Gipakita sa gipangsulti nila Samuel, Teresa, ug Magdalene nga lainlain ang rason kon nganong mag-ampo ang mga tawo. Ang ubang rason mas dungganon kon itandi sa uban. May pag-ampo nga sinsero ug duna poy taphaw lang. Bisan pa niana, minilyon ang mibati nga kinahanglan gyong moampo, himoon man kana aron mopasar sa eksaminasyon sa eskuylahan, modaog ang ilang paboritong team sa dula, giyahan sa Diyos ang ilang pamilya, o sa lain pang rason. Gani, gipakita sa mga surbi nga bisan kadtong walay relihiyon regular nga mag-ampo.

Mag-ampo ka ba? Kon mao, unsay imong giampo? Kanunay man kang mag-ampo o dili, lagmit makapangutana ka: ‘May kaayohan ba gyod ang pag-ampo? May mamati ba niini?’ Usa ka magsusulat miingon nga ang pag-ampo usa lang ka “paagi aron maulian sa gibati . . . samag pagpakig-estorya sa imong binuhing isda.” Ingon ana sab ang panglantaw sa ubang eksperto sa medisina. Gitawag nila ang pag-ampo nga “alternatibong paagi sa pagtambal.” Ang uban ba nag-ampo kay mao niy ilang naandan, o moampo aron maulian sa ilang gibati?

Sa kasukwahi, gipakita sa Bibliya nga ang pag-ampo dili lang makapaalibyo sa gibati. Gisultihan ta niini nga duna gyoy mamati sa mga pag-ampo kon kini himoon sa hustong paagi ug kon mangayo tag mga butang nga dalawaton. Tinuod ba kini? Tan-awon nato ang ebidensiya.

Gibati sa uban nga usik lang sa panahon ang pag-ampo ug walay mamati niini. Ang uban nag-ampo pero para nila, wala sila tubaga. Gihanduraw sa usa ka ateyista kon unsay hitsura sa Diyos ug dayon miampo: “Padungga ko bisag hunghong lang.” Apan siya miingon nga ang Diyos “nagpakahilom.”

Pero, gipasaligan ta sa Bibliya nga duna gyoy Diyos ug mamati siya sa mga pag-ampo. Nasulat sa Bibliya kini nga pamulong alang sa usa ka katawhan kaniadto: “Siya [ang Diyos] sa walay pakyas magpakitag pabor kanimo sa tingog sa imong pagtuaw; inigkadungog gayod niya niini siya sa tinuod motubag kanimo.” (Isaias 30:19) Matod sab sa lain pang teksto: “Ang pag-ampo sa mga matul-id makapahimuot kaniya.”—Proverbio 15:8.

Mabasa sab sa Bibliya ang mga pag-ampo nga gidungog. Usa ka teksto naghisgot nga si Jesus naghimog “mga pangaliya . . . ngadto sa Usa nga arang makaluwas kaniya” ug “gidungog siya nga may pag-uyon.” (Hebreohanon 5:7) Ang ubang pananglitan anaa sa Daniel 9:21 ug 2 Cronicas 7:1.

Apan nganong gibati sa uban nga wala tubaga ang ilang pag-ampo? Aron dunggon, kinahanglang moampo lang ta kang Jehova,a ang Diyos sa Bibliya, ug dili sa bisan unsang diyos o sa mga katigulangan. Gusto sab sa Diyos nga kita ‘mangayo sumala sa iyang kabubut-on’—sa mga butang nga iyang giuyonan. Kon kana ang atong paagi sa pag-ampo, gipasaligan ta sa Diyos nga “siya magpatalinghog kanato.” (1 Juan 5:14) Busa, aron dunggon ang atong mga pag-ampo, kinahanglang makaila ta sa Diyos sa Bibliya ug mahibalo sa iyang kabubut-on.

Gituohan sa daghan nga ang pag-ampo dili lang kay kalihokan sa pagsimba, kondili ang Diyos maminaw gyod ug motubag sa mga pag-ampo. Si Isaac nga taga-Kenya miingon: “Miampo ko nga tabangan kong masabtan ang Bibliya. Sa wa madugay, dihay miduol nako ug gitanyagan ko sa tabang nga akong gikinahanglan.” Gusto ni Hilda, nga taga-Pilipinas, nga moundang ug panigarilyo. Kay kadaghan na siya mapakyas, misugyot ang iyang bana, “Unsa kahag moampo ka sa Diyos para sa tabang?” Gisunod niya ang tambag ug miingon: “Dili ko makatuo sa paagi sa Iyang pagtabang nako. Kalit nga nawad-an kog gana nga manigarilyo. Nakaundang ra gyod ko.”

