehova ingon nga Maghuhukom sa mga kaso ug mga isyu. Pananglitan, human nga natimbangtimbang sa “Maghuhukom sa tibuok yuta” ang ebidensiya labot sa pagkadaotan sa Sodoma ug Gomorra, siya mihukom nga ang mga molupyo takos laglagon ug gipadapat kanang matarong nga paghukom. (Genesis 18:20-33; Job 34:10-12) Napasaligan gayod kita niini sa pagkasayod nga si Jehova maoy usa ka matarong nga Maghuhukom nga makapadapat kanunay sa iyang mga paghukom!

7. Sa unsang paagi milihok si Jehova ingong Maghuhukom sa pagpakiglabot sa Israel?

⁷ Sa karaang Israel, si Jehova usahay direktang nagpakanaog ug paghukom. Dili ka ba malipay balik niadto sa pagkasayod nga usa ka hingpit nga Maghuhukom ang naghukom sa mga butang? (Levitico 24:10-16; Numeros 15:32-36; 27:1-11) Ang Diyos usab nagtagana ug “hudisyal nga mga desisyon” nga sa katibuk-an maayo ingong mga sukdanan sa pagpanghukom. (Levitico 25:18, 19; Nehemias 9:13; Salmo 19:9, 10; 119:7, 75, 164; 147:19, 20) Siya mao ang “Maghuhukom sa tibuok yuta,” busa kitang tanan apektado.​—Hebreohanon 12:23.

8. Unsang hinungdanong panan-awon ang nakita ni Daniel?

⁸ Kita may pamatuod sa “saksi nga nakakita” labot niining butanga. Ang manalagnang Daniel gihatagan ug usa ka panan-awon sa mapintas nga mga mananap nga nagbarog alang sa mga kagamhanan o mga empiryo. (Daniel 7:1-8, 17) Siya midugang: “Dihay mga trono nga gibutang ug ang Karaan sa mga Adlaw milingkod. Ang iyang bisti maputi ingon sa niyebe.” (Daniel 7:9) Matikdi nga si Daniel nakakita ug mga trono “ug ang Karaan sa mga Adlaw [Jehova] milingkod.” Pangutan-a ang imong kaugalingon, ‘Ang nakita ba ni Daniel dinhi mao ang pagkahimong Hari sa Diyos?’

9. Unsa ang usa sa kahulogan sa ‘naglingkod’ sa trono? Paghatag ug mga pananglitan.

⁹ Buweno, kon mabasa nato nga ang usa “milingkod” sa trono, kita tingali maghunahuna bahin sa iyang pagkahimong hari, kay mogamit usahay ang Bibliya ug ingon niana nga pinulongan. Pananglitan: “Sa dihang nagsugod sa paghari [si Zimri], sa milingkod siya sa iyang trono, siya . . .” (1 Hari 16:11; 2 Hari 10:30; 15:12; Jeremias 33:17) Usa ka Mesiyaniko nga tagna nag-ingon: “Siya kinahanglang molingkod ug magmando sa iyang trono.” Busa, ang ‘paglingkod sa trono’ mahimong magkahulogan sa pagkahimong hari. (Zacarias 6:12, 13) Si Jehova gihubit ingong usa ka Hari nga naglingkod sa trono. (1 Hari 22:19; Isaias 6:1; Pinadayag 4:1-3) Siya mao ang “Hari sa kadayonan.” Bisan pa, samtang nagpahayag siya ug usa ka bag-ong bahin sa soberanya, mahimong ikaingon nga siya nahimong Hari, nga daw naglingkod sa iyang trono sa bag-ong paagi.​—1 Cronicas 16:1, 31; Isaias 52:7; Pinadayag 11:15-17; 15:3; 19:1, 2, 6.

10. Unsa ang pangunang katungdanan sa mga haring Israelinhon? Iilustrar.

¹⁰ Apan aniay hinungdanong punto: Ang pangunang katungdanan sa karaang mga hari mao ang paghusay sa mga kaso ug sa pagpanghukom. (Proverbio 29:14) Hinumdomi ang maalamong paghukom ni Solomon sa dihang giangkon sa duha ka babaye ang usa ka masuso. (1 Hari 3:16-28; 2 Cronicas 9:8) Ang usa sa iyang mga tinukod nga pangkagamhanan mao “ang Kayda sa Trono diin siya maghukom,” nga gitawag usab “ang kayda sa paghukom.” (1 Hari 7:7) Ang Jerusalem gihubit ingong ang dapit diin “ang mga trono sa paghukom naglingkod.” (Salmo 122:5) Matin-aw, ang ‘paglingkod sa trono’ magkahulogan usab ug pagpasundayag sa gahom sa paghukom.​—Exodo 18:13; Proverbio 20:8.

11, 12. (a) Unsay kahulogan sa paglingkod ni Jehova, nga gihisgotan sa Daniel kapitulo 7? (b) Sa unsang paagi gipamatud-an sa ubang mga teksto nga si Jehova molingkod sa paghukom?

¹¹ Karon balikan nato ang talan-awon diin nakita ni Daniel ‘ang Karaan sa mga Adlaw nga naglingkod.’ Ang Daniel 7:10 midugang: “Ang Hukmanan nanglingkod, ug dihay mga basahon nga gibuksan.” Oo, ang Karaan sa mga Adlaw naglingkod aron sa paghukom bahin sa pagmando sa kalibotan ug sa paghukom sa Anak sa tawo ingong takos sa pagmando. (Daniel 7:13, 14) Dayon atong mabasa nga “ang Karaan sa mga Adlaw miabot ug ang paghukom gihatag dapig sa mga balaan,” kadtong gihukman nga takos sa pagmando uban sa Anak sa tawo. (Daniel 7:22) Sa kataposan “ang Hukmanan nagpadayon sa paglingkod” ug nagpakanaog ug dili maayong paghukom sa kataposang gahom sa kalibotan.​—Daniel 7:26.a

¹² Busa, ang pagkakita ni Daniel sa Diyos nga ‘naglingkod sa trono’ nagkahulogan sa Iyang pag-abot aron sa paghukom. Sayo pa niana si David miawit: “Ikaw [Jehova] nagpahamtang sa akong paghukom ug sa akong kawsa; naglingkod ka sa trono nga naghimo sa matarong nga paghukom.” (Salmo 9:4, 7) Ug si Joel nagsulat: “Pasagdi nga mapukaw ang kanasoran ug patungasa sa walog sa Jehosapat; kay didto ako [Jehova] molingkod aron sa paghukom sa tanang mga nasod.” (Joel 3:12; itandi ang Isaias 16:5.) Si Jesus ug Pablo nailalom sa hudisyal nga mga kahimtang diin didto naglingkod ang usa ka tawo sa paghusay sa kaso ug sa paghukom.b​—Juan 19:12-16; Buhat 23:3; 25:6.

