Ang Pagkahimong Born Again—Ang Dalan sa Kaluwasan?

UNSAY imong tubag sa pangutanang, “Born again ka?” Daghang Kristiyano sa tibuok kalibotan moingong, “Oo!” Sila nagtuo nga ang pagkahimong born again maoy ilhanan sa matuod nga mga Kristohanon ug ang bugtong dalan sa kaluwasan. Ang ilang opinyon kaamgid nianang sa mga lider sa relihiyon sama sa teologong si Robert C. Sproul, kinsa misulat: “Kon ang usa ka tawo dili born again, . . . siya dili Kristiyano.”

Ikaw ba nagtuo usab nga ang pagkahimong born again makaluwas kanimo? Kon mao, seguradong gusto nimong tabangan ang imong mga paryente ug mga higala nga mahimong born again aron sila maluwas usab. Apan kinahanglang masabtan una nila kon unsay ipasabot sa pagkahimong born again. Unsaon man nimo kana pagpatin-aw kanila?

Daghan ang nagtuo nga ang ekspresyong born again nagtumong sa tawong kinasingkasing nga nanaad sa pag-alagad sa Diyos ug kang Kristo ug tungod niana, siya nakabaton nag maayong relasyon sa Diyos.

Mao ba kaha kini ang gitudlo sa Bibliya? Gusto ka bang mahibalo kon unsa gayoy gitudlo sa Pulong sa Diyos bahin sa pagkahimong born again? Ang pagsusi niini makatabang gayod kanimo. Ngano man? Kay ang tukmang pagsabot niini makaapektar sa imong kinabuhi ug sa imong umaabot.

Unsay Gitudlo sa Bibliya?

Sa Bibliya, ang ekspresyong “ipanganak pag-usab” o born again makita lamang diha sa Juan 3:1-12. Ang maong teksto naghubit sa makaiikag nga pag-estoryahanay ni Jesus ug sa usa ka relihiyosong lider sa Jerusalem. Kana nga asoy sa Bibliya bug-os nga gikutlo diha sa sunod nga panid. Palihog basaha kini pag-ayo.

Sa maong asoy, gipasiugda ni Jesus ang daghang punto bahin sa ‘pagkahimugso pag-usab.’a Gani, ang gihisgotan ni Jesus makatabang kanato sa pagtubag niining lima ka hinungdanong pangutana:

◼ Unsa ka hinungdanon ang pagkahimong born again?

◼ Kita ba ang modesisyon aron mahimong born again?

◼ Unsay katuyoan niini?

◼ Sa unsang paagi mahimong born again?

◼ Unsang kausaban sa kahimtang ang ipahinabo niini?

Usa-usahon nato pagtubag kining mga pangutanaha.

[Footnote]

[Kahon/Hulagway sa panid 4]

“Kamo Kinahanglang Ipanganak Pag-usab”

“Karon dihay tawo nga usa sa mga Pariseo, Nicodemo ang iyang ngalan, usa ka magmamando sa mga Hudiyo. Kini siya miadto kaniya sa kagabhion ug miingon kaniya: ‘Rabbi, nahibalo kami nga ikaw ingon nga magtutudlo maoy gikan sa Diyos; kay walay makahimo niining mga ilhanan nga imong ginahimo gawas kon ang Diyos magauban kaniya.’ Sa pagtubag si Jesus miingon kaniya: ‘Sa pagkatinuod gayod ako magaingon kanimo, Gawas kon ang usa ipanganak pag-usab, dili siya makakita sa gingharian sa Diyos.’ Si Nicodemo miingon kaniya: ‘Sa unsang paagi ipanganak ang usa ka tawo sa dihang tigulang na siya? Siya dili makasulod sa tagoangkan sa iyang inahan sa ikaduhang higayon ug ipanganak, dili ba?’ Si Jesus mitubag: ‘Sa pagkatinuod gayod ako magaingon kanimo, Gawas kon ang usa ipanganak gikan sa tubig ug sa espiritu, siya dili makasulod sa gingharian sa Diyos. Ang gipanganak gikan sa unod maoy unod, ug ang gipanganak gikan sa espiritu maoy espiritu. Ayaw kahibulong tungod kay gisulti ko kanimo, Kamo kinahanglang ipanganak pag-usab. Ang hangin mohuros bisan asa nga buot niini, ug madungog mo ang tingog niini, apan wala ka mahibalo kon diin kini gikan ug asa kini padulong. Mao man usab ang matag usa nga gipanganak gikan sa espiritu.’ Sa pagtubag si Nicodemo miingon kaniya: ‘Unsaon man pagkahitabo niining mga butanga?’ Sa pagtubag si Jesus miingon kaniya: ‘Usa ba ikaw ka magtutudlo sa Israel apan wala mahibalo niining mga butanga? Sa pagkatinuod gayod ako magaingon kanimo, Kami nagsulti sa among nahibaloan ug kami nagpamatuod sa among nakita, apan wala ninyo dawata ang among pamatuod. Kon nagsulti ako kaninyog yutan-ong mga butang apan dili kamo motuo, unsaon man ninyo pagtuo kon isulti ko kaninyo ang langitnong mga butang?’”—Juan 3:1-12.

