Salig Kang Jehova Alang sa Kusog
1 Sa daghang katarongan, kita angayng mosalig kang Jehova. Ang pagsangyaw sa maayong balita “sa tibuok gipuy-ang yuta” maoy usa ka mahagitong asaynment. (Mat. 24:14) Sa kanunay, kita makigbisog sa atong pagkadi-hingpit. (Roma 7:21-23) Dugang pa, “kita adunay pakigdumog . . . batok sa [labaw-tawhanong] mga magmamando sa kalibotan niini nga kangitngit.” (Efe. 6:11, 12) Dayag, kita nagkinahanglag tabang. Sa unsang paagi atong maangkon ang kusog gikan kang Jehova?
2 Pinaagi sa Pag-ampo: Si Jehova dagayang maghatag sa iyang gamhanang balaang espiritu ngadto sa iyang mga alagad nga mangayo niana. (Luc. 11:13) Wala ka ba ing pagsalig sa imong katakos sa balaybalay nga pagsangyaw, sa kadalanan, o pinaagig telepono? Maulaw ka bang mosangyaw sa di-pormal nga paagi? Namenosan ba ang imong kasibot tungod sa kawalay-pagtagad sa mga tawo diha sa teritoryo? Unsa na man kon pit-oson ka nga ikompromiso ang imong pagtuo o integridad? Salig kang Jehova. Pag-ampo alang sa kusog.—Filip. 4:13.
3 Pinaagi sa Personal nga Pagtuon: Maingon nga atong maangkon ang kusog pinaagi sa pagkaon ug pisikal nga kalan-on, kita usab malig-on sa espirituwal pinaagi sa regular nga pagkaon sa Pulong sa Diyos ug sa mga publikasyon sa “matinumanon ug maalamong ulipon.” (Mat. 4:4; 24:45) Sa dihang gipangutana kon unsay nakahatag kaniyag kusog sa paglahutay sa katuigang nag-inusarang pagkabilanggo sa Tsina nga walay Bibliya, si Stanley Jones nag-ingon: “Kita makabarog nga malig-on sa pagtuo. Siyempre, magtuon una kita. Wala kitay pangsulod nga kalig-on kon dili kita magtuon.”
4 Pinaagi sa Pagtambong sa mga Tigom: Diha sa usa ka Kristohanong tigom sa unang siglo, si Judas ug Silas “nagdasig sa mga igsoon pinaagi sa daghang pakigpulong ug nagpalig-on kanila.” (Buh. 15:32) Mao usab karon, kon unsay atong mapatalinghogan diha sa mga tigom magpalalom sa atong pagpabili kang Jehova, magpalig-on sa atong pagtuo, ug magpadasig kanato sa ministeryo. Ang mga tigom magpalangkit kanunay kanato uban sa “mga isigkamagbubuhat sa gingharian sa Diyos,” kinsa atong “makapalig-on nga tabang.”—Col. 4:11.
5 Kita nagkinahanglag tabang niining “makuyaw nga mga panahong lisod sagubangon.” (2 Tim. 3:1) Bahin kanilang mokuhag kusog gikan kang Jehova, kita gipasaligan: “Sila manglupad pataas pinaagig mga pako nga sama sa mga agila. Sila managan ug dili maluya; sila manglakaw ug dili kapoyon.”—Isa. 40:31.