Ang Katungdanan ni Jesus

13, 14. (a) Unsang pasalig ang nabatonan sa katawhan sa Diyos nga si Jesus mahimong Hari? (b) Kanus-a si Jesus milingkod sa iyang trono, ug sa unsang diwa siya nagmando gikan sa 33 K.P. padayon?

¹³ Si Jehova maoy Hari ug Maghuhukom. Komosta si Jesus? Ang manulonda nga nagpahibalo sa iyang pagkatawo miingon: “Ihatag ni Jehova nga Diyos kaniya ang trono ni David nga iyang amahan, . . . ug walay pagkatapos ang iyang gingharian.” (Lucas 1:32, 33) Si Jesus mahimong permanenteng manununod sa Davidikong pagkahari. (2 Samuel 7:12-16) Siya magmando gikan sa langit, kay si David nag-ingon: “Ang gipamulong ni Jehova sa akong Ginoo [Jesus] mao: ‘Lingkod sa akong tuong kamot hangtod nga ibutang ko ang imong mga kaaway ingong tumbanan sa imong mga tiil.’ Ang barras sa imong kalig-on ipadala ni Jehova gikan sa Sion, nga nagaingon: ‘Maghari ka sa taliwala sa imong mga kaaway.’”​—Salmo 110:1-4.

¹⁴ Kanus-a kana mahitabo? Si Jesus wala magmando ingong Hari samtang tawhanon. (Juan 18:33-37) Sa 33 K.P., siya namatay, gibanhaw, ug mikayab sa langit. Ang Hebreohanon 10:12 nag-ingon: “Kini nga tawo mitanyag ug usa ka halad alang sa mga sala hangtod sa hangtod ug milingkod diha sa tuong kamot sa Diyos.” Unsang awtoridad ang nabatonan ni Jesus? “[Ang Diyos] mipalingkod kaniya diha sa iyang tuong kamot sa langitnong mga dapit, nga labaw kaayo sa tanang kagamhanan ug awtoridad ug gahom ug pagkaginoo . . . ug gihimo siyang ulo ibabaw sa tanang butang nganha sa kongregasyon.” (Efeso 1:20-22) Sanglit si Jesus niadtong panahona may harianong awtoridad ibabaw sa mga Kristohanon, si Pablo nakasulat nga si Jehova “nagpahigawas kanato gikan sa awtoridad sa kangitngit ug nagbalhin kanato ngadto sa gingharian sa Anak sa iyang gugma.”​—Colosas 1:13; 3:1.

15, 16. (a) Nganong makaingon kita nga si Jesus wala mahimong Hari sa Gingharian sa Diyos sa 33 K.P.? (b) Kanus-a nagsugod si Jesus sa pagmando sa Gingharian sa Diyos?

¹⁵ Sa maong panahon, hinunoa, si Jesus wala molihok ingong Hari ug Maghuhukom ibabaw sa kanasoran. Siya naglingkod tapad sa Diyos, naghulat sa panahon sa paglihok ingong Hari sa Gingharian sa Diyos. Si Pablo misulat bahin kaniya: “Mahitungod ba gayod kang kinsa sa mga anghel nga siya miingon: ‘Lingkod sa akong tuong kamot, hangtod nga akong ibutang ang imong mga kaaway ingong tungtonganan sa imong mga tiil’?”​—Hebreohanon 1:13.

¹⁶ Ang mga Saksi ni Jehova nagpatik ug daghang ebidensiya nga ang yugto sa paghulat ni Jesus natapos niadtong 1914, sa dihang siya nahimong magmamando sa Gingharian sa Diyos diha sa dili-makita nga kalangitan. Ang Pinadayag 11:15, 18 nag-ingon: “Ang gingharian sa kalibotan nahimong ang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.” “Apan ang kanasoran nangapungot, ug ang imo mismong kapungot miabot.” Oo, gipakita sa nasod ang kasuko sa usag usa panahon sa Gubat sa Kalibotan I. (Lucas 21:24) Ang mga gubat, mga linog, kamatay, kakulang ug pagkaon, ug ang susama niini, nga atong nakita sukad sa 1914 nagpamatuod nga si Jesus karon nagmando diha sa Gingharian sa Diyos, ug ang bug-os nga kataposan sa kalibotan haduol na.​—Mateo 24:3-14.

17. Unsang hinungdanong mga punto ang ato nang natino?

¹⁷ Agig lakbit nga repaso: Ang Diyos mahimong ikaingon nga naglingkod sa trono ingong Hari, apan sa laing diwa siya mahimong naglingkod sa iyang trono aron sa paghukom. Sa 33 K.P., si Jesus milingkod sa tuong kamot sa Diyos, ug siya karon ang Hari sa Gingharian. Apan si Jesus ba, nga karon nagmando ingong Hari, nag-alagad usab ingong Maghuhukom? Ug nganong mabalaka kita niini, ilabina niining panahona?

