Reperensiya Para sa Workbook sa Tigom nga Kinabuhi ug Ministeryo
Disyembre 3-9
BAHANDI GIKAN SA PULONG SA DIYOS | BUHAT 9-11
“Pintas nga Tiglutos Nahimong Madasigong Saksi”
(Buhat 9:1, 2) Apan si Saulo, nga nagpangusmo pa gihapog hulga ug pagbuno batok sa mga tinun-an sa Ginoo, miadto sa hataas nga saserdote 2 ug nangayo kaniyag mga sulat ngadto sa mga sinagoga sa Damasco, aron nga iyang mataral nga ginapos ngadto sa Jerusalem si bisan kinsang makaplagan nga iya sa Dalan, mga lalaki ug mga babaye.
bt 60 ¶1-2
Ang Kongregasyon “Nakabaton ug Yugto sa Kalinaw”
ANG mga tawong isog ug dagway nagsingabot na sa Damasco ug sila may daotang tuyo didto. Ilang bunloton ang mga tinun-an ni Jesus gikan sa ilang mga balay, gaposon, pakaulawan, ug guyoron pa-Jerusalem aron pasilotan sa Sanhedrin.
2 Ang lider sa maong pundok nga si Saulo nalangkit na sa pagpatayg tawo. Di pa dugay, siya miuyon ug nagtan-aw lang samtang gibato sa panatiko niyang mga kauban ang debotadong tinun-an ni Jesus nga si Esteban hangtod namatay. (Buh. 7:57–8:1) Kay wala pa makontento sa iyang paglutos sa mga sumusunod ni Jesus nga nagpuyo sa Jerusalem, si Saulo nahisamag sulo nga andam na sa pagpasilaob sa kalayo sa paglutos. Gusto niyang puohon ang samokang sekta nga nailhang ang “Dalan.”—Buh. 9:1, 2; tan-awa ang kahon nga “Ang Awtoridad ni Saulo sa Damasco,” sa panid 61.
(Buhat 9:15, 16) Apan ang Ginoo miingon kaniya: “Umadto ka, tungod kay kining tawhana maoy usa ka piniling sudlanan alang kanako aron magdala sa akong ngalan ngadto sa tanang kanasoran maingon man sa mga hari ug sa mga anak sa Israel. 16 Kay akong ipakita kaniya sa dayag kon unsa ka daghang butang ang iyang kinahanglang antoson tungod sa akong ngalan.”
Pabilhi si Jehova Ingong Atong Magkukulon
4 Dihang susihon ni Jehova ang mga tawo, dili siya magtan-aw sa panggawas nga panagway. Hinunoa, iyang susihon ang kasingkasing, ang pangsulod nga pagkatawo. (Basaha ang 1 Samuel 16:7b.) Gipakita kini sa Diyos dihang iyang gitukod ang Kristohanong kongregasyon. Iyang gikabig ngadto kaniya ug sa iyang Anak ang daghang indibiduwal nga sa panglantaw sa tawo dili kaayo bililhon. (Juan 6:44) Usa kanila mao ang Pariseo nga si Saulo—“usa ka tigpasipala ug maglulutos ug tawong bagis.” (1 Tim. 1:13) Pero “ang tig-usisa sa mga kasingkasing” wala mag-isip kang Saulo ingong way pulos nga yutang kulonon. (Prov. 17:3) Hinunoa, nakita sa Diyos nga puwede siyang umolon ingong maayong sudlanan—usa ka “piniling sudlanan” nga maghatag ug pamatuod “ngadto sa tanang kanasoran maingon man sa mga hari ug sa mga anak sa Israel.” (Buh. 9:15) Ang uban nga giisip sa Diyos ingong potensiyal nga mga sudlanan “alang sa gamit nga dungganon” naglakip sa kanhing mga palahubog, imoral, ug kawatan. (Roma 9:21; 1 Cor. 6:9-11) Samtang nakabaton silag tukmang kahibalo sa Pulong sa Diyos, milig-on ang ilang pagtuo ug ilang gitugotan si Jehova sa pag-umol kanila.
