Kon Unsaon Pagsugod ug mga Pagtuon nga Gamiton ang Librong Gitudlo sa Bibliya

Daghan kanato malipay sa pagdumalag usa ka pagtuon sa Bibliya kon may usa na unta ka pagtuon nga atong masugdan. Ang bag-ong libro nga Unsay Tinuod nga Gitudlo sa Bibliya? makatabang kanato. Ang pasiunang mga pulong sa mga panid 3-7 gilaraw aron ang tagbalay makaapil sa panaghisgot sa Bibliya nga gigamit ang maong libro. Bisan kadtong gamay rag kasinatian sa ministeryo sayonan sa paggamit niini diha sa pagsugod ug mga pagtuon.

◼ Makasulay ka niining metodoha nga gigamit ang panid 3:

Human sa paghisgot ug usa ka balita o suliran nga gikabalak-an sa mga tawo sa inyong teritoryo, dad-a ang pagtagad sa tagbalay ngadto sa mga pangutana nga tataw ang pagkasulat diha sa panid 3, ug pakomentoha siya. Unya paklia sa mga panid 4-5.

◼ O basin palabihon mo ang pagsugod sa pagtuon pinaagi sa pagpasiugda sa mga panid 4-5:

Makaingon ka, “Dili ba kahibulongan kon mahitabo gayod ang mga kausaban nga gihulagway dinhi?” O makasukna ka, “Hain niining mga saara ang gusto nimong makita nga matuman?” Patalinghog pag-ayo sa tubag.

Kon ang tagbalay magpakitag linaing interes sa usa ka teksto, ipakita kaniya kon unsay gitudlo sa Bibliya bahin sa maong ulohan pinaagi sa paghisgot sa mga parapo diha sa libro nga naghisgot nianang tekstoha. (Tan-awa ang kahon niining panira nga pasukip.) Hisgoti ang ulohan sama sa imong paghisgot diha sa pagtuon sa Bibliya. Mahimong himoon kini sa lima ngadto napulo ka minuto sa unang pagduaw diha mismo sa pultahan.

◼ Ang laing metodo mao ang pagpahinabo nga mopahayag ang usa ka tawo sa iyang opinyon nga gamiton ang panid 6:

Dad-a ang pagtagad sa tagbalay ngadto sa mga pangutana sa ubos sa panid, ug isukna, “Naghunahuna ka ba sukad sa bisan usa niining mga pangutanaha?” Kon siya magpahayag ug interes sa usa sa mga pangutana, paklia ngadto sa mga parapo diha sa libro nga motubag sa pangutana. (Tan-awa ang kahon niining panira nga pasukip.) Samtang inyong hisgotan ang impormasyon, ikaw nagadumalag usa ka pagtuon sa Bibliya.

◼ Ang panid 7 magamit aron ikapasundayag ang usa ka pagtuon sa Bibliya:

Basaha ang unang tulo ka tudling-pulong diha sa panid, ug unya paklia ngadto sa kapitulo 3 ug ipasundayag ang usa ka pagtuon nga gamiton ang mga parapo 1-3. Hikaya ang pagbalik-duaw aron hisgotan ang mga tubag sa mga pangutana sa parapo 3.

◼ Kon unsaon paghikay ang pagbalik-duaw:

Sa pagtapos sa unang pagtuon, hikaya nga ipadayon ang panaghisgot. Ikaw yanong makaingon: “Sa pipila ra ka minuto, nakakat-on kita kon unsay gitudlo sa Bibliya bahin sa usa ka hinungdanong ulohan. Sa sunod higayon, atong mahisgotan [ibilin ang usa ka pangutana nga pagahisgotan]. Makaduaw ba ako kanimo sa samang oras sa sunod semana?”

Samtang nagkaduol kita sa tinudlong panahon ni Jehova, siya nagpadayon sa pagsangkap kanato alang sa buluhaton nga angay natong buhaton. (Mat. 28:19, 20; 2 Tim. 3:17) Gamiton natong epektibo kining talagsaon nga bag-ong kasangkapan sa pagsugod ug mga pagtuon sa Bibliya.

Kon Unsaon Pagtanyag ang Librong Gitudlo sa Bibliya

Kining maong pasukip adunay nagkadaiyang mga sugyot sa pagtanyag sa librong Gitudlo sa Bibliya. Aron mahimong labing epektibo, ipahayag kini sa imong kaugalingong mga pulong, ipahiuyon ang imong presentasyon ngadto sa mga tawo sa inyong teritoryo, ug sayra ang espesipikong mga punto nga anaa sa libro nga mahimong gamiton sa panaghisgot sa Bibliya. Ang ubang mga presentasyon nga praktikal sa inyong teritoryo mahimong gamiton usab.—Tan-awa ang Enero 2005 nga Atong Ministeryo sa Gingharian, p. 8.

