Mga Pangutana Gikan sa mga Magbabasa

Pagasabton ba nato gikan sa Job 1:8 nga sa panahong si Job nagkinabuhi, siya lamang ang tawo nga nagmatinumanon kang Jehova?

Dili. Kanang konklusyona wala ipakamatarong sa Job 1:8, nga nagaingon:

“Si Jehova miingon kang Satanas: ‘Gibutang mo ba ang imong kasingkasing sa akong alagad nga si Job, nga walay sama kaniya sa yuta, usa ka tawo nga walay ikasaway ug matarong, nga mahadlokon sa Diyos ug nagapahilayo sa daotan?” Ang Diyos mihatag ug susamang pagbanabana sa Job 2:3, nga nangutana kang Satanas: “Gibutang mo ba ang imong kasingkasing sa akong alagad nga si Job, nga walay sama kaniya sa yuta, usa ka tawo nga walay ikasaway ug matarong, nga mahadlokon sa Diyos ug nagapahilayo sa daotan?”

Ang basahong Job mismo nagpaila nga si Job dili mao lamang ang tawong buhi si kinsa gidawat sa Diyos ingong matinumanon. Sugod sa kapitulo 32, atong mabasa ang bahin kang Eliu. Bisan pag batan-ong lalaki, si Eliu nagtul-id sa sayop nga panglantaw ni Job ug nagbayaw sa matuod nga Diyos.​—Job 32:6–​33:6, 31-33; 35:1–​36:2.

Busa, ang komento sa Diyos nga ‘walay sama kang Job sa yuta’ kinahanglang magpasabot nga si Job ilabinang talagsaon ingong usa ka tawong matarong. Lagmit si Job nabuhi sa kinatung-an sa pagkamatay ni Jose sa Ehipto ug sa pagsugod sa pag-alagad ni Moises ingong propeta sa Diyos. Sulod nianang yugtoa sa panahon daghang mga Israelinhon nagpuyo sa Ehipto. Walay katarongan ang paghunahuna nga silang tanan dili matinumanon ug dili dalawaton sa Diyos; lagmit dihay daghan nga nagsalig kang Jehova. (Exodo 2:1-10; Hebreohanon 11:23) Apan, walay mausa kanila ang may iladong bahin, sama kang Jose, ni kadtong maong mga magsisimba talagsaon kon bahin sa matuod nga pagsimba, sama kang Moises nga maoy manguna sa nasod sa Israel sa paggawas sa Ehipto.

Hinuon, nga nagpuyo sa laing dapit, may usa ka tawo nga may talagsaong integridad. “Dihay usa ka tawo sa yuta sa Uz kansang ngalan mao si Job; ug kanang tawhana napamatud-ang walay ikasaway ug matarong, ug mahadlokon sa Diyos ug nagapahilayo sa daotan.”​—Job 1:1.

Sa ingon si Jehova nakahisgot kang Job ingong dayag o iladong panig-ingnan sa pagtuo ug pagkamahinalaron. Sa susama, ang mga magsusulat sa Bibliya nga si Ezekiel ug Santiago sa mahandomon linaing nagpaila kang Job ingong naghatag ug sumbanan sa pagkamatarong ug pagkamainantoson.​—Ezekiel 14:14; Santiago 5:11.

Tinuig nga Tigom—Oktubre 3, 1992

ANG TINUIG NGA TIGOM sa mga membro sa Watch Tower Bible and Tract Society of Pennsylvania pagahimoon sa Oktubre 3, 1992, sa Assembly Hall of Jehovah’s Witnesses, 2932 Kennedy Boulevard, Jersey City, New Jersey. Ang pasiunang tigom sa mga membro lamang himoon sa 9:30 s.b., nga sundan sa katibuk-ang tinuig nga tigom sa 10:00 s.b.

Ang mga membro sa Korporasyon angay magpahibalo sa Opisina sa Sekretaryo karon sa bisan unsang kausaban sa ilang mga adres sa sulat sulod sa miaging tuig aron ang regular nga mga sulat sa pahibalo ug proxies makaabot kanila dili dugay tapos sa Agosto 1.

Ang proxies, nga ipadala ngadto sa mga membro uban sa pahibalo sa tinuig nga tigom, igabalik aron makaabot sa Opisina sa Sekretaryo sa Sosyedad dili molapas sa Agosto 15. Matag membro kinahanglang magkompleto ug magbalik dayon sa iyang proxy, nga magpahayag kon siya moadto ba sa tigom sa personal o dili. Ang impormasyon nga ihatag diha sa matag proxy angay nga tino niining puntoha, sanglit kini saligan sa pagtino kon kinsay presente sa personal.

Gidahom nga ang enterong sesyon, apil ang pormal nga tigom pamatigayon ug mga taho, pagataposon sa pagka 1:00 s.h. o dili dugay tapos niana. Walay sesyon sa hapon. Tungod sa limitadong lugar, ang pagpasulod maoy pinaagig tiket lamang. Walay kahikayan ang himoon sa pagkonektar sa tinuig nga tigom pinaagig telepono ngadto sa ubang mga awditoryum.