Ang Pagkahimong Born Again—Unsa ka Hinungdanon?

SA DIHANG si Jesus nakig-estorya kang Nicodemo, iyang gipasiugda nga hinungdanon kaayo ang pagkahimong born again. Sa unsang paagi?

Matikdi ang iyang giingon: “Gawas kon ang usa ipanganak pag-usab, dili siya makakita sa gingharian sa Diyos.” (Juan 3:3) Ang mga pulong “gawas” ug “dili” nagpasiugda sa kahinungdanon sa pagkahimong born again. Aniay ilustrasyon: Kon dunay moingon, “Dili gayod mohayag, gawas kon mosidlak ang adlaw,” ang iyang ipasabot mao nga gikinahanglan gayod ang sidlak sa adlaw aron mohayag. Sa samang paagi, si Jesus miingon nga gikinahanglan gayod ang pagkahimong born again aron “makakita sa gingharian sa Diyos.”

Dayon, aron mawala ang bisan unsang pagduhaduha, si Jesus miingon: “Kamo kinahanglang ipanganak pag-usab.” (Juan 3:7) Busa, sumala kang Jesus, gikinahanglan ang pagkahimong born again aron “makasulod sa gingharian sa Diyos.”—Juan 3:5.

Kay hinungdanon kaayo kang Jesus ang pagkahimong born again, angayng paneguroon sa mga Kristohanon nga tukma ang ilang pagsabot niini. Pananglitan, makabuot kaha ang usa ka Kristohanon nga mahimo siyang born again?

[Blurb sa panid 5]

“Dili gayod mohayag, gawas kon mosidlak ang adlaw”

Ang Pagkahimong Born Again—Ikaw ba ang Modesisyon?

KINSAY magbuot nga mahimong born again ang usa ka tawo? Sa dihang awhagon sa ubang mga ministro ang mga tawo nga mahimong born again, ilang kutloon ang giingon ni Jesus: “Kamo kinahanglang ipanganak pag-usab.” (Juan 3:7) Mora bag ang maong mga ministro nagsugo, “Kamo kinahanglan nga mahimong born again!” Busa sila nagtudlo nga nagdepende sa matag usa ang pagtuman kang Jesus ug paghimo sa gikinahanglang mga lakang aron mahimong born again. Ilang gipasabot nga ikaw ang modesisyon nga mahimong born again. Apan kana ba nga pagtuo uyon sa giingon ni Jesus kang Nicodemo?

Kon atong sabton ug maayo ang giingon ni Jesus, atong masayran nga siya wala magtudlo nga ang tawo maoy magbuot nga mahimong born again. Ngano man? Ang Gregong ekspresyon nga gihubad nga “ipanganak pag-usab” o born again mahimo usab nga hubaron nga “kinahanglang ipanganak gikan sa itaas.”a Busa, ang pagkahimong born again ‘naggikan sa itaas,’ nga sa ato pa “gikan sa langit,” o “gikan sa Amahan.” (Juan 19:11; Santiago 1:17) Oo, ang Diyos gayod maoy magbuot.—1 Juan 3:9.