18. Unsa pay pamatuod nga si Jesus mahimong Maghuhukom usab?

¹⁸ Si Jehova, kinsa may katungod sa pagtudlo ug mga maghuhukom, mipili kang Jesus ingong Maghuhukom nga nakaabot sa Iyang mga sukdanan. Gipakita kini ni Jesus sa dihang naghisgot bahin sa mga tawo nga mahimong buhi sa espirituwal: “Wala gayoy usa nga hukman ang Amahan, apan iyang gipiyal ang tanang pagpanghukom ngadto sa Anak.” (Juan 5:22) Bisan pa, ang hudisyal nga papel ni Jesus maoy labaw pa nianang matanga sa pagpanghukom, kay siya maoy maghuhukom sa mga buhi ug sa mga patay. (Buhat 10:42; 2 Timoteo 4:1) Si Pablo kas-a miingon: “[Ang Diyos] nakatakda na ug adlaw nga iyang ginatuyo nga hukman ang gipuy-ang yuta sa pagkamatarong pinaagi sa usa ka tawo [Jesus] kinsa iyang gikatudlo, ug siya naghatag ug garantiya ngadto sa tanang tawo sa pagkaagi nga siya nagbanhaw kaniya.”​—Buhat 17:31; Salmo 72:2-7.

19. Nganong husto ang paghisgot kang Jesus nga naglingkod ingong Maghuhukom?

¹⁹ Busa kita ba may katarongan sa paghinapos nga si Jesus naglingkod diha sa mahimayaong trono sa espesipikong papel sa Maghuhukom? Oo. Gisultihan ni Jesus ang mga apostoles: “Sa paglalang-pag-usab, sa dihang ang Anak sa tawo molingkod sa iyang mahimayaong trono, kamo nga misunod kanako manglingkod usab sa inyong kaugalingon sa napulog-duha ka trono, nga managhukom sa napulog-duha ka tribo sa Israel.” (Mateo 19:28) Bisan tuod nga si Jesus karon mao ang Hari sa Gingharian, ang iyang dugang kalihokan nga gihisgotan sa Mateo 19:28 mag-apil sa paglingkod diha sa trono sa paghukom panahon sa Milenyo. Sa maong panahon iyang pagahukman ang tanang katawhan, ang mga matarong ug ang mga daotan. (Buhat 24:15) Makatabang nga ibutang kini sa hunahuna samtang ibali nato ang atong pagtagad sa usa sa mga sambingay ni Jesus may kalabotan sa atong panahon ug sa atong mga kinabuhi.

Unsay Giingon sa Sambingay?

20, 21. Unsay gipangutana sa mga apostoles ni Jesus labot sa atong panahon, nga motultol ug unsang mga pangutana?

²⁰ Una pa mamatay si Jesus, ang iyang mga apostoles nangutana kaniya: “Kanus-a man kining mga butanga mahitabo, ug unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Si Jesus nagtagna ug dagkong mga hitabo sa yuta sa dili pa ‘moabot ang kataposan.’ Sa dili pa moabot kana nga kataposan, ang mga nasod ‘makakita sa Anak sa tawo nga moanhi diha sa mga panganod sa langit uban ang gahom ug dakong himaya.’​—Mateo 24:14, 29, 30.

²¹ Apan, unsay kahimtang sa mga tawo niadtong mga nasora sa dihang moabot ang Anak sa tawo diha sa iyang himaya? Atong susihon gikan sa sambingay sa mga karnero ug mga kanding, nga nagsugod niining mga pulonga: “Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono. Ug ang tanang kanasoran tigomon atubangan kaniya.”​—Mateo 25:31, 32.

22, 23. Unsang mga punto ang nagpakita nga ang sambingay sa mga karnero ug mga kanding wala magsugod sa katumanan niini sa 1914?

²² Aplikado ba kining maong sambingay sa dihang milingkod si Jesus sa harianong gahom sa 1914, sama sa dugay na natong nasabtan? Aw, ang Mateo 25:34 naghisgot kaniya ingong Hari, busa ang sambingay sa makataronganon aplikado sukad nga nahimong Hari si Jesus sa 1914. Apan unsang pagpanghukom ang iyang gihimo human gilayon niadto? Dili kadto pagpanghukom sa “tanang kanasoran.” Hinunoa, siya miliso sa iyang pagtagad ngadto niadtong nangangkon nga naglangkob sa “balay sa Diyos.” (1 Pedro 4:17) Nahiuyon sa Malakias 3:1-3, si Jesus, ingong mensahero ni Jehova, sa hudisyal nga paagi nagsusi sa dinihogang mga Kristohanon nga nahibilin sa yuta. Panahon usab kadto alang sa hudisyal nga paghukom sa Kakristiyanohan, kinsa bakak nga nangangkon nga mao “ang balay sa Diyos.”c (Pinadayag 17:1, 2; 18:4-8) Ugaling walay nagpakita nga sa maong panahon, o sukad niadto, si Jesus milingkod sa paghukom sa katawhan sa tanang kanasoran sa kataposan ingong mga karnero o mga kanding.

²³ Kon atong timbangtimbangon ang buluhaton ni Jesus sa sambingay, atong makita siya sa kataposan nga nagapanghukom sa tanang kanasoran. Ang sambingay wala magpakita nga ang maong pagpanghukom magpadayon sa usa ka hataas nga yugto sa daghang tuig, nga daw ang matag tawong nangamatay niining nanglabayng mga dekada gihukman nga takos sa walay kataposang kamatayon o walay kataposang kinabuhi. Mopatim-aw nga ang kadaghanan sa nangamatay sa dili pa dugayng mga dekada nangadto sa komon nga lubnganan sa katawhan. (Pinadayag 6:8; 20:13) Ang sambingay, hinunoa, naglarawan sa panahon sa dihang si Jesus maghukom sa katawhan sa “tanang kanasoran” kinsa mga buhi sa maong panahon ug nagaatubang sa pagpahamtang sa iyang hudisyal nga paghukom.

24. Kanus-a matuman ang sambingay bahin sa mga karnero ug sa mga kanding?

²⁴ Sa laing pagkasulti, ang sambingay nagpunting sa umaabot sa dihang ang Anak sa tawo moabot diha sa iyang himaya. Siya molingkod sa paghukom sa katawhan nga buhi unya nianang panahona. Ang iyang paghukom ipasukad sa kon unsay ilang gipasundayag mismo. Sa maong panahon “ang kalainan tali sa usa nga matarong ug sa usa ka daotan” tin-aw nga natino na. (Malakias 3:18) Ang aktuwal nga pagpahayag ug pagpahamtang sa paghukom himoon sa limitadong panahon. Unya sa maong panahon ipakanaog ni Jesus ang matarong nga mga desisyon pinasukad sa kon unsay mapamatud-an bahin sa mga indibiduwal.​—Tan-awa usab ang 2 Corinto 5:10.

