Pagbantay Pag-ayo sa Imong Paggamit sa Panahon

1. Unsang suliran ang giatubang sa mga tawo bisan diin karong adlawa?

¹ Niining atong panahon diin daghang himan ang makapamenos sa panahon ug kahago, nakaplagan sa daghan nga morag daghan silag mga butang nga himoon apan diyutay ra ang ilang panahon sa paghimo niana. Nalisdan ka ba niana sa paghupot kanunay ug maayong espirituwal nga rutina? Nangandoy ka ba nga unta may dugang panahon ka alang sa ministeryo? Sa unsang paagi atong magamit ang atong panahon sa labing maayong paagi?—Sal. 90:12; Filip. 1:9-11.

2, 3. Unsang mga suliran ang ipatungha sa teknolohiya bahin sa impormasyon, ug sa unsang paagi ang matag usa kanato makasusi sa kaugalingon?

² Ilha ang mga Tig-usik ug Panahon: Kitang tanan angayng magsusi sa popanahon kon giunsa nato paggamit ang atong panahon. Ang Bibliya nag-awhag: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” (Efe. 5:15, 16) Tagda ang mga suliran nga gipatungha sa nag-uswag nga teknolohiya bahin sa impormasyon. Bisan tuod ug mapuslanon ang paggamit ug mga kompiyuter ug uban pang elektronikong mga himan, kini mahimong lit-ag kon dili kita magbantay pag-ayo sa atong paggamit sa panahon.—1 Cor. 7:29, 31.

³ Ang matag usa kanato angayng pangutan-on ang iyang kaugalingon: ‘Nakagugol ba ako ug panahon matag adlaw sa pagbasa o pagtubag sa mga sulat diha sa E-mail nga dili ra gayod hinungdanon? Kanunay ba akong manawag sa telepono ug magpadalag mga text message bahin sa di-hinungdanong mga butang? (1 Tim. 5:13) Motan-aw ba ako ug Internet nga wala ray katuyoan o way-tumong nga pagbalhinbalhin ug channel sa dihang magtan-aw ug telebisyon? Nakabalda ba ang akong pagsigeg dula ug elektronikong mga dula diha sa akong pagtuon sa Pulong sa Diyos?’ Ang maong mga kalihokan mahimong magdaot sa atong espirituwalidad sa malipotong paagi.—Prov. 12:11.

4. Unsang kausaban ang gihimo sa usa ka batan-on, ug ngano?

⁴ Maalamong Paggamit sa Panahon: Ang elektronikong mga himan dali nga makakuha sa atong panahon ug pagtagad. Ang usa ka batan-on nga kanhi nalinga pag-ayo sa mga dula sa kompiyuter miangkon: “Usahay sa dihang magdula ako sa dili pa mosangyaw o motambong sa Kristohanong panagkatigom, malisdan ako sa pagsentro sa pagtagad. Ang akong gihunahuna halos mao na lang kon unsaon nako pagsulbad ang problema sa usa ka dula inig-uli nako sa balay. Naapektohan ang akong personal nga pagtuon ug regular nga pagbasa sa Bibliya. Ang akong kalipay sa pag-alagad sa Diyos misugod pagkahanaw.” Kay nakaamgo nga kinahanglan siyang mohimog mga kausaban, iyang gipapas ang tanan niyang mga dula sa kompiyuter. “Lisod kaayo kadto,” siya nahinumdom. “Mas nalangkit na diay ako sa dula kay sa akong gihunahuna. Apan naeksperyensiyahan usab nako ang nindot nga pagbati sa kadaogan tungod kay nahibalo ako nga gibuhat ko kadto alang sa akong kaayohan.”—Mat. 5:29, 30.

5. Sa unsang paagi kita makapalit ug panahon alang sa espirituwal nga mga kalihokan, ug sa unsang paagi kita makabenepisyo gumikan sa paghimo niana?

⁵ Mahimong kinahanglanon ang paghimo sa maong mga lakang kon dunay mga luna nga kinahanglan mo nga mohimog mga kausaban. Makapalit ka bag tunga sa oras kada adlaw gikan sa di-hinungdanong mga kalihokan? Kana mao ang hapit nga gidaghanon sa panahon nga imong gikinahanglan aron mabasa ang tibuok Bibliya sa usa ka tuig. Dayag nga magantihon gayod kana sa espirituwal! (Sal. 19:7-11; 119:97-100) Pagbutang ug tinong mga panahon alang sa pagbasa sa Bibliya, pagpangandam sa tigom, ug sa ministeryo sa kanataran. (1 Cor. 15:58) Ang paghimo niana motabang kanimo sa pagkontrolar sa mga tig-usik ug panahon ug motabang kanimo nga ‘padayong sabton kon unsa ang kabubut-on ni Jehova.’—Efe. 5:17.

Kon Unsay Isulti Labot sa mga Magasin

Ang Bantayanang Torre Ene. 15

“Tungod kay ang mga saad nga wala matuman maoy komon kaayo karong mga adlawa, daghan ang nalisdan sa pagsalig kang bisan kinsa. Sa imong hunahuna aduna bay usa kansang mga saad atong masaligan? [Tugoting motubag. Dayon basaha ang Josue 23:14.] Kining magasina nagpakita kon sa unsang paagi atong maugmad ang pagsalig diha sa mga saad sa Diyos nga narekord sa Bibliya.”

Pagmata! Ene. 22

“Mao ni ang dagway sa personal nga ngalan sa Diyos sa Hebreohanong pinulongan. [Ipakita ang hapin.] Nagtuo gayod ang pipila ka tawo nga kining ngalana dili gayod angayng litokon. Ang uban naggamit niana nga walay pagpanuko. Kining gulaa sa Pagmata! nagsusi niining maong kontrobersiya. Gihisgotan usab niini kon sa unsang paagi atong mahibaloan ang ngalan sa Diyos.” Basaha ang Salmo 83:18.

Ang Bantayanang Torre Peb. 1

“Kadaghanan kanato maampingon gayod sa atong pisikal nga kahimsog. Apan, ang di pa dugayng mga pagtuon nagsugyot nga ang atong maayong panglawas maapektohan usab pinaagi sa atong espirituwalidad. Nagtuo ka ba nga posible kana? [Tugoting motubag. Dayon basaha ang Mateo 5:3.] Kining gulaa sa Ang Bantayanang Torre naghisgot kon sa unsang paagi atong matagbaw ang atong espirituwal nga panginahanglan.”

Pagmata! Peb. 8

“Daghan karon ang puliki kaayo sa ilang mga kinabuhi ug nagkinahanglag igong pahulay. Tingali mouyon ka niining mga pulonga nga gisulat kapin sa 3,000 ka tuig kanhi. [Basaha ang Ecclesiastes 4:6. Dayon tugoting motubag.] Kining gulaa sa Pagmata! naghisgot ug mapuslanong impormasyon kon sa unsang paagi mailhan ug masagubang ang suliran bahin sa utang sa pagkatulog.”