Base sa ekspresyon nga “gikan sa itaas,” atong masabtan kon nganong ang matag indibiduwal dili makabuot nga siya mahimong born again. Tagda pananglitan ang imong pagkahimugso. Ikaw bay nagbuot nga mahimugso ka? Siyempre dili! Natawo ka tungod sa imong amahan. Sa samang paagi, mahimo lamang kitang born again kon kini ipahinabo sa Diyos, nga atong langitnong Amahan. (Juan 1:13) Busa, si apostol Pedro miingon: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy kita iyang gipahimugso pag-usab.”—1 Pedro 1:3.

Kini ba Usa ka Sugo?

Ang uban tingali mangutana, ‘Kon ang tawo dili makabuot nga siya mahimong born again, nganong nagsugo man si Jesus: “Kamo kinahanglang ipanganak pag-usab”?’ Haom kining pangutanaha. Kay kon ang gisulti ni Jesus usa pa ka sugo, siya daw nagpahimo kanato ug usa ka butang nga dili nato mahimo. Dili kana makataronganon. Nan, unsaon man nato pagsabot ang iyang mga pulong nga ikaw kinahanglang “ipanganak pag-usab”?

Ang pagsusi nianang mga pulonga diha sa orihinal nga pinulongan nagpakita nga kini dili usa ka sugo. Hinunoa, kini nagpahayag lamang ug impormasyon. Sa ato pa, sa dihang si Jesus miingon nga ikaw kinahanglang “ipanganak pag-usab,” siya wala magsugo kondili naghatag lamang ug impormasyon. Siya miingon: “Kinahanglan nga kamo ipanganak gikan sa itaas.”—Juan 3:7, Modern Young’s Literal Translation.

Sa pag-ilustrar, tagda kini nga pananglitan, dunay usa ka siyudad nga daghag eskuylahan. Ang usa niini maoy alang sa nitibong mga estudyante nga nagpuyo layo nianang siyudara. Usa ka adlaw niana, may batan-ong lalaki nga dili nitibo nga miingon sa prinsipal nianang eskuylahana, “Gusto kong magpaenrol.” Giingnan siya sa prinsipal, “Kinahanglang nitibo ka aron maenrol ka.” Siyempre, ang prinsipal wala magsugo kaniya nga mahimo siyang nitibo kondili ang iyang ipasabot mao nga mga nitibo lang ang puwedeng magpaenrol. Igo rang gisulti sa prinsipal kon unsay gikinahanglan aron makapaenrol sa eskuylahan. Sa samang paagi, sa dihang si Jesus miingon: “Kamo kinahanglang ipanganak pag-usab,” siya igo rang nagsulti kon unsay gikinahanglan aron ang usa “makasulod sa gingharian sa Diyos.”

Ang maong Gingharian sa Diyos dunay kalabotan sa lain pang bahin sa pagkahimong born again. Tubagon sa sunod nga artikulo ang pangutanang, Unsay katuyoan sa pagkahimong born again? Ang tubag niana maoy yawi sa tukmang pagsabot sa pagkahimong born again.

[Footnote]

[Hulagway sa panid 6]

Sa unsang paagi ang pagkahimong born again nahisama sa pagkahimugso sa usa ka tawo?

Ang Pagkahimong Born Again—Unsay Katuyoan Niini?

DAGHAN ang nagtuo nga ang usa kinahanglang mahimong born again aron maluwas. Apan, tagda ang giingon ni Jesus bahin sa katuyoan sa pagkahimong born again. Siya miingon: “Gawas kon ang usa ipanganak pag-usab, dili siya makakita sa gingharian sa Diyos.” (Juan 3:3) Busa, ang usa kinahanglang mahimong born again aron makasulod sa Gingharian sa Diyos, dili aron maluwas. Apan tingali moingon ang uban, ‘Dili ba managsama ra ang kahulogan niining duha ka ekspresyon—pagsulod sa Gingharian ug kaluwasan?’ Dili. Aron masabtan ang kalainan, atong hisgotan ang kahulogan sa ekspresyong “gingharian sa Diyos.”

