Mamiminaw Gidasig ug Gipalig-on

WALAY sapayan sa mga suliran nga ilang giatubang, ang mga alagad sa Diyos angayng mapalig-on diha sa Kristohanong kongregasyon. Aron makab-ot kana, ang mga ansiyano ilabina angayng magtino nga makapalig-on ang ilang mga pakigpulong ug tambag. Ang mga ansiyano angay nga “mahimong sama sa usa ka tagoanang dapit gikan sa hangin ug usa ka salipdanang dapit gikan sa bagyo, sama sa mga sapa sa tubig sa usa ka walay-tubig nga yuta, sama sa landong sa usa ka dako kaayong bato sa usa ka umaw nga yuta.”​—Isa. 32:2.

Kon ikaw ansiyano, ang imo bang mga pakigpulong makapalig-on ug makapahupay? Makapadasig ba kana niadtong naningkamot sa pag-alagad nga matinumanon kang Jehova? Makahatag ba kanag kusog aron makalahutay sa pagbuhat sa kabubut-on sa Diyos bisan pa sa kawalay-pagtagad o pagsupak sa kadaghanan? Unsa na man kon ang pipila sa imong mamiminaw magul-anon kaayo, nag-antos sa kabug-at sa grabeng kalisdanan sa panginabuhi, o nagpakigbisog sa grabeng sakit nga walay nasayrang tambal? Ikaw ‘makapalig-on sa imong mga igsoon pinaagi sa pulong sa imong baba.’​—Job 16:5.

Gamita ang higayong imong nabatonan ingong mamumulong sa pagtabang sa imong mga igsoon nga makabatog paglaom ug kalig-on gikan ni Jehova ug sa mga tagana nga iyang gihimo.​—Roma 15:13; Efe. 6:10.

Pahinumdomi ang Mamiminaw sa Nahimo ni Jehova. Usa ka bililhong paagi sa pagpabuhi sa kalig-on maoy pinaagi sa pagpakita kon giunsa pagtabang ni Jehova ang iyang katawhan latas sa mga suliran sa nangaging panahon.​—Roma 15:4.

Si Jehova nagsugo kang Moises nga “dasigon” ug “palig-onon” si Josue sa wala pa mosulod ang Israel sa Yutang Saad, nga sa maong panahon gipuy-an sa kaawayng mga nasod. Giunsa kadto paghimo ni Moises? Sa atubangan ni Josue, gipahinumdoman ni Moises ang tibuok nasod sa mga butang nga nahimo ni Jehova alang kanila sa ilang pagbiya sa Ehipto. (Deut. 3:28; 7:18) Si Moises nag-asoy usab sa mga kadaogan nga gihatag kanila ni Jehova batok sa mga Amorihanon. Unya giawhag ni Moises si Josue: “Magmaisogon ug magmakusganon ka.” (Deut. 31:1-8) Sa dihang nagtinguha sa pagdasig sa imong mga igsoon, gitabangan mo ba sila nga makabatog kalig-on pinaagi sa pagpahinumdom kon unsay nahimo ni Jehova alang kanila?

Usahay ang mga indibiduwal mabug-atan kaayo sa ilang mga suliran nga sila mahibulong kon makatagamtam pa sila sa mga panalangin sa Gingharian. Ipahinumdom kanila ang pagkakasaligan sa mga saad ni Jehova.​—Jos. 23:14.

Sa pipila ka nasod ang atong mga igsoon nag-atubang ug mga dekreto sa gobyerno nga nagdili sa pagsangyaw sa maayong balita. Sa maong mga kahimtang, ang mahigugmaong mga ansiyano makatabang sa mga isigkamagtutuo nga makabatog kusog gikan sa mga kasinatian sa mga apostoles ni Jesu-Kristo. (Buh. 4:1–​5:42) Ug ang pagpasiugda sa paagi sa pagmaniobra sa Diyos sa mga panghitabo sumala sa natala sa basahong Ester labing tino nga makapadasig sa mga igsoon nga magmaisogon.

Usahay ang mga indibiduwal motambong sa mga tigom sa kongregasyon apan dili na mouswag. Sila tingali mobati nga ang Diyos dili gayod magpasaylo kanila tungod kay ang ilang kanhing pagkinabuhi daotan kaayo. Tingali makaasoy ka kon giunsa pagpakiglabot ni Jehova kang Haring Manases. (2 Cron. 33:1-16) O makasugilon ka bahin sa mga tawo sa karaang Corinto nga nag-usab sa ilang pagkinabuhi, nahimong mga Kristohanon, ug gipahayag sa Diyos nga matarong.​—1 Cor. 6:9-11.

May pipila ba ka tawo nga mibating ang mga sulirang ilang ginaantos nagpaila nga wala na sila uyoni sa Diyos? Ikapahinumdom mo kanila ang nasinati ni Job ug kon sa unsang paagi tugob siyang gipanalanginan tungod kay lig-on niyang gihuptan ang iyang pagkamatinumanon kang Jehova. (Job 1:1-22; 10:1; 42:​12, 13; Sal. 34:19) Ang mini nga mga maglilipay ni Job sayop nga nangatarongan nga si Job nakahimog sala. (Job 4:​7, 8; 8:​5, 6) Sa katugbang, sa dihang naglig-on sa mga tinun-an ug “nagdasig kanila nga magpabilin sa pagtuo,” si Pablo ug Bernabe miingon: “Kita kinahanglang mosulod sa gingharian sa Diyos pinaagi sa daghang kasakitan.” (Buh. 14:​21, 22) Sa susama karong adlawa, ikaw makapalig-on niadtong nag-antos sa mga pagsulay pinaagi sa pagpunting nga ang paglahutay ilalom sa kasakitan gikinahanglan sa tanang Kristohanon ug bililhon kaayo sa mga mata sa Diyos.​—Prov. 27:11; Mat. 24:13; Roma 5:​3, 4; 2 Tim. 3:12.

