Sulat Gikan sa Nagamandong Lawas

Minahal nga mga Isigka-Saksi ni Jehova:

Pagkakulbahinam sa atong panahon! Ug pagkadako sa atong kalipay! Malipayon gayod kaming nag-alagad nga “abaga sa abaga” uban kaninyo among minahal nga mga igsoon sa paghimog labing dakong pamatuod sukad masukad alang sa atong langitnong Amahan, si Jehova.—Sof. 3:9; Juan 14:12.

Bisag malipayon kitang nag-alagad kang Jehova, kita makasinati gihapog grabeng kalisdanan. Sa miaging tuig sa pag-alagad, ang uban nagkalisodlisod tungod sa mga linog, baha, bagyo, ug uban pang kalamidad. (Mat. 24:7) Daghan ang nag-antos sa grabeng mga sakit ug katigulangon. Kita nakigbisog sa nag-uswag nga “kaul-ol sa kasakit.” (Mat. 24:8) Sa daghang nasod, lakip ang Armenia, Eritrea, ug South Korea, daghan ang nabilanggo tungod sa ilang pagtuo.—Mat. 24:9.

Unsay nakatabang kanato nga magpabiling positibo bisan pa sa mga kalisdanan? Ang tinuig nga teksto sa 2010 nagpahinumdom kanato sa usa ka hinungdanong punto: ‘Ang gugma molahutay sa tanang butang. Ang gugma dili gayod mapakyas.’ (1 Cor. 13:7, 8) Oo, ang atong gugma sa usag usa ug ang atong gugma kang Jehova nakatabang kanato sa paglahutay.

Daghang nag-angkong Kristohanon ang nakadayeg sa kaylap ug padayon natong pagsangyaw. Bisag dili sila modawat sa atong mga pagtulon-an, ang uban nakaingon pa gani, “Kamo nagabuhat sa angay unta namong buhaton!” Unsay nagtukmod sa mga Saksi ni Jehova nga magmasiboton sa pagsangyaw? Sa gihapon, kini mao ang gugma. Sama sa atong langitnong Amahan, dili kita buot nga dunay malaglag. (2 Ped. 3:9) Ang atong tinguha nga ang tanan maghinulsol makita sa bag-ong kinatas-ang ihap nga 7,508,050 ka magmamantala sa miaging tuig sa pag-alagad. Duna bay laing relihiyon nga daghang membro ang miboluntaryo sa pagsangyaw?

Kita nalig-on nga padayong natuman ang tagna ni Isaias: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang tanang kanasoran magaganayan.” (Isa. 2:2-4) Lakip sa daghang nagganayan sa balay ni Jehova mao ang 294,368 nga nabawtismohan sa miaging tuig sa pag-alagad. Atong giabiabi sila sa atong organisasyon. Hinaot nga ang atong Kristohanong gugma magtukmod kanato sa pagtabang kanila nga suklan ang pag-atake sa atong kaaway, si Satanas nga Yawa.—1 Ped. 5:8, 9.

Ang kinatas-ang ihap nga 18,706,895 nga mitambong sa Memoryal sa Martes, Marso 30, 2010 nagpakita nga minilyon pa ang potensiyal nga mahimong alagad ni Jehova. Mapasalamaton gayod kita nga wala pa ipadangat ni Jehova ang kalaglagan niining daotang sistema! Sa kasamtangan, ang atong gugma makatabang kanato sa paglahutay.—2 Tes. 3:5.

Ang “Pabiling Suod Kang Jehova!” nga Distritong Kombensiyon, nga ang kadaghanan gipahigayon sa tibuok kalibotan sa 2010, nakapalig-on sa atong relasyon kang Jehova. Tinuod gayod ang mga pulong sa salmista: “Malipayon ang katawhan kansang Diyos mao si Jehova!” (Sal. 144:15) Bisag unsa pay mahitabo sa umaabot, kita masaligon nga kon si Jehova magauban kanato, wala kitay angayng kahadlokan. (Sal. 23:4) Sa dili madugay, si Jehova pinaagi sa iyang Anak ‘magbungkag sa mga buhat sa Yawa.’ (1 Juan 3:8) Gipangandoy gayod nato ang pag-abot sa maong adlaw! Apan sa kasamtangan, daghan pa kitag angayng buhaton.—1 Cor. 15:58.

Makasalig kamo nga “sa walay hunong” kami nagaampo alang kaninyo. (Roma 1:9) Hinaot nga “magpabilin kamo diha sa gugma sa Diyos, samtang nagapaabot kamo sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.”—Jud. 21.

Kami nagmahal kaninyong tanan!

Inyong mga igsoon,

Nagamandong Lawas sa mga Saksi ni Jehova