Ang Adlaw ni Jehova Haduol Na

¹ Ang mga Kristohanon maikagon kaayong nangandoy sa pag-abot sa adlaw ni Jehova, nga pinaagi niana iyang laglagon ang presenteng sistema sa mga butang ug ipadangat ang bag-ong kalibotan sa pagkamatarong. (2 Ped. 3:12, 13) Sanglit wala man gayod kita mahibalo kon kanus-a moabot kanang adlawa, kinahanglan kitang magbantay kanunay ug atong tabangan ang uban nga magmabinantayon usab. (Ezeq. 33:7-9; Mat. 24:42-44) Ang pagpamalandong sa matagnaong Pulong sa Diyos mopalig-on sa atong pagtuo nga “ang dakong adlaw ni Jehova haduol na.”—Sof. 1:14.

² Sunodsunod nga Pagtungha sa mga Gahom sa Kalibotan: Sumala sa natala sa Pinadayag 17:9-11, ang apostol nga si Juan naghisgot ug “pito ka hari,” nga naghawas sa sunodsunod nga pagtungha sa pito ka gahom sa kalibotan. Si Juan naghisgot usab ug “ikawalo nga hari,” nga gihawasan karon sa Hiniusang Kanasoran. Magdahom ba kita ug lain pang mga gahom sa kalibotan nga motungha? Dili, ang tagna nag-ingon nga kining ikawalo nga hari “mopadulong ngadto sa pagkalaglag,” nga human niana wala nay laing yutan-ong mga hari nga gihisgotan. Makatabang ba kining tagnaa kanimo sa pagsabot kon diin na kita sa agos sa panahon?

³ Ang Daniel 2:31-45 makatabang kanato sa pagsabot sa umaabot nga adlaw ni Jehova. Nianang tagnaa, ang dakong imahen nga nakita ni Nabukodonosor sa usa ka damgo naghawas sa sunodsunod nga pagtungha sa mga gahom sa kalibotan. Ang matag usa ning maong mga gahom mitungha na. Unsa nang yugtoa sa panahon ang atong gikinabuhian karon? Diha sa yugto sa panahon nga gisimbolohan sa mga tiil sa imahen. Ang tagna tin-awng naghubit kon unsay sunod nga mahitabo. Ang tawhanong pagmando bug-os nga malaglag, nga mag-andam sa dalan alang sa “usa ka gingharian nga dili gayod malumpag.” Masabtan ba nimo kon sa unsang paagi kini nagpakita nga ang adlaw ni Jehova haduol na?

⁴ Dugang Pamatuod: Kita mga saksing-nakakita sa dugang pamatuod nga ang adlaw ni Jehova haduol na. Nakita nato ang katumanan sa gitagna ni apostol Pablo bahin sa mga taras sa mga tawo “sa kataposang mga adlaw.” (2 Tim. 3:1-5) Ug kita nakig-ambit sa tibuok-kalibotang pagpamatuod nga kinahanglang ihatag sa dili pa moabot ang kataposan. (Mat. 24:14) Hinaot ang atong publikong ministeryo magpadayon sa pagbanaag sa pagkadinalian sa gipahayag sa manulonda: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.”—Pin. 14:6, 7.

Bahin 8: Pagdumalag Mauswagong mga Pagtuon sa Bibliya

Giyahi ang mga Ginatun-an Ngadto sa Organisasyon

¹ Ang atong tumong sa pagdumalag mga pagtuon sa Bibliya dili lang ang pagtudlo ug doktrinal nga impormasyon kondili ang pagtabang usab sa mga ginatun-an nga mahimong bahin sa Kristohanong kongregasyon. (Zac. 8:23) Ang brosyur nga Mga Saksi ni Jehova—Kinsa Sila? Unsay Ilang Gituohan? makatabang kanato sa paghimo niini. Hatagig kopya ang bag-ong mga ginatun-an sa Bibliya, ug dasiga sila sa pagbasa niana. Dugang pa, paggahin ug pipila ka minuto matag semana panahon sa pagtuon sa pagpaambit ug usa ka punto bahin sa organisasyon ni Jehova.

² Mga Tigom sa Kongregasyon: Ang pangunang paagi aron mapabilhan sa mga ginatun-an sa Bibliya ang organisasyon sa Diyos mao ang pagpakig-uban kanato diha sa mga tigom sa kongregasyon. (1 Cor. 14:24, 25) Busa, makasugod ka tingali pinaagi sa pagsaysay kanila sa lima ka senemanang mga tigom, matag tigom sa tagsa ka higayon. Hisgoti ang ulohan sa sunod nga pakigpulong publiko. Ipakita kanila ang materyal nga pagatun-an panahon sa Pagtuon sa Bantayanang Torre ug sa Pagtuon sa Libro sa Kongregasyon. Isaysay ang Teokratikanhong Tunghaan sa Ministeryo ug ang Tigom sa Pag-alagad. Kon aduna kay asaynment sa tunghaan, mahimo nimong ensayohon kana uban kanila. Ipaambit ang talagsaong mga punto nga gipresentar sa mga tigom. Dapita sila sa pagtambong sukad gayod sa unang pagtuon.

³ Sa dihang taliabot na ang Memoryal, mga asembliya, ug duaw sa magtatan-aw sa sirkito, paggahin ug pipila ka minuto sa pagpatin-aw ug pagdasig kanila alang niining maong mga kahikayan. Anam-anama pagtubag ang mga pangutanang sama sa: Nganong gitawag kitang mga Saksi ni Jehova? Nganong gitawag man nato ang atong mga tigomanan nga mga Kingdom Hall? Unsay buluhaton sa mga ansiyano ug ministeryal nga mga alagad? Sa unsang paagi ang buluhatong pagsangyaw ug ang teritoryo giorganisar? Sa unsang paagi gipatik ang atong mga literatura? Sa unsang paagi gisuportahan sa pinansiyal ang organisasyon? Unsay papel sa sangang buhatan ug sa Nagamandong Lawas sa pagdumala sa buluhaton?

⁴ Matulon-anong mga Video: Ang laing paagi aron ang mga ginatun-an sa Bibliya makasabot sa talagsaong organisasyon ni Jehova maoy pinaagi sa atong mga video. Makita nila ang atong kalihokan sa pagsangyaw sa tibuok kalibotan pinaagi sa To the Ends of the Earth, masinati sila sa atong tibuok kapunongan sa mga igsoon pinaagi sa Our Whole Association of Brothers, ug makita nila kon sa unsang paagi atong gipasundayag ang tinuod nga inigsoong panaghiusa pinaagi sa United by Divine Teaching. Ang usa ka babaye nga nakadawat sa atong mga magasin ug uban pang mga literatura sulod sa lima ka tuig nakahilak tungod sa video nga Jehovah’s Witnesses—The Organization Behind the Name. Siya misalig sa mga Saksi nga miduaw kaniya, apan human makita ang video, siya mibati nga iyang masaligan usab ang organisasyon. Ang usa ka pormal nga pagtuon nasugdan uban kaniya, ug pagkasunod semana, siya mitambong sa mga tigom sa Kingdom Hall.

⁵ Pinaagig paggahin ug pipila ka minutos matag semana uban sa atong ginatun-an, anam-anam natong magiyahan ang mga ginatun-an sa Bibliya ngadto sa bugtong organisasyon nga gigamit ni Jehova karon.