Ang gingharian maoy usa ka matang sa gobyerno. Busa ang ekspresyong “gingharian sa Diyos” nagkahulogang “gobyerno sa Diyos.” Ang Bibliya nagtudlo nga si Jesu-Kristo, ang “anak sa tawo,” mao ang Hari sa Gingharian sa Diyos ug nga siya may kaubang mga magmamando. (Daniel 7:1, 13, 14; Mateo 26:63, 64) Dugang pa, ang panan-awon nga nakita ni apostol Juan nagpadayag nga ang kaubang mga magmamando ni Kristo gipili “gikan sa matag tribo ug pinulongan ug katawhan ug nasod” ug sila “magamando ingong mga hari ibabaw sa yuta.” (Pinadayag 5:9, 10; 20:6) Ang Pulong sa Diyos nagpadayag usab nga kadtong magmando ingong mga hari maoy “gamayng panon” nga gilangkoban sa 144,000 ka indibiduwal “nga gipalit gikan sa yuta.”—Lucas 12:32; Pinadayag 14:1, 3.

Asa natukod ang Gingharian sa Diyos? “Ang gingharian sa Diyos” gitawag usab ug “gingharian sa mga langit.” Kini nagpakita nga si Jesus ug ang iyang kaubang mga hari magmando gikan sa langit. (Lucas 8:10; Mateo 13:11) Busa, ang Gingharian sa Diyos maoy usa ka langitnong kagamhanan nga gimandoan ni Jesu-Kristo ug sa iyang mga isigkamagmamando nga gikuha gikan sa yuta.

Nan, unsay gipasabot sa giingon ni Jesus nga ang usa kinahanglang mahimong born again aron “makasulod sa gingharian sa Diyos”? Ang iyang gipasabot mao nga gikinahanglan kini aron ang usa mahimong magmamando kauban ni Kristo sa langit. Sa ato pa, ang katuyoan sa pagkahimong born again maoy pag-andam sa usa ka gamayng grupo sa mga tawo aron magmando sa langit.

Busa atong nasabtan nga hinungdanon kaayo ang pagkahimong born again, nga kini ipahinabo sa Diyos, ug kini nag-andam sa usa ka grupo sa mga tawo aron magmando sa langit. Apan sa unsang paagi mahitabo ang pagkahimong born again?

[Blurb sa panid 7]

Ang katuyoan sa pagkahimong born again maoy pag-andam sa usa ka gamayng grupo sa mga tawo aron magmando sa langit

[Hulagway sa panid 7]

Si Jesu-Kristo ug ang usa ka grupo sa iyang mga isigkamagmamando nga gikuha gikan sa yuta maoy naglangkob sa Gingharian sa Diyos

Ang Pagkahimong Born Again—Sa Unsang Paagi Kini Mahitabo?

SA DIHANG si Jesus nakigsulti kang Nicodemo, siya wala lamang maghisgot sa kahinungdanon sa pagkahimong born again, sa katuyoan niini, ug kon kinsay magpahinabo niini, kondili kon sa unsang paagi usab kini mahitabo. Si Jesus miingon: “Gawas kon ang usa ipanganak gikan sa tubig ug sa espiritu, siya dili makasulod sa gingharian sa Diyos.” (Juan 3:5) Busa ang usa ka tawo mahimong born again pinaagi sa tubig ug sa espiritu. Apan unsay ipasabot sa ekspresyong ‘tubig ug espiritu’?

‘Tubig ug Espiritu’—Unsay Ipasabot Niini?

Kay batid man si Nicodemo sa relihiyon sa mga Hudiyo, way duhaduha nga siya pamilyar sa paagi sa paggamit sa Hebreohanong Kasulatan sa terminong “espiritu sa Diyos”—ang aktibong puwersa sa Diyos, nga makatabang sa mga tawo sa paghimog talagsaong mga buhat. (Genesis 41:38; Exodo 31:3; 1 Samuel 10:6) Busa, sa dihang gigamit ni Jesus ang pulong nga “espiritu,” lagmit nasabtan ni Nicodemo nga kini nagtumong sa balaang espiritu, ang aktibong puwersa sa Diyos.