(Buhat 9:20-22) ug sa walay langan diha sa sinagoga siya misugod sa pagwali kang Jesus, nga Siya mao ang Anak sa Diyos. 21 Apan kadtong tanan nga nanagpakadungog kaniya nahingangha ug nanag-ingon: “Dili ba mao man kining tawhana nga naglaglag niadtong nanagtawag niining ngalana didto sa Jerusalem, ug mianhi dinhi alang niini mismo nga katuyoan, aron iyang madala sila nga ginapos ngadto sa pangulong mga saserdote?” 22 Apan si Saulo padayong nakabatog dugang pa nga gahom ug nagpakutaw sa hunahuna sa mga Hudiyo nga nagpuyo sa Damasco samtang gipamatud-an niya sa makataronganong paagi nga kini mao ang Kristo.
bt 64 ¶15
Ang Kongregasyon “Nakabaton ug Yugto sa Kalinaw”
15 Mahanduraw mo ba ang kahingangha, kakugang, ug kasuko nga gibati sa mga tawo sa dihang misugod si Saulo sa pagwali bahin kang Jesus diha sa mga sinagoga? “Dili ba mao man kining tawhana nga naglaglag niadtong nanagtawag niining ngalana didto sa Jerusalem?” sila nangutana. (Buh. 9:21) Sa dihang si Saulo nagpatin-aw kon nganong nausab ang iyang tinamdan bahin kang Jesus, siya ‘nagpamatuod sa makataronganong paagi nga kini mao ang Kristo.’ (Buh. 9:22) Apan ang maayong pagpangatarongan dili makakombinsir sa tanan. Kini dili makapausab sa hunahuna sa mga tawo nga garboso o naulipon sa tradisyon. Bisan pa niana, wala mosurender si Saulo.
Pagpangitag Espirituwal nga Bahandi
(Buhat 9:4) ug natumba siya sa yuta ug nakadungog ug usa ka tingog nga nag-ingon kaniya: “Saulo, Saulo, nganong ginalutos mo ako?”
bt 60-61 ¶5-6
Ang Kongregasyon “Nakabaton ug Yugto sa Kalinaw”
5 Sa dihang gibalda ni Jesus ang panaw ni Saulo paingon sa Damasco, Siya wala mangutana: “Nganong ginalutos mo ang akong mga tinun-an?” Apan siya nangutana: “Nganong ginalutos mo ako?” (Buh. 9:4) Oo, gibati mismo ni Jesus ang kasakit sa mga paglutos sa iyang mga sumusunod.—Mat. 25:34-40, 45.
6 Kon ikaw gidaogdaog tungod sa imong pagtuo kang Kristo, salig gayod nga si Jehova ug si Jesus nahibalo sa imong kahimtang. (Mat. 10:22, 28-31) Sa pagkakaron, ang pagsulay mahimong dili wad-on. Hinumdomi, si Jesus nakakita sa pagkalangkit ni Saulo sa pagkamatay ni Esteban ug sa iyang pagpamunlot sa matinumanong mga tinun-an gikan sa ilang mga balay sa Jerusalem. (Buh. 8:3) Apan si Jesus wala manggilabot niadtong tungora. Bisan pa niana, si Jehova, pinaagi ni Kristo, naghatag kang Esteban ug sa ubang mga tinun-an ug gikinahanglang kusog aron sila magpabiling matinumanon.
(Buhat 10:6) Kining tawhana ginaabiabi sa usa ka Simon, usa ka magtitinag-panit, nga may balay daplin sa dagat.”