25. Unsay gilarawan sa Mateo 25:31 sa naghisgot bahin sa Anak sa tawo nga naglingkod diha sa mahimayaong trono?

²⁵ Nan, kini nagkahulogan nga ang kang Jesus nga ‘paglingkod sa iyang mahimayaong trono’ alang sa paghukom, nga gihisgotan sa Mateo 25:31, aplikado sa umaabot nga panahon sa dihang kining gamhanang Hari molingkod sa pagpahayag ug sa pagpahamtang sa paghukom diha sa kanasoran. Oo, ang talan-awon sa paghukom nga naglangkit kang Jesus diha sa Mateo 25:31-33, 46 ikatandi sa talan-awon sa Daniel kapitulo 7, diin ang nagmandong Hari, ang Karaan sa mga Adlaw, milingkod aron ipatuman ang iyang papel ingong Maghuhukom.

26. Unsang bag-ong pagpatin-aw bahin sa sambingay ang nadayag?

²⁶ Ang pagsabot sa sambingay sa mga karnero ug mga kanding niining paagiha nagpaila nga ang paghukom sa mga karnero ug mga kanding maoy sa umaabot. Kini mahitabo human sa pag-ulbo “sa kasakitan” nga gihisgotan sa Mateo 24:29, 30 ug ang Anak sa tawo ‘moabot diha sa iyang himaya.’ (Itandi ang Marcos 13:24-26.) Dayon, uban sa tibuok nga daotang sistema nga matapos, molingkod si Jesus sa hukmanan ug magpakanaog ug magpadapat sa paghukom.​—Juan 5:30; 2 Tesalonica 1:7-10.

27. Sa unsa kita angay magmaikagon sa pagkahibalo bahin sa kataposang sambingay ni Jesus?

²⁷ Kini naghatag ug katin-awan sa atong pagsabot bahin sa panahon sa sambingay ni Jesus, nga nagpakita sa dihang ang mga karnero ug mga kanding pagahukman. Apan sa unsang paagi apektado kita niini nga madasigong nagwali sa maayong balita sa Gingharian? (Mateo 24:14) Nagpahimo ba kini sa atong buluhaton nga dili kaayo hinungdanon, o naghatag ba kini ug mas bug-at nga responsibilidad? Atong tan-awon ang sunod nga artikulo kon sa unsang paagi kita apektado.

[Mga footnote]

Nakahinumdom Ka Ba?

◻ Sa unsang paagi si Jehova nag-alagad ingong Hari ug Maghuhukom?

◻ Unsa ang duha ka kahulogan sa ‘paglingkod sa trono’?

◻ Unsay atong giingon kaniadto bahin sa panahon sa Mateo 25:31, apan unsay basehanan alang sa gibag-ong hunahuna?

◻ Kanus-a ang Anak sa tawo milingkod sa iyang trono, sumala sa gipakita sa Mateo 25:31?

Unsay Umaabot Alang sa mga Karnero ug sa mga Kanding?

“Siya maglain sa katawhan gikan sa usag usa, maingon sa usa ka pastol nga nagalain sa mga karnero gikan sa mga kanding.”​—MATEO 25:32.

1, 2. Nganong ang sambingay mahitungod sa mga karnero ug sa mga kanding makapaikag kanato?

TINO nga si Jesu-Kristo mao ang labing bantogang Magtutudlo sa yuta. (Juan 7:46) Usa sa iyang mga paagi sa pagpanudlo mao ang paggamit ug mga sambingay, o mga ilustrasyon. (Mateo 13:34, 35) Kini mga yano apan epektibo sa paghatod sa halalom espirituwal ug matagnaong mga kamatuoran.

² Diha sa sambingay mahitungod sa mga karnero ug sa mga kanding, gipunting ni Jesus ang usa ka panahon nga siya molihok diha sa linain nga katungdanan: “Sa dihang moabot ang Anak sa tawo diha sa iyang himaya, ug . . .” (Mateo 25:31) Angay kining makapaikag kanato tungod kay mao kini ang ilustrasyon diin gitapos ni Jesus ang iyang tubag sa pangutana: “Unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Apan unsay kahulogan niini alang kanato?

3. Sayo sa iyang pakigpulong, unsay giingon ni Jesus nga mahitabo dihadiha human magsugod ang dakong kasakitan?

³ Gitagna ni Jesus ang talagsaong mga hitabo nga moabot “dihadiha pagkahuman” sa pagbuto sa dakong kasakitan, mga hitabo nga atong gipaabot. Siya miingon nga sa maong panahon “ang ilhanan sa Anak sa tawo” motungha. Apektado kaayo niini ang “tanang tribo sa yuta” nga “makita ang Anak sa tawo nga moanhi diha sa mga panganod sa langit uban ang gahom ug dakong himaya.” Ang Anak sa tawo pagaubanan sa “iyang mga anghel.” (Mateo 24:21, 29-31)a Komosta man ang sambingay mahitungod sa mga karnero ug sa mga kanding? Gibutang kini sa modernong mga Bibliya diha sa kapitulo 25, apan bahin kini sa tubag ni Jesus, nga naghatag ug dugang mga detalye bahin sa iyang pag-abot diha sa himaya ug pagsentro sa pagtagad sa iyang paghukom sa “tanang kanasoran.”​—Mateo 25:32.

Mga Personahe sa Sambingay

4. Unsa ang unang paghisgot bahin kang Jesus ang mabasa diha sa sambingay mahitungod sa mga karnero ug sa mga kanding, ug kinsa pa ang gihisgotan?

