Nahinumdom ka ba nga natumba sa bata pa? Tingali nasamad ang imong kamot o napangos ang imong tuhod. Mahinumdoman pa ba nimo nga gialam-alaman ka sa imong mama? Seguro iyang gitambalan ang imong samad ug duga sa kamunggay. Mihilak ka, pero kay iya kang gialam-alaman ug gigakos, miundang kag hilak. Sa bata ka pa, ang kahupayan makita dayon.

Pero sa magkadako na kita, mas lisod na ang kinabuhi. Ang problema magkadako, ug ang kahupayan mas lisod nang makita. Ikasubo, ang mga problema sa hamtong dili na madalag duga sa kamunggay ug gakos. Tagda ang pipila ka pananglitan.

• Nakasulay ka ba nga naguol kay natangtang ka sa trabaho? Si Julian miingon nga siya natangtang sa trabaho, ug naguol pag-ayo. Siya nakapangutana: ‘Unsaon man nako pagbuhi sa akong pamilya? Human sa daghang tuig nakong pagkugig trabaho sa kompaniya, ila lang kong tangtangon?’

• Tingali naguol kaayo ka nga nagbulag mo sa imong kapikas. “Dihang kalit nga gibulagan ko sa akong bana 18 ka bulan nang milabay, naguol ko. Nahugno ang akong kasingkasing,” miingon si Raquel. “Dulot sa bukog ang akong kasakit. Nabalaka ko niini.”

• Tingali duna kay grabeng sakit nga morag wala nay alibyo. Seguro may mga panahon nga mobati ka sama sa gibati sa patriarkang si Job, kinsa miingon nga siya wala na ganahi sa iyang kinabuhi ug dili na gustong mabuhi pa. (Job 7:16) Lagmit mobati sab ka sama sa gibati ni Luis, nga 80 anyos, kinsa miingon, “Usahay mobati ko nga naghulat na lang kong mamatay.”

• O posible nga tungod sa kamatayon sa usa sa imong minahal, nangandoy kag kahupayan. “Sa namatay ang akong anak nga lalaki tungod sa aksidente sa ayroplano, wala ko makatuo,” miingon si Robert. “Dayon mibati kog kaguol, kaguol nga gihisgotan sa Bibliya nga samag giduslak kag espada.”—Lucas 2:35.

Si Robert, Luis, Raquel, ug Julian nakakitag kahupayan bisan sa makaguol nga kahimtang. Ilang nakita ang kinamaayohang Persona nga makahatag ug kahupayan—ang Labing Gamhanang Diyos. Sa unsang paagi siya maghatag ug kahupayan? Makahatag ba usab siyag kahupayan kanimo?

Gihubit ni apostol Pablo si Jehovaa ingong ‘Diyos sa tanang paghupay, kinsa naghupay kanato sa tanan natong kasakitan.’ (2 Corinto 1:3, 4) Busa ang Bibliya nagpasalig nga kitang tanan matabangan sa Diyos, ug bisag unsa pa ka dako sa problema, ang atong langitnong Amahan makahupay nato.

Siyempre, kinahanglang duna kitay buhaton kon gusto kitag kahupayan gikan sa Diyos. Unsaon pagtabang sa doktor kon kita dili magpakonsulta niya? Si propetang Amos nangutana: “Magkuyog ba sa paglakaw ang duha gawas kon sila nagtagbo sumala sa gikasabotan?” (Amos 3:3) Busa ang Kasulatan nag-awhag kanato: “Duol sa Diyos, ug siya moduol kaninyo.”—Santiago 4:8.

Nganong makaseguro kita nga ang Diyos makigsuod nato? Una, kay daghang beses na siyang nagsulti nga gusto siyang motabang nato. (Tan-awa ang kahon.) Ikaduha, kay kita dunay lig-ong pamatuod gikan sa mga tawo nga gihupay sa Diyos—mga tawo sa karaang panahon ug karon.