Armagedon

◼ “Inigkabati sa mga tawo sa pulong ‘Armagedon,’ makahunahuna ang daghang tawo bahin sa kalaglagan sa daghang katawhan. Matingala ka ba sa pagkahibalo nga ang Armagedon sa pagkatinuod maoy panghitabo nga mapaabot uban ang kahinam? [Patubaga. Unya ipabasa ang Pinadayag 16:14, 16.] Matikdi kining komentoha bahin sa kon unsa unyay kahimtang sa kinabuhi human sa Armagedon.” Paklia ngadto sa mga panid 82-4, ug basaha ang parapo 21.

Bibliya

◼ “Ang katawhan kasagarang moingon nga ang Bibliya maoy Pulong sa Diyos. Nahibulong ka ba sukad kon sa unsang paagi ang usa ka basahon nga gisulat sa mga tawo tukmang tawgon nga Pulong sa Diyos? [Patubaga. Unya basaha ang 2 Pedro 1:21 ug ang parapo 5 sa mga panid 19-20.] Ihatag niining libroha ang mga tubag sa Bibliya sa maong mga pangutana.” Ipakita ang mga pangutana diha sa panid 6.

◼ “Karong mga adlawa, ang mga tawo makabaton ug mas daghang impormasyon kay sukad masukad. Apan sa imong hunahuna, asa nato makaplagi ang maayong tambag nga makatabang kanato sa pagtagamtam ug malipayon, malamposong mga kinabuhi? [Patubaga. Unya basaha ang 2 Timoteo 3:16, 17 ug ang parapo 12 sa panid 23.] Kining libroha mopatin-aw kon sa unsang paagi kita mahimong magkinabuhi sa paagi nga makapahimuot sa Diyos ug makabaton ug kaayohan.” Ipakita ang tsart ug ang hulagway sa mga panid 122-3.

Gubat/Kalinaw

◼ “Ang katawhan sa bisan diin nangandoy ug kalinaw. Sa imong hunahuna, ang paglaom ba nga magmalinawon ang yuta mao lamay usa ka damgo? [Patubaga. Unya basaha ang Salmo 46:8, 9.] Kining libroha naghisgot kon sa unsang paagi tumanon sa Diyos ang iyang katuyoan ug ipatungha ang kalinaw sa tibuok yuta.” Ipakita ang hulagway sa panid 35, ug hisgoti ang mga parapo 17-21 sa mga panid 33-4.

Jehova nga Diyos

◼ “Ang daghang tawo nga nagtuo sa Diyos gustong masuod kaniya. Nahibalo ka ba nga ang Bibliya nagaawhag kanato nga masuod kaniya? [Patubaga. Unya basaha ang Santiago 4:8a ug ang parapo 20 sa panid 16.] Kining libroha gipatik aron tabangan ang mga tawo nga makakat-on ug dugang bahin sa Diyos, nga gamiton ang ilang kaugalingong kopya sa Bibliya.” Ipakita ang pasiunang mga pangutana sa panid 8.

◼ “Daghang tawo nag-ampo nga balaanon unta ang ngalan sa Diyos. Nahibulong ka ba sukad kon unsay ngalan sa Diyos? [Patubaga. Unya basaha ang Salmo 83:18 ug ang mga parapo 2-3 sa panid 195.] Kining libroha mopatin-aw kon unsay tinuod nga gitudlo sa Bibliya bahin kang Jehova nga Diyos ug sa iyang katuyoan alang sa katawhan.”

Jesu-Kristo

◼ “Ang katawhan sa tibuok yuta nakadungog na bahin kang Jesu-Kristo. Ang pipila moingon nga siya usa lamang ka inilang tawo. Ang uban nagsimba kaniya ingong Diyos nga Labing Gamhanan. Sa imong hunahuna, hinungdanon ba kon unsay atong pagtuo bahin kang Jesu-Kristo?” Patubaga. Unya basaha ang Juan 17:3 ug ang parapo 3 sa mga panid 37-8. Dad-a ang pagtagad ngadto sa pasiunang mga pangutana sa ubos sa ulohan sa kapitulo.

