“Nagapugas sa Binhi sa Gingharian” Maylabot sa mga Rota sa Magasin
1 Ang Awit 133 sa Mag-awit ug mga Pagdayeg Kang Jehova nag-ulohag “Nagapugas sa Binhi sa Gingharian.” Gipasukad kini sa ilustrasyon ni Jesus nga nagpakasama sa buluhatong paghimog tinun-an sa pagpugas ug binhi. (Mat. 13:4-8, 19-23) Ang mga liriko sa awit mabasa: “Kon binhi anha sa maayong yuta/Sagad nag-agad kanimo.” Unsaon nato pagpauswag ang kaepektibo sa atong ministeryo? Usa ka paagi mao ang pag-establisar ug pagmentinar ug usa ka rota sa magasin.
2 Ubay-ubayng tumong ang makab-ot pinaagig rota sa magasin. (1) Ang regular nga mga duaw sa matag duha ka semana makapaarang nimo sa pagtukod ug mahigalaong relasyon uban sa interesadong tawo. (2) Padayon nimong masuplayan ang maong tawo sa nagaluwas kinabuhing impormasyon nga anaa sa Ang Bantayanang Torre ug Pagmata! (3) Pinaagi sa imong mga panaghisgot hayan matabangan mo ang tawo nga maugmad ang pangandoy sa Kasulatanhong kamatuoran, nga motultol ngadto sa pagtuon sa Bibliya.—1 Ped. 2:2.
3 Kon Unsaon Pagsugob ug Rota sa Magasin: Sa dihang ang usa magpakitag interes sa mga magasin, isaysay nga ang talagsaong mga artikulo makita sa matag gula ug nga ikaw malipay sa paghatod niana matag duha ka semana. Human sa pagbiya, isulat ang ngalan ug adres sa tawo, ang petsa sa pagduaw, ang mga petsa sa mga gula nga napahiluna, ang gipasiugdang artikulo, ug ang mga ulohan nga ilabinang nakapainteres sa tawo.
4 Makasugod kag rota sa pipila lamang ka tawo nga anaa niana. Dayon palamboa kana pinaagig pagdugang sa uban nga imong napahilunaag mga magasin. Samtang modaghan ang imong rota, imo kanang maorganisar sumala sa dapit aron mas sayon ang pagkobre. Paghupot ug maampingong talaan kon unsang mga gulaa ang napahiluna sa matag duaw ug kanus-a. Idugang ang mga nota maylabot sa imong mga panaghisgot ug kon unsaon pagpadayon pag-ugmad sa interes sa tawo diha sa kamatuoran sa sunod duaw.
5 Ilakip ang Negosyante ug Propesyonal nga mga Tawo: Gipakita sa kasinatian nga ang mga tindera/tindero ug ubang mga propesyonal lagmit modawat sa atong mga magasin sa regular nga paagi. Nahimo pa ngani sa usa ka ansiyano nga iyang rota sa magasin ang mayor sa iyang lungsod. Usa ka magmamantala nakasugod ug pagtuon uban sa 80-anyos-edad nga tag-iya sa suplay-igtutukod nga kompaniya human makahatod kaniyag mga magasin sa sunodsunod napulo ka tuig!
6 Usa ka payunir nga sister misulod sa tindahan ug nahibalag ang usa ka magtiayon nga taphaw nga midawat kaniya. Bisan pa, sanglit midawat sila sa mga magasin, siya mihukom nga idugang ang magtiayon sa iyang rota sa magasin. Ngadtongadto, gusto nang undangan sila sa pagduaw sa sister tungod kay sila dili gayod mahigalaon ug wala gayoy daghang ikasulti, bisan gani sa dihang misukna siyag usa ka punto de vista nga pangutana. Apan nag-ampo ang sister bahin sa maong butang ug ngadtongadto nakapahilunag Mabuhing Walay Kataposan nga libro sa magtiayon. Human mabasa kana, ang asawa mipatugbaw: “Sa kataposan, akong nakaplagan ang kamatuoran!” Nasugdan ang pagtuon sa Bibliya, ug sa ulahi ang magtiayon nabawtismohan. Ang pagkamalahutayon sa payunir sa pagkatinuod nagbungag maayong resulta.
7 Paghimog mga Balikbuaw: Inigkadawat nimog bag-ong magasin, basaha ang matag artikulo. Pangitag mga puntos nga mosaler sa matag tawo diha sa imong rota. Dayon sa imong pagbalik, ikaw makaingon: “Samtang akong gibasa kining artikuloha, naghunahuna ko nimo ug kon sa unsang paagi kini makapainteres kanimo.” Ang mga magmamantala sa tanang pangedaron mahimuot sa pagbaton ug rota sa magasin. Bisan ang gamayng bata makaingon: “Nalipay ko sa pagpakigkita kanimo pag-usab. Ang imong labing bag-ong mga kopya sa Ang Bantayanang Torre ug Pagmata! miabot na. Sa akong hunahuna makaangay ka ning artikuloha nga nag-ulohang . . .”
8 Pahinama sa umaabot nga mga artikulo pinaagig pagpatagad ngadto sa kahon nga nag-ulohang “Sa Among Sunod Gula.” Sa dihang ang mga artikulo motungha ingong serye, ipahibalo kini ug dasiga ang magbabasa nga dili sayloan ang bisan haing bahin niana. Ayawg kalimti nga sa matag higayon nga imong ihatod ang mga magasin ngadto sa tawo nga apil sa imong rota sa magasin, ang usa ka balikduaw mahimong iphon. Ug labaw sa tanan, hinumdomi nga ang atong tumong mao ang pag-ugmad niining mga duawa ngadto sa mga pagtuon sa Bibliya sa balay.
9 Buawa ang mga Tawo sa Imong Rota sa Regular nga Paagi: Makobrehan mo ang imong rota sa magasin sa bisan unsang panahon nga praktikal—sa usa ka buntag sa adlaw sa semana, sa kilumkilom, sa sayong kagabhion, o sa hinapos sa semana human sa paggahin ug panahon sa buluhatong pamalaybalay. Kon di ka makahimo pagkobre sa imong rota tungod kay nasakit o nagbakasyon, para nimo hangyoa ang laing magmamantala sa imong pamilya o kongregasyon sa paghatod sa mga magasin. Nianang paagiha, silang anaa sa imong rota dili mapakyas sa pagdawat sa ilang mga magasin sa hustong panahon.
10 Usa ka paagi sa pagpugas sa binhi sa Gingharian mao ang pagdala sa Ang Bantayanang Torre ug Pagmata! nga regular ngadto sa tanang anaa sa imong rota sa magasin. Samtang imong tudloan sila sa Kasulatanhong kamatuoran, hayan masabtan nila ang kahulogan sa pulong sa Gingharian ug ngadtongadto mamunga sa bunga sa Gingharian duyog kanimo.—Mat. 13:8, 23.