Unsay ipasabot ni Jesus sa dihang siya naghisgot bahin sa tubig? Tagda ang mga panghitabo nga narekord sa wala pa ug pagkatapos sa panag-estorya ni Jesus ug Nicodemo. Atong mabasa nga si Juan Bawtista ug ang mga tinun-an ni Jesus nagbawtismo sa mga tawo diha sa tubig. (Juan 1:19, 31; 3:22; 4:1-3) Kini nabaniog sa tibuok Jerusalem. Busa, sa dihang si Jesus naghisgot bahin sa tubig, nasabtan ni Nicodemo nga bawtismo sa tubig ang gitumong ni Jesus.

Bawtismo “sa Balaang Espiritu”

Kon ang ekspresyong “ipanganak gikan sa tubig” nagtumong sa bawtismo sa tubig, unsay ipasabot sa ekspresyong “ipanganak gikan . . . sa espiritu”? Sa wala pa makig-estorya si Nicodemo kang Jesus, si Juan Bawtista miingon nga ang bawtismo dili lamang himoon pinaagi sa tubig kondili pinaagi usab sa espiritu. Siya miingon: “Ako nagbawtismo kaninyo sa tubig, apan siya [si Jesus] magbawtismo kaninyo sa balaang espiritu.” (Marcos 1:7, 8) Si Marcos, nga magsusulat sa Ebanghelyo, naghisgot sa unang bawtismo nga nahitabo. Siya misulat: “Sa paglakat niadtong mga adlawa miabot si Jesus gikan sa Nasaret sa Galilea ug gibawtismohan ni Juan sa Jordan. Ug dihadiha sa paghaw-as niya gikan sa tubig nakita niya ang mga langit nga nabahin, ug, ingon sa usa ka salampati, ang espiritu mikunsad diha kaniya.” (Marcos 1:9, 10) Si Jesus gibawtismohan sa tubig sa dihang siya gituslob sa suba sa Jordan. Dayon, siya gibawtismohan sa balaang espiritu sa dihang mikunsad kaniya ang espiritu gikan sa langit.

Mga tulo ka tuig human sa bawtismo ni Jesus, iyang gisaaran ang iyang mga tinun-an: “Kamo pagabawtismohan sa balaang espiritu pipila ka adlaw human niini.” (Buhat 1:5) Kanus-a kana nahitabo?

Sa adlaw sa Pentekostes sa tuig 33 C.E., mga 120 ka tinun-an ni Jesus ang nagtapok diha sa usa ka balay sa Jerusalem. “Sa kalit may nahitabong kabanha gikan sa langit sama gayod nianang nagahuros nga makusog nga hangin, ug kini mipuno sa tibuok nga balay diin sila nanglingkod. Ug ang mga dila nga maorag kalayo mipakita kanila . . . , ug silang tanan napuno sa balaang espiritu.” (Buhat 2:1-4) Nianang adlawa, ang ubang mga tawo sa Jerusalem giawhag sa pagpabawtismo sa tubig. Gisultihan ni apostol Pedro ang mga tawo: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” Unsay ilang reaksiyon? “Kadtong kinasingkasing nga misagop sa iyang pulong nabawtismohan, ug nianang adlawa mga tulo ka libong kalag ang nadugang.”—Buhat 2:38, 41.

Duha ka Paagi sa Bawtismo

Unsay gipadayag niining maong mga bawtismo bahin sa pagkahimong born again? Kini nagpakita nga dunay duha ka paagi sa bawtismo aron mahimong born again. Matikdi nga si Jesus unang gibawtismohan sa tubig. Dayon siya gikunsaran sa balaang espiritu. Sa susama, ang mga tinun-an unang gibawtismohan sa tubig (si Juan Bawtista maoy nagbawtismo sa uban), ug dayon gikunsaran sila sa balaang espiritu. (Juan 1:26-36) Ang 3,000 ka bag-ong mga tinun-an unang gibawtismohan usab sa tubig, ug dayon sila gikunsaran sa balaang espiritu.