Kamatayon/Pagkabanhaw

◼ “Daghang tawo ang nahibulong kon unsay tinuod nga mahitabo sa pagkamatay sa tawo. Sa imong hunahuna, posible ba natong masayran kana? [Patubaga. Unya basaha ang Ecclesiastes 9:5 ug ang mga parapo 5-6 sa mga panid 58-9.] Kining libroha mopatin-aw usab kon unsay kahulogan sa saad sa Bibliya sa pagkabanhaw alang niadtong nangamatay.” Ipakita ang hulagway sa panid 75.

◼ “Sa dihang mamatay ang usa nato ka minahal, natural lamang nga buot gayod natong makita siya pag-usab. Dili ba mouyon ka niana? [Patubaga.] Daghan ang nahupayan tungod sa saad sa Bibliya sa pagkabanhaw. [Basaha ang Juan 5:28, 29 ug ang mga parapo 16-17 sa panid 72.] Kining kapituloha motubag usab niining mga pangutanaha.” Ipakita ang pasiunang mga pangutana sa panid 66.

Kinabuhing Walay Kataposan

◼ “Gusto sa kadaghanang tawo ang maayong panglawas ug taas nga kinabuhi. Apan kon posible, buot ba nimong mabuhi sa walay kataposan? [Patubaga. Unya basaha ang Pinadayag 21:3, 4 ug ang parapo 17 sa panid 54.] Gihisgotan niining libroha kon sa unsang paagi kita makabaton ug kinabuhing walay kataposan ug kon unsay kahimtang sa kinabuhi sa dihang matuman ang maong saad.”

Pag-ampo

◼ “Nahibulong ka ba sukad kon sa unsang paagi tubagon sa Diyos ang mga pag-ampo? [Patubaga. Unya basaha ang 1 Juan 5:14, 15 ug ang mga parapo 16-18 sa mga panid 170-2.] Kining kapituloha mopatin-aw usab kon nganong angay kitang moampo sa Diyos ug kon unsay angay natong pagabuhaton aron iyang dunggon.”

Pamalay

◼ “Sa daghang dapit, nagakalisod ang pagkaplag ug desente ug baratong balay. Sa imong hunahuna, moabot kaha ang adlaw nga ang tanan aduna nay balay nga igong kapuy-an? [Patubaga. Unya basaha ang Isaias 65:21, 22 ug ang parapo 20 sa panid 34.] Kining libroha mopatin-aw kon sa unsang paagi ang maong saad sa Diyos matuman.”

Pamilya

◼ “Kitang tanan interesado nga magmalipayon ang atong pamilya. Dili ba mouyon ka niana? [Patubaga.] Naghisgot ang Bibliya bahin sa butang nga mahimong himoon sa matag usa sa pamilya aron makatabang sa pagpatunghag kalipay diha sa pamilya—pagsundog sa Diyos diha sa pagpakitag gugma.” Basaha ang Efeso 5:1, 2 ug ang parapo 4 sa panid 135.

Relihiyon

◼ “Ang daghang tawo nagsugod sa paghunahuna nga ang mga relihiyon sa kalibotan usa ka hinungdan sa mga suliran sa katawhan imbes usa ka solusyon. Sa imong hunahuna, ang relihiyon ba nagaagak sa mga tawo sa hustong direksiyon? [Patubaga. Unya basaha ang Mateo 7:13, 14 ug ang parapo 5 sa mga panid 145-6.] Kining kapituloha nagatuki sa unom ka butang nga nagpaila sa pagsimba nga giuyonan sa Diyos.” Ipakita ang listahan sa panid 147.

Trahedya/Pag-antos

◼ “Inigkahitabo sa usa ka trahedya, ang daghan magduhaduha kon ang Diyos tinuod bang may pagtagad sa mga tawo ug nagmatikod sa ilang pag-antos. Nahibulong ka ba sukad bahin niana? [Patubaga. Unya basaha ang 1 Pedro 5:7 ug ang parapo 11 sa panid 11.] Kining libroha mopatin-aw kon sa unsang paagi bug-os wagtangon sa Diyos ang pag-antos sa katawhan.” Ipakita ang pasiunang mga pangutana sa panid 106.

[Kahon sa panid 5]

Mga Paagi sa Paghisgot sa Kahikayan sa Donasyon

“Kon buot nimong mohatag ug gamayng donasyon karon alang sa among tibuok-kalibotang buluhaton, malipay akong modawat niana.”

“Bisan pag ang among literatura gitanyag nga libre, modawat kamig gagmayng mga donasyon alang sa among tibuok-kalibotang buluhaton.”

