Ang Pagsangyaw Makatabang Aron Kita Makalahutay

¹ Giawhag kita sa Pulong sa Diyos nga “daganon nato nga malahutayon ang lumba nga gibutang sa atong atubangan.” (Heb. 12:1) Ingon nga ang usa ka magdadagan kinahanglang molahutay aron modaog sa lumba, kinahanglan usab kitang molahutay aron makab-ot ang ganti nga kinabuhing walay kataposan. (Heb. 10:36) Sa unsang paagi ang Kristohanong ministeryo makatabang kanato aron makalahutay nga matinumanon hangtod sa kataposan?—Mat. 24:13.

² Mapalig-on sa Espirituwal: Ang atong pagmantala sa kahibulongang saad sa Bibliya bahin sa usa ka matarong nga bag-ong kalibotan makapabuhi kanunay sa atong paglaom. (1 Tes. 5:8) Sa dihang regular kitang makigbahin sa pagsangyaw sa kanataran, makahigayon kita sa pagpahayag sa mga kamatuoran nga atong nakat-onan gikan sa Bibliya. Makahigayon kita sa pagdepensa sa atong pagtuo, nga sa baylo makatabang kanato nga mahimong lig-on sa espirituwal.

³ Aron epektibong matudloan ang uban, kinahanglang tin-aw natong masabtan ang mga kamatuoran sa Bibliya. Kinahanglan kitang manukiduki ug mamalandong sa maong materyal. Ang atong makugihong pagpaningkamot makapalalom sa atong kahibalo, makapalig-on sa atong pagtuo, ug makapalagsik kanato sa espirituwal. (Prov. 2:3-5) Busa, samtang maningkamot kita sa pagtabang sa uban, mapalig-on nato ang atong kaugalingon.—1 Tim. 4:15, 16.

⁴ Ang masibotong pagpakigbahin sa ministeryo maoy usa ka hinungdanong bahin sa “kompletong armadura gikan sa Diyos,” nga atong gikinahanglan aron lig-on kitang makabarog batok sa Yawa ug sa mga demonyo. (Efe. 6:10-13, 15) Ang atong pagkapuliki diha sa sagradong pag-alagad makatabang kanato sa pagsentro sa atong hunahuna sa makapalig-ong mga butang ug sa paglikay sa makadaot nga impluwensiya sa kalibotan ni Satanas. (Col. 3:2) Samtang gitudloan nato ang uban sa mga dalan ni Jehova, kita padayong mapahinumdoman nga kinahanglan natong huptan kanunay ang balaang panggawi.—1 Ped. 2:12.

⁵ Gihatagag Gahom sa Diyos: Sa kataposan, ang atong pagpakigbahin sa buluhatong pag-ebanghelyo magtudlo kanato sa pagsalig kang Jehova. (2 Cor. 4:1, 7) Pagkadakong panalangin kana! Ang atong pag-ugmad sa maong pagsalig magsangkap kanato aron matuman ang atong ministeryo ug masagubang usab ang bisan unsang mga kahimtang nga lagmit atong masinati sa kinabuhi. (Filip. 4:11-13) Sa pagkatinuod, ang pagkat-on sa pagsalig kang Jehova sa bug-os maoy usa ka hinungdanong butang nga makatabang aron kita makalahutay. (Sal. 55:22) Sa daghang paagi, ang pagsangyaw makatabang aron kita makalahutay.

Bahin 9: Pagdumalag Mauswagong mga Pagtuon sa Bibliya

Pag-andam sa mga Ginatun-an sa Pagsangyaw sa Di-Pormal nga Paagi

¹ Sa dihang nakaamgo si Andres ug Felipe nga si Jesus mao ang gisaad nga Mesiyas, wala sila makapugong sa pagtug-an sa uban mahitungod sa maong makapalipayng balita. (Juan 1:40-45) Mao man usab karon, sa dihang ang mga ginatun-an sa Bibliya mosugod sa pagpasundayag ug pagtuo sa ilang nakat-onan, matukmod sila sa pagpakigsulti bahin niana. (2 Cor. 4:13) Sa unsang paagi ato silang madasig sa pagsangyaw sa di-pormal nga paagi ug pag-andam kanila sa paghimo niana sa epektibong paagi?

² Makapangutana ka sa ginatun-an kon iya na bang nasulti sa uban ang iyang nakat-onan gikan sa Bibliya. Tingali duna siyay mga higala ug mga membro sa pamilya nga iyang madapit nga moduyog sa iyang pagtuon. Pangutan-a siya kon duna ba siyay mga kauban sa trabaho, eskolmet, o uban pang mga kaila nga nagpakitag interes. Niining paagiha siya makasugod sa pagsangyaw. Tabangi siya nga masabtan nga kinahanglan nga magmailahon ug magmatinahoron ug magmahigalaon sa dihang makig-estorya sa uban bahin kang Jehova nga Diyos ug sa iyang mga katuyoan.—Col. 4:6; 2 Tim. 2:24, 25.

³ Pagpaambit sa Ilang mga Gituohan: Hinungdanon gayod nga bansayon ang mga ginatun-an sa Bibliya sa paggamit sa Pulong sa Diyos sa dihang magpaambit sa ilang mga gituohan. Diha sa piniling mga punto samtang nagtuon, pangutan-a ang ginatun-an: “Sa unsang paagi magamit nimo ang Bibliya aron ipatin-aw kining kamatuorana ngadto sa imong pamilya?” o “Unsang tekstoha sa Bibliya ang imong gamiton aron pamatud-an kini ngadto sa usa ka higala?” Matikdi kon giunsa niya pagtubag, ug ipakita kaniya kon sa unsang paagi ipasukad niya sa Kasulatan ang iyang pagpanudlo. (2 Tim. 2:15) Pinaagi sa pagbuhat niana, giandam nimo ang ginatun-an sa pagsangyaw sa di-pormal nga paagi ug sa organisadong buluhaton sa pagsangyaw kauban sa kongregasyon sa dihang siya kuwalipikado na.

⁴ Maalamon nga andamon ang mga ginatun-an sa Bibliya sa pag-atubang sa pagsupak. (Mat. 10:36; Luc. 8:13; 2 Tim. 3:12) Sa dihang ang uban mangutana o mokomento bahin sa mga Saksi ni Jehova, kini makahatag ug kahigayonan sa mga ginatun-an sa pagsangyaw. Ang brosyur nga Mga Saksi ni Jehova—Kinsa Sila? Unsay Ilang Gituohan? makasangkap kanila nga mahimong ‘andam sa pagdepensa.’ (1 Ped. 3:15) Kini maghatag ug tukmang kasayoran nga magamit sa mga bag-ohan aron matabangan ang maayog-tuyo nga mga higala ug mga membro sa pamilya nga masabtan ang atong pinasukad-sa-Bibliya nga mga gituohan ug kalihokan.