“Inamoma sa mga Pulong sa Pagtuo”

¹ Ang pagkinabuhi nga may diyosnong pagkamahinalaron nagkinahanglag dakong paningkamot. (1 Tim. 4:7-10) Sa atong kaugalingong kusog, kita sa di-madugay maluya ug mapandol sa pagpaningkamot sa pagsunod sa maong pagkinabuhi. (Isa. 40:29-31) Ang usa ka paagi nga kita makakuhag kusog gikan kang Jehova mao ang pagkahimong “inamoma sa mga pulong sa pagtuo.”—1 Tim. 4:6.

² Dagayang Espirituwal nga Pagkaon: Pinaagi sa iyang Pulong ug sa “matinumanon ug maalamong ulipon,” si Jehova nagtaganag dagayang espirituwal nga pagkaon. (Mat. 24:45) Gibuhat ba nato ang atong bahin aron makabenepisyo gikan niana? Gibasa ba nato ang Bibliya kada adlaw? Gigahinan ba natog panahon ang personal nga pagtuon ug pagpamalandong? (Sal. 1:2, 3) Ang maong mahimsog nga espirituwal nga diyeta makapalagsik ug makapanalipod kanato gikan sa makapaluya nga mga epekto sa kalibotan ni Satanas. (1 Juan 5:19) Kon atong pun-on ang atong hunahuna sa maayong mga butang ug ipadapat kini sa atong kinabuhi, si Jehova magauban kanato.—Filip. 4:8, 9.

³ Si Jehova nagapalig-on usab kanato pinaagi sa mga tigom sa kongregasyon. (Heb. 10:24, 25) Ang espirituwal nga instruksiyon ug maayong panag-ubanay nga makita diha sa maong mga panagkatigom makapalig-on kanato sa pagbarog nga malig-on bisan pa sa mga pagsulay. (1 Ped. 5:9, 10) Usa ka Kristohanong batan-on nag-ingon: “Ako moeskuyla sa tibuok adlaw, ug kini makapaluya kanako. Apan ang mga tigom nahisamag tuboran sa tubig diha sa desyerto, diin ako mapalagsik aron makatungha na usab sa sunod adlaw.” Panalanginan gayod kita tungod sa paningkamot nga atong ginahimo sa pagtambong sa mga tigom!

⁴ Pagmantala sa Kamatuoran: Ang pagwali ngadto sa uban nahisamag pagkaon alang kang Jesus. Kini nakapalagsik kaniya. (Juan 4:32-34) Sa samang paagi, sa dihang kita makig-estorya sa uban bahin sa kahibulongang mga saad sa Diyos, kita mobatig kalagsik. Ang pagkahimong puliki diha sa ministeryo makahupot usab sa atong kasingkasing ug hunahuna nga nasentro sa Gingharian ug sa mga panalangin nga moabot sa dili madugay. Kana makapalagsik gayod kanato.—Mat. 11:28-30.

⁵ Pagkadako sa atong pribilehiyo nga makabenepisyo sa dagayang espirituwal nga pagkaon nga gitagana ni Jehova sa iyang katawhan karon! Hinaot magpadayon kita sa paghugyaw sa kalipay alang sa iyang kadayeganan.—Isa. 65:13, 14.

Bahin 5—Pagdumalag Mauswagong mga Pagtuon sa Bibliya

Tinoa Kon Unsa ka Daghang Materyal ang Kobrehan

¹ Sa dihang nagpanudlo, gikonsiderar ni Jesus ang mga limitasyon sa iyang mga tinun-an, nga nagsulti kanila “kutob sa maarangan nila sa pagpatalinghog.” (Mar. 4:33; Juan 16:12) Sa samang paagi, kinahanglang tinoon sa mga magtutudlo sa Pulong sa Diyos karon kon unsa ka daghang materyal ang ilang angayng kobrehan sa gitugot nga panahon diha sa usa ka pagtuon sa Bibliya. Ang gidaghanon sa materyal nga pagakobrehan magdepende sa katakos ug mga kahimtang sa magtutudlo ug sa ginatun-an.

² Tukora ang Lig-ong Pagtuo: Ang pipila nga mga ginatun-an hayan nagkinahanglag duha o tulo ka sesyon sa pagtuon aron masabtan ang samang materyal nga masabtan dayon sa ubang mga ginatun-an sa usa lang ka sesyon sa pagtuon. Mas hinungdanon nga atong tabangan ang ginatun-an nga tin-awng makasabot sa materyal kay sa kobrehan ang daghang materyal sulod lamang sa mubong panahon. Ang matag ginatun-an nagkinahanglag lig-ong patukoranan sa bag-o niyang nakaplagang pagtuo sa Pulong sa Diyos.—Prov. 4:7; Roma 12:2.

³ Samtang dumalahon mo ang pagtuon kada semana, gamita gayod ang bisan unsang panahon nga gikinahanglan aron matabangan ang ginatun-an sa pagsabot ug pagdawat sa iyang nakat-onan gikan sa Pulong sa Diyos. Ayaw pagdalidali aron mapahimuslan gayod sa ginatun-an ang bililhong kamatuoran nga imong ginatudlo. Gahinig igong panahon ang pagsentro sa pagtagad sa pangunang mga punto ug paghisgot sa yawing mga teksto nga mopamatuod sa mga pagtulon-an.—2 Tim. 3:16, 17.

⁴ Ayawg Langana ang Pagtuon: Bisan tuod dili nato gustong magdalidali sa pagtuon, dili usab nato gustong malangan ang pagtuon. Kon ang ginatun-an makiling sa pagsulti ug daghan bahin sa personal nga mga butang, tingali angay natong hikayon nga hisgotan kanang mga butanga inigkahuman sa pagtuon.—Eccl. 3:1.

⁵ Sa laing bahin, tungod sa ato mismong kadasig dapig sa kamatuoran nga malisdan kita nga dili daghan kaayog isulti panahon sa pagtuon. (Sal. 145:6, 7) Bisan tuod mapuslanon sa pagtuon ang panalagsang paghisgot ug dugang punto o kasinatian, apan dili nato gustong daghanon o tas-on kini aron dili mababagan ang ginatun-an sa pagkuhag tukmang kahibalo sa paninugdang mga pagtulon-an sa Bibliya.

⁶ Pinaagi sa pagkobre ug igoigong gidaghanon sa materyal sa matag sesyon sa pagtuon, atong matabangan ang mga ginatun-an sa ‘paglakaw diha sa kahayag ni Jehova.’—Isa. 2:5.