Sama sa daghang tawo karon nga nangayog tabang sa Diyos, si Haring David nakasinati sab ug mga problema. ‘Patalinghogi ang akong mga pangaliyupo dihang ako motuaw kanimo alang sa tabang,’ siya mihangyo kang Jehova. Mitabang ba ang Diyos? Oo. Si David miingon: ‘Gitabangan ko, mao nga ang akong kasingkasing nagsadya.’—Salmo 28:2, 7.

PAPEL NI JESUS SA PAGHUPAY SA MGA MAGUL-ANON

Gihatagan sa Diyos si Jesus ug dakong papel sa paghupay sa mga magul-anon. Lakip sa papel nga gihatag sa Diyos kaniya mao ang ‘pagbugkos sa gun-ob ug kasingkasing’ ug sa “paghupay sa tanang nagbangotan.” (Isaias 61:1, 2) Sumala sa gitagna, si Jesus nagpakitag espesyal nga pagtagad niadtong “nabudlayan ug nabug-atan.”—Mateo 11:28-30.

Si Jesus naghupay sa mga tawo pinaagi sa iyang maayong mga tambag, maayong pagtratar kanila, ug sa ubang higayon, pag-ayo pa gani sa ilang mga sakit. Usa ka sanlahon nagpakiluoy kang Jesus: “Kon buot mo lamang, ikaw makahinlo kanako.” Kay naluoy, si Jesus miingon: “Buot ko. Mamahinlo ka.” (Marcos 1:40, 41) Ug ang sanlahon naayo.

Ang Anak sa Diyos wala na dinhi sa yuta karon sa paghupay kanato sa personal. Apan ang iyang Amahan, si Jehova, “ang Diyos sa tanang paghupay,” padayong nagtabang niadtong nagkinahanglag paghupay. (2 Corinto 1:3) Sayra ang upat ka paagi nga gigamit sa Diyos sa paghupay sa mga tawo.

• Ang Bibliya. “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.”—Roma 15:4.

• Ang Balaang Espiritu sa Diyos. Wala madugay human mamatay si Jesus, ang tibuok Kristohanong kongregasyon nagmalinawon. Ngano? “Kini naglakaw diha sa kahadlok kang Jehova ug diha sa paghupay sa balaang espiritu.” (Buhat 9:31) Ang balaang espiritu, ang aktibong puwersa sa Diyos, gamhanan kaayo. Gamiton kini sa Diyos sa paghupay kang bisan kinsa sa bisan unsang kahimtang.

• Pag-ampo. Ang Bibliya nagtambag: “Ayaw kabalaka sa bisan unsang butang.” Hinunoa, kini nag-ingon: “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.”—Filipos 4:6, 7.

• Isigka-Kristohanon. Ang atong isigka-Kristohanon maoy kasaligang mga higala nga makahupay nato sa lisod nga mga situwasyon. Si apostol Pablo miingon nga ang iyang mga kauban maoy “makapalig-on nga tabang” panahon sa mga “kalisdanan ug pag-antos.”—Colosas 4:11; 1 Tesalonica 3:7, Maayong Balita Biblia.

Pero tingali naghunahuna ka kon kini nga mga paagi tinuod ba gyod nga makahupay. Atong hisgotan ang kasinatian sa mga tawo nga nakaatubag mga problema nga sama sa gihisgotan sa unang artikulo niining magasina. Sama kanila, imong makita nga ginatuman sa Diyos ang iyang makapahupay nga saad: ‘Sama sa tawo nga padayong ginahupay sa iyang inahan, sa ingon ako magpadayon sa paghupay kaninyo.’—Isaias 66:13.

DIHANG MAWAD-AG TRABAHO

“Ako ug ang akong asawa dungang nawad-ag trabaho,” miingon si Seth.a “Duha ka tuig nga nabuhi mi sa mga hinatag sa among pamilya ug sa ginagmayng trabaho. Busa ang akong asawa, si Priscilla, naguol pag-ayo ug mibati nga wala na siyay kapuslanan.

