Pagdumalag Progresibong mga Pagtuon sa Bibliya Diha sa Pultahan ug Pinaagig Telepono
1, 2. Sa unsang paagi ikapasibo nato ang atong pagdumalag pagtuon aron matabangan ang puliking mga tawo?
1 Ang mga tawo karon puliki. Apan daghan ang interesado sa espirituwal nga mga butang. Sa unsang paagi makatabang kita kanila sa pagtagbaw sa ilang espirituwal nga panginahanglan? (Mat. 5:3) Daghang magmamantala ang nakadumalag pagtuon sa Bibliya diha sa pultahan o pinaagig telepono. Mapauswag ba nimo ang imong ministeryo niining paagiha?
2 Aron makasugod ug mga pagtuon sa Bibliya, kinahanglang idemonstrar nato ang paagi sa pagtuon kon dunay kahigayonan. Sa unsang paagi ug asa nato kini himoon?
3. Sa unsang paagi ikademonstrar ang pagtuon sa Bibliya diha sa pultahan?
3 Diha sa Pultahan: Sa dihang makahimamat kag tawo nga gustong makigsulti bahin sa Bibliya, buksi ang usa ka basahon nga imong naandam, tingali ang panid 16 ug 17 sa labing bag-ong publikong edisyon sa Bantayanang Torre, o ang haom nga parapo sa librong Gitudlo sa Bibliya, ug sugdi ang pagtuon. Basaha ang parapo, isukna ang pangutana, ug hisgoti ang usa o duha ka teksto nga gisitar. Sagad mahimo kini diha sa pultahan sa 5 o 10 minutos. Kon nagustohan niya ang panaghisgot, pakigsabot nga hisgotan ninyo ang sunod nga usa o duha ka parapo sa laing higayon.
4. Unsang kasinatian ang nagpakita nga daghang tawo ang mas gustong magtuon sa Bibliya pinaagig telepono?
4 Pinaagig Telepono: Ang pipila ka tawo mas gustong magtuon sa Bibliya pinaagig telepono kay sa personal. Tagda ang mosunod nga kasinatian: Samtang ang usa ka sister nagsangyaw sa balaybalay, nahimamat niya ang usa ka batan-ong inahan nga may sekular nga trabaho. Sa dihang wala na siya maabti pag-usab sa sister diha sa balay, siya gikontak pinaagig telepono. Misulti ang batan-ong inahan nga wala gayod siyay panahon sa paghisgot sa Bibliya. Ang sister miingon: “Sa 10 o 15 minutos, may bag-ong butang kang makat-onan, bisan pinaagi sa telepono.” “Aw, kon pinaagig telepono, okey ko!” mitubag ang babaye. Sa wala madugay, ang regular nga pagtuon gidumala na pinaagig telepono.
5. Nganong paningkamotan nato nga mas dakong panahon ang magugol sa pagtuon diha sa pultahan?
5 Pagtuon sa Bibliya Sulod sa Balay: Apan, makontento na lang ba kita sa pagdumala sa pagtuon diha sa pultahan? Dili. Maalamon nga dili magdugay sa unang pagtuon sa Bibliya, apan kon ang pagtuon establisado na ug ang interes sa tagbalay nahaling na, mahimong mogugol nag mas taas nga panahon sa pagtuon. Kini hinungdanon gayod. Ingong ilustrasyon, ang batang gikuraw sa sinugdan pakan-on rag tinagdiyutay hangtod maulian siya sa iyang gana, apan dili kita makadahom nga siya mabaskog ug motubo nga normal kon tinagdiyutay ra ang ipakaon kaniya sulod sa daghang bulan. Sa susama, ang estudyante sa Bibliya nagkinahanglag mas pormal ug regular nga pagtuon aron mahimong hamtong nga alagad sa Diyos.—Heb. 5:13, 14.
6. Unsa ang mga kaayohan sa pagdumala sa pagtuon sa Bibliya sa sulod sa balay o sa pribadong lugar?
6 Mas maayo ang pagdumalag pagtuon sa Bibliya diha sa pribadong lugar—sa sulod sa balay o sa laing haom nga dapit. Kini makatabang nga mas daling makakat-on ang estudyante ug mas masabtan niya ang Pulong sa Diyos. (Mat. 13:23) Makatabang usab kini sa magtutudlo nga mas dali niyang ikapasibo ang tun-anan sa panginahanglan sa estudyante. Dugang pa, kon mas taas ang panahong magugol sa pagtuon, ang paghisgot sa Pulong sa Diyos mahimong mas tin-aw ug makapalig-on sa pagtuo.—Roma 10:17.
7. Sa unsang paagi atong mabalhin ang pagtuon gikan sa pultahan ngadto sa sulod sa balay?
7 Sa unsang paagi mabalhin nimo ang pagtuon gikan sa pultahan ngadto sa sulod sa balay. Human sa ubay-ubayng hamubong mga pagtuon, nganong dili nimo direktang itanyag ang mas taas, espesipikong gitas-on sa panahon sa pagtuon? O makagamit kag dili-direktang paagi pinaagi sa pagsukna, “May panahon ka ba karon nga makalingkod ug atong mahisgotan kini nga ulohan?” o “Pila ka minutos gusto nimong hisgotan kining ulohana?” Kon dili molampos ang imong paningkamot, nan ipadayon ang hamubong mga pagtuon diha sa pultahan. Sa nahiangayng panahon, sulayi na usab nga ibalhin ang pagtuon sa sulod sa balay.
8. Unsay atong tumong samtang kita nagatuman sa atong ministeryo?
8 Samtang nagpadayon kita sa pagpangita sa mga tawong takos, dili gayod nato kalimtan ang atong katuyoan—ang pagtabang sa mga tawong matarong ug kasingkasing nga mahimong dedikado ug bawtismadong mga alagad ni Jehova. Hinaot panalanginan niya ang atong mga paningkamot samtang kita nagatuman sa atong ministeryo uban sa maong tumong.—2 Tim. 4:5.