Nakita ba Nimo ang Panginahanglan?
1 Si Jehova gihubit ingong usa ka Magtatabang ug usa ka Dalangpanan. Kita nahibalo nga makaduol kita kaniya sa panahon sa panginahanglan ug siya magatabang kanato. (Sal. 18:2; 46:1) Atong masundog kining hiyasa pinaagig pagtanyag ug pag-abag kon atong nakita ang panginahanglan.
2 Unsa man ang magatukmod sa usa ka tawo sa paghimog espesyal nga panikaysikay sa pagtabang sa laing tawo? Ang kadaghanang tawo nagaila niini ingong mahigugmaon, tawhanong butang nga pagabuhaton. Tino nga ang Pulong sa Diyos nagadasig niana. (Roma 15:1) Si Pablo nag-awhag kanato ‘nga managtan-aw, dili sa personal nga kaayohan nianang mga butang labot sa inyong kaugalingon lamang, apan usab sa personal nga kaayohan nianang ila sa uban.’—Filip. 2:4.
3 Kini maoy usa ka butang nga kitang tanan makakaplag ug kalipay sa pagbuhat. (Buh. 20:35) Si Pablo naghisgot kang Timoteo ingong usa nga “tiunay nga moatiman sa mga butang maylabot” sa iyang mga igsoon. (Filip. 2:20) Kita man batan-on o tigulang, adunay mga butang nga atong mahimo kon atong nakita ang panginahanglan.
4 Gibati ba nimo nga ang pipila may mga panginahanglan nga mahatagan ug mas maayong pagtagad? Tingali ang usa ka igsoon anaa sa ospital ug diyutay ra ang mga igsoong miduaw; o ang usa nahimong baldado, apan walay usa nga miabag sa mga buluhaton sa panimalay. Si Jesus miisip niadtong nagaalagad kang Jehova ingong mga membro sa usa ka pamilya nga tiunayng nagatagad sa usag usa.—Mar. 3:33-35.
5 Sa Unsang Paagi Ako Makatabang? Unsa man ang mahimo sa pagtaganag tabang sa dihang adunay dayag nga panginahanglan? Makahimo ba kita sa pagpanguna sa pag-abag sa pipila ka paagi? Tingali may mga tigulang nga nanginahanglag pagdasig, apan wala silay suod nga mga kauban sa pagtabang kanila. Mahimong adunay mga batan-on nga nanginahanglag tabang. Ang usa ka bag-ong interesadong pamilya nga may ubay-ubayng mga anak basin motambong sa Kingdom Hall sa dihang dili presente ang magmamantala nga nagatuon kanila. Sila magapabili kon adunay motabang kanila sa mga anak.
6 Samtang motubo kita sa gugma alang sa organisasyon ni Jehova, kita usab motubo diha sa pagpabili alang sa uban diha sa kongregasyon. Si Pablo nagadasig kanato sa pagpalapad niining bahina. (2 Cor. 6:11-13) Si Jesus nagpasiugda nga ang atong pagpakitag gugma sa usag usa mao ang pangunang paagi nga atong mapasundayag nga kita tinuod gayod nga iyang mga sumusunod.—Juan 13:35.
7 Busa kon nakita nato ang panginahanglan, ang tiunayng gugma alang sa atong mga igsoon ug sa kongregasyon kinahanglang magpalihok kanato sa pagpanguna ug pag-abag sa bisan unsang paagi nga atong maarangan. (Gal. 6:9, 10) Kining maong kabalaka alang sa uban magpalambigit kanato diha sa suod nga mga bugkos sa gugma ug panaghiusa.—1 Cor. 10:24.