“Giunsa namo kini pagsagubang? Gipahinumdoman kanunay ni Priscilla ang iyang kaugalingon sa giingon ni Jesus sa Mateo 6:34. Si Jesus miingon nga dili kita angayng mabalaka bahin sa sunod nga adlaw, kay ang matag adlaw dunay iyang kaugalingong kabalaka. Ang kinasingkasing nga pag-ampo ni Priscilla nakapalig-on kaniya. Sa akong bahin, ang Salmo 55:22 nakahupay nako. Sama sa salmista, akong gitugyan ang akong mga kabalaka kang Jehova, ug iya kong gipalig-on. Bisag duna na koy trabaho, among gipasimple ang among kinabuhi nga maoy gitambag ni Jesus sa Mateo 6:20-22. Labaw sa tanan, kami mas nasuod sa Diyos ug sa usag usa.”

“Dihang nahapay ang among gamayng negosyo, nabalaka ko kon mag-unsa na lang mi,” miingon si Jonathan. “Tungod sa kalisod, ang tanan namong napondar sa 20 ka tuig nangawala ra. Sige mig lalis sa akong asawa bahin sa kuwarta. Wala na gani namo gamita ang among credit card kay basig dili na kini madawat.

“Apan ang Pulong sa Diyos ug ang iyang espiritu nakatabang namo sa paghimog maayong mga desisyon. Midawat kog bisan unsang trabaho, ug gimenosan namo ang among paggasto. Ingong mga Saksi ni Jehova, gitabangan usab kami sa among mga igsoon sa pagtuo. Ilang napalig-on ang among dignidad ug gitabangan sa panahon nga naglisod mi.”

DIHANG MABUNGKAG ANG KAMINYOON

“Dihang kalit lang nga gibiyaan ko sa akong bana, nasakitan ko ug naglagot,” miingon si Raquel. “Puwerte nakong guola. Pero nakigsuod ko sa Diyos ug iya kong gihupay. Ang kalinaw sa Diyos nakahupay nako dihang moampo ko kaniya adlaw-adlaw. Ang akong gun-ob nga kasingkasing morag iyang giayo.

“Ug tungod sa iyang Pulong, ang Bibliya, nabuntog nako ang akong kasuko ug pagdumot. Akong gipadapat ang giingon ni apostol Pablo sa Roma 12:21: ‘Ayaw pagpadaog sa daotan, kondili padayong daoga ang daotan pinaagi sa maayo.’

“Gitambagan ko sa akong suod nga higala nga kinahanglan kong magpadayon sa akong kinabuhi. Iyang gipabasa nako ang Ecclesiastes 3:6 ug gisultihan nga panahon na nga atong dawaton kon unsay nawala. Sakit kadto nga tambag, pero mao kadtoy akong gikinahanglan. Karon duna na koy bag-ong mga tumong sa kinabuhi.”

“Kon mabungkag ang imong kaminyoon, nagkinahanglan kag tabang,” miingon si Elizabeth. “Duna koy suod nga higala nga wala gyod mobiya nako. Siya miduyog nakog hilak, mihupay nako, ug iyang gipabati nako nga ako minahal imbes sinalikway. Nagtuo gyod ko nga gigamit siya ni Jehova sa pag-ayo sa akong gun-ob nga kasingkasing.”

DIHANG MASAKIT O MATIGULANG

Si Luis, nga gihisgotan sa sinugdanan niining magasina, dunay grabeng sakit sa kasingkasing, ug duha ka higayon nga hapit siyang mamatay. Nagkinahanglan siyag oxygen 16 ka oras kada adlaw. “Pirme kong mag-ampo kang Jehova,” siya miingon. “Pagkahuman ug ampo, mabati nako nga napalig-on ko sa iyang espiritu. Ang pag-ampo nakatabang nako sa pagpadayon kay may pagtuo ako kaniya ug nahibalo nga iya kong gimahal.”

