Bahin 7: Pagdumalag Mauswagong mga Pagtuon sa Bibliya

Itanyag ang Pag-ampo Panahon sa Pagtuon

1. (a) Nganong haom nga buksan ug taposon ang usa ka pagtuon sa Bibliya pinaagig pag-ampo? (b) Sa unsang paagi atong ikasugyot ang pag-ampo panahon sa usa ka pagtuon sa Bibliya?

¹ Aron ang mga ginatun-an sa Bibliya mouswag sa espirituwal, hinungdanon ang panalangin ni Jehova. (1 Cor. 3:6) Busa, haom ang pagbukas ug pagtapos sa pagtuon pinaagig pag-ampo. Kasagaran mahimo nato kini sa unang higayon mismo uban sa mga tawong relihiyoso. Apan alang sa ubang ginatun-an, kinahanglan tingali natong ilhon ang haom nga panahon sa pagtanyag ug pag-ampo. Mahimo nimong gamiton ang Salmo 25:4, 5 ug ang 1 Juan 5:14 aron matabangan ang ginatun-an nga makasabot kon nganong angayng mag-ampo ug gamita usab ang Juan 15:16 sa pagpatin-aw sa kahinungdanon sa pag-ampo ngadto kang Jehova pinaagi kang Jesu-Kristo.

2. Kon ang usa ka sister ubanan sa usa ka bawtismadong igsoong lalaki o di-bawtismadong magmamantala nga lalaki, kinsay motanyag sa pag-ampo?

² Kinsay moampo panahon sa usa ka pagtuon sa Bibliya? Kon ubanan sa usa ka bawtismadong igsoong lalaki ang usa ka sister panahon sa usa ka pagtuon, ang maong igsoong lalaki maoy motanyag sa pag-ampo, bisan tuod ang sister maoy modumala sa pagtuon nga magpandong. (1 Cor. 11:5, 10) Sa laing bahin, kon ubanan sa usa ka lalaki nga di-bawtismadong magmamantala sa Gingharian ang usa ka sister panahon sa pagtuon, ang sister maoy motanyag sa pag-ampo. Sa maong kahimtang, ang sister kinahanglang magpandong sa dihang mag-ampo ug sa dihang siya magdumala sa pagtuon.

3. Unsa ang haom nga mga butang nga angayng ilakip sa mga pag-ampo nga itanyag panahon sa pagtuon sa Bibliya?

³ Kon Unsay Mahimong Ilakip sa Pag-ampo: Ang mga pag-ampo panahon sa pagtuon dili man kinahanglang taas, apan kini angayng magmaespesipiko. Gawas pa sa pagpangayo sa panalangin sa Diyos sa maong pagtuon ug pagpasalamat alang sa mga kamatuoran nga nakat-onan, maoy haom ang pagdayeg kang Jehova ingong Tuboran sa instruksiyon. (Isa. 54:13) Ikalakip usab nato ang mga pulong nga nagbanaag sa atong sinserong interes sa ginatun-an ug sa atong pagpabili sa organisasyon nga gigamit ni Jehova. (1 Tes. 1:2, 3; 2:7, 8) Ang atong paghangyo nga panalanginan ni Jehova ang mga paningkamot sa ginatun-an sa pagpadapat kon unsay iyang nakat-onan makatabang kaniya sa pagkasabot sa kahinungdanon sa pagkahimong “magtutuman sa pulong.”—Sant. 1:22.

4. Ang pagbukas ug pagtapos sa pagtuon sa Bibliya pinaagig pag-ampo adunay unsang mga kaayohan?

⁴ Dunay daghang kaayohan ang pag-ampo. Kini magdalag panalangin sa Diyos. (Luc. 11:13) Kini nagpasiugda sa pagkaseryoso sa pagtuon sa Pulong sa Diyos. Samtang maminaw ang ginatun-an sa atong mga pag-ampo, siya makakat-on kon unsaon sa pag-ampo. (Luc. 6:40) Dugang pa, ang mga pag-ampo nga maggikan sa kasingkasing nga puno sa gugma alang sa Diyos ug pagpasalamat alang sa iyang di-hitupngang mga hiyas makatabang sa ginatun-an sa pag-ugmad ug personal nga relasyon uban kang Jehova.

Kon Unsay Isulti Labot sa mga Magasin

Ang Bantayanang Torre Abr. 15

“Dili ba adunay daghan kaayong mabatonang impormasyon karon? [Tugoting motubag.] Apan, walay mas bililhon pa kay sa gihubit niining tekstoha. [Basaha ang Juan 17:3.] Kining magasina nagpatin-aw kon unsay kahulogan sa terminong ‘kinabuhing walay kataposan’ ug kon sa unsang paagi atong mabatonan ang kahibalo nga motultol nganha niana.”

Pagmata! Abr. 22

“Bisan tuod si Jesu-Kristo mao tingali ang labing inila kay ni bisan kinsang tawo nga nabuhi sukad, daghang tawo ang nahibulong kon kinsa gayod siya. Nasayod ka ba nga bisan ang mga apostoles mismo ni Jesus naghunahuna usab bahin niini? [Tugoting motubag. Dayon basaha ang Marcos 4:41.] Kining magasina nagsusi kon unsay giingon sa Bibliya bahin sa tinuod nga pagkatawo ni Jesus.”

Ang Bantayanang Torre Mayo 1

“Sa dihang mamatay ang usa nga atong gimahal, natural lamang nga gusto natong makita siya pag-usab. Dili ba? [Tugoting motubag.] Daghan ang nahupayan sa saad sa Bibliya bahin sa pagkabanhaw. [Basaha ang Juan 5:28, 29.] Kining magasina naghisgot kon kanus-a mahitabo ang pagkabanhaw ug kon kinsa gayod ang makabenepisyo gikan niana.”

Pagmata! Mayo 8

“Kadaghanan sa mga ginikanan mapilion bahin sa kon unsay ilang itugot nga tan-awon sa ilang mga anak. Nalisdan ka ba sa pagpangitag angayang mga pelikula nga tan-awon sa imong pamilya? [Tugoting motubag. Dayon basaha ang Efeso 4:17.] Kining magasina naghisgot kon sa unsang paagi ang mga ginikanan makatabang sa ilang mga anak sa pagpilig maayong kalingawan.”