Ang Tunghaan sa Teokratikanhong Ministeryo sa 2000
1 Ang Tunghaan sa Teokratikanhong Ministeryo napamatud-ang usa ka dagayang panalangin sa katawhan ni Jehova. Sa milabayng 50 ka tuig, nakatabang kini sa milyonmilyon sa pag-ugmad sa ilang mga katakos ingong mga mamumulong sa publiko ug mga magtutudlo sa mga kamatuoran sa Bibliya. (Sal. 145:10-12; Mat. 28:19, 20) Makita ba nimo kon sa unsang paagi ang tunghaan nakatabang kanimo? Makapadayon kini sa paghimo sa ingon sulod sa 2000 kon ikaw bug-os nga makig-ambit niini ug mopadapat sa tambag nga ihatag.
2 Ang mga instruksiyon bahin sa mga asaynment ug ang mga publikasyon nga gamiton gilista diha sa unang panid sa eskedyul sa tunghaan sa 2000. Ang panahon nga gigahin sa matag bahin, ang tinubdang materyal, kon sa unsang paagi ang materyal ipresentar, ug ubang mga detalye gitagad. Palihog gahinig panahon ang pagbasa sa mga instruksiyon nga maampingon ug ipadapat kana.
3 Senemanang Pagbasa sa Bibliya: Adunay duha ka bulag nga mga programa alang sa senemanang pagbasa sa Bibliya. Ang usa mao ang naandang programa sa pagbasa nga nagkobre ug halos lima ka panid sa Bibliya. Ang dagkong mga puntos (highlights) gipasukad niini nga pagbasa. Ang laing programa sa pagbasa maoy dugang sa naandang pagbasa ug magkobre ug duha ka pilong gidaghanon sa materyal. Pinaagig pagsunod niining programaha, ikaw makahimo sa pagbasa sa tibuok Bibliya sulod sa tulo ka tuig. Dayag nga ang pipila tingali buot mobasa nga kapin pa sa naeskedyul diha sa suplemental nga programa, ug ang uban dili tingali makanunot niana. Inay kay itandi ang imong kaugalingon sa uban, kalipayi kon unsay imong mapalampos. (Gal. 6:4) Ang hinungdanong butang mao ang pagbasa sa Pulong sa Diyos sa adlaw-adlaw.—Sal. 1:1-3.
4 Aron malista diha sa Tunghaan sa Teokratikanhong Ministeryo, ikaw kinahanglang makigsulti sa magtatan-aw sa tunghaan. Palihog dawata ang imong mga asaynment nga seryoso, ug ayawg kanselaha nga wala kinahanglana. Pabilhi ang tunghaan ingong usa ka tagana gikan kang Jehova. Pangandam pag-ayo, sinatia sa bug-os ang giasayn nga materyal, ug ipahayag nga kinasingkasing, nga sa ingon makabatog kaayohan sa bug-os gikan niining talagsaong tunghaan.