Gusto kaha sa Diyos nga tabangan ka sa imong mga panginahanglan nga uyon sa iyang kabubut-on?

Gusto sa Diyos nga makighigala kanato.

Ang managhigala mag-estoryahanay aron mahimong suod. Sa susama, gidapit ta sa Diyos nga makig-estorya kaniya aron masuod ta niya. Siya nag-ingon: “Kamo motawag gayod kanako ug moanhi ug moampo kanako, ug ako mamati kaninyo.” (Jeremias 29:12) Samtang makig-estorya ka sa Diyos, masuod ka kaniya, ug siya makigsuod nimo. (Santiago 4:8) Gipasaligan ta sa Bibliya: “Si Jehova haduol kanilang tanan nga nagatawag kaniya.” (Salmo 145:18) Kon kanunay tang mag-ampo, mas molig-on ang atong relasyon sa Diyos.

Gusto kang tabangan sa Diyos.

Si Jesus miingon: “Kinsang tawhana taliwala kaninyo nga pangayoan ug tinapay sa iyang anak—dili siya motunol kaniyag bato, dili ba? O, kaha, mangayo siyag isda—dili siya motunol kaniyag halas, dili ba? Busa, kon kamo . . . mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan nga anaa sa mga langit mohatag ug maayong mga butang niadtong nagapangayo kaniya!” (Mateo 7:9-11) Oo, gidapit ka sa Diyos nga moampo kay “siya may kahingawa” kanimo ug gusto ka niyang tabangan. (1 Pedro 5:7) Iya pa gani kang gidapit nga mosulti kaniya sa imong mga problema. Giingnan ta sa Bibliya: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.”—Filipos 4:6.

Kita may espirituwal nga panginahanglan.

Sumala sa mga eksperto sa kinaiyahan sa tawo, gibati sa minilyon nga kinahanglan tang mag-ampo. Lakip sa maong gidaghanon ang ubang ateyista ug agnostiko.a Gipakita niini nga ang tawo gilalang nga may espirituwal nga panginahanglan. Si Jesus miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang usa ka paagi aron matagan-an kana mao ang regular nga pagpakig-estorya sa Diyos.

Kon dawaton nato ang pagdapit sa Diyos nga moampo kaniya, unsa may atong mga benepisyo?

Sa dili pa ka mohimog bisan unsa, moingon gyod tingali ka, ‘Makabenepisyo ba ko niini?’ Apan, kon mangutana ka niana bahin sa pag-ampo, nagpasabot ba nga kaugalingon ray imong gihunahuna? Wala. Natural lang nga buot natong masayod kon duna ba kanay kaayohan. Bisan ang matarong nga tawong si Job nangutana: “Kon ako motawag kaniya, motubag ba siya kanako?”—Job 9:16.

Sa nag-unang mga artikulo, atong nakita nga ang pag-ampo mas labaw pa kay sa relihiyosong rutina o paagi nga maulian sa gibati. Maminaw gyod sa pag-ampo ang matuod nga Diyos. Siya magpatalinghog kon mag-ampo ta sa hustong paagi ug alang sa hustong mga butang. Gani, iya tang giawhag nga moduol kaniya. (Santiago 4:8) Busa, unsay atong dahomon kon himoon natong bahin sa atong kinabuhi ang pag-ampo? Kini ang pipila sa mga kaayohan.

Kalinaw sa hunahuna.

Kon dunay mga problema ug hagit sa kinabuhi, bation ba nimo ang tumang kabalaka? Nan, gidasig ta sa Bibliya sa “pag-ampo nga walay-hunong” ug ipahibalo ‘sa Diyos ang atong mga pangaliya.’ (1 Tesalonica 5:17; Filipos 4:6) Gipasaligan ta sa Bibliya nga kon moampo ta sa Diyos, “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip.” (Filipos 4:7) Mobati tag kalinaw kon isulti nato sa atong langitnong Amahan ang atong mga kabalaka. Gani, kini ang iyang pagdasig sa Salmo 55:22, “Itugyan ang imong palas-anon kang Jehova, ug siya magasapnay kanimo.”

Sa tibuok kalibotan, daghan ang nakasinati niini nga kalinaw. Si Hee Ran, taga-South Korea, miingon: “Bisag dagko kog problema, daw mahuwasan ko ug mobating makalahutay dihang mag-ampo ko.” Matod ni Cecilia nga taga-Pilipinas: “Kay inahan man ko, kanunay kong mabalaka sa akong mga anak nga babaye ug sa akong mama nga di na makaila nako. Pero tungod sa pag-ampo, padayon kong nagkinabuhi nga wa na kaayoy kabalaka. Nahibalo kong tabangan ko ni Jehova aron maatiman sila.”