“Daghan kog gustong buhaton, pero dili ko makahimo,” miingon si Petra, nga mga 80 anyos. “Nakita nako nga nagkaluya ang akong lawas. Kapoyon ko pirme ug nagsalig na lang sa tambal. Kanunayng mosantop sa akong hunahuna ang paghangyo ni Jesus sa iyang Amahan nga ipalabay na lang ang pag-antos nga iyang agoman kon posible. Pero gipalig-on ni Jehova si Jesus, ug iya sab kong gipalig-on. Ang pag-ampo maoy akong adlaw-adlaw nga terapiya. Mogaan ang akong pagbati human ko makig-estorya sa Diyos.”—Mateo 26:39.

Si Julian, nga nagsakit ug multiple sclerosis sa mga 30 na ka tuig, mibati usab ug ingon niana. “Imbes lingkoranan sa manedyer, wheelchair na ang akong lingkoranan,” siya miingon. “Pero may pulos gihapon ang akong kinabuhi tungod kay ako kining gigugol sa pagtabang sa uban. Ang pagtabang makapaalibyo sa kasakit, ug tinuod nga motuman si Jehova sa iyang saad nga iya kitang palig-onon panahon sa kalisod. Sama kang apostol Pablo, ako makaingon: ‘Sa tanang butang ako adunay kusog pinaagi kaniya nga naghatag ug gahom kanako.’”—Filipos 4:13.

DIHANG MAMATYAN

“Dihang namatay si Papa sa aksidente, sa primero dili ko makatuo,” miingon si Antonio. “Dili kadto angayng mahitabo kaniya kay naglakaw ra siya sa dalan. Pero wala koy mahimo. Siya na-coma ug lima ka adlaw ug namatay. Wala ko maghilak atubangan ni Mama, pero mihilak ko dihang nag-inusara. ‘Ngano man? Ngano?’ Kanunay kong mangutana sa akong kaugalingon.

“Sa maong makapaguol kaayong panahon, pirme kong mag-ampo kang Jehova nga makontrolar nako ang akong emosyon ug nga hatagan kog kalinaw sa hunahuna. Ug anam-anam nga mikalma ko. Nahinumdom ko sa giingon sa Bibliya nga ang ‘wala damhang panghitabo’ mahitabo kanatong tanan. Kay dili man mamakak ang Diyos, nagtuo gyod ko nga akong makita pag-usab si Papa sa pagkabanhaw.”—Ecclesiastes 9:11; Juan 11:25; Tito 1:2.

Si Robert, nga gihisgotan sa nag-unang artikulo, ingon sab niana ug hunahuna. Siya miingon: “Ako ug ang akong asawa nakabatog kalinaw sa hunahuna nga gihisgotan sa Filipos 4:6, 7. Tungod to sa among pag-ampo kang Jehova. Kini nga kalinaw nakatabang namo sa pagpakigsulti sa mga reporter sa balita bahin sa atong paglaom sa pagkabanhaw. Bisag namatay ang among anak nga lalaki tungod sa aksidente sa ayroplano, daghan kamig mahinumdoman nga malipayong mga panahon sa buhi pa siya. Kini ang gipamalandong namo kanunay.

“Dihang ang kauban namong mga Saksi misulti nga ila ming nakita sa TV nga kalmadong nagpatin-aw sa among pagtuo, amo silang giingnan nga tungod kadto kay daghan ang nag-ampo para namo. Nagtuo gyod ko nga gitabangan mi ni Jehova pinaagi sa ilang mga pulong sa paghupay.”

Sama sa gipakita sa nahisgotang mga pananglitan, ang Diyos makahupay sa mga tawo nga dunay daghang problema ug kalisdanan. Ikaw, komosta? Bisag unsa pay imong problema, makakita kag kahupayan nga makatabang nimo sa lisod nga mga panahon.b Busa nganong dili ka modangop kang Jehova? Siya ang “Diyos sa tanang paghupay.”—2 Corinto 1:3.