Tudloi ang Uban sa Pagkuhag Kaayohan sa Ilang Kaugalingon
1 Buot ni Jehova nga ang tanang tawo makakuhag kaayohan sa ilang kaugalingon. (Isa. 48:17) Siya nahibalo kon unsay mohatag kanatog tinuod nga kalipay. Ang iyang mainitong tinguha mao nga ang mga tawo makalikay sa katalagman ug makapahimulos sa kinabuhi pinaagi sa paghatag ug pagtagad sa iyang mga sugo. Nagakuha kitag dakong kaayohan pinaagig pagpahiuyon sa atong mga kinabuhi sa dalan sa Diyos. (Sal. 34:8) Sa unsang paagi kita makatudlo sa uban nga buhaton ang sama niana?
2 Unsay Gusto sa mga Tawo? Unsa ang gikabalak-an sa mga tagbalay sa dapit nga imong gipuy-an? Dili ba ang kasegurohan sa ilang balay, ang kalig-on sa ilang kaminyoon, ang kaugmaon sa ilang mga anak, ug susamang mga butang? Sa dihang sila adunay mga problema, asa man sila modangop alang sa tabang? Sila tingali mosalig sa ilang kaugalingon, sa programa nga makatabang sa kaugalingon, o sa paggiya sa uban. Sa ngadtongadto, daghan ang padayong nalibog tungod sa nagkasumpaki ug di-praktikal nga mga ideya bahin sa paagi sa pagkuhag kaayohan sa ilang kaugalingon. Angay natong kombinsihon sila nga ang gitanyag sa Pulong sa Diyos nga giya maoy mas maayo. (Sal. 119:98) Atong mahimo kini pinaagi sa pagpakita kanila kon sa unsang paagi ilang mapauswag ang kalidad sa ilang mga kinabuhi bisan karon kon sila mohimog paningkamot sa pagtuon sa Bibliya ug ipadapat kon unsay giingon niini.—2 Tim. 3:16, 17.
3 Maarang-arang Pamilyahanong Kinabuhi: Nakaamgo ang pipila ka tawo kon sa unsang paagi gayod ang dinasig nga tambag sa Efeso 5:22–6:4 misaler sa pagsulbad sa mga problema sa pamilya. Kini ang kahimtang sa usa ka magtiayon kinsa, human sa napulo ka tuig sa kaminyoon, mihukom nga sila magbulag. Apan, usa ka pagtuon sa Bibliya ang nasugdan uban sa asawa, nga natudloan sa Kasulatanhong mga prinsipyo mahitungod sa kinabuhing minyo. Sa wala madugay ang bana nakamatikod sa mga kausaban nga iyang nahimo samtang iyang gipadapat ang mga prinsipyo sa Bibliya, ug siya miduyog sa pagtuon. Sa ulahi ang bana miingon: “Karon amo nang nakaplagan ang pasukaranan alang sa tinuod kaayong malipayong pamilyahanong kinabuhi.”
4 Tinuod nga Katuyoan sa Kinabuhi: Sa dihang ang batan-ong nagiyan sa droga nangitag tabang gikan sa mga Saksi, natudloan siya nga si Jehova personal nga nagtagad kaniya. Siya miingon: ‘Akong nakat-onan nga ang Maglalalang adunay katuyoan para sa tawo ug nagtanyag ug kinabuhing walay kataposan niadtong iyang giuyonan. Dili nimo mahanduraw kon unsa ka malipayon ang akong gibati bahin niini. Karong adlawa ako nagpahimulos ug maayong panglawas, kalinaw sa hunahuna, ug usa ka suod nga relasyon sa Diyos.’
5 Ang tanan makakuhag kaayohan gikan sa praktikal nga tabang nga makaplagan sa Pulong sa Diyos. Pinaagi sa paggamit niini ingong atong giya, atong napamatud-an nga ang paagi ni Jehova maoy labaw kaayo kay sa mga paagi sa kalibotan. (Sal. 116:12) Ato kining pribilehiyo nga ipasa kini nga mensahe ngadto sa uban, nga magtudlo kanila sa pagkuhag kaayohan sa ilang kaugalingon. Kon atong buhaton ang ingon, atong makita ang daghang maayong resulta.