Ikaw Giabiabi sa Teokratikanhong Tunghaan sa Ministeryo

SA TIBUOK yuta, sa kapin sa 200 ka nasod, milyonmilyong estudyante ang nakabatog kaayohan kada semana gikan sa edukasyon sa Teokratikanhong Tunghaan sa Ministeryo. Ang pipila maoy bag-ohan. Ang uban nagtambong na sa tunghaan sulod sa daghang katuigan. Ang tunghaan gidumala diha sa tinagpulo ka libong dapit. Bisan diin ka magpuyo sa yuta, ang samang programa sa edukasyon imong mabatonan. Ang mga tawo sa tanang pangedaron, etnikong mga grupo, ug edukasyonal nga mga kahimtang makadawat niining teokratikanhong instruksiyon, nga walay bayad.

Sa dihang giinagurahan ang tunghaan diha sa mga kongregasyon sa mga Saksi ni Jehova sa 1943, ang katuyoan niini gilitok niining mga pulonga: “Aron maandam ang tanang ‘matinuohong mga tawo,’ kadtong nakadungog sa Pulong sa Diyos ug nagpamatuod sa ilang pagtuo diha niana, aron ‘makatudlo ngadto sa uban’ . . . sa tumong nga himoon ang matag usa . . . nga masangkapan ug maayo aron ipresentar sa publiko ang paglaom nga gituohan niya.” (Course in Theocratic Ministry, p. 4) Ang tumong sa tunghaan mao gihapon hangtod karon.

Sa pagkatinuod, unsa ang labing maayo nga mahimo ni bisan kinsa kanato sa gihatag-sa-Diyos kanato nga gasa nga katakos sa pagsulti? Ang Bibliya nagtubag: “Ang tanang may gininhawa​—ipadayeg si Jah.” (Sal. 150:6) Sa pagbuhat nato niana, kita makapalipay sa kasingkasing sa atong langitnong Amahan. Kita makapamatuod kaniya nga ang atong mga kasingkasing mapasalamatong misanong sa iyang pagkamaayo ug gugma. Dili ikatingala nga ang mga Kristohanon gidasig kanunay nga “itanyag nato sa Diyos ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan”! (Heb. 13:15) Isip tumong nga matabangan ka sa pagpalambo sa imong katakos sa paggamit sa hinatag-sa-Diyos nga mga gasa sa pagdayeg kang Jehova, ikaw among giabiabi ingong estudyante sa Teokratikanhong Tunghaan sa Ministeryo.

Bisan tuod ang publikong pagbasa ug ang arte sa pagpanulti ug pagtudlo gihatagag dakong pagtagad sa tunghaan, ang mga kaayohan sa edukasyon sa Teokratikanhong Tunghaan sa Ministeryo dili lang kutob diha. Samtang ikaw makigbahin, ikaw matabangan sa pag-ugmad sa hinungdanong mga katakos sama sa personal nga pagbasa, pagpaminaw ug paghinumdom, pagtuon, pagpanukiduki, pag-analisar ug pag-organisar, pagkulokabildo, pagtubag sa mga pangutana, ug pagsulat sa imong mga hunahuna. Ang Bibliya mismo ug gipasukad-sa-Bibliyang mga publikasyon motaganag basehanan alang sa pagtuon ug sa mga komento ug sa mga pasundayag nga ipresentar diha sa tunghaan. Samtang imong pun-on ang imong hunahuna sa hinungdanong mga kamatuoran nga makaplagan diha sa Pulong sa Diyos, makakat-on ka sa paghunahuna sa mga hunahuna sa Diyos. Pagkamapuslanon unya niana diha sa matag bahin sa imong kinabuhi! Mahitungod sa bili sa Pulong sa Diyos, ang ika-20ng siglong magtutudlo sa unibersidad nga si William Lyon Phelps misulat: “Ang tanang adunay bug-os nga kahibalo sa Bibliya sa tinuoray matawag nga edukado. . . . Nagtuo ako nga ang kahibalo sa Bibliya nga walay kurso sa kolehiyo mas hinungdanon pa kay sa usa ka kurso sa kolehiyo nga walay Bibliya.”

Kon Unsaon Pagpahimulos sa Bug-os

Siyempre, aron makapahimulos sa bug-os sa edukasyon nga itagana sa Teokratikanhong Tunghaan sa Ministeryo, ikaw, ang estudyante, kinahanglang maningkamot. Giawhag ni apostol Pablo ang iyang Kristohanong kauban nga si Timoteo: “Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” (1 Tim. 4:15) Sa unsang praktikal nga mga paagi nga makapanlimbasog ka?