“Basin nahibulong ka kon sa unsang paagi kami nakapadayon sa paghimo niining buluhatona. Kini tungod kay ang among tibuok-kalibotang buluhaton suportado sa boluntaryong mga donasyon. Kon buot nimong mohatag ug gamayng donasyon karon, ako malipayng modawat niana.”

(1) Pangutana, (2) Teksto, ug (3) Kapitulo

Ang usa ka yanong paagi sa pagpresentar sa Unsay Tinuod nga Gitudlo sa Bibliya? mao ang (1) pagpatunghag punto-debista nga pangutana, (2) pagbasag haom nga teksto, ug (3) paghisgot ug usa ka kapitulo diha sa libro nga naghisgot sa maong ulohan pinaagi sa pagbasa sa pasiunang mga pangutana ubos sa ulohan sa kapitulo. Kon magpakitag interes ang tagbalay, mahimong ikapasundayag nimo ang pagtuon sa Bibliya nga gamiton ang unang mga parapo sa maong kapitulo. Kining metodoha magamit sa pagsugod ug usa ka pagtuon sa unang pagduaw o sa dihang mobalik-duaw.

◼ “Sa imong hunahuna, posible kahang ang mga tawo makaila sa atong labing gamhanang Maglalalang, sumala sa giingon dinhi sa Bibliya?” Basaha ang Buhat 17:26, 27, ug patubaga. Unya hisgoti ang kapitulo 1.

◼ “Tungod sa mga suliran nga atong gisagubang karon, sa imong hunahuna, posible kahang makaplagan ang kahupayan ug paglaom nga gibatbat dinhi?” Basaha ang Roma 15:4, ug patubaga. Unya hisgoti ang kapitulo 2.

◼ “Kon ikaw may gahom sa paghimo niini, ipahinabo mo ba kining maong mga kausaban?” Basaha ang Pinadayag 21:4, ug patubaga. Unya hisgoti ang kapitulo 3.

◼ “Sa imong hunahuna, matagamtam gayod kaha sa atong mga anak ang mga kahimtang nga gibatbat niining karaang awit?” Basaha ang Salmo 37:10, 11, ug patubaga. Unya hisgoti ang kapitulo 3.

◼ “Sa imong hunahuna, moabot gayod kaha ang adlaw sa dihang matuman kining mga pulonga?” Basaha ang Isaias 33:24, ug patubaga. Unya hisgoti ang kapitulo 3.

◼ “Nahibulong ka ba sukad kon ang mga patay nahibalo kon unsay ginabuhat sa mga buhi?” Patubaga. Unya basaha ang Ecclesiastes 9:5, ug hisgoti ang kapitulo 6.

◼ “Sa imong hunahuna, may adlaw kahang moabot nga makita nato pag-usab ang atong mga minahal nga namatay, sumala sa gisulti ni Jesus niining mga bersikuloha?” Basaha ang Juan 5:28, 29, ug patubaga. Unya hisgoti ang kapitulo 7.

◼ “Sa imong hunahuna, unsay gikinahanglan aron matuman ang kabubut-on sa Diyos sa yuta ingon nga natuman sa langit, sama sa gihisgotan niining iladong pag-ampo?” Basaha ang Mateo 6:9, 10, ug patubaga. Unya hisgoti ang kapitulo 8.

◼ “Sa imong hunahuna, ania na ba kita nagkinabuhi sa panahong gibatbat niining tagnaa?” Basaha ang 2 Timoteo 3:1-4, ug patubaga. Unya hisgoti ang kapitulo 9.

◼ “Daghang tawo nahibulong kon nganong ang mga suliran sa katawhan maorag nagakagrabe. Sa imong hunahuna, ang katin-awan nga gihatag niining tekstoha mao kaha ang tubag?” Basaha ang Pinadayag 12:9, ug patubaga. Unya hisgoti ang kapitulo 10.

◼ “Gusto mo ba gayong masayran ang tubag sa pangutana nga sama niini?” Basaha ang Job 21:7, ug patubaga. Unya hisgoti ang kapitulo 11.

◼ “Sa imong hunahuna, ang pagpadapat ba niining tambaga gikan sa Bibliya makatabang sa mga tawo sa pagtagamtam ug malipayon nga pamilyahanong kinabuhi?” Basaha ang Efeso 5:33, ug patubaga. Unya hisgoti ang kapitulo 14.

Ang usa ka pagtuon sa Bibliya ikataho sa dihang kini madumalag duha ka beses human mapasundayag ang kahikayan sa pagtuon ug kon adunay katarongan sa pagtuo nga ang pagtuon magpadayon.