Pagtanyag sa Maayong Balita​—Gamitang Epektibong mga Pasiuna

¹ Dakong kaayohan ang malampos sa atong ministeryo kon nangandam ug epektibong mga pasiuna. Kon sa sinugdan dili ta mabutad ang atensiyon sa tagbalay, hayan dili ta mahaling ang igong interes aron angayng duawon pag-usab uban sa tumong sa pagsugod ug pagtuon sa Bibliya. Sa unsang paagi atong mahimong mas epektibo ang atong mga introduksiyon?

KATUYOAN SA MGA PASIUNA

² Sa pagsugod, kinahanglang tin-aw sa atong hunahuna ang katuyoan sa mga introduksiyon. Nag-ingon ang Giya sa Tunghaan: “Ang introduksiyon . . . magapukaw sa interes sa ulohan. Kini kinahanglan makakabig sa pagtagad sa imong mamiminaw ug magaandam nila nga mohatag ug dakong pagtagad sa mosunod.” Midugang ang maong libro: “Ang usa sa labing maayong mga paagi sa pagpukaw sa interes . . . mao ang paglangkit sa imong mamiminaw.” (Tan-awang panid 113, par. 1, 2.) Sa unsang paagi mabuhat mo kini diha sa imong ministeryo?

³ Ang mga pasiuna nga makaplagan sa mga panid 9-15 sa basahong Nangatarongan giandam uban sa mga puntos nga gihisgotan sa itaas. Analisaha kini. Matikdi kon sa unsang paagi kini makakabig sa interes ug mopatagad sa mga tagbalay ngadto sa mga ulohan nga ginahisgotan. Nag-ingon ang usa ka sister nga sa paggamit sa lainlaing mga pasiuna, ang iyang pag-alagad sa kanataran mas nga nakalipay ug siya labaw nga nagmahunahunaon sa pagpakigsulti sa mga tawo. Maylabot sa mga sugyot diha sa basahong Nangatarongan, siya miingon: “Kini gayod mosaler.”

⁴ Unsang mga pasiuna ang nakaplagan mong epektibo uban sa karong Ulohan nga Mahisgotan? Imo bang nasulayan na kanang nalista ubos sa “Bibliya/Diyos” sa panid 10 sa basahong Nangatarongan? Ang usa niini nga mahimong magamit mao ang mosunod: “Nalipay akong ania ka ra sa balay. Ako nagapaambit sa akong mga silingan ug makapalig-ong punto gikan sa Bibliya. Nahibulong ka ba gayod kon unsay magpahimo sa relihiyon nga adunay tinuod nga bili uban sa Diyos?” Ang laing pasiuna mahimong: “Kami nagadasig sa mga tawo sa pagbasa sa ilang Bibliya. Ang mga tubag nga gihatag niini sa importanteng mga suliran sagad nagapatingala sa katawhan. Pananglitan, matikdi kon sa unsang paagi ang 2 Timoteo 3:1, 2, ug 2Tim 3:5 nagapakita kon nganong dili dawaton sa Diyos ang pipila ka pagsimba nga ginabuhat sa relihiyosong mga tawo.”

⁵ Hayan palabihon mong gamiton ang ubang mga pasiuna nga dugang pa nianang anaa sa basahong Nangatarongan. Apan, makaplagan mong labing maayo ang pagsunod sa panig-ingnan sa mga pasiuna nga anaa sa librong Nangatarongan. Kini nagapresentar ug mga isyu nga nakapabalaka sa mga tawo. Kini magpalangkit sa tagbalay diha sa panaghisgot. Kini mubo ra ug laktod sa punto. Mao nga adunay dakong benepisyo nga susihon pag-ayo ang mga pasiuna nga anaa sa basahong Nangatarongan bisan tuod may mga panahon nga ang imong teritoryo nagakinahanglan ug mga introduksiyon nga wala diha sa libro.

⁶ Sa laing bahin, ang uban mibasa sa angay nga mga pasiuna diretso gikan sa ilang librong Nangatarongan sa dihang nakigsulti sa mga tawo, ilabina niadtong daw puliki. Kini nagpaarang kanila nga larino ug laktod sa punto, ug sa pagkabig sa pagtagad sa tagbalay. Sagad sila gidapit nga mosulod (modayon) aron ipadayon ang panaghisgot.

