Si Kristo Ingong Sumbanan sa mga Batan-on
1 Human sa usa ka panaghisgot sa Bibliya ang usa ka batan-on miingon: “Ako nahaylo sa dinamikong personalidad ni Jesu-Kristo. Ania ang usa ka lider nga akong matuohan.” Ang susama dili ikaingon sa bisan kinsang nasodnong tawo o sa mga bayani sa dula ug kalingawan. Ang kalibotanong mga sukdanan ug di-kristohanong mga estilo-sa-kinabuhi nga ilang gisagop nagdiskuwalipikar kanila ingong mga sumbanan alang kanato.—Sal. 146:3, 4.
2 Ang mga batan-on mapasaligan nga kon sila magabaton ug pagtuo diha kang Jesu-Kristo, sila maoy mga karnero sa Diyos ug nailhan ug giatiman ni Jesus. (Juan 10:14, 15, 27) Ang mga batan-on nga nagasunod kang Kristo ingong ilang Sumbanan gipanalanginan.
3 Usa ka igsoong lalaki nga nagaalagad sa Brooklyn Bethel naghimo niining pribilehiyoa sa pag-alagad ingong usa ka tumong gikan sa panahon nga siya walo pa ka tuig ang edad. Siya gidasig sa paglantaw sa pag-alagad sa Bethel ingong usa ka praktikal nga paagi sa pagsunod sa panig-ingnan ni Kristo kon siya modako na. Ang iyang mga ginikanan, maingon man ang nagapanawng mga magtatan-aw, nagbutang niining maong tumong sa atubangan niya. Aron matabangan siya sa pagpangandam, sila nagdasig kaniya sa makugihong pagpadapat sa iyang kaugalingon samag usa ka Bethelite, nga nagabuhat sa mga buluhaton sa panimalay, nagatabang sa pagmentinar sa Kingdom Hall, ug nagaugmad ug mga kahanas diha sa ministeryo. Human nakapahimulos sa Bethel nga pag-alagad sa daghan na karong katuigan, siya mapasalamaton nga iyang gihimo ang panikaysikay nga sundogon ang panig-ingnan ni Kristo samtang siya nagatubo.
4 Si Jesus wala mangagpas ug kalibotanong karera; iyang gipili ang ministeryo. Usa ka batan-ong igsoong babaye buot nga magpayunir sa dihang siya migraduwar sa tunghaan apan nagpanuko tungod kay walay tukmang part-time nga panarbaho. Siya padayong naghunahuna: ‘Una mangita kog trabaho, unya itunol nako ang akong aplikasyon sa payunir.’ Usa ka ansiyano nagpunting nga sa gidugayon nga siya magahulat, mas nagakaayo lantawon ang usa ka bug-os-panahong trabaho, tungod kay wala may butang nga makapugong niya sa pagdawat niana. Siya miasoy: “Ako nag-ampo kang Jehova alang sa iyang espiritu sa paggiya kanako.” Siya nagpalista dihadiha ingong usa ka oksilyare payunir ug sa ulahi nahimong usa ka regular payunir. Wala madugay human niana, siya nakakaplag ug nahiangayng trabaho nga mihaom sa iyang payunir nga eskedyul.
5 Si Jesus maisogong nagmantala sa mensahe sa Gingharian sa tanan. (Mat. 4:23) Ang batan-ong mga Kristohanon makakat-on usab nga magmaisogon sa pagsangyaw, nga dili magpahulga sa uban. Usa ka 14-anyos-edad nga Saksi nagtaho: “Ang tanan sa eskuylahan nahibalo sa akong baroganan ingong usa ka Kristohanon. . . . Nasayod sila pag-ayo niana nga kon ikahibalag ko ang usa ka klasmet samtang nakig-ambit sa ministeryo, dili ko mobatig kaulaw. Ang mga klasmet sagad maminaw, ug daghang higayon nga sila nagadawat ug Iiteratura.”
6 Ang pagpamalandong sa panig-ingnan ni Kristo makatabang sa batan-ong katawhan sa paghimog maalamong mga desisyon mahitungod sa ilang kaugmaon. Ang iyang panig-ingnan nagadasig kanila sa ‘paghinumdom sa ilang Dakong Maglalalang’ pinaagig pagpakitag kasibot sa pag-alagad kang Jehova. (Eccl. 12:1) Sama kang Kristo Jesus, ilang ginaugmad “ang gugma sa Amahan,” nga nagadalag mga panalangin nga mas maayo pa kay sa bisan unsang butang nga gitanyag sa kalibotan. Inay nga “magataliwan,” sila makalaom nga ‘magapabilin hangtod sa hangtod.’—1 Juan 2:15-17.