BEZALEL

[Ilalom sa Landong (Silong) sa Diyos].

1. Pangulong artesano ug magtutukod sa tabernakulo, “nga anak nga lalaki ni Uri nga anak nga lalaki ni Hur sa tribo ni Juda.” (Ex 31:​1, 2; 1Cr 2:20) Si Jehova mao ang nagtudlo kang Bezalel ug nagsaad nga ‘pun-on siya sa espiritu sa Diyos sa kaalam ug sa pagsabot ug sa kahibalo ug sa tanang matang sa kahanas sa pagbuhat, alang sa pagdisenyog mga galamiton, alang sa pagpamuhat ginamit ang bulawan ug plata ug tumbaga, ug sa pagpamuhat diha sa mga bato aron ipahimutang kini ug sa pagpamuhat diha sa kahoy aron sa paghimo sa tanang matang sa kagamitan.’ (Ex 31:3-5; 35:30-33) Kining mahalong mga materyales nga gigamit ni Bezalel maoy gikan sa dagayang mga amot sa “andam ug kasingkasing” nga katawhan, ug “gani nagsobra pa” kini.​—Ex 35:4-9, 20-29; 36:3-7.

Si Bezalel adunay pangunang katabang nga mao si Oholiab (Ex 31:6), ug dihay daghang “maalamon ug kasingkasing” nga mitabang kanila, apan ang responsibilidad sa pagdirihir sa komplikadong buluhaton iya ni Bezalel. (Ex 35:10-19, 25, 26, 34; 36:​1, 2) Tin-awng makita kini diha sa pagbayloay sa mga pronombre nga “siya,” nga nagtumong kang Bezalel, ug “sila,” nga nagtumong sa iyang mga katabang. (Ex 36-39) Sanglit daghan kaayong naantigohan si Bezalel ug kay siya napuno sa “espiritu sa Diyos” (Ex 35:31), iyang nadumala ang pagpanghimo sa mga tabil sa tolda ug sa mga borda niini, sa bulawan ug tumbagang mga kaw-it, sa panggawas nga mga tabon nga gikan sa mga panit, sa mga kuwadrong bayanan nga gipanghaklapan ug bulawan, sa mga tabil sa sulod (Ex 36), sa hinaklapang arka sa pakigsaad ug sa mga kerubin niini, sa lamesa ug sa mga galamiton niini, sa bulawan nga tangkawan ug sa halaran sa insenso, sa giespesipikar nga igdidihog nga lana ug insenso (Ex 37), sa halaran sa halad-nga-sinunog, sa dulang nga tumbaga ug sa tungtonganan niini, sa sawang (Ex 38), sa epod ug sa tabon sa dughan uban sa bililhong mga bato niini, ug sa mga tag-as nga besti sa mga saserdote (Ex 39). Sa dihang milingkod sa trono si Solomon 475 ka tuig sa ulahi, ang tolda sa tabernakulo, ang arka sa pakigsaad, ug ang halaran nga tumbaga gigamit pa gihapon.​—2Cr 1:1-6.

2. Usa sa mga anak nga lalaki ni Pahat-moab nga naghingilin sa ilang langyawng mga asawa ug mga anak tungod sa pag-awhag ni Esdras.​—Esd 10:​30, 44.