Dasiga ang imong mga tigpatalinghog sa paghunahunag mga paagi diin si Jehova nagtuman sa iyang mga saad diha sa ilang kaugalingong mga kinabuhi. Pinaagi sa pagpahinumdom, basin ilang masabtan kon sa unsang paagi si Jehova naglihok na labot kanila sa personal, sumala sa iyang gisaad. Sa Salmo 32:​8, atong mabasa: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” Pinaagi sa pagtabang sa imong mga tigpatalinghog nga mahinumdom kon giunsa ni Jehova paggiya o pagpalig-on kanila, makapasabot ka kanila sa personal kaayong paagi nga si Jehova may pagtagad kanila ug siya motabang gayod kanila latas sa mga pagsulay nga ilang gisagubang pagkakaron.​—Isa. 41:​10, 13; 1 Ped. 5:7.

Ipakita ang Kalipay Diha sa Ginahimo Karon sa Diyos. Sa dihang magtinguha nga dasigon ang imong mga igsoon, ipunting ang atensiyon sa ginahimo karon ni Jehova. Ang pagsulti bahin niining mga butanga sa paaging magpakita nga nakapalipay kini kanimo makapukaw ug susamang mga pagbati diha sa mga kasingkasing sa imong mga tigpatalinghog.

Hunahunaa kon giunsa pagtabang ni Jehova kanato sa pagsagubang sa mga kapit-osan sa kinabuhi. Gipakita niya kanato ang labing maayong paagi sa pagkinabuhi. (Isa. 30:21) Gipatin-aw niya ang mga hinungdan sa krimen, inhustisya, kakabos, sakit, ug kamatayon ug gisulti kanato kon sa unsang paagi iyang taposon kining tanan. Gipalibotan niya kitag mahigugmaong mga igsoon. Gihatag niya kanato ang bililhong pribilehiyo sa pag-ampo. Gisaligan niya kita sa pribilehiyo nga mahimong iyang mga Saksi. Gipadayag niya kanato nga si Kristo naentrono na sa mga langit ug ang kataposang mga adlaw sa daang sistema tuling nagsingabot sa kataposan.​—Pin. 12:1-12.

Idugang sa maong mga panalangin ang atong mga tigom sa kongregasyon, mga asembliya, ug mga kombensiyon. Sa dihang hisgotan nato ang maong mga tagana sa paaging magpakitag tinuod nga pagpabili niini, imong mapalig-on ang determinasyon sa uban nga dili pasagdan ang panagkatigom uban sa ilang mga igsoon.​—Heb. 10:23-25.

Ang mga taho nga mohatag ug ebidensiya sa pagpanalangin ni Jehova sa atong mga paningkamot diha sa ministeryo sa kanataran sa susama maoy tinubdan sa kusog. Sa unang siglo sa dihang si Pablo ug Bernabe nagpaduol sa Jerusalem, sila nakahatag ug “dakong kalipay sa tanang igsoon” pinaagi sa pag-asoy nga detalyado sa pagkakabig sa mga tawo sa mga nasod. (Buh. 15:3) Ikaw usab makahatag ug kalipay sa mga igsoon pinaagi sa pagpakig-ambit ug makapalig-ong mga kasinatian kanila.

Ang dugang nga pagpalig-on mosangpot sa dihang ang mga indibiduwal matabangan sa pagkasabot sa pagkabililhon sa ilang ginahimo. Dayega sila tungod sa ilang pagpakigbahin sa Kristohanong ministeryo. Dayega sila kansang kalihokan limitado na kaayo tungod sa pagkatigulang ug sakit apan nagapakitag matinumanong paglahutay. Pahinumdomi sila nga si Jehova dili malimot sa gugma nga ilang gipakita alang sa iyang ngalan. (Heb. 6:10) Ang pagtuo nga sinulayan maoy bililhon kaayong kabtangan. (1 Ped. 1:​6, 7) Ang atong mga igsoon angayng pahinumdoman niini.

Hisgoting Mahinamon ang Paglaom sa Unahan. Ang dinasig nga mga saad bahin sa mga butang sa unahan maoy dakong tinubdan sa pagdasig sa tanan nga nahigugma sa Diyos. Tingali kadaghanan sa imong mamiminaw subsob nakadungog niining mga pulonga. Apan pinaagi sa pagpabili nga imong ipakita sa dihang hisgotan mo kining mga saara, ikaw makapabuhi niini, makapasilsil ug pagsalig diha sa katumanan niini, ug makapahimo sa mga kasingkasing nga matugob sa pagkamapasalamaton. Ang pagpadapat sa imong nakat-onan sa Teokratikanhong Tunghaan sa Ministeryo makatabang nimo sa paghimo niana.

Si Jehova mismo mao ang Dakong Magdadasig ug Maghahatag ug kusog sa iyang katawhan. Bisan pa niana, ikaw makakooperar kaniya sa pagpaila sa maong pagdasig ug pagpalig-on. Sa dihang magpakigpulong ka sa kongregasyon, gamitang epektibo ang higayon sa pagbuhat niana.