Pagpanghatag nga Nagapasidungog Kang Jehova

¹ Sa Proverbio 3:9, si Haring Solomon nagsugo: “Pasidunggi si Jehova pinaagi sa imong bililhong mga butang ug pinaagi sa mga unang bunga sa tanan mong abot.” Ang Balaod nga gihatag sa Israel kaniadto nag-ingon nga ang diyes porsiyento sa ilang abot kinahanglang igahin sa pagpasidungog kang Jehova. Komosta ang bahin sa mga Kristohanon? Ang tubag mabasa sa giingon ni apostol Pablo sa 2 Corinto 9:7, “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.”

² Ang usa ka “malipayong maghahatag” magahatag nga kinabubut-on, dili “pinugos.” Buhaton niya kana tungod kay gusto niyang pasidunggan si Jehova ug ipakita ang pagpabili sa tanan nga nahimo sa Diyos kanato. Bisag wala pugsa sa paghatag, bation sa usa ka dedikadong Kristohanon nga obligado siya sa pagpakita sa kadako sa iyang gugma ug pagpabili kang Jehova ug sa iyang mga igsoon. (1 Juan 4:11) Gipakita sa daghan natong mga igsoon ang maong pagkamanggihatagon pinaagi sa pagsuportar sa buluhatong pagpanukod ug Kingdom Hall, ug tungod niana gatosan na ka Kingdom Hall ang natukod sa Pilipinas.

³ Gikinahanglan ang Paghalad: Ubos sa Moisesnong Balaod, ang tanang Israelinhon, kabos man o adunahan, gisugo nga regular nga magtanyag ug mga halad kang Jehova, bisan pag lainlain ang bili niana, depende sa maarangan sa naghalad. Gipakita ni Jesus nga ang usa ka Kristohanon kinahanglang ‘modumili sa iyang kaugalingon’ ug motanyag usab ug mga halad aron mapasidunggan si Jehova. (Mat. 16:24) Kini naglakip sa pagpamenos sa personal nga kaharuhay ug mga kabtangan sa usa aron iyang magamit ang iyang mga gipanag-iya diha sa pagtabang sa uban, nga bahin sa atong sagradong pag-alagad. Si Pablo nagtambag: “Ayaw kalimti . . . ang pagpakig-ambit sa mga butang sa uban, kay ang maong mga halad gikahimut-an sa Diyos.”​—Heb. 13:16.

⁴ Sa unsang paagi atong mahimo ang ‘malipayong paghatag’ maylabot sa programa sa pagpanukod ug mga Kingdom Hall? Atong hisgotan kon sa unsang paagi kini mahimo diha sa (1) mga kongregasyon nga wala mailalom sa programa sa pagpanukod ug Kingdom Hall, (2) mga kongregasyon nga wala pa makaimpas sa ilang loan sa Kingdom Hall, ug (3) mga kongregasyon nga naggamit sa bag-ong mga Kingdom Hall nga gipanag-iya sa sangang buhatan.

⁵ Mga Kongregasyon nga Wala Mailalom sa Programa sa Pagpanukod ug Kingdom Hall: Tingali aduna kamoy kaugalingong Kingdom Hall nga wala mailalom sa programa sa pagpanukod. Kon mao, sa unsang paagi inyong masuportahan ang programa? Di pa dugay, nakadawat kitag instruksiyon bahin sa pagbutang ug laing kahon alang sa amot nga pagatawgong “Kingdom Hall Construction Worldwide.” Ang tanang kontribusyon nga makuha niining kahona gamiton sa pagtukod ug Kingdom Hall sa ubang mga kongregasyon, dili lamang alang sa atong kaugalingong kongregasyon. Nahiuyon kini sa mga pulong ni Pablo: “Magatan-aw, dili lamang sa personal nga interes sa mga butang labot sa [atong] kaugalingon, kondili sa personal nga interes usab sa uban.”​—Filip. 2:4.

⁶ Samtang ang mga igsoon maghulog ug mga donasyon niini nga kahon, ang pipila ka kongregasyon, lakip na ang pipila nga nagbayad ug loan sa Kingdom Hall, adunay resolusyon nga magpadalag tinong kantidad kada bulan gikan sa pondo sa kongregasyon sa pagsuportar sa programa sa pagpanukod ug Kingdom Hall sa tibuok kalibotan. Sa maong kahimtang, ang binulan nga donasyon nga gikauyonan idugang sa tanan nga makuha sa kahon nga gimarkahag “Kingdom Hall Construction Worldwide” sa dihang ipadala kana ngadto sa sangang buhatan.

