Bahin 4—Pagdumalag Mauswagong mga Pagtuon sa Bibliya

Pagbansay sa mga Estudyante sa Pagpangandam

¹ Ang estudyante nga abanteng magbasa sa leksiyon, maglinya sa mga tubag, ug maghunahuna kon unsaon pagpahayag niana sa iyang kaugalingong mga pulong sagad kusog nga mouswag sa espirituwal. Busa, sa dihang maregular na ang pagtuon, duyog ninyong andamon ang usa ka leksiyon aron ipakita sa estudyante kon unsaon pagpangandam. Sa kadaghanang estudyante, mapuslanon nga duyog ninyong andamon ang tibuok nga kapitulo o leksiyon.

² Paglinya ug Paghimog mga Nota: Isaysay kon unsaon pagpangitag laktod nga mga tubag sa gipatik nga mga pangutana. Ipakita sa estudyante ang imong kopya sa gitun-an nga publikasyon nga niana imong gilinyahan lamang ang pangunang mga pulong o mga prase. Samtang imong hisgotan ang materyal, hayan buot niyang sundogon ang imong panig-ingnan, nga maglinya lamang diha sa iyang kopya kon unsay gikinahanglan aron makatabang kaniya sa paghinumdom sa tubag. (Luc. 6:40) Dayon hangyoa siya sa pagtubag sa iyang kaugalingong mga pulong. Sa ingon imong matino kon nasabtan ba gayod niya ang materyal.

³ Ang maampingong pagsusi sa wala-kutloa nga mga teksto usa ka hinungdanong bahin sa pagpangandam sa estudyante alang sa pagtuon. (Buh. 17:11) Tabangi siya sa pagsabot nga ang matag gisitar nga teksto nagsuportar sa usa ka punto diha sa parapo. Ipakita kaniya kon unsaon paghimog mugbong mga nota diha sa kilid sa iyang gitun-an nga publikasyon. Pasabta siya nga ang Bibliya mao ang pasukaranan sa iyang ginatun-an. Dasiga siya nga gamiton ug maayo ang gisitar nga mga teksto diha sa iyang mga komento panahon sa pagtuon.

⁴ Pagsuta ug Pagrepaso: Sa dili pa sugdan sa estudyante ang iyang detalyadong pagpangandam sa tun-anang materyal, mas maayo kon iya unang sutaon ang katibuk-an sa ulohan. Ipakita nga iyang masuta ang materyal pinaagi sa pagmatikod sa ulohan sa kapitulo, mga sub-ulohan, ug mga ilustrasyon. Isaysay nga sa dili pa niya humanon ang pagpangandam, siya maalamon nga mogahig panahon aron repasohon ang pangunang mga punto nga gipresentar sa leksiyon, tingali gamiton ang kahon sa repaso kon kini gilakip. Ang maong pagsubli motabang kaniya nga masilsil ang impormasyon.

⁵ Ang pagbansay sa estudyante sa pagpangandam pag-ayo sa iyang pagtuon motabang kaniya sa paghimog makahuloganong mga komento diha sa mga tigom sa kongregasyon. Motabang usab kini kaniya sa pag-ugmad sa mga batasan sa pagtuon nga malungtarong magmapuslanon kaniya human sa iyang nakompleto nang personal nga pagtuon sa Bibliya.

Bag-ong Tagana sa Pagtabang Kanato sa Pag-ayad Gikan sa Dugo

Giaprobahan sa Nagamandong Lawas ang bag-ong dokumento nga nag-ulohang Durable Power of Attorney for Health Care (DPA) aron ipuli sa kanhing Advance Medical Directive/Release kard.

Kinahanglan nga imong pil-apan ang DPA kard, nga balido kini bisan kanus-a o walay tagal ug magsilbi ingong usa ka pahayag sa imong mga kagustohan bisan kon ikaw mobiyahe sa ubang nasod. Sa umaabot, angay kang magpil-ap ug bag-ong DPA kard kon (1) kinahanglang mohimo kag bisan unsang mga kausaban sa imong DPA kard, sama sa pag-usab sa imong mga kagustohan, mga hawas sa pag-atiman sa panglawas, mga adres, ug mga numero sa telepono, o (2) kon ang imong DPA kard nawala o nadaot.

Ang DPA kard kinahanglang mainampoong tagdon ug maampingong pil-apan didto sa balay. Apan, sa dili pa pirmahan ang kard, tinoa nga ang duha ka saksi nga imong pilion presente inigpirma nimo niini. Ang mga magtatan-aw sa pagtuon sa libro sa popanahon mahimong magsusi niadtong wala pa makapil-ap ug bag-ong mga kard aron makita kon gikinahanglan ba ang tabang.

Sa dili pa pil-on ang DPA kard, paghimog mga kopya nga maayong pagkaseroks alang sa imong hawas sa pag-atiman sa panglawas, kapuling hawas sa pag-atiman sa panglawas, ug doktor, maingon man sa imong kaugalingong mga rekord. Mahimo usab nga ikaw maghimog mga kopya alang sa ubang mga membro sa pamilya ug sa sekretaryo sa kongregasyon. Ang mga kopya kinahanglan nga dili luyog-luyo diha sa gamay nga kuponban (8 1⁄2” x 11”), diin ang DPA kard mahimutang diha sa tunga sa panid. Ang orihinal nga DPA kard, nga dili sineroks, maoy imong daladalaon.

Ang Identity Card alang sa di-bawtismadong mga anak sa mga Saksing ginikanan wala mausab. Angayng tinoon sa mga ginikanan nga ang kard alang sa matag usa sa menor-de-edad nga anak maayong pagkapil-ap ug pagkapirma ug ang bata magdala niana sa nahiangay nga mga panahon.

Ang di-bawtismadong mga magmamantala mahimong ilang ipasibo ang pagkasulti sa DPA kard ug sa Identity Card aron ilang ikasulat ang mga instruksiyon sa pag-atiman sa panglawas alang sa ilang kaugalingon ug sa ilang mga anak. Ang sekretaryo kinahanglang maghatag ug usa ka DPA kard alang sa tanang bag-ong bawtismadong mga magmamantala.