Bag-ong Programa sa Sirkitong Asembliya
1 Ang atong Agalon nagtagna nga ang iyang mga tinun-an makaagom ug kasakitan. (Mat. 24:9) Sa unsang paagi angay natong lantawon ang mga pagsulay? Unsay makapaarang kanato sa pag-antos sa kasakitan? Kining mga pangutanaha pagatubagon sa programa sa sirkitong asembliya sa 2004. Ang tema maoy “Magmaya Diha sa Paglaom. Mag-antos sa Kasakitan.”—Roma 12:12.
2 Duha ka Simposyum: Ang unang simposyum nga nag-ulohang “Pamunga Uban ang Paglahutay,” maghisgot sa mga paagi diin kita makapamunga. Ubay-ubayng mga magmamantala ang interbiyohon kon sa unsang paagi sila nagsangyaw ug nanudlo uban ang pagbati sa pagkadinalian. Ang mga ginikanan ilabina angayng maminaw sa bahin nga “Sa Dihang Disiplinahon ni Jehova,” nga maghisgot kon sa unsang paagi ang mga ginikanan makapangatarongan uban sa ilang mga anak. Ang kataposang mamumulong sa simposyum magpasiugda kon unsay angay natong himoon aron masanta ang kalibotan sa paghimog kadaot ug maghimo kanato nga dili mabungahon.—Mar. 4:19.
3 Ang tema sa ikaduhang simposyum maoy “Dagana ang Lumba Uban ang Paglahutay.” Kini magpatin-aw kon sa unsang paagi ang atong dalan sa kinabuhi maoy sama sa usa ka lumba. Nganong angay man kitang modagan sumala sa mga lagda? Sa unsang paagi kita molampos sa pagtangtang sa tanang kabug-at ug dili molunga diha sa lumba alang sa kinabuhi? Ang tukma-sa-panahon nga Kasulatanhong tambag nga ihatag motabang kanatong tanan sa pagpadayon sa pagdagan nga malahutayon.
4 Ang Pagkamalahutayon Makabaton sa Pag-uyon sa Diyos: Usa sa mga pakigpulong sa magtatan-aw sa distrito nag-ulohang “Ang Paglahutay Magpatungha ug Usa ka Inuyonang Kahimtang.” Tubagon sa pakigpulong publiko ang pangutana: Kang kansang ngalan angayng molaom ang mga nasod, ug unsay nalangkit niana? Ang paniklop nga pakigpulong, “Pinaagi sa Paglahutay Mabatonan Ninyo ang Inyong mga Kalag,” maghisgot kon sa unsang paagi si Jesus nakaantos sa inhustisya nga wala mapikal.
5 Ayawg kalimot sa pagdala sa imong libro nga Tunghaan sa Ministeryo ug ang imong Bantayanang Torre nga tun-an sa maong semana. Pagkuhag mga nota nga makatabang kanimo sa pagsentro sa imong pagtagad ug alang sa reperensiya sa umaabot. Ang usa ka repaso niining programaha pagahimoon sa ulahi diha sa kongregasyon.