nwtsty study note sa Buh 10:6
Simon, usa ka magtitinag-panit: Ang magtitinag panit sa mga mananap mogamit ug likidong gisagolag apog aron matangtang ang balhibo o mga tipik sa unod ug tambok. Dayon iyang tinaon ang panit gamit ang isog nga likido, aron ang panit puwede nang gamiton sa paghimog lainlaing butang. Ang proseso sa pagtina baho kaayo ug nagkinahanglag daghang tubig, mao tingali nga si Simon nagpuyo daplin sa dagat, lagmit duol sa utlanan sa Jope. Sa Moisesnong Balaod, ang tawo nga mohikap sa patayng lawas sa mga mananap hugaw sa seremonyal nga paagi. (Lev 5:2; 11:39) Busa daghang Hudiyo ang nakamenos sa mga magtitinag panit ug di ganahang mopuyo uban nila. Gani diha sa Talmud, ang mga magtitinag panit giisip nga mas ubos sa mga tigkolekta ug tai. Bisan pa niana, si Pedro wala magpihigpihig ug miestar sa balay ni Simon. Ang bukas nga panghunahuna ni Pedro niining bahina nakatabang niya sa iyang sunod nga asaynment—pagduaw sa usa ka Hentil sa balay niini. Ang ubang eskolar nag-ingon nga ang Gregong pulong sa “magtitinag-panit” (byr·seusʹ) mao ang apelyido ni Simon.
Pagbasa sa Bibliya
(Buhat 9:10-22) Didtoy usa ka tinun-an sa Damasco nga ginganlag Ananias, ug ang Ginoo miingon kaniya sa usa ka panan-awon: “Ananias!” Siya miingon: “Ania ako, Ginoo.” 11 Ang Ginoo miingon kaniya: “Tindog, umadto ka sa dalan nga gitawag ug Tul-id, ug sa balay ni Judas pangitaa ang usa ka tawo nga ginganlag Saulo, nga taga-Tarso. Kay, tan-awa! siya nag-ampo, 12 ug sa usa ka panan-awon iyang nakita ang usa ka tawo nga ginganlag Ananias nga misulod ug mitapion sa iyang mga kamot kaniya aron maulian siya sa iyang panan-aw.” 13 Apan si Ananias mitubag: “Ginoo, nakadungog ako gikan sa daghan mahitungod niining tawhana, kon unsa ka daghang makadaot nga mga butang nga iyang gihimo ngadto sa imong mga balaan sa Jerusalem. 14 Ug ania, siya may awtoridad gikan sa pangulong mga saserdote sa pagpanggapos sa tanang nagtawag sa imong ngalan.” 15 Apan ang Ginoo miingon kaniya: “Umadto ka, tungod kay kining tawhana maoy usa ka piniling sudlanan alang kanako aron magdala sa akong ngalan ngadto sa tanang kanasoran maingon man sa mga hari ug sa mga anak sa Israel. 16 Kay akong ipakita kaniya sa dayag kon unsa ka daghang butang ang iyang kinahanglang antoson tungod sa akong ngalan.” 17 Busa si Ananias miadto ug misulod sa maong balay, ug iyang gitapion ang iyang mga kamot kaniya ug miingon: “Saulo, igsoon, ang Ginoo, ang Jesus nga nagpakita kanimo diha sa dalan nga imong giagian sa pag-anhi, nagpadala kanako, aron ikaw maulian sa imong panan-aw ug mapuno sa balaang espiritu.” 18 Ug dihadiha may natagak gikan sa iyang mga mata nga maorag mga himbis, ug siya naulian sa iyang panan-aw; ug siya mitindog ug gibawtismohan, 19 ug siya mikaon ug naulian sa kabaskog. Sulod sa pipila ka adlaw siya kauban sa mga tinun-an didto sa Damasco, 20 ug sa walay langan diha sa sinagoga siya misugod sa pagwali kang Jesus, nga Siya mao ang Anak sa Diyos. 21 Apan kadtong tanan nga nanagpakadungog kaniya nahingangha ug nanag-ingon: “Dili ba mao man kining tawhana nga naglaglag niadtong nanagtawag niining ngalana didto sa Jerusalem, ug mianhi dinhi alang niini mismo nga katuyoan, aron iyang madala sila nga ginapos ngadto sa pangulong mga saserdote?” 22 Apan si Saulo padayong nakabatog dugang pa nga gahom ug nagpakutaw sa hunahuna sa mga Hudiyo nga nagpuyo sa Damasco samtang gipamatud-an niya sa makataronganong paagi nga kini mao ang Kristo.
