Bag-ong Programa sa Adlawng Espesyal nga Asembliya
1 Daghang impormasyon ang mabatonan karong mga adlawa bahin sa paghupot sa atong literal nga kasingkasing nga maayog kahimtang aron makatagamtam ug mas malipayon ug mas taas nga kinabuhi. Apan, labawng hinungdanon ang kahimtang sa atong mahulagwayong kasingkasing. Busa, tukma gayod ang tema sa programa sa adlawng espesyal nga asembliya nga magsugod sa Pebrero 2004: “Alagara si Jehova Uban ang Bug-os nga Kasingkasing.” (1 Cron. 28:9) Unsay atong gipaabot nga makat-onan?
2 Ang magtatan-aw sa sirkito maghisgot sa “Tabangi ang Uban sa Pag-alagad Kang Jehova Uban ang Usa ka Malipayong Kalag.” Ang mga interbiyo magpasiugda sa kalipay nga moresulta gumikan sa pag-ugmad sa interes ug pagdumala ug mga pagtuon sa Bibliya. Ang tanang manambong walay duhaduha nga mahupay ug madasig gikan sa unang pakigpulong sa nagaduaw nga mamumulong, “Pagbantay sa Atong Kasingkasing Diha sa Gubot nga Kalibotan.” Ang sesyon sa buntag taposon pinaagi sa pakigpulong sa bawtismo.
3 Sa hapon, ang bahin nga “Ihatag ang Tabang” maghisgot kon sa unsang paagi kita makaabag sa uban. Unsay mahimo sa mga ginikanan sa pagpanalipod sa kasingkasing sa ilang mga anak batok sa sayop nga mga impluwensiya ug sa pagtabang kanila nga masuod kang Jehova? Ang bahin nga “Tabangi ang Inyong mga Anak nga Malipay Diha Kang Jehova” maghatag ug praktikal nga mga sugyot ug magpasundayag kon sa unsang paagi kini himoon.
4 Gipahimuslan ba nato ang tanang tagana ni Jehova aron atong mahuptan ang atong mahulagwayong kasingkasing nga himsog ug lig-on? Ang kataposang pakigpulong sa nagaduaw nga mamumulong, “Hupti ang Bug-os nga Kasingkasing sa Pag-alagad Kang Jehova,” magsentro sa pagtagad sa upat ka pangunang mga bahin sa atong rutina aron mamentinar ang atong espirituwalidad. Unsa ka daghan ang panahon ug paningkamot nga atong gigahin sa kinasingkasing nga pag-ampo, sa pagtuon sa Pulong sa Diyos, sa masibotong pagsangyaw, ug sa pagpakig-uban sa ubang mga Kristohanon? Mapauswag ba nato ang bisan hain niining mga bahina?
5 Si Jehova nagpaabot sa imbitasyon: “Ibutang ang imong kasingkasing sa disiplina ug ang imong igdulungog ngadto sa mga pulong sa kahibalo.” (Prov. 23:12) Pagplano na karon nga makatambong niining mapuslanong adlaw sa Kasulatanhong pagpanudlo. Ang paghimo niana mopalig-on kanimo nga padayong mag-alagad kang Jehova uban ang bug-os nga kasingkasing.