Busa sa unsang paagi ang usa karon mahimong born again? Sa samang paagi sa pagkahimong born again sa mga apostoles ug mga tinun-an ni Jesus niadtong Pentekostes 33 C.E. Una, ang usa ka tawo kinahanglang maghinulsol sa iyang mga sala, biyaan ang iyang sayop nga mga binuhatan, magpahinungod sa iyang kinabuhi ngadto kang Jehova aron sa pagsimba ug pag-alagad kaniya, ug ipahibalo sa publiko ang iyang pagpahinungod pinaagig bawtismo sa tubig. Dayon, kon pilion siya sa Diyos sa pag-alagad ingong magmamando sa Iyang Gingharian, siya pagadihogan sa balaang espiritu. Ang unang bahin niini nga paagi sa bawtismo (bawtismo sa tubig) maoy desisyon sa indibiduwal; ang ikaduhang bahin (bawtismo sa espiritu) maoy pagbuot sa Diyos. Sa dihang ang usa ka tawo mabawtismohan niining duha ka paagi, siya mahimong born again.

Apan, sa pagpakig-estorya ni Jesus kang Nicodemo, nganong migamit man siya sa ekspresyong “ipanganak gikan sa tubig ug sa espiritu”? Iyang gigamit ang maong ekspresyon aron mapasiugda ang dakong kausaban nga mahitabo niadtong nabawtismohan sa tubig ug sa espiritu. Hisgotan sa sunod nga artikulo ang maong bahin sa pagkahimong born again.

[Hulagway sa panid 9]

Ang mahinulsolong mga Israelitas gibawtismohan ni Juan sa tubig

Ang Pagkahimong Born Again—Unsang Kausaban ang Ipahinabo Niini?

NGANONG gigamit ni Jesus ang ekspresyong “ipanganak . . . gikan sa espiritu” sa dihang siya naghisgot bahin sa bawtismo sa balaang espiritu? (Juan 3:5) Kon gamiton sa simbolikong paagi, ang pulong “pagkahimugso” nagkahulogan ug “sinugdanan.” Busa ang terminong “gipahimugso pag-usab” o born again nagpasabot ug “bag-ong sinugdanan.” Sa ato pa, ang simbolikong paggamit sa mga pulong nga “pagkahimugso” ug “gipahimugso pag-usab” o born again nagpasiugda ug bag-ong sinugdanan sa relasyon sa Diyos ug niadtong nabawtismohan sa balaang espiritu. Sa unsang paagi kining dakong kausaban mahitabo?

Sa pagpatin-aw kon sa unsang paagi giandam sa Diyos ang mga tawo aron sa pagmando sa langit, si apostol Pablo migamit ug ilustrasyon nga posibleng mahitabo diha sa panimalay. Siya misulat sa mga Kristohanon sa iyang panahon nga sila ‘sagopon ingong mga anak’ ug busa ang Diyos makiglabot kanila “ingon nga mga anak.” (Galacia 4:5; Hebreohanon 12:7) Ang ilustrasyon sa pagsagop makatabang kanato nga masabtan kon unsang kausaban ang mahitabo sa dihang ang usa bawtismohan sa balaang espiritu. Apan aron mas masabtan kini, atong balikan ang ilustrasyon sa batan-ong lalaki nga gustong magpaenrol sa eskuylahan sa mga nitibo.

Kausaban Tungod sa Pagsagop

Sa ilustrasyon, ang batan-on dili makapaenrol sa eskuylahan tungod kay dili siya nitibo. Apan usa ka adlaw niana dihay dakong kausaban nga nahitabo. Siya legal nga gisagop sa usa ka pamilya nga nitibo. Unsay epekto niana sa batan-on? Buweno, kay gisagop man siya, may katungod na siya nga sama sa ubang batan-ong mga nitibo—sama sa pagpaenrol sa ilang eskuylahan. Iya nang mahimo ang dili niya mahimo kaniadto.

Kini nagpakita kon unsay mahitabo niadtong mahimong born again. Matikdi kini nga mga pagtandi. Ang batan-on sa ilustrasyon makapaenrol lang kon iyang makab-ot ang kinahanglanon sa eskuylahan—ang pagkahimong nitibo. Apan dili niya makab-ot ang maong kinahanglanon sa iyang kaugalingong paningkamot. Sa samang paagi, ang pipila ka tawo hatagag luna diha sa Gingharian sa Diyos, o langitnong gobyerno, basta makab-ot nila ang kinahanglanon—ang pagkahimong born again. Apan dili nila kini mahimo sa ilang kaugalingong pagbuot tungod kay ang Diyos maoy magbuot nga ang usa mahimong born again.