Disyembre 10-16
BAHANDI GIKAN SA PULONG SA DIYOS | BUHAT 12-14
“Si Bernabe ug Pablo Naghimog mga Tinun-an sa Lagyong Lugar”
(Buhat 13:2, 3) Samtang sila dayag nga nag-alagad kang Jehova ug nagpuasa, ang balaang espiritu miingon: “Ilain alang kanako gikan sa tanan si Bernabe ug si Saulo alang sa buluhaton nga niini gitawag ko sila.” 3 Unya sila nagpuasa ug nag-ampo ug nagpandong sa ilang mga kamot diha kanila ug nagpalakaw kanila.
“Napuno sa Kalipay ug sa Balaang Espiritu”
4 Apan nganong giingon sa balaang espiritu nga ilain si Bernabe ug Saulo “alang sa buluhaton”? (Buh. 13:2) Walay gisulti ang Bibliya. Nahibalo kita nga gimbut-an sa balaang espiritu ang pagkapili sa maong duha ka lalaki. Walay timailhan nga gisupak sa mga manalagna ug mga magtutudlo sa Antioquia ang maong desisyon. Hinuon, bug-os nilang gisuportahan ang pagtudlo sa duha ka lalaki alang sa buluhaton. Dako gayod ang kalipay ni Bernabe ug Saulo nga ang ilang mga isigkamagtutuo wala masina kondili “nagpuasa ug nag-ampo ug nagpandong sa ilang mga kamot diha kanila ug nagpalakaw kanila.” (Buh. 13:3) Kita usab angayng mosuportar niadtong nakadawat ug teokratikanhong mga asaynment, lakip ang tinudlong mga ansiyano sa kongregasyon. Inay masina, angay natong ‘ihatag kanila ang labaw sa kasagaran nga pagtahod diha sa gugma tungod sa ilang buhat.’—1 Tes. 5:13.
(Buhat 13:12) Niana ang prokonsul, sa pagkakita sa nahitabo, nahimong usa ka magtutuo, kay siya nahingangha sa pagtulon-an ni Jehova.
(Buhat 13:48) Sa dihang nadungog kini niadtong iya sa kanasoran, sila nagmaya ug naghimaya sa pulong ni Jehova, ug kadtong tanan nga hustong nakiling alang sa kinabuhing walay kataposan nahimong mga magtutuo.
(Buhat 14:1) Karon didto sa Iconio sila nagkuyog sa pagsulod sa sinagoga sa mga Hudiyo ug misulti sa ingon nga paagi nga tungod niana usa ka dakong panon sa mga Hudiyo ug mga Grego ang nahimong mga magtutuo.
bt 95 ¶5
“Nagsulti Uban ang Kaisog Pinaagi sa Awtoridad ni Jehova”
5 Mihapit si Pablo ug Bernabe sa Iconio, usa ka dapit nga Grego ug kultura ug usa sa dagkong mga siyudad sa Romanhong probinsiya sa Galacia. Ang mga Hudiyong impluwensiyado kaayo ug ang daghang di-Hudiyo nga kinabig nagpuyo niining siyudara. Sumala sa ilang nabatasan, si Pablo ug Bernabe misulod sa sinagoga ug nagwali didto. (Buh. 13:5, 14) Sila ‘misulti sa talagsaon kaayong paagi nga tungod niana usa ka dakong panon sa mga Hudiyo ug mga Grego ang nahimong mga magtutuo.’—Buh. 14:1.
(Buhat 14:21, 22) Ug human makapahayag sa maayong balita nianang siyudara ug makahimog ubay-ubayng mga tinun-an, sila namalik ngadto sa Listra ug sa Iconio ug ngadto sa Antioquia, 22 nga nagpalig-on sa mga kalag sa mga tinun-an, nga nagdasig kanila nga magpabilin sa pagtuo ug nag-ingon: “Kita kinahanglang mosulod sa gingharian sa Diyos pinaagi sa daghang kasakitan.”
