Tabangi ang Uban sa Paghimaya Kang Jehova
1 Usa ka hinungdanong mensahe ang ginamantala ngadto sa mga tawo sa tibuok kalibotan: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” (Pin. 14:6, 7) Maoy atong pribilehiyo ang pagpakig-ambit diha sa maong pagmantala. Unsay angayng mahibaloan sa mga tawo bahin kang Jehova aron mahadlok ug mosimba kaniya?
2 Ang Iyang Ngalan: Kinahanglan nga ang mga tawo makaarang sa pag-ila sa ngalan sa bugtong matuod nga Diyos gikan sa daghang bakak nga mga diyos nga ginasimba karon. (Deut. 4:35; 1 Cor. 8:5, 6) Sa pagkatinuod, ang mga magsusulat sa Bibliya naggamit sa dungganong ngalan ni Jehova kapin sa 7,000 ka higayon. Samtang sa hustong paagi atong gamiton ang katakos sa pag-ila kon kanus-a nato ipaila ang ngalan sa Diyos, dili gayod nato kini tagoan o likayan ang paggamit niini. Ang kabubut-on sa Diyos mao nga ang tanang tawo makaila sa iyang ngalan.—Sal. 83:18.
3 Ang Iyang Personalidad: Aron mahimaya si Jehova, ang mga tawo kinahanglang mahibalo kon unsang matanga siya sa Diyos. Kinahanglang ipasinati nato kanila ang iyang talagsaong gugma, kinalabwang kaalam, bug-os nga hustisya, ug labing gamhanang puwersa, duyog sa iyang kaluoy, mahigugmaong-kalulot, ug uban pang kahibulongang mga hiyas. (Ex. 34:6, 7) Kinahanglan usab silang makakat-on sa pagbaton sa maayong matang sa pagkahadlok sa Diyos, sa pagkataha kaniya, nga nag-ila nga ang ila gayong mga kinabuhi nagdepende sa pagkabaton sa pag-uyon ni Jehova.—Sal. 89:7.
4 Pakigsuod sa Diyos: Aron maluwas sa umaabot nga paghukom sa Diyos, ang mga tawo kinahanglang mosangpit kang Jehova diha sa pagtuo. (Roma 10:13, 14; 2 Tes. 1:8) Naglangkit kini ug labaw pa kay sa pagbaton lamang ug kahibalo bahin sa ngalan ug mga hiyas sa Diyos. Kinahanglan natong tabangan ang mga tawo sa pag-ugmad ug personal nga relasyon uban kang Jehova, nga mosalig kaniya uban sa tibuok nilang kasingkasing. (Prov. 3:5, 6) Samtang ilang ipadapat ang ilang nakat-onan, moduol sa Diyos diha sa tim-os nga pag-ampo, ug tagamtamon ang iyang tabang diha sa ilang kinabuhi, ang ilang pagtuo mouswag, nga magtabang kanila nga masuod kang Jehova.—Sal. 34:8.
5 Hinaot nga masiboton natong imantala ang ngalan sa Diyos ug tabangan ang uban sa bug-os nga pagsalig ug pagkahadlok kaniya. Kita mahimong makatabang pa ug mas daghan aron makaila kang Jehova ug makahimaya kaniya ingong ilang “Diyos sa kaluwasan.”—Sal. 25:5.