⁷ Mga Kongregasyon nga Wala pa Makaimpas sa Ilang Loan sa Kingdom Hall: Kapin sa 700 ka kongregasyon sa Pilipinas ang wala pa makaimpas sa ilang loan sa Kingdom Hall. Sa unsang paagi ang maong mga kongregasyon makatabang sa programa sa pagpanukod? Ang usa ka paagi mao ang pagpaningkamot nga ilang mapadala ngadto sa sangang buhatan ang bug-os nga kantidad nga ilang gisaad nga iamot matag bulan. Gipakita sa mga rekord nga, sa aberids, wala pay katunga sa gisaad nga kantidad nga ibayad kada bulan ang madawat sa sangang buhatan gikan sa mga kongregasyon nga adunay loan. Busa, kon ilang mapadala ang bug-os nga kantidad nga ilang gisaad, madoble unta ang pondo nga magamit sa pagtukod ug mga Kingdom Hall alang sa ubang kongregasyon nga nanginahanglan niana. Ang mga magmamantala nga gustong moamot alang niini nga katuyoan maghulog niana diha sa kahon nga gimarkahag “Local Congregation Expenses.” Dayon sa kataposan sa bulan, ipadala sa mga ansiyano ngadto sa sangang buhatan ang bug-os nga kantidad nga ilang gisaad ingong bayad sa ilang loan sa Kingdom Hall.

⁸ Mga Kongregasyon nga Naggamit sa mga Kingdom Hall nga Gipanag-iya sa Sangang Buhatan: Kapin na sa 600 ka kongregasyon ang nagatigom karon sa mga Kingdom Hall nga ubos sa bag-ong programa sa pagpanukod. Kini nga mga kongregasyon mihimog resolusyon nga mopadalag tinong kantidad kada bulan ingong donasyon. Nganong ila man kanang gihimo? Tungod kay sila nahibalo nga natukoran silag bag-ong Kingdom Hall tungod sa pagsakripisyo sa daghang igsoon nga miamot alang sa Kingdom Hall Construction. Karon nga naa na silay bag-ong tigomanan, gusto usab nilang motabang sa uban nga wala pay bag-ong Kingdom Hall. Sa pagbuhat niini ilang gisunod ang tambag sa Bibliya: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”​—1 Cor. 10:24.

⁹ Makapalipay nga daghan niining maong mga kongregasyon ang nagapadala sa bug-os nga kantidad nga ilang gisaad kada bulan, ug adunay pipila nga nagapadala ug mas dako pa kay sa ilang gisaad. Apan ang ubang kongregasyon wala makaabot sa kantidad nga ilang gisaad, tungod tingali kay ang pipila ka magmamantala wala makatuman sa ilang gisaad nga kantidad. Bisan tuod nga ang kantidad nga ihatag sa usa maoy “sumala sa iyang gihukom diha sa iyang kasingkasing,” apan kana gisaad nato kang Jehova ug bahin sa atong halad kaniya. (2 Cor. 9:7) Busa ang atong paghatag niini sa matinud-anong paagi maoy bahin sa atong pagsimba ug kinahanglang igahin nato kini alang niini nga katuyoan. Mao kanay gidasig ni apostol Pablo sa dihang siya miingon sa 1 Corinto 16:2: “Matag unang adlaw sa semana ang matag usa kaninyo diha sa iyang kaugalingong balay kinahanglang magagahin agig pagtigom sumala sa iyang pag-uswag.” Nakita sa daghang igsoon nga mas maayong ibutang sa laing sobre ang kantidad nga ilang ‘gigahin’ aron dili nila kana magamit sa laing katuyoan.

¹⁰ Daghang kongregasyon ang nadugangan ug mga magmamantala sukad nga una nilang gihimo ang ilang resolusyon nga moamot alang sa ilang Kingdom Hall. Tungod niini, gisugyot sa Nagamandong Lawas nga kada tuig, angayng repasohon sa mga ansiyano ang resolusyon nga ilang gihimo ug tan-awon kon mahimo pa ba kining patas-an. Mas maayo nga himoon kini sa Enero 2009, diin awhagon ang mga magmamantala nga isulat diha sa gamayng papel ang kantidad nga gusto nilang iamot kada bulan agig apresasyon sa ilang Kingdom Hall. Dili sulatan ug ngalan ang mga papel. Dayon mahimo nang ipresentar sa mga ansiyano ang usa ka bag-ong resolusyon nga sagopon sa tibuok kongregasyon. Human mahimo ang bag-ong resolusyon, angayng ipadala sa mga ansiyano ang kopya niana ngadto sa sangang buhatan aron mapulihan ang daang resolusyon.

¹¹ Kami nahibalo nga daghan kaninyo ang nagsundog sa mga kongregasyon sa Macedonia sa unang siglo, nga bisan pa sa ilang “hilabihang kakabos nagpadagaya . . . sa ilang pagkamahinatagon. Kay sumala sa ilang maarangan, oo, ako makapamatuod, kadto maoy labaw sa ilang maarangan, samtang sila sa ilang kaugalingon nagpadayon sa paghangyo kanamo . . . alang sa pribilehiyo sa malulotong pagpanghatag.” (2 Cor. 8:1-4) Hinaot nga atong batonan ang samang tinamdan sa mga ‘taga-Macedonia’ pinaagi sa atong madagayaong pagpanghatag nga nagapasidungog kang Jehova!