Magmaunongon sa Diyos Bisan pa sa “Daghang Kasakitan”
4 Human sa ilang pagduaw sa Derbe, si Pablo ug Bernabe “namalik ngadto sa Listra ug sa Iconio ug ngadto sa Antioquia, nga nagpalig-on sa mga kalag sa mga tinun-an, nga nagdasig kanila nga magpabilin sa pagtuo ug nag-ingon: ‘Kita kinahanglang mosulod sa gingharian sa Diyos pinaagi sa daghang kasakitan.’” (Buh. 14:21, 22) Daw dili katuohan ang maong pamulong. Kon buot hunahunaon, ang pagkahibalo nga makaatubang kag “daghang kasakitan” makapaguol, dili makapadasig. Nan, sa unsang paagi si Pablo ug Bernabe “nagpalig-on sa mga kalag sa mga tinun-an” pinaagi sa pag-ingon nga makaatubang silag dugang kasakitan?
5 Makita nato ang tubag kon atong susihon pag-ayo ang mga pulong ni Pablo. Wala lang siya basta moingon: “Kita kinahanglang molahutay sa daghang kasakitan.” Hinunoa, siya miingon: “Kita kinahanglang mosulod sa Gingharian sa Diyos pinaagi sa daghang kasakitan.” Busa gipalig-on ni Pablo ang mga tinun-an pinaagi sa pagpasiugda sa positibong resulta kon sila magmatinumanon. Ang maong ganti dili usa ka ilusyon. Sa pagkatinuod, si Jesus miingon: “Siya nga nakalahutay hangtod sa kataposan mao ang maluwas.”—Mat. 10:22.
Pagpangitag Espirituwal nga Bahandi
(Buhat 12:21-23) Apan sa adlaw nga gitakda, si Herodes nagsul-ob ug harianong besti ug milingkod sa lingkoranan-sa-paghukom ug mihatag kanila ug usa ka publikong pakigpulong. 22 Unya ang nagkatigom nga katawhan naninggit: “Tingog sa usa ka diyos, ug dili sa tawo!” 23 Dihadiha gihampak siya sa manulonda ni Jehova, tungod kay wala niya ihatag ang himaya ngadto sa Diyos; ug gikaon siya sa mga ulod ug nabugtoan sa gininhawa.
Mga Pangunang Punto Gikan sa Basahon sa Mga Buhat
12:21-23; 14:14-18. Gidawat dayon ni Herodes ang himaya nga angayng ihatag lamang ngadto sa Diyos. Pagkalahi gayod niana sa dihadiha ug puwersadong pagdumili ni Pablo ug Bernabe sa dili angayng pagdayeg ug pasidungog! Dili gayod kita magtinguhang himayaon tungod sa bisan unsang mga kalamposan nga atong mabatonan sa pag-alagad kang Jehova.
(Buhat 13:9) Si Saulo, kinsa usab mao si Pablo, nga napuno sa balaang espiritu, mitutok kaniya
nwtsty study notes sa Buh 13:9
Saulo, kinsa usab mao si Pablo: Sugod dinhi, si Saulo gitawag nag Pablo. Ang apostol natawong Hebreohanon ug lungsoranon sa Roma. (Buh 22:27, 28; Flp 3:5) Busa posible nga sukad sa iyang pagkabata duha ang iyang ngalan, Saulo sa Hebreohanon ug Pablo sa Romano. Komon sa mga Hudiyo niadtong panahona ang pagbaton ug duha ka ngalan, ilabina kadtong wala magpuyo sa Israel. (Buh 12:12; 13:1) Ang ubang paryente ni Pablo naa poy Romano o Gregong mga ngalan. (Rom 16:7, 21) Ingong “apostol alang sa kanasoran,” si Pablo gisugo sa pagsangyaw sa maayong balita ngadto sa mga dili Hudiyo. (Rom 11:13) Gigamit niya ang iyang Romanong ngalan kay lagmit gibati niya nga mas dalawaton kini. (Buh 9:15; Gal 2:7, 8) Matod sa uban, gisagop niya ang Romanong ngalan sa pagpasidungog kang Sergio Paulo, apan morag dili kini sakto kay gigamit gihapon niya ang ngalang Pablo bisag mibiya na siya sa Cipro. Ang uban miingon nga gilikayan ni Pablo ang paggamit sa iyang Hebreohanong ngalan kay kon litokon kini, halos parehas ni sa Gregong pulong nga nagtumong sa tawo (o hayop) nga hambogiro ug linakwan.—Buh 7:58.