Kutob sa mahimo, tambong sa Teokratikanhong Tunghaan sa Ministeryo kada semana. Gamita nga maalamon kini nga teksbok, Pahimusli ang Edukasyon sa Teokratikanhong Tunghaan sa Ministeryo. Isulat ang imong ngalan diha sa blangko para niini diha sa panid sa ulohan. Dad-a kanunay ang basahon inigtambong nimo sa tunghaan. Kini nga teksbok adunay mga luna nga masulatan. Inigkabasa nimo sa hinungdanong mga punto niini nga bation nimong makatabang, badlisi kini. Gamita ang dagkong margin aron isulat ang praktikal nga mga punto nga imong makat-onan sa mga panaghisgot sa tunghaan.

Ang usa ka pinatik nga kopya sa programa nga maoy tamdan sa Teokratikanhong Tunghaan sa Ministeryo separadong gitagana. Kining eskedyula maglakip usab sa mga detalye kon sa unsang paagi dumalahon ang tunghaan. Makaplagan nimong praktikal nga tagoan ang eskedyul dinhi niining basahona, nga magamit dayon kini.

Sa pagpangandam sa senemanang mga sesyon sa tunghaan, hinumdomi nga ang Bibliya mao ang prinsipal nga teksbok. Unaha pagbasa ang bisan haing bahin sa Bibliya nga mahimong gieskedyul alang sa semana. Kon abante nimong mabasa ang materyal alang sa nagkalainlaing bahin sa programa, kini mapuslanon usab kaayo.

Panahon sa tunghaan, mahimong dunay mga kahigayonan nga makig-ambit ang mamiminaw. Pahimusli kinig maayo. Ang pagpakigbahin sa maong mga panaghisgot maoy usa ka hinungdanong tabang sa paghinumdom sa imong madungog ug pagpadapat niana sa imong personal nga kinabuhi.

Siyempre, ang tanang estudyante adunay mga kahigayonan sa paghatag ug mga pakigpulong o mga pasundayag atubangan sa kongregasyon. Pahimusli pag-ayo ang matag usa niini nga mga kahigayonan. Paningkamoti gayod nga mapauswag ang bisan unsang kalidad sa pagpanulti nga giasayn kanimo. Ikaw tambagan maylabot sa imong padayong pag-uswag. Kahinangpi kanang personal nga tabang. Sa imong basahon, isulat ang espesipikong mga sugyot nga mahimong himoon nimo aron mouswag. Tungod kay lisod para sa usa ka tawo nga mailhan ang kaugalingon nga sama sa pag-ila sa uban kaniya, ang mahigugmaon, gipasukad-sa-Bibliyang mga sugyot ug tambag nga gitagana makaabag ug dako sa imong pag-uswag. Tinuod kana bisan pa kon nahitala ka na sa tunghaan sulod sa daghang tuig.​—Prov. 1:5.

Buot ba nimo nga makahimog dugang kusog nga pag-uswag? Kon magpakita kag personal nga inisyatibo, kana mahimo. Tun-i nga abante ang materyal nga kobrehan sa matag pakigpulong sa estudyante. Kon magkinahanglan ug kapuling mamumulong, ikaw makaboluntaryo, ug kana makahatag kanimog dugang eksperyensiya. Sa dihang magpakigpulong ang uban, paminaw pag-ayo kon unsaon nila pagtagik ang materyal. Makakat-on kita sa usag usa.

Dugang pa, kon motugot ang imong mga kahimtang, imong mapakusog ang imong pag-uswag pinaagi sa abanteng personal nga pagtuon niini nga teksbok. Human nga makakat-on ka pag-ayo sa mosunod nga 15 ka tun-anan, padayon sa pag-uswag ginamit ang “Programa Aron Maugmad ang Katakos Ingong Usa ka Mamumulong ug Magtutudlo,” sugod sa panid 78. Una, tun-i ang matag leksiyon, ug tubaga ang mga pasulit nga gilaraw maylabot niini. Ipadapat ang imong makat-onan diha sa imong ministeryo. Makatampo kinig dako sa imong pag-uswag isip usa ka mamumulong ug magtutudlo sa Pulong sa Diyos.

Ang imong edukasyon sa Teokratikanhong Tunghaan sa Ministeryo makatabang nimo sa pagpangandam sa labing hinungdanong mga butang sa kinabuhi. Tungod kay kita nabuhi gumikan sa kabubut-on sa Diyos, ang pagdayeg kaniya maoy pag-ila sa mismong katuyoan sa atong pagkinabuhi. Si Jehova nga Diyos angayan sa taas kaayong kalidad sa pagdayeg. (Pin. 4:11) Ang edukasyon nga madawat nato sa tunghaan maoy usa ka paagi sa pagpalampos niini aron kita makahimo sa paghunahuna nga tin-aw, paglihok nga maalamon, ug pagpakigkomunikar nga epektibo sa kahibulongang mga kamatuoran gikan sa inspiradong Pulong sa Diyos.