Pangutana

■ Kinahanglan ba natong isulti ang kahikayan sa donasyon ngadto sa tagbalay sa matag higayon nga moduaw kita kaniya?

Dili. Kinahanglang gamiton ang maayong panghukom maylabot niini. Gusto natong matin-aw sa hunahuna sa mga tawo nga ang atong gihimo mao gayoy edukasyonal nga buluhaton sa Bibliya ug dili komersiyal nga kalihokan. Wala kita mangayog mga donasyon.

Sa katibuk-an makaayo ang pagpatin-aw pag-ayo kon sa unsang paagi ang atong buluhaton gipaluyohan sa boluntaryong mga donasyon sa dihang una natong napahimutangan ug literatura ang interesadong mga tawo. Tungod kay ibilin man nato ang literatura ngadto lamang sa mga tawong nagpakitag interes o gustong mobasa sa atong literatura, kasagaran ang maong mga tawo malipay nga moamot.

Daghan sa maong interesadong mga tawo ang boluntaryong mohatag ug mga donasyon sa sunod nga mga duaw. Ang uban mahimong mangutana kon tagpila ang usa ka literatura. Atong ikapatin-aw sa mubo nga ang atong buluhaton dili komersiyal, nga magpatin-aw nga kita nagtanyag sa atong literatura nga walay tinong kantidad, apan si bisan kinsa nga gustong mopaluyo sa tibuok-kalibotang buluhaton mahimong makahatag ug kasarangan boluntaryong donasyon. Ngadtongadto, kon nahiangay, kita makahisgot bahin sa kahikayan sa pagpaluyo sa tibuok-kalibotang buluhaton kon ang tawo nga atong ginaduaw dili mobuhat niana.

Angay natong hinumdoman nga bisan pag atong itanyag ang atong literatura nga walay tinong kantidad, dakong salapi ang nalangkit sa pag-imprenta ug pag-apod-apod sa atong literatura. Moamot man ang mga tagbalay o dili alang niini, ang tanang magmamantala ug mga payunir angayng mobati sa responsabilidad sa pagpaluyo sa tibuok-kalibotang buluhaton kutob sa ilang maarangan. Ang uban mohimo niini sa dihang mokuhag literatura o sila mohatag ug tinong donasyon kada semana o kada bulan. Sa dihang himoon kini, ang maong mga donasyon angayng buhaton sa hapsay ug regular nga paagi sumala sa pag-uswag sa maghahatag.​—1 Cor. 16:2.

Masaligon kita nga palihokon sa espiritu sa Diyos ang iyang mga alagad ug ang interesadong mga tawo diha sa kanataran sa paghatag ug boluntaryong mga donasyon aron makobrehan ang galastohan sa tanang bahin sa tibuok-kalibotang buluhaton.