Pagmentinar sa Atong mga Kingdom Hall
1. Unsay katuyoan sa mga Kingdom Hall?
1 Ang atong Kingdom Hall nagsilbi ingong sentro sa putling pagsimba diha sa atong dapit. Bisan pag kini simple ug makasaranganon, girepresentar niini si Jehova ug ang iyang mga alagad diha sa maong dapit, busa angayng atimanon kini pag-ayo lakip na ang palibot niini.
2. Nganong hinungdanon nga huptang hinlo ug presentable ang Kingdom Hall?
2 Regular nga Eskedyul sa Pagpanghinlo: Ang pagmentinar sa atong Kingdom Hall maoy usa ka hinungdanong bahin sa atong sagradong pag-alagad. Ang librong Organisado sa panid 121 naghisgot: “Ang mga sakop sa kongregasyon angayng mag-isip nga usa ka pribilehiyo ang pagsuportar sa pinansiyal nga paagi sa Kingdom Hall ug ang pagboluntaryo sa ilang mga serbisyo aron makatabang sa paghupot niini nga hinlo, presentable, ug maayog kondisyon. Sa sulod ug sa gawas, ang Kingdom Hall kinahanglang magrepresentar sa tukmang paagi sa organisasyon ni Jehova.” Sama sa karaang panahon, angayng magkugi ang mga alagad ni Jehova karon sa “pag-ayom ug sa pag-ayo” sa atong dapit sa pagsimba.—2 Cron. 34:10.
3. Sa unsang paagi giorganisar ang pagpanghinlo sa Kingdom Hall ug kinsa ang makapakigbahin niini nga pribilehiyo?
3 Angayng ipaskil sa information board ang senemanang eskedyul sa pagpanghinlo sa Kingdom Hall. Ang tanang grupo sa pagtuon sa libro angayng magpulipuli sa pagpanghinlo sa matag semana, nga magbuhat kon unsay angayng himoon. Ang tanang makaarang angayng makigbahin niining maong pribilehiyo sa paghupot sa Kingdom Hall nga hinlo ug presentable matag semana. Sa tabang sa mga ginikanan, ang mga kabataan makapakigbahin usab ug sa ingon magtudlo kanila nga ilang pabilhan kining maong pribilehiyo. Gikinahanglan ang kooperasyon ilabina kon daghang kongregasyon ang naggamit sa usa ka Kingdom Hall aron dili lamang ang pipila, kondili ang tanan makapakigbahin niining mahinungdanong bahin sa atong pagsimba.
4. Sa unsang paagi giorganisar ang pagmentinar sa Kingdom Hall?
4 Pagmentinar sa Kingdom Hall: Ang lawas sa mga ansiyano maoy responsable sa pagdumala ug sa pagmentinar sa Kingdom Hall. Kon usa lamang ka kongregasyon ang naggamit sa Kingdom Hall, itudlo ang usa ka ansiyano o ministeryal nga alagad sa pagdumala sa maong buluhaton. Organisahon niya ang adlaw-adlaw nga kalihokan sa Kingdom Hall, nga paneguroon nga mahuptang hinlo, maayog kahimtang ug dunay igong suplay sa mga galamiton sa pagpanghinlo. Kon duha o kapin pang mga kongregasyon ang naggamit sa mao rang tigomanan, ang mga lawas sa mga ansiyano magtudlog usa ka operating committee aron sa paghimog mga kahikayan alang sa pag-atiman sa tinukod ug sa propiedad. Ang maong komite magalihok ubos sa pagtultol sa mga lawas sa mga ansiyano.
5. Unsay ginahimo sa matag tuig ug sa matag duaw sa magtatan-aw sa sirkito aron mahuptan ang kahamugaway sa Kingdom Hall?
5 Dunay ginahimo nga detalyadong inspeksiyon sa Kingdom Hall sa Septiyembre matag tuig. Dugang pa, sa duaw sa magtatan-aw sa sirkito, siya magtaho sa kahimtang sa Kingdom Hall ug maghatag ug mga sugyot sa mga butang nga angayng pagatagdon. Sundon kini sa mga ansiyano pinaagi sa paghimog mga kahikayan aron matagad gayod kon dunay angayng himoon. Ang mga magmamantala mahimong dapiton aron motabang sa mga pagpang-ayo ug pagmentinar. Angayng paningkamotan sa tanan nga tagdon bisan ang ginagmayng mga guba ug ayohon kana sa labing madaling panahon.
6, 7. Sa unsang paagi mapatungha ang mga pondo alang sa pagmentinar sa Kingdom Hall?
6 Paggahin ug mga Pondo alang sa Pagmentinar: Kadaghanan sa mga buluhaton diha sa Kingdom Hall ug sa palibot niini ginahimo sa mga boluntaryo. Ang ilang pagsakripisyo sa kaugalingon maoy kapahayagan sa ilang gugma ug dako kinig ikatabang aron mamenosan ang galastohan. Bisan pa niana, gikinahanglan gihapon ang pondo alang sa galastohan sa pagpang-ayo, sa mga himan sa pagpanghinlo, ug sa mga bayronon sa tubig ug koryente. Busa labing maayo kon ang mga ansiyano maggahin ug salapi sa matag bulan aron magamit sa operating committee, o sa ansiyano o ministeryal nga gitudlo sa maong buluhaton.
7 Kon kapin sa usa ka kongregasyon ang naggamit sa Kingdom Hall, ang operating committee angayng maghupot ug separadong pondo sa bangko ug maghatag ug binulan nga taho sa mga galastohan ngadto sa matag lawas sa mga ansiyano aron mahibalo sila sa mga nagasto. Ang mga ansiyano maoy responsable sa maalamong paggamit sa pondo sa kongregasyon.
8. Unsay angayng himoon kon gikinahanglan ang dinagkong pagmentinar o pagpang-ayo?
8 Dinagkong Pagmentinar ug Pagpang-ayo: Kon makita sa operating committee nga dako ang gikinahanglang pagmentinar o pagpang-ayo sa Kingdom Hall, ang komite makighisgot niana ngadto sa mga lawas sa mga ansiyano alang sa giya. Kon ilang makita nga gikinahanglan gayod ang dakong pagmentinar o pagpang-ayo, ang mga ansiyano magbanabana sa nahiangayng mga galastohan ug maghimog resolusyon nga aprobahan sa kongregasyon. (Tan-awa ang “Pangutana” sa Pebrero 1994 nga Atong Ministeryo sa Gingharian.) Dayon angay nilang sulatan ang sangang buhatan aron kana maaprobahan. Sa ilang sulat, isulti sa mga ansiyano ang ilang mga panginahanglan ug ang kantidad niana maingon man usab ang salapi nga anaa sa ilang panudlanan. Walay dinagkong pagpang-ayo o mga pagdugang nga himoon kon wala kana maaprobahi sa sangang buhatan.
9. Sa unsang paagi nato ikapakita ang atong pagpabili sa atong Kingdom Hall?
9 Pabilhan gayod nato ang atong pribilehiyo nga magkatigom diha sa Kingdom Hall! Angayng makigbahin kitang tanan pinaagi sa paghatag ug kinasingkasing nga mga donasyon ug sa pagsuportar sa pagmentinar sa atong dapit sa pagsimba.