⁴ Gisugdan ni Jesus ang sambingay pinaagi sa pag-ingon: “Sa dihang moabot ang Anak sa tawo.” Malagmit nahibalo ka kon kinsa “ang Anak sa tawo.” Sagad ipadapat sa mga magsusulat sa Ebanghelyo kanang ekspresyona kang Jesus. Bisan si Jesus mismo mihimo niana, nga sa walay duhaduha anaa sa hunahuna ang panan-awon ni Daniel bahin sa “usa nga sama sa anak sa tawo” nga miduol sa Karaan sa mga Adlaw sa pagdawat “sa dominyo ug dignidad ug gingharian.” (Daniel 7:13, 14; Mateo 26:63, 64; Marcos 14:61, 62) Samtang si Jesus mao ang pangunang persona niini nga sambingay, wala siya mag-inusara. Sayo sa iyang pakigpulong, sumala sa gikutlo sa Mateo 24:30, 31, miingon siya nga sa dihang ang Anak sa tawo ‘moanhi uban ang gahom ug dakong himaya,’ dulaon sa iyang mga manulonda ang usa ka hinungdanong papel. Sa samang paagi, gipakita sa sambingay bahin sa mga karnero ug sa mga kanding nga ang mga manulonda kauban ni Jesus sa dihang siya ‘molingkod sa iyang mahimayaong trono’ aron sa paghukom. (Itandi ang Mateo 16:27.) Apan ang Maghuhukom ug ang iyang mga manulonda atua sa langit, ingon ba usab ang mga tawo nga gihisgotan diha sa sambingay?

5. Sa unsang paagi nato mailhan ang “mga igsoon” ni Jesus?

⁵ Ang lakbit nga pagsusi sa sambingay magpadayag ug tulo ka grupo nga kinahanglang atong ilhon. Dugang pa sa mga karnero ug mga kanding, gidugang sa Anak sa tawo ang ikatulong grupo kansang kailhanan hinungdanon sa pag-ila sa mga karnero ug sa mga kanding. Gitawag ni Jesus kining ikatulong grupo nga iyang espirituwal nga mga igsoon. (Mateo 25:40, 45) Sila mao gayod ang mga magsisimba, tungod kay si Jesus miingon: “Si bisan kinsa nga nagabuhat sa kabubut-on sa akong Amahan . . . , mao ang akong igsoong lalaki, ug igsoong babaye, ug inahan.” (Mateo 12:50; Juan 20:17) Labing hinungdanon, si Pablo nagsulat mahitungod sa mga Kristohanon nga bahin sa “binhi ni Abraham” ug kinsa mga anak sa Diyos. Iyang gitawag sila ingong “mga igsoon” ni Jesus ug “mga mag-aambit sa langitnong pagtawag.”​—Hebreohanon 2:9–3:1; Galacia 3:26, 29.

6. Kinsa ang “labing ubos” sa mga igsoon ni Jesus?

⁶ Nganong gihisgotan ni Jesus ang “labing ubos” sa iyang mga igsoon? Gipalanog niadtong mga pulonga ang iyang unang gisulti nga nadunggan sa mga apostoles. Sa nagtandi kang Juan Bawtista, nga namatay ug una kang Jesus ug busa may yutan-ong paglaom, uban niadtong makabaton ug langitnong kinabuhi, si Jesus miingon: “Wala pay gibangon nga labaw kay kang Juan nga Bawtista; apan ang usa nga ubos sa gingharian sa mga langit labaw pa kay kaniya.” (Mateo 11:11) Ang uban nga mahilangit tingali maoy mga prominente sa kongregasyon, sama sa mga apostoles, ug ang uban dili kaayo prominente, apan silang tanan maoy espirituwal nga mga igsoon ni Jesus. (Lucas 16:10; 1 Corinto 15:9; Efeso 3:8; Hebreohanon 8:11) Busa, bisan pa kon ang pipila daw ubos diha sa yuta, sila maoy iyang mga igsoon ug angayng tagdon sa ingon niana.

Kinsa ang mga Karnero ug mga Kanding?

7, 8. Unsay giingon ni Jesus mahitungod sa mga karnero, busa unsay mahimo natong ihinapos bahin kanila?

⁷ Atong mabasa ang bahin sa paghukom sa mga karnero: “[Si Jesus] moingon niadtong anaa sa iyang tuo, ‘Umari, kamong mga gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan. Kay gigutom ako ug kamo mihatag kanakog makaon; giuhaw ako ug kamo mihatag kanakog mainom. Naestranyo ako ug kamo matinagdanong midawat kanako; hubo, ug kamo nagbisti kanako. Nasakít ako ug kamo miatiman kanako. Didto ako sa prisohan ug miadto kamo kanako.’ Unya ang mga matarong motubag kaniya sa mga pulong, ‘Ginoo, kanus-a ka man namo nakita nga gigutom ug nagpakaon kanimo, o giuhaw, ug naghatag kanimog mainom? Kanus-a ka man namo nakita nga estranyo ug matinagdanong nagdawat kanimo, o hubo, ug nagbisti kanimo? Kanus-a ka man namo nakita nga nasakít o didto sa prisohan ug nangadto kanimo?’ Ug sa pagtubag ang hari moingon kanila, ‘Sa pagkamatuod ako magaingon kaninyo, Sa sukod nga gibuhat ninyo kini sa usa sa labing ubos niining akong mga igsoon, inyo kining gibuhat kanako.’”​—Mateo 25:34-40.

⁸ Matin-aw, ang mga karnero nga gihukmang takos nga mahimutang sa tuong kiliran sa pasidungog ug pag-uyon ni Jesus naghawas sa usa ka matang sa mga tawo. (Efeso 1:20; Hebreohanon 1:3) Unsay ilang gihimo ug kanus-a? Si Jesus miingon nga sila sa maluloy-on, matinahoron, ug manggihatagon mihatag kaniya ug pagkaon, ilimnon, ug sapot, gitabangan siya sa dihang siya nasakit o nabilanggo. Sa dihang miingon ang mga karnero nga wala nila kini mahimo kang Jesus sa personal, siya miingon nga sila sa pagkatinuod nagsuportar sa iyang espirituwal nga mga igsoon, ang nanghibilin sa dinihogang mga Kristohanon, busa sa maong diwa gibuhat nila kana kaniya.

9. Nganong ang sambingay dili ikapadapat sa panahon sa Milenyo?

⁹ Ang sambingay dili ikapadapat sa panahon sa Milenyo, tungod kay sa maong panahon ang mga dinihogan dili na mga tawo nga mag-antos sa gutom, uhaw, sakit, o pagkabilanggo. Hinunoa, daghan kanila ang nakaagom niana panahon sa konklusyon niining sistema sa mga butang. Sukad gitambog si Satanas sa yuta, ang mga nanghibilin iyang gihimo nga linaing tumong sa iyang kasuko, gipaagom sila sa pagbiaybiay, pagsakit, ug kamatayon.​—Pinadayag 12:17.

