Pangutana
◼ Ang mga ginikanan kinahanglang magpakitag unsang mga panagana sa dihang ang ilang gagmay pa nga mga anak makig-ambit sa pag-alagad sa kanataran?
Maayong ikuyog sa Kristohanong mga ginikanan ang ilang mga anak diha sa pag-alagad sa kanataran, nga magbansay kanila sa pagpaambit sa maayong balita sa Gingharian ngadto sa uban. Sa pagbuhat sa ingon, may panginahanglan sa pagbantay sa ilang mga kabataan tungod sa kalagmitang mga kapeligrohan diha sa teritoryo, bisan diha sa “mas hilwas” nga mga kasilinganan. Nga nagasamot, ang kabataan maoy mga tumong sa kapintasan ug pag-abuso tungod sa nag-uswag nga kadalo ug seksuwal nga pagkadaotan niining “makuyaw nga mga panahon” nga atong gipuy-an. (2 Tim. 3:1-5) Ang mga ginikanan kinahanglang maghimog makataronganong mga panagana aron sa pagpanalipod sa ilang gagmay nga mga anak gikan niadtong mobiktima kanila. Unsay mahimo?
Ang Bibliya maalamong nagtambag nga kita magmabinantayon ug abanteng mamalandong aron makita daan ang kapeligrohan. (Prov. 22:3; Mat. 10:16) Ang tumong dinhi dili aron mohimog mga lagda, apan maalamon alang sa usa ka ginikanan o laing hamtong sa pagkuyog sa usa ka bata sa dihang makig-ambit sa pag-alagad sa kanataran. Kon ang duha ka responsableng batan-ong mga magmamantala magkuyog pagsangyaw, mas maayong ang usa ka ginikanan o laing hamtong makakita nila sa tanang higayon. Siyempre, sa dihang ang bata mogulanggulang na ug mahimong mas responsable, ang mga ginikanan makahukom kon siya nagakinahanglan ba ug di-kaayo deretsong pagbantay sa ginikanan.—Tan-awa usab ang “Pangutana” sa Nobyembre 1992 nga Atong Ministeryo sa Gingharian.
Maalamon usab nga kanunayng magmahunahunaon sa kahilwasan samtang nagabiyahe pinaagig sakyanan ug samtang nagasuroysuroy. Ang paghimog hustong mga panagana kasagarang magpugong sa mga aksidente ug sa makaguol nga mga palas-anon sa kasakit, medikal nga mga galastohan, ug posibleng legal nga mga bayranan sa nagauswag nga hilig-sa-pag-asunto nga kalibotan sa atong palibot.
Maoy haom alang sa mga batan-on ang “pagdayeg sa ngalan ni Jehova.” (Sal. 148:12, 13) Ang ilang makapahimuot nga mga pulong ug maayong panggawi samtang anaa sa ministeryo sa kanataran dalayegon kaayo ngadto sa uban ug makapasidungog kang Jehova. Mga ginikanan, kutob gayod sa maarangan, tabangi ang inyong kabataan sa regular nga pagpakig-ambit sa pagmantala sa maayong balita samtang kamo usab magmaalisto kanunay sa pagpanalipod kanila gikan sa bisan unsang kalagmitang mga kapeligrohan nga nagalungtad!