Bahin 6—Pagdumalag Mauswagong mga Pagtuon sa Bibliya

Kon Mangutana ang Ginatun-an

¹ Sa dihang matukod na pag-ayo ang pagtuon sa Bibliya, kasagaran labing maayo nga mahisgotan ang mga pagtulon-an sa Bibliya sa sistematikong paagi imbes nga kalit magbalhinbalhin gikan sa usa ka ulohan ngadto sa laing ulohan. Kini makatabang sa ginatun-an nga makatukod ug pundasyon sa tukmang kahibalo ug mouswag sa espirituwal. (Col. 1:9, 10) Ugaling lang, ang mga ginatun-an sagad mopatunghag mga pangutana labot sa lainlaing mga ulohan panahon sa pagtuon. Sa unsang paagi kini dumalahon?

² Magmasinaboton: Ang mga pangutana nga dunay kalabotan sa ginatun-ang materyal mahimong tubagon dayon. Kon ang pangutana pagahisgotan ra sa ulahing bahin sa ginatun-ang basahon, tingali igo na ang pagpunting lamang niana. Apan, kon ang pangutana wala ing kalabotan sa ginatun-ang materyal o nanginahanglag pagpanukiduki aron matubag sa hustong paagi, labing maayong hisgotan kana human sa pagtuon o sa laing higayon. Namatikdan sa uban nga ang pagsulat sa pangutana nagpasalig sa ginatun-an nga ang iyang pangutana seryosong gihunahuna ug sa samang higayon makatabang nga dili mabalda ang pagtuon.

³ Daghang pagtulon-an sa Bibliya ang gihisgotan lang sa mubo diha sa atong paninugdang mga basahon nga ginatun-an. Unsay angayng himoon kon ang ginatun-an dili makadawat sa usa ka pagtulon-an o lig-ong nagtuo sa bakak nga pagtulon-an? Hayan mapuslanon ang pagtagad sa dugang materyal nga bug-os naghisgot kon unsay giingon sa Bibliya bahin sa maong ulohan. Kon dili gihapon makombinsir ang ginatun-an, biyai una ang maong ulohan nga hisgotan sa sunod higayon ug ipadayon ang iyang regular nga pagtuon. (Juan 16:12) Samtang modaghan ang iyang kahibalo bahin sa Bibliya ug mouswag sa espirituwal, hayan masabtan ra niya ang maong pagtulon-an sa Bibliya.

⁴ Magmakasaranganon: Kon dili ka segurado sa tubag sa pangutana, likayi nga matental sa paghatag ug kaugalingong opinyon. (2 Tim. 2:15; 1 Ped. 4:11) Ipatin-aw nga imong panukidukion una ang maong pangutana ug tubagon kana sa imong pagbalik. Magamit pa gani nimo ang maong kahigayonan sa pagtudlo sa ginatun-an kon unsaon sa pagpanukiduki. Sa inanay ipakita kaniya kon unsaon paggamit ang lainlaing mga himan sa pagpanukiduki nga gitagana sa organisasyon ni Jehova. Nianang paagiha siya sa ngadtongadto makaarang sa pagtubag sa iyang kaugalingong mga pangutana.—Buh. 17:11.

Tabangi Silang Mahatagag Dugang Pamatuod

¹ Samtang atong iwali ang maayong balita, kita subsob makahibalag ug mga tawo nga wala magpuyo sa atong teritoryo o nagsultig laing pinulongan, nga naglakip sa senyas nga pinulongan. Ang uban nga atong gidumalahan ug mauswagong mga panaghisgot sa Bibliya basin mobalhin ug puy-anan nga gawas na sa atong teritoryo. Sa unsang paagi ato silang mahatagag dugang pamatuod? Pinaagi sa paggamit sa Please Follow Up (S-43) nga porma.

² Ang mga tawo sagad mamati pag-ayo sa maayong balita kon kini gipresentar diha sa kaugalingon nilang pinulongan. (Buh. 22:1, 2) Busa, sa kadaghanang kahimtang, kon makahibalag kitag tawo nga nagsulti ug laing pinulongan, angay natong pil-apan ang porma bisan pag ang maong tawo wala magpakitag interes sa mensahe sa Gingharian. Hinunoa, kon ubay-ubay gayod ang mga tawong nagsultig langyaw nga pinulongan nga kanunayng masangyawan ginamit ang kaugalingon nilang pinulongan, dili na tingali kinahanglang pil-apan pa ang maong porma gawas kon adunay interes nga gipakita.

³ Pagpil-ap sa Porma: Mataktikanhong kuhaa ang ngalan, adres, ug numero sa telepono sa maong tawo. Isulat kon unsa ka dako ang interes nga iyang gipakita, kon kanus-a siya maabtan sa ilaha, kon unsang literatura ang napahimutang o gihangyo, ug kon unsang pinulongan nga masabtan pag-ayo sa maong tawo. Human mapil-api kining pormaha, ihatag dayon kini sa sekretaryo sa kongregasyon, nga maoy mopadala niini ngadto sa haom nga kongregasyon o grupo.

⁴ Pagpadala sa Porma: Kon ang sekretaryo wala mahibalo kon unsang kongregasyona o grupoha ang iyang padad-an sa maong porma o walay adres sa padalhan, mahimo niyang ipadala kini sa sangang buhatan aron ikapadala kini ngadto sa haom nga kongregasyon o grupo.

⁵ Sa dihang makadawat ang kongregasyon o grupo sa napil-apang Please Follow Up nga porma, kinahanglang himoon ang mga kahikayan sa pagduaw dayon sa maong tawo. Samtang makugihon natong buhaton ang atong bahin, makasalig kita nga buksan ni Jehova ang kasingkasing niadtong “hustong nakiling alang sa kinabuhing walay kataposan.”—Buh. 13:48.