10, 11. (a) Nganong dili-makataronganon ang paghunahuna nga lakip sa mga karnero ang tanan nga nagbuhat ug usa ka buhat sa kaluoy sa mga igsoon ni Jesus? (b) Kinsa ang tukmang gihawasan sa mga karnero?

¹⁰ Ang buot bang ipasabot ni Jesus nga ang matag usa nga naghimog gagmayng kaluoy ngadto sa usa sa iyang mga igsoon, sama sa paghatag ug usa ka buok tinapay o usa ka basong tubig, kuwalipikado na nga mahimong usa niining mga karnero? Tugotan ta, nga ang pagbuhat sa maong mga kaluoy mahimong magpabanaag sa tawhanong kaluoy, apan ang tinuod, daw labaw pa ang nalangkit sa mga karnero niining maong sambingay. Pananglitan, si Jesus wala gayod magtumong sa mga ateyista o mga klerigo nga nakahimog usa ka buhat sa kaluoy sa usa sa iyang mga igsoon. Sa kasukwahi, duha ka beses gitawag ni Jesus ang mga karnero nga “mga matarong.” (Mateo 25:37, 46) Busa ang mga karnero tino nga mao kadtong sa usa ka yugto sa panahon mitabang​—aktibong nagasuportar—​sa mga igsoon ni Kristo ug nagapasundayag ug pagtuo sa sukod nga nakadawat ug matarong nga baroganan sa atubangan sa Diyos.

¹¹ Sa paglabay sa kasiglohan, daghan sama kang Abraham ang nakapahimulos ug matarong nga baroganan. (Santiago 2:21-23) Si Noe, Abraham, ug ubang mga matinumanon maoy lakip sa “ubang mga karnero” nga magapanunod ug kinabuhi sa Paraiso ubos sa Gingharian sa Diyos. Sa panahong dili pa dugay minilyon pa ang midawat sa matuod nga pagsimba ingong ubang mga karnero ug nahimong “usa ka panon” uban sa mga dinihogan. (Juan 10:16; Pinadayag 7:9) Kini sila nga may yutan-ong paglaom miila sa mga igsoon ni Jesus ingong mga embahador sa Gingharian ug busa nagtabang kanila​—sa literal ug sa espirituwal. Giisip ni Jesus ang gihimo sa ubang mga karnero alang sa iyang mga igsoon sa yuta nga gihimo usab diha kaniya. Kini sila nga mga buhi sa iyang pag-anhi sa paghukom sa mga nasod pagahukman ingong mga karnero.

12. Ngano kahang nangutana ang mga karnero kon sa unsang paagi sila nakahimog maayo kang Jesus?

¹² Kon ang ubang mga karnero karon nagwali na sa maayong balita uban sa mga dinihogan ug nagtabang kanila, nganong sila nangutana: “Ginoo, kanus-a ka man namo nakita nga gigutom ug nagpakaon kanimo, o giuhaw, ug naghatag kanimog mainom?” (Mateo 25:37) Mahimong adunay lainlaing mga katarongan. Usa kini ka sambingay. Pinaagi niini, gipakita ni Jesus ang iyang kinasingkasing nga kabalaka alang sa iyang espirituwal nga mga igsoon; siya mibati duyog kanila, miantos duyog kanila. Una pa niini si Jesus miingon: “Siya nga nagadawat kaninyo nagadawat usab kanako, ug siya nga nagadawat kanako nagadawat usab kaniya nga nagpadala kanako.” (Mateo 10:40) Niining ilustrasyona, gipasangkad ni Jesus ang prinsipyo, nga nagpakita nga kon unsay gibuhat (maayo o daotan) ngadto sa iyang mga igsoon makaabot bisan ngadto sa langit; nga daw gihimo kini diha kaniya sa langit. Usab, gipasiugda dinhi ni Jesus ang sukdanan ni Jehova sa paghukom, nga nagpatin-aw nga ang paghukom sa Diyos, pag-uyon man o pagtunglo, may pasikaranan ug matarong. Ang mga kanding dili makapangatarongan, ‘Aw, kon nakita ka pa lang unta namo sa personal.’

13. Nganong gitawag sa mga samag-kanding si Jesus ingong “Ginoo”?

¹³ Sa dihang masabtan nato kon kanus-a ipahamtang ang paghukom nga gipakita niini nga sambingay, makabaton kita ug mas tin-awng hunahuna kon kinsa ang mga kanding. Ang katumanan niini mahitabo sa dihang “ang ilhanan sa Anak sa tawo magpakita sa langit, ug niana ang tanang tribo sa yuta magapukpok sa ilang kaugalingon sa pagminatay, ug ilang makita ang Anak sa tawo nga moanhi . . . uban ang gahom ug dakong himaya.” (Mateo 24:29, 30) Ang mga makalabang buhi sa kasakitan sa Bantogang Babilonya nagtagad sa mga igsoon sa Hari sa matamayong paagi karon sa desperado motawag sa Maghuhukom “Ginoo,” sa paglaom nga maluwas ang ilang mga kinabuhi.​—Mateo 7:22, 23; itandi ang Pinadayag 6:15-17.

14. Sa unsa ipasukad ni Jesus ang iyang paghukom sa mga karnero ug sa mga kanding?

¹⁴ Apan, ang paghukom ni Jesus dili ipasukad sa desperadong mga pangangkon sa kanhing mga maninimba, mga ateyista, o uban pa. (2 Tesalonica 1:8) Hinunoa, susihon sa maghuhukom ang kahimtang sa kasingkasing ug nangaging mga binuhatan sa mga tawo bisan ngadto sa “usa niining labing ubos [sa iyang mga igsoon].” Sa tinuod, ang gidaghanon sa dinihogang mga Kristohanon nga nahibilin sa yuta nagkadiyutay. Hinunoa, basta ang dinihogan, nga gilangkoban sa “buotan ug kasaligang ulipon,” magpadayon sa pagtagana ug espirituwal nga pagkaon ug pagtultol, ang umaabot nga karnero adunay kahigayonan sa paghimog maayo sa ulipon nga matang, ingon sa ginahimo sa ‘dakong panon gikan sa tanang kanasoran ug mga tribo ug katawhan.’​—Pinadayag 7:9, 14.

