Buot Niya nga mabuhi tang malinawon ug malipayon sa paraisong yuta sa walay kataposan!

Tingali mangutana ka, ‘Mahitabo ba god na?’ Nag-ingon ang Bibliya nga ang Gingharian sa Diyos maoy magpahinabo niana, ug buot sa Diyos nga ang tanang tawo makakat-on bahin sa Gingharian ug sa iyang katuyoan alang kanato.​—Salmo 37:11, 29; Isaias 9:7.

Buot Niya nga makabaton tag kaayohan.

Sama sa maayong amahan nga nagtinguha sa labing maayo alang sa iyang mga anak, gusto sa atong langitnong Amahan nga kita magmalipayon sa walay kataposan. (Isaias 48:17, 18) Siya nagsaad nga ang “nagabuhat sa kabubut-on sa Diyos magpabilin hangtod sa hangtod.”​—1 Juan 2:17.

Buot Niya nga mosubay ta sa iyang dalan.

Ang Bibliya nag-ingon nga buot sa atong Maglalalang nga ‘matudloan kita sa iyang mga dalan’ aron kita ‘makalakaw sa iyang mga alagianan.’ (Isaias 2:2, 3) Iyang giorganisar ang “usa ka katawhan alang sa iyang ngalan” aron mapahibalo ang iyang kabubut-on sa tibuok yuta.​—Buhat 15:14.

Buot Niya nga magkahiusa ta sa pagsimba kaniya.

Inay makapabahin, ang putling pagsimba kang Jehova makapahiusa sa mga tawo diha sa tinuod nga gugma. (Juan 13:35) Kinsa karon ang nagtudlo sa mga tawo sa tibuok kalibotan kon sa unsang paagi magkahiusa sa pag-alagad sa Diyos? Palihog susiha kana niini nga brosyur.

May kaila ka ba nga Saksi ni Jehova? Tingali may Saksi kang silingan, kauban sa trabaho, o klasmet. O tingali gikaestorya ka na namo bahin sa Bibliya. Kinsa ba gayod kami, ug nganong isangyaw namo ang among tinuohan?

Kami ordinaryo rang mga tawo. Kami lainlaig kagikan ug kahimtang sa kinabuhi. Ang uban namo kaniadto lahig relihiyon, samtang ang uban wala magtuog Diyos. Apan una mi mahimong Saksi, gisusi namo pag-ayo ang mga pagtulon-an sa Bibliya. (Buhat 17:11) Kami nakombinsir sa among nakat-onan ug midesidir sa pagsimba kang Jehova nga Diyos.

Kami nakabenepisyo sa pagtuon sa Bibliya. Sama sa uban, nagsagubang kamig mga problema ug kahuyangan. Apan tungod sa pagpadapat sa mga prinsipyo sa Bibliya matag adlaw, may dayag nga kauswagan sa among pagkinabuhi. (Salmo 128:1, 2) Usa kana sa mga rason kon nganong ginapaambit namo sa uban ang among nakat-onan sa Bibliya.

Kami nagpadapat sa diyosnong mga prinsipyo. Ang mga prinsipyo nga gitudlo sa Bibliya makatabang sa usa nga mahimong malipayon, matinahoron, matinud-anon, ug buotan. Kini makatabang usab nga ang usa mahimong responsableng lungsoranon, ug makapalambo sa panaghiusa sa pamilya ug sa maayong moralidad. Kay kombinsidong “ang Diyos dili mapihigon,” giisip namo nga kami usa ka internasyonal nga pamilyang nahiusa sa tinuohan, nga wala mabahinbahin tungod sa rasa ug politika. Bisag ordinaryo ra mi nga mga tawo, talagsaon kami nga pundok.​—Buhat 4:13; 10:34, 35.

• Sa unsang mga bahin nga ang mga Saksi ni Jehova sama sa ubang tawo?

• Unsang mga prinsipyo ang nakat-onan sa mga Saksi sa ilang pagtuon sa Bibliya?

Daghan ang nagtuo nga ang Saksi ni Jehova maoy ngalan sa usa ka bag-ong relihiyon. Apan kapig 2,700 ka tuig kanhi, ang mga alagad sa bugtong matuod nga Diyos gitawag nag iyang “mga saksi.” (Isaias 43:10-12) Una pa sa 1931, nailhan ming mga Estudyante sa Bibliya. Nganong gidala namo karon ang ngalang Saksi ni Jehova?

Kini nagpaila sa among Diyos. Sumala sa karaang mga manuskrito, ang ngalan sa Diyos nga Jehova makitag linibo ka beses sa Bibliya. Sa daghang hubad, kining ngalana giilisag mga titulo, sama sa Ginoo o Diyos. Apan ang matuod nga Diyos nagpadayag kang Moises sa iyang ngalang Jehova, nga nag-ingon: “Kini ang akong ngalan hangtod sa hangtod.” (Exodo 3:15) Niining paagiha, gipaila niya nga siya lahi sa tanang bakak nga diyos. Kami mapasigarbohong nagdala sa balaang ngalan sa Diyos.

Kini nagpaila sa among buluhaton. Sugod sa matarong nga si Abel, daghang tawo sa karaang panahon ang nagpamatuod bahin sa ilang pagtuo kang Jehova. Latas sa kasiglohan, si Noe, Abraham, Sara, Moises, David, ug uban pa miduyog niining “bagang panganod sa mga saksi.” (Hebreohanon 11:4–12:1) Sama sa tawong motestigos o mosaksi diha sa korte dapig sa inosenteng biktima, kami determinadong magpadayag sa kamatuoran bahin sa among Diyos.

Kami nagsundog kang Jesus. Siya gitawag sa Bibliya nga “matinumanon ug matuod nga saksi.” (Pinadayag 3:14) Si Jesus mismo nag-ingon nga iyang ‘gipaila ang ngalan sa Diyos’ ug padayong ‘nagpamatuod sa kamatuoran’ bahin sa Diyos. (Juan 17:26; 18:37) Busa ang tinuod nga mga sumusunod sa Kristo kinahanglang magdala sa ngalan ni Jehova ug magpaila niana. Ang mga Saksi ni Jehova naningkamot sa paghimo niini.

• Nganong sa ulahi ang mga Estudyante sa Bibliya ginganlag mga Saksi ni Jehova?

• Unsa na ka dugay nga si Jehova may mga saksi dinhi sa yuta?

• Kinsa ang kinalabwang Saksi ni Jehova?