Pablo: Sa Kristohanon Gregong Kasulatan, ang ngalang Pauʹlos, gikan sa Latin nga Paulus, nagkahulogang “Gamay; Mubo.” Kini gigamit ug 157 ka beses sa pagtumong kang apostol Pablo ug kas-a sa pagtumong kang Sergio Paulo nga prokonsul sa Cipro.—Buh 13:7.
Pagbasa sa Bibliya
(Buhat 12:1-17) Nianang panahona si Herodes nga hari mibakyaw sa iyang mga kamot sa pagdagmal sa pipila niadtong sakop sa kongregasyon. 2 Iyang gipatay si Santiago nga igsoon ni Juan pinaagi sa espada. 3 Sa iyang nakita nga kini nakapahimuot sa mga Hudiyo, gidakop usab niya si Pedro. (Ug kadto usab, mga adlaw sa mga tinapay nga walay igpapatubo.) 4 Ug sa iya nang nadakpan si Pedro, iyang gibanlod siya sa bilanggoan, nga nagtugyan kaniya ngadto sa upat ka relibo sa tinagup-at ka sundalo aron bantayan siya, kay maoy tuyo niya nga ipaatubang siya sa katawhan human sa paskuwa. 5 Busa si Pedro gitener didto sa bilanggoan; apan ang pag-ampo ngadto sa Diyos alang kaniya padayong gihimo nga mainiton sa kongregasyon. 6 Karon sa dihang si Herodes hapit nang magpaatubang kaniya, nianang gabhiona si Pedro natulog nga ginapos sa duha ka kadena taliwala sa duha ka sundalo, ug ang mga guwardiya atubangan sa pultahan nagbantay sa bilanggoan. 7 Apan, tan-awa! ang manulonda ni Jehova nagtindog sa duol, ug misidlak ang usa ka kahayag sulod sa selda sa bilanggoan. Nagdagpi kang Pedro sa kilid, iyang gipukaw siya, nga nag-ingon: “Tindog dayon!” Ug ang iyang mga kadena nangatangtang gikan sa iyang mga kamot. 8 Ang manulonda miingon kaniya: “Pagbakos ug isul-ob ang imong sandalyas.” Iyang gibuhat kini. Sa kataposan siya miingon kaniya: “Isul-ob ang imong panggawas nga besti ug padayon sa pagsunod kanako.” 9 Ug siya migula ug mipadayon sa pagsunod kaniya, apan wala siya mahibalo nga tinuod diay ang nahitabo pinaagi sa manulonda. Sa pagkatinuod, gipakaingon niya nga nakakita siya ug usa ka panan-awon. 10 Human molabay sa unang guwardiya sentinela ug sa ikaduha sila nakaabot sa puthaw nga ganghaan padulong sa siyudad, ug kanila kini naabli nga iyaiya ra. Ug human sila makagula sila mipadayon paglakaw agi sa usa ka dalan, ug dihadiha ang manulonda mibiya kaniya. 11 Ug si Pedro, sa nakamatngon na, miingon: “Karon akong nahibaloan nga si Jehova nagpadala sa iyang manulonda ug nagluwas kanako gikan sa kamot ni Herodes ug gikan sa tanang gipaabot sa katawhan nga mga Hudiyo.” 12 Ug human niya kini palandonga, siya miadto sa balay ni Maria nga inahan ni Juan kinsa gianggaag Marcos, diin didto ubay-ubay ang nagkatigom ug nag-ampo. 13 Sa dihang siya mituktok sa pultahan sa ganghaan, usa ka sulugoong babaye nga ginganlag Roda miadto aron sa pagtubag, 14 ug, sa pagkaila sa tingog ni Pedro, tungod sa kalipay wala niya kini mabuksi, apan midagan sa sulod ug mitaho nga si Pedro nagtindog atubangan sa ganghaan. 15 Sila miingon kaniya: “Ikaw nabuang.” Apan pursigido siyang nagpahayag nga tinuod gayod kadto. Sila miingon: “Iya kadtong manulonda.” 16 Apan si Pedro nagpabilin didto nga nanuktok. Sa dihang ilang gibuksan, ilang nakita siya ug sila nahingangha. 17 Apan iyang gisenyasan sila sa iyang kamot nga maghilom ug gisaysay kanila nga detalyado kon giunsa ni Jehova pagpagawas kaniya sa bilanggoan, ug siya miingon: “Itaho kining mga butanga kang Santiago ug sa mga igsoon.” Niana siya migula ug mipanaw ngadto sa laing dapit.