15. (a) Sa unsang paagi gipakita sa daghan ang ilang kaugalingon nga samag mga kanding? (b) Nganong kinahanglang likayan nato ang pagsulti nga ang usa maoy karnero o usa ka kanding?

¹⁵ Sa unsang paagi gitagad ang mga igsoon ni Kristo ug ang minilyon sa ubang mga karnero nga nahiusa uban kanila ingong usa ka panon? Daghang tawo tingali wala sa personal mangatake sa mga hawas ni Kristo, apan wala usab nila tagda sa mahigugmaon ang iyang katawhan. Gipalabi ang daotang kalibotan, gisalikway sa mga samag-kanding ang mensahe sa Gingharian, nakadungog man niana sa direkta o dili-direkta. (1 Juan 2:15-17) Siyempre, sa kataposan, si Jesus mao ang usa nga gitudlo sa paghukom. Dili alang kanato ang pagtino kon kinsa ang mga karnero ug kon kinsa ang mga kanding.​—Marcos 2:8; Lucas 5:22; Juan 2:24, 25; Roma 14:10-12; 1 Corinto 4:5.

Unsay Palaaboton sa Matag Grupo?

16, 17. Unsang palaaboton ang mabatonan sa mga karnero?

¹⁶ Gihatag ni Jesus ang iyang paghukom sa mga karnero: “Umari, kamong mga gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan.” Pagkamainitong imbitasyon​—“Umari”! Ngadto sa unsa? Ngadto sa walay-kataposang kinabuhi, sama sa iyang gipahayag sa katibuk-an: “Ang matarong [mosulod] ngadto sa kinabuhing walay-kataposan.”​—Mateo 25:34, 46.

¹⁷ Diha sa sambingay mahitungod sa mga talanton, gipakita ni Jesus kon unsay gikinahanglan alang niadtong magmando uban kaniya sa langit, apan niini nga sambingay iyang gipakita kon unsay gidahom sa bahin sa mga sakop sa Gingharian. (Mateo 25:14-23) Sa laktod, tungod sa ilang kinasingkasing nga pagpaluyo sa mga igsoon ni Jesus, ang mga karnero magapanunod ug dapit diha sa yutan-ong dominyo sa iyang Gingharian. Tagamtamon nila ang kinabuhi diha sa paraisong yuta​—usa ka palaaboton nga giandam sa Diyos alang kanila “gikan sa pagkatukod sa kalibotan” sa malukat nga mga tawo.​—Lucas 11:50, 51.

18, 19. (a) Unsang paghukom ang ipahamtang ni Jesus sa mga kanding? (b) Sa unsang paagi kita makatino nga ang mga kanding dili makaatubang ug walay kataposang pag-antos?

¹⁸ Pagkalahi ang paghukom nga ipahamtang diha sa mga kanding! “Ug siya moingon ngadto na usab kanila nga diha sa iyang wala, ‘Panglakaw kamo gikan kanako, kamong mga tinunglo, ngadto sa walay-kataposang kalayo nga giandam alang sa Yawa ug sa iyang mga anghel. Kay gigutom ako, apan wala kamo maghatag kanakog makaon, ug giuhaw ako, apan wala kamo maghatag kanakog mainom. Naestranyo ako, apan wala kamo modawat kanako nga matinagdanon; hubo, apan wala ninyo ako bistihi; nasakít ug didto sa prisohan, apan wala kamo moatiman kanako.’ Unya sila usab motubag sa mga pulong nga, ‘Ginoo, kanus-a ka man namo nakita nga gigutom o giuhaw o usa ka estranyo o hubo o nasakít o didto sa prisohan ug wala moalagad kanimo?’ Unya motubag siya kanila sa mga pulong nga, ‘Sa pagkamatuod ako magaingon kaninyo, Sa sukod nga wala ninyo kini buhata sa usa niining mga labing ubos, wala ninyo kini buhata kanako.’”​—Mateo 25:41-45.

¹⁹ Ang mga estudyante sa Bibliya nahibalo nga kini wala magkahulogan nga ang dili-mamatay nga mga kalag sa mga samag-kanding mag-antos sa walay kataposang kalayo. Dili, tungod kay ang mga tawo maoy mga kalag; wala sila magbaton ug dili-mamatay nga mga kalag. (Genesis 2:7; Ecclesiastes 9:5, 10; Ezekiel 18:4) Pinaagi sa paghukom sa mga kanding ngadto sa “walay kataposang kalayo,” ang Maghuhukom nagpasabot sa kalaglagan nga walay paglaom sa umaabot, nga mao usab ang permanenteng kataposan sa Yawa ug sa iyang mga demonyo. (Pinadayag 20:10, 14) Busa, ang Maghuhukom ni Jehova magpakanaog ug lahi nga mga paghukom. Iyang giingnan ang mga karnero, “Umari”; ang mga kanding, “Pahilayo gikan kanako.” Ang mga karnero magpanunod ug “walay kataposang kinabuhi.” Ang mga kanding makaagom ug “walay-kataposang pagputol.”​—Mateo 25:46.b

Unsay Kahulogan Niini Alang Kanato?

20, 21. (a) Ang mga Kristohanon adunay unsang hinungdanong buluhaton nga pagabuhaton? (b) Unsang pagbahinbahin karon ang nagakahitabo? (c) Unsa ang kahimtang sa mga tawo sa dihang ang sambingay sa mga karnero ug sa mga kanding magsugod na sa pagkatuman?

²⁰ Ang upat ka apostoles nga nakadungog sa tubag ni Jesus mahitungod sa ilhanan sa iyang presensiya ug sa konklusyon sa sistema daghan ug pagatagdon. Sila kinahanglang magpadayon sa pagtukaw ug sa pagbantay. (Mateo 24:42) Kinahanglan usab nilang himoon ang buluhatong pagwali sumala sa gihisgotan sa Marcos 13:10. Makugihong ginahimo sa mga Saksi ni Jehova kanang buluhatona karon.