⁷ Gusto tang hinumdoman nga importante kaayo ang atong pasiunang mga pulong diha sa ministeryo sa kanataran. Ang pagkaepektibo niini dako gayod ang mahimo. Sama kang Salomon, kita usab kinahanglang bug-os nga magsusi alang sa makalipayng mga pulong samtang magaandam kita sa paggamit ug epektibong mga pasiuna diha sa atong buluhatong pamalaybalay. Ang basahong Nangatarongan moabag kanato niining maong pagsusi.​—Eccl. 12:9, 10.

Pagtuon sa Libro sa Kongregasyon

Eskedyol para sa mga pagtuon sa kongregasyon diha sa basahong Matuod nga Kalinaw ug Kasegurohan​—Sa Unsang Paagi Imong Makaplagan?:

Enero 11-17: Kap. 4, par. 6-24

Enero 18-24: Kap. 5, par. 1-15

Enero 25-31: Kap. 5, par. 16–Kap. 6, par. 7

Pebrero 1-7: Kap. 6, par. 8-24

Teokratikanhong mga Balita

◆ Ang distritong kombensiyon sa Aruba gitambongan ug 960, ug 21 ang nabawtismohan.

◆ Gitambongan ug 2,334 ang duha ka distritong kombensiyon sa Bahamas, uban sa 34 nga nabawtismohan.

◆ Nagtaho ang Bolivia ug mga kinatas-ang 5,401 ka magmamantala ug 9,009 ka pagtuon sa Bibliya. Nag-aberids ug 13.6 oras ang mga magmamantala sa kongregasyon diha sa ministeryo sa kanataran.

Pangutana

● Nganong atong pagatun-an ang duha ka basahon uban sa mga bag-ohan, bisan tuod sila magpabawtismo sa dili pa mahuman ang duha ka libro?

Samtang itudlo ta ang kamatuoran ngadto sa mga bag-ohan, ang pipila makasabot ug modawat niana nga mas dali kay sa uban. Ang uban mahimong takos na sa bawtismo sa mubong yugto sa panahon. Apan, hinungdanon nga ang tanang makadangat sa pag-ila kang Jehova “mapuno sa hustong kahibalo sa iyang kabubut-on diha sa tanang kaalam ug espirituwal nga salabotan, aron mahimong takos sa paglakaw kang Jehova ngadto sa katuyoan sa bug-os nga pagpahimuot kaniya.” (Col. 1:9, 10) Pinaagig kompletong pagtuon sa basahong Mabuhing Walay Kataposan ug dayon sa Nahiusa sa Pagsimba o Matuod nga Kalinaw, ang mga bag-ohan matabangan sa pagbuhat niini.

Pinaagig unang pagtuon sa usa ka libro bahin sa pasukaranang mga pagtulon-an, nga pagasundan ug usa ka libro nga nagakobre sa Kristohanong mga hiyas, ang estudyante makadawat ug mabug-oson-gayong kahibalo. Siya usab makakat-on sa mga prinsipyo nga magatultol sa personal nga panggawi ug pagsimba nga hinungdanon ngadto sa usa ka tawong mahimong tinuod nga Kristohanon. Ang matag tawo nga mosulod sa organisasyon ni Jehova kinahanglang mahimong hamtong diha sa mga gahom sa pagsabot.​—1 Cor. 14:20.

Dugang pa, ang kasinatian nagpakita nga ang tabang sa usa ka hamtong nga magtutudlo gikinahanglan. Bisan tuod ang personal nga pagbasa sa mga publikasyon ug pagtambong sa mga tigom importante, kana dili kanunay magpatungha sa “kaalam ug espirituwal nga salabotan” nga gikinahanglan aron sa pag-alagad kang Jehova nga madawaton. Ang usa ka personal nga pagtuon sa Bibliya uban sa usa ka magtutudlo hinungdanon gayod. (Buh. 8:30, 31) Ang usa nga nagadumala sa pagtuon magtaho sa oras, sa balikduaw, ug pagtuon sa Bibliya hangtod mahuman ang ikaduhang libro, bisan tuod ang gitun-an bawtismado na.