Disyembre 17-23
BAHANDI GIKAN SA PULONG SA DIYOS | BUHAT 15-16
“Gikausahang Desisyon Base sa Pulong sa Diyos”
(Buhat 15:1, 2) Ug dihay mga tawo nga nanglugsong gikan sa Judea ug nanudlo sa mga igsoon: “Gawas kon kamo magpatuli sumala sa kostumbre ni Moises, kamo dili maluwas.” 2 Apan sa dihang nahitabo kanila ang usa ka dakong panagsumpaki ug panaglalis ni Pablo ug Bernabe, ilang gihikay nga si Pablo ug si Bernabe ug ang pipila kanila nga motungas ngadto sa mga apostoles ug sa mga ansiyano sa Jerusalem maylabot niini nga panaglalis.
“Nahitabo Kanila ang Usa ka Dakong Panagsumpaki”
8 Si Lucas mipadayon: ‘Sa dihang nahitabo ang dakong panagsumpaki ug panaglalis tali kanila [“mga tawo”] ug kang Pablo ug Bernabe, sila [mga ansiyano] mihikay nga si Pablo ug si Bernabe ug ang pipila kanila motungas ngadto sa mga apostoles ug sa mga ansiyano sa Jerusalem maylabot niini nga panaglalis.’ (Buh. 15:2) Ang “panagsumpaki ug panaglalis” nagpasabot nga ang duha ka grupo may di-matarog nga mga opinyon ug ang kongregasyon sa Antioquia dili makahusay niana. Aron magpabilin ang kalinaw ug panaghiusa, ang kongregasyon mihukom nga ang maong isyu ipahusay sa “mga apostoles ug sa mga ansiyano sa Jerusalem,” nga naglangkob sa nagamandong lawas. Unsay atong makat-onan gikan sa mga ansiyano sa Antioquia?
(Buhat 15:13-20) Human sila makahunong sa pagsulti, si Santiago mitubag, nga nag-ingon: “Mga katawhan, mga igsoon, pamatia ako. 14 Giasoy sa bug-os ni Simeon kon giunsa sa Diyos sa unang higayon pagliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan. 15 Ug niini nahiuyon ang mga pulong sa mga Manalagna, ingon sa nahisulat, 16 ‘Human niining mga butanga ako mobalik ug tukoron ko pag-usab ang napukan nga balongbalong ni David; ug akong tukoron pag-usab ang kagun-oban niini ug patindogon kini pag-usab, 17 aron kadtong mahibilin sa mga tawo matinuorong mangita kang Jehova, kauban sa katawhan sa kanasoran, ang katawhan nga ginatawag sa akong ngalan, nag-ingon si Jehova, nga nagbuhat niining mga butanga, 18 nga nailhan sukad sa kakaraanan.’ 19 Busa maoy akong hukom nga dili samokon silang gikan sa kanasoran nga nangliso ngadto sa Diyos, 20 kondili sulatan sila nga mag-ayad sa mga butang nga nahugawan sa mga idolo ug gikan sa pakighilawas ug gikan sa naluok ug gikan sa dugo.
Ang Matuod nga mga Kristohanon Nagtahod sa Pulong sa Diyos
6 Ang Amos 9:11, 12 nakatabang sa pagsulbad sa isyu. Kini ang gikutlo sa Buhat 15:16, 17, nga mabasa: “Ako mobalik ug tukoron ko pag-usab ang napukan nga balongbalong ni David; ug akong tukoron pag-usab ang kagun-oban niini ug patindogon kini pag-usab, aron kadtong mahibilin sa mga tawo matinuorong mangita kang Jehova, kauban sa katawhan sa kanasoran, ang katawhan nga ginatawag sa akong ngalan, nag-ingon si Jehova.”