Nganong nausab ang kahimtang sa maong batan-on? Tungod kini sa legal nga proseso sa pagsagop. Siyempre, ang maong pagsagop wala mag-usab sa pagkatawo sa batan-ong lalaki. Bisan pa niana, nausab ang iyang kahimtang human makab-ot ang legal nga mga kinahanglanon sa pagsagop. Oo, usa kadto ka bag-ong sinugdanan—nga mora bag gipanganak siya pag-usab. Giisip na siya nga anak, ug tungod niana duna na siyay katungod sa pag-eskuyla sa maong eskuylahan ug sa pagkahimong membro sa pamilya sa nagsagop kaniya.

Sa samang paagi, giusab ni Jehova ang kahimtang sa usa ka grupo sa dili-hingpit nga mga tawo pinaagi sa kinabubut-ong pagsagop kanila ingong iyang mga anak. Si apostol Pablo, nga kauban sa maong grupo, misulat sa iyang mga isigkamagtutuo: “Kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’ Ang espiritu mismo nagpamatuod uban sa atong espiritu nga kita mga anak sa Diyos.” (Roma 8:15, 16) Oo, tungod kay gisagop ang maong mga Kristohanon, sila nahimong bahin sa pamilya sa Diyos, o “mga anak sa Diyos.”—1 Juan 3:1; 2 Corinto 6:18.

Siyempre, ang pagsagop sa Diyos kanila wala mag-usab sa ilang pagkatawo, kay sila dili gihapon hingpit. (1 Juan 1:8) Apan, sumala sa gipatin-aw ni Pablo, nausab ang ilang kahimtang human makab-ot ang legal nga mga kinahanglanon sa pagsagop. Nianang higayona, gitisok sa espiritu sa Diyos diha sa hunahuna sa sinagop nga mga anak nga sila magkinabuhi uban ni Kristo sa langit. (1 Juan 3:2) Ang maong kusganon nga pagbati nga gipahinabo sa balaang espiritu nakapausab gayod sa ilang panglantaw sa kinabuhi. (2 Corinto 1:21, 22) Oo, usa kadto ka bag-ong sinugdanan—nga mora bag gipanganak sila pag-usab.

Sa paghisgot bahin sa sinagop nga mga anak sa Diyos, ang Bibliya miingon: “Sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.” (Pinadayag 20:6) Uban ni Kristo, ang sinagop nga mga anak sa Diyos mahimong mga hari sa Gingharian sa Diyos o langitnong gobyerno. Gisultihan ni apostol Pedro ang iyang mga isigkamagtutuo nga sila makadawat ug ‘usa ka panulondon nga dili madunot, dili mabuling ug dili malawos’ nga ‘gitagana sa langit’ alang kanila. (1 Pedro 1:3, 4) Pagkabililhon gayod niini nga panulondon!

Apan kining maong pagmando nagpatungha usab ug usa ka pangutana. Kon kadtong mahimong born again magmando ingong mga hari sa langit, kinsay ilang mandoan? Kanang pangutanaha pagatubagon sa sunod nga artikulo.

[Hulagway sa panid 10]

Unsay giingon ni Pablo bahin sa pagsagop?

Diyutay ang Magmando, Daghan ang Makapahimulos

SUKAD pa sa panahon sa mga apostoles, ang Diyos nagpili na gikan sa katawhan ug gamayng grupo sa matinumanong mga Kristohanon, nga nagsagop kanila ingong mga anak. Dako kaayo ang kausaban nga mahitabo niining sinagop nga mga anak mao nga ang Pulong sa Diyos naghubit niini ingong pagkahimugso pag-usab. Ang katuyoan niini mao ang pag-andam kanila sa pagmando sa langit. (2 Timoteo 2:12) Aron mahimong mga magmamando, sila pagabanhawon gikan sa kamatayon ngadto sa langitnong kinabuhi. (Roma 6:3-5) “Sila magamando ingong mga hari ibabaw sa yuta” uban ni Kristo sa langit.—Pinadayag 5:10; 11:15.

Apan ang Pulong sa Diyos nag-ingon usab nga dili lang kadtong nahimong born again ang makabaton ug dumalayon nga kaluwasan kondili aduna pay uban. Ang Bibliya (diha