⁶ Ingong Usa ka Mahigugmaong Magbalantay: Ang magtatan-aw sa pagtuon sa libro interesado niadtong kinsa tungod sa ilang mga kahimtang gamay lang ug mahimo diha sa buluhatong pagsangyaw. Paneguroon niya nga kadtong diyutay lang gayod ang mahimo tungod sa katigulangon o tungod kay dili na makagawas sa balay ug kadtong temporaryong dili makahimo tungod sa grabeng sakit o kadaot mahibalo nga adunay kahikayan nga magtugot kanila sa pagtaho sa oras sa pag-alagad diha sa tag-15-minutos nga gidaghanon kon dili sila makaarang sa pagtaho ug usa ka oras sulod sa usa ka bulan. (Tinoon sa Komite sa Pag-alagad sa Kongregasyon kon kinsay kuwalipikado niining kahikayana.) Interesado usab siya niadtong giasayn sa grupo nga nahimong di-aktibo, nga maningkamot sa pagtabang kanila nga mapadayon ang ilang kalihokan uban sa kongregasyon.​—Luc. 15:4-7.

Kon Unsay Isulti Labot sa mga Magasin

Ang Bantayanang Torre Okt. 15

“Unsaon nimo pagpatin-aw ngadto sa mga bata o sa ubang mga tawo kon nganong daghan kaayong daotang mga butang nga nahitabo karong adlawa? [Tugoting motubag.] Ang Bibliya nagtubag sa pangutanang, ‘Kinsay Nagpaluyo sa Tanang Pagkadaotan?’ [Basaha ang 1 Juan 5:19.] Kining gulaa sa Ang Bantayanang Torre motabang kanimo sa pagsabot kon kinsa kanang maong daotan ug kon sa unsang paagi makasukol kita kaniya.”

Pagmata! Okt. 22

“Nagtuo ka ba nga ang mga pag-ampo sa relihiyosong mga lider o ni bisan kinsa makapatunghag pakigdait sa kalibotan? [Tugoting motubag.] Ang Bibliya nagsaad ug usa ka panahon sa tibuok-kalibotang pakigdait. [Basaha ang Isaias 9:​6, 7.] Namatikdan mo ba nga usa ka linaing magmamando ang makapatunghag pakigdait sa kalibotan? Gibutyag niining gulaa sa Pagmata! kon kinsa ang maong magmamando ug kon sa unsang paagi iyang ipatungha ang tinuod nga pakigdait.”

Ang Bantayanang Torre Nob. 1

“Daghan kanato ang maningkamot nga makabaton ug makigdaitong relasyon sa ubang mga tawo. Apan lagmit mouyon ka nga kasagaran sayon lang kining isulti kay sa buhaton. [Tugoting motubag.] Ang Bibliya nagpatin-aw kon nganong lisod kining buhaton. [Basaha ang Santiago 3:2.] Kining artikuloha nagpakita kon sa unsang paagi ang pagpangayog pasaylo mahimong dakog ikatabang sa pagpasig-uli ug paghupot sa pakigdait.”

Pagmata! Nob. 8

“Gipaila sa tagna sa Bibliya nga taliabot ang panahon sa dihang wala nay tawo nga moingon, ‘Ako masakiton.’ [Basaha ang Isaias 33:24.] Dili ba kana katingalahan? [Tugoting motubag.] Hinunoa, ang katawhan karong adlawa nakaagom ug daghang balatian, lakip ang hampak sa AIDS. Kining gulaa sa Pagmata! nagtubag sa pangutana, ‘Mahunong ba ang Makamatay nga Pagkaylap sa AIDS?’”