Kahupayan ug kusog dihang may pagsulay.

Naluya ka ba pag-ayo, ug naguol sa usa ka panghitabo o hulga sa kinabuhi? Mahuwasan ka sa gibati kon moampo ka sa “Diyos sa tanang paghupay.” Ang Bibliya nag-ingon nga siya ‘nagahupay kanato sa tanan natong kasakitan.’ (2 Corinto 1:3, 4) Pananglitan, dihang si Jesus naguol pag-ayo, siya “miluhod ug nag-ampo.” Ang resulta? “Usa ka manulonda gikan sa langit nagpakita kaniya ug nagpalig-on kaniya.” (Lucas 22:41, 43) Si Nehemias, nga matinumanon usab, gihulga sa daotang mga tawo nga naningkamot nga pahunongon siya sa pagbuhat sa buluhaton sa Diyos. Siya miampo: “Karon lig-ona ang akong mga kamot.” Gipakita sa misunod nga panghitabo nga gitabangan gyod siya sa Diyos nga mabuntog ang iyang kahadlok ug molampos sa iyang buluhaton. (Nehemias 6:9-16) Gihubit ni Reginald nga taga-Ghana ang iyang kasinatian sa pag-ampo: “Dihang mag-ampo ko, ilabina kon naa sa tumang kalisod, bation nako nga duna koy gisultihan sa akong problema kinsa makatabang nako ug mopasalig nako nga wa koy angayng kabalak-an.” Oo, ang Diyos makahupay nato kon moampo ta kaniya.

Kaalam nga gikan sa Diyos.

Duna tay mga desisyon nga makaapektar nato ug sa atong mga minahal hangtod sa hangtod. Unsaon nato paghimog maalamong desisyon? Ang Bibliya nag-ingon: “Kon aduna man kaninyoy nakulangan ug kaalam [ilabina sa pagsagubang sa pagsulay], magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Santiago 1:5) Kon mag-ampo ta alang sa kaalam, puwedeng gamiton sa Diyos ang iyang balaang espiritu aron giyahan ta sa paghimog maalamong desisyon. Gani, espesipiko tang makapangayog balaang espiritu kay gipasaligan ta ni Jesus nga ang “Amahan sa langit mohatag ug balaang espiritu niadtong nagapangayo kaniya!”—Lucas 11:13.

Bisan si Jesus mibati nga kinahanglang mangayog tabang sa iyang Amahan kon mohimog importanteng mga desisyon. Gibutyag sa Bibliya nga dihang mopili na siyag 12 ka lalaki nga himoon niyang mga apostoles, “siya nagpadayon sa tibuok gabii sa pag-ampo ngadto sa Diyos.”—Lucas 6:12.

Sama kang Jesus, daghan karon ang nadasig dihang sila nagiyahan sa paghimog maalamong mga desisyon human sila mangayog tabang sa Diyos. Matod ni Regina nga taga-Pilipinas, lainlain siyag problema human mamatay ang iyang bana—nagtrabaho siya para sa kaugalingon ug sa pamilya, nawad-ag trabaho, ug naglisod sa pagpadakog mga anak. Unsay nakatabang niya nga mohimog maayong mga desisyon? Siya miingon, “Ako misalig kang Jehova pinaagi sa pag-ampo.” Giasoy ni Kwabena nga taga-Ghana kon nganong nangayo siyag tabang sa Diyos, “Nawad-an kog trabaho sa konstruksiyon nga maayo untag suweldo.” Dihang nagtimbangtimbang kon unsay himoon, siya miingon, “Kanunay kong nag-ampo kang Jehova alang sa giya aron makadesidir kon unsay maayo.” Miingon pod siya, “Gibati gyod nakong gitabangan ko ni Jehova nga mopilig karera nga makatagana sa akong espirituwal ug pisikal nga mga panginahanglan.” Tabangan sab ka sa Diyos kon imong iampo ang bisan unsa nga makaapektar sa imong relasyon kaniya.

Nahisgotan nato ang pipila lang ka kaayohan sa pag-ampo. (Alang sa dugang pananglitan, tan-awa ang kahong “Mga Kaayohan sa Pag-ampo.”) Apan kinahanglan una nimong ilhon ang Diyos ug ang iyang kabubut-on aron makabenepisyo niini. Kon kana ang imong gusto, gidasig ka namo nga hangyoon ang mga Saksi ni Jehova nga tabangan kang magtuon sa Bibliya.a Kini ang unang lakang aron mas masuod ka sa “Tigpatalinghog sa pag-ampo.”—Salmo 65:2.