Nakapangutana ka na ba niana? Kon mao, wala ka mag-inusara. Ang mga tawo sa tibuok kalibotan namalandong sa dagkong mga pangutana bahin sa kinabuhi. Makaplagan kaha nimo ang mga tubag?

Minilyon ang motubag ug “Oo!” Ngano? Kay nakaplagan nila sa Bibliya ang makapatagbawng tubag sa ilang mga pangutana. Gusto ka bang mahibalo sa giingon sa Bibliya? Kon mao, tingali gusto nimong makabenepisyo sa libreng pagtuon sa Bibliya nga gitanyag sa mga Saksi ni Jehova.a

Tinuod, kon bahin sa pagtuon sa Bibliya, ang uban moingon: “Busy kaayo ko.” “Lisod kaayo nâ.” “Dili ko gustong maobligar.” Pero lahi pod ang uban. Gusto nilang makakat-on kon unsay gitudlo sa Bibliya. Tagda ang pipila ka pananglitan:

• “Nakasimba ko sa Katoliko ug Protestante, sa templo sa Sikh, ug sa monasteryo sa Budhista, ug nagtuon kog teolohiya sa unibersidad. Pero wala matubag ang daghan nakong pangutana bahin sa Diyos. Dayon gibisita kog Saksi ni Jehova. Nakadayeg ko sa iyang mga tubag nga gibase sa Bibliya maong nagpa-Bible study ko.”—Gill, England.

• “Daghan kog pangutana bahin sa kinabuhi, pero wala ko matagbaw sa tubag sa among pastor. Apan gitubag sa usa ka Saksi ni Jehova ang akong mga pangutana gamit lang ang Bibliya. Dihang gisukna ko niya kon gusto ba nakong mahibalog dugang, misugot ko.”—Koffi, Benin.

• “Gusto kong mahibalo sa kahimtang sa mga patay. Gituohan nako nga ang mga patay makahatag ug kadaot sa mga buhi, pero gusto kong mahibalo sa giingon sa Bibliya. Busa nagtuon kog Bibliya uban sa akong amigo nga Saksi.”—José, Brazil.

• “Gibasa nako ang Bibliya pero wala ko kasabot. Dayon giduaw ko sa mga Saksi ni Jehova, ug tin-aw nilang gipasabot ang pipila ka tagna sa Bibliya. Gusto kong makakat-on pag dugang.”—Dennize, Mexico.

• “Nagduhaduha ko kon may pagtagad ba gyod ang Diyos kanako. Busa miampo ko sa Diyos nga gihisgotan sa Bibliya. Pagkaugma, ang mga Saksi nanuktok sa akong pultahan, ug midawat kog pagtuon sa Bibliya.”—Anju, Nepal.

Ang maong mga kasinatian magpahinumdom kanato sa mga pulong ni Jesus: “Malipayon kadtong mahunahunaon sa ilang espirituwal nga panginahanglan.” (Mateo 5:3) Oo, natural sa tawo nga dunay espirituwal nga panginahanglan. Ang Diyos lang ang makatagana niana, ug gihatag niya kana pinaagi sa iyang Pulong, ang Bibliya.

Busa, unsaon paghimo ang Bible study? Sa unsang paagi kini makatabang nimo? Tubagon kini sa mosunod nga mga artikulo.

Ang mga Saksi ni Jehova ilado sa ilang pagsangyaw sa publiko. Pero nahibalo ka ba nga duna sab miy tibuok kalibotang programa sa pagtuon sa Bibliya?

Sa 2014, kapig 8,000,000 ka Saksi sa 240 ka kayutaan ang nagdumalag mga 9,500,000 ka Bible study matag bulan.a Gani, mas daghan pa ang nagtuon sa Bibliya uban namo kay sa matag populasyon sa mga 140 ka nasod!

Aron molampos kini nga buluhatong pagpanudlo, ang mga Saksi ni Jehova nag-imprenta matag tuig ug halos usa ug tunga ka bilyong Bibliya, libro, magasin, ug uban pang giya sa pagtuon sa Bibliya—sa mga 700 ka pinulongan! Tungod niining dili matupngan nga pag-imprenta, ang mga tawo makatuon sa Bibliya sa ilang gustong pinulongan.

TUBAG SA KOMON NGA MGA PANGUTANA BAHIN SA AMONG PROGRAMA SA PAGTUON SA BIBLIYA

Sa unsang paagi ginahimo ang pagtuon?

Magpili mig lainlaing topiko sa Bibliya ug susihon ang mga teksto bahin niana. Pananglitan, gitubag sa Bibliya ang mga pangutana sama sa: Kinsa ang Diyos? Makita ba siya? Duna ba siyay ngalan? Asa siya nagpuyo? Puwede ba tang makigsuod niya? Hagit kon asa pangitaon sa Bibliya ang mga tubag.

Aron tabangan ang mga tawo nga makita ang tubag, gigamit namo ang 224 ka panid nga librong Unsay Tinuod nga Gitudlo sa Bibliya?b Kini gidisenyo aron masabtan sa mga tawo ang pangunang mga pagtulon-an sa Bibliya. Lakip niini ang mga topiko bahin sa Diyos, kang Jesu-Kristo, pag-antos sa tawo, pagkabanhaw, pag-ampo, ug uban pa.

Kanus-a ug asa himoon ang pagtuon?

Ang pagtuon puwedeng himoon sa oras ug dapit nga gusto nimo.

Unsa ka dugay ang sesyon sa matag pagtuon?

Daghan ang maggahin ug usa ka oras o kapin pa matag semana sa pagtuon sa Bibliya. Pero ang gitas-on sa matag pagtuon puwedeng usbon. Sundon namo ang imong eskedyul. Ang uban magtuon sulod lang sa 10 o 15 minutos matag semana.

Pilay bayad sa pagtuon?

Libre ang pagtuon ug ang mga publikasyon nga tun-an. Nahiuyon kini sa instruksiyon ni Jesus sa iyang mga tinun-an: “Nadawat ninyo nga walay bayad, ihatag nga walay bayad.”—Mateo 10:8.

Unsa ka dugay ang tibuok programa sa pagtuon?

Ikay mag-igo kon unsa ka dugay ka magtuon. Ang librong Unsay Tinuod nga Gitudlo sa Bibliya? dunay 19 ka kapitulo. Makapili kag topiko o kaha tun-an nimo ang tanang topiko sa gipaspason nga gusto nimo.

Kinahanglan ba kong mag-Saksi ni Jehova?

Dili. Gitahod namo ang katungod sa matag indibiduwal sa pagpili kon unsay iyang tuohan. Pero, ang mga tawo nga nakakat-on sa pangunang kahibalo bahin sa Bibliya makahimog maalamong desisyon.

Asa ko makakuhag dugang impormasyon?

Ang Web site nga jw.org dunay tukmang impormasyon bahin sa mga pagtulon-an ug buluhaton sa mga Saksi ni Jehova.

Unsaon nako paghangyog pagtuon sa Bibliya?

• 

  Pagpadalag request sa www.jw.org/ceb.

• Pagsulat sa kinaduolang adres nga nalista sa panid dos niini nga magasin.

• Kontaka ang mga Saksi ni Jehova sa inyong lugar.