²¹ Apan, unsay kahulogan niining bag-ong pagsabot sa sambingay bahin sa mga karnero ug sa mga kanding alang kanato? Buweno, ang mga tawo nagpili na kon unsay dapigan. Ang uban sa ‘luag nga dalan padulong sa kalaglagan,’ samtang ang uban naningkamot nga magpabilin sa ‘hagip-ot nga dalan padulong sa kinabuhi.’ (Mateo 7:13, 14) Apan ang panahon sa dihang ipahayag ni Jesus ang kataposang paghukom sa mga karnero ug sa mga kanding nga gilarawan sa sambingay maoy sa umaabot pa. Sa dihang ang Anak sa tawo moanhi ingong Maghuhukom, iyang tinoon nga daghang matuod nga mga Kristohanon​—sa aktuwal “usa ka dakong panon” sa dedikadong mga karnero​—ang makuwalipikar nga makalabang sa kataposang bahin “sa dakong kasakitan” ngadto sa bag-ong kalibotan. Kana nga palaaboton angay nga mahimong tuboran karon sa kalipay. (Pinadayag 7:9, 14) Sa laing bahin, ang kadaghanan gikan sa “tanang kanasoran” makapamatuod sa ilang kaugalingon nga sama sa gahig-ulong mga kanding. Sila “mobiya ngadto sa walay-kataposang pagputol.” Pagkadakong kahupayan alang sa yuta!

22, 23. Sanglit ang katumanan sa sambingay maoy sa umaabot pa, nganong ang atong buluhatong pagwali karon hinungdanon?

²² Samtang ang paghukom nga gihisgotan sa sambingay maoy sa haduol pang umaabot, bisan karon usa ka hinungdanong butang ang nagakahitabo. Kitang mga Kristohanon nagapakigbahin sa nagaluwas ug kinabuhing buluhaton sa pagmantala sa mensahe nga nagpahinabog pagkabahinbahin taliwala sa katawhan. (Mateo 10:32-39) Si Pablo nagsulat: “Kay ‘ang tanang nanagtawag sa ngalan ni Jehova mamaluwas.’ Apan, unsaon nila pagtawag kaniya kang kinsa wala sila magbutang ug pagtuo? Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali?” (Roma 10:13, 14) Ang atong pag-alagad sa katilingban nakaabot sa katawhan sa kapin sa 230 ka kayutaan nga dala ang ngalan sa Diyos ug iyang mensahe sa kaluwasan. Ang dinihogang mga igsoon ni Kristo mao gihapon ang nanguna niining buluhatona. Duolan sa lima ka milyon sa ubang karnero ang nakig-uban karon kanila. Ug ang mga tawo sa tibuok yuta nagasanong sa mensahe nga ginawali sa mga igsoon ni Jesus.

²³ Daghan ang naladlad sa atong mensahe samtang nagsangyaw kita gikan sa balay ug balay o sa dili-pormal nga paagi. Ang uban tingali nahibalo bahin sa mga Saksi ni Jehova ug sa mga butang nga atong gihawasan sa mga paagi nga wala nato masayri. Sa dihang moabot ang takna sa paghukom, hangtod sa unsang sukod pagalantawon ni Jesus ang responsibilidad sa katilingban ug pagkatakos sa pamilya? Dili kita makasulti, ug kawang nga mangagpas. (Itandi ang 1 Corinto 7:14.) Daghan karon ang nagpabungolbungol, nagbiaybiay, o nakigbahin sa direktang paglutos sa katawhan sa Diyos. Busa, kini maoy usa ka hinungdanong panahon; adunay mga tawo nga mahimong ingon niana nga pagahukman ni Jesus ingong mga kanding.​—Mateo 10:22; Juan 15:20; 16:2, 3; Roma 2:5, 6.

24. (a) Nganong hinungdanon nga paborableng mosanong ang mga indibiduwal sa atong pagsangyaw? (b) Kining maong pagtuon nakatabang kanimo sa personal sa pagbaton ug unsang tinamdan sa imong ministeryo?

²⁴ Hinunoa, makalilipay nga daghan ang paborableng nagasanong, nagtuon sa Pulong sa Diyos, ug nahimong mga Saksi ni Jehova. Ang uban nga sa pagkakaron daw samag-kanding basin mag-usab ug mahimong samag-karnero. Ang punto mao nga kadtong nagasanong ug aktibong nagasuportar sa nanghibilin sa mga igsoon ni Kristo sa ingon naghatag ug ebidensiya karon nga nagtaganag basehanan aron sila mabutang sa tuong kamot ni Jesus sa dihang, sa haduol nga umaabot, siya molingkod na sa iyang trono aron maghukom. Kini sila gipanalanginan karon ug padayon nga panalanginan. Busa, kini nga sambingay angay magdasig kanato aron mahimong mas masiboton sa buluhaton sa Kristohanong ministeryo. Sa dili pa ulahi ang tanan, buot natong buhaton ang tanan kutob sa atong mahimo sa pagwali sa maayong balita sa Gingharian ug sa maong paagi maghatag sa uban ug kahigayonan sa pagsanong. Nan depende na kang Jesus ang paghukom, pagtunglo man o pag-uyon.​—Mateo 25:46.

[Mga footnote]

Nahinumdom Ka Ba?

◻ Unsang mga kaamgiran sa Mateo 24:29-31 ug Mateo 25:31-33 ang nagpakita nga ang sambingay mahitungod sa mga karnero ug sa mga kanding aplikado sa umaabot, ug kanus-a kana?

◻ Kinsa ang “labing ubos” sa mga igsoon ni Jesus?

◻ Sa unsang paagi ang paggamit ni Jesus sa ekspresyong “mga matarong” makatabang kanato sa pag-ila kon ngadto kang kinsa kini naghawas ug kang kinsa kini wala maghawas?

◻ Bisan tuod ang sambingay matuman pa sa umaabot, nganong ang atong pagsangyaw hinungdanon kaayo karon ug dinalian?

[Kahon/Hulagway sa panid 24]

MATIKDI ANG MGA KAAMGIRAN

Mateo 24:29-31 Mateo 25:31-33

[Credit Line]

Garo Nalbandian