7 Apan duna tingali mangatarongan nga ang teksto wala mag-ingon nga ang Hentil nga mga Kristohanon dili na kinahanglang magpatuli. Tinuod kana; apan nasabtan sa Hudiyong mga Kristohanon ang punto. Wala nila isipa ang tinuli nga mga Hentil ingong “katawhan sa kanasoran” apan ingong mga igsoon. (Ex. 12:48, 49) Pananglitan, sumala sa bersiyon ni Bagster sa Septuagint, ang Ester 8:17 mabasa: “Daghang Hentil ang gituli, ug nahimong mga Hudiyo.” Busa sa dihang gitagna sa Kasulatan nga kadtong nahibilin sa balay sa Israel (mga Hudiyo ug tinuling mga kinabig nga Hudiyo) uban sa “katawhan sa kanasoran” (dili tinuling mga Hentil) mahimong usa ka katawhan alang sa ngalan sa Diyos, tin-aw ang punto. Ang mga Hentil nga gustong mahimong Kristohanon dili kinahanglang magpatuli.
(Buhat 15:28, 29) Kay ang balaang espiritu ug kami nagkauyon nga dili magsangon ug dugang pang palas-anon kaninyo, gawas niining kinahanglanong mga butang, 29 nga padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas. Kon kamo magpahilayo gayod niining mga butanga, mabulahan kamo. Maayong panglawas kaninyo!”
(Buhat 16:4, 5) Karon samtang sila mipanaw agi sa mga siyudad ilang ipanghatod ang mga sugo nga gidesisyonan sa mga apostoles ug mga ansiyano nga didto sa Jerusalem aron sundon sa mga atua didto. 5 Busa, sa pagkatinuod, ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.
bt 123 ¶18
“Nagpalig-on sa mga Kongregasyon”
18 Nagkauban si Pablo ug Timoteo sa pag-alagad sulod sa daghang katuigan. Isip mga nagapanawng ministro, sila nagtuman ug lainlaing asaynment gikan sa nagamandong lawas. Ang talaan sa Bibliya nag-ingon: “Samtang sila mipanaw agi sa mga siyudad ilang ipanghatod ang mga sugo nga gidesisyonan sa mga apostoles ug mga ansiyano nga didto sa Jerusalem.” (Buh. 16:4) Dayag nga nagsunod ang mga kongregasyon sa instruksiyon gikan sa mga apostoles ug sa mga ansiyano sa Jerusalem. Tungod sa maong pagkamasinugtanon, “ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.”—Buh. 16:5.
Pagpangitag Espirituwal nga Bahandi
(Buhat 16:6-9) Dugang pa, milibot sila sa Frigia ug sa yuta sa Galacia, tungod kay sila gidid-an sa balaang espiritu nga isulti ang pulong didto sa distrito sa Asia. 7 Labot pa, sa paghiabot nila dapit sa Misia naningkamot sila sa pag-adto sa Bitinia, apan ang espiritu ni Jesus wala motugot kanila. 8 Busa sila milabay sa Misia ug milugsong ngadto sa Troas. 9 Ug panahon sa kagabhion usa ka panan-awon ang nagpakita kang Pablo: dihay usa ka tawong Macedonianhon nga nagbarog ug nangaliyupo kaniya ug nag-ingon: “Dali ngari sa Macedonia ug tabangi kami.”
Kat-oni ang Pagkamabinantayon sa mga Apostoles ni Jesus
8 Unsay atong makat-onan niini? Matikdi nga ayha pa mibabag ang espiritu sa Diyos dihang si Pablo mipaingon na sa Asia. Dayon, ayha pa mihatag si Jesus ug dugang instruksiyon dihang si Pablo duol na sa Bitinia. Ug sa kataposan, ayha pa gisugo ni Jesus si Pablo nga moadto sa Macedonia dihang nakaabot na siya sa Troas. Ingong Ulo sa kongregasyon, mahimong giyahan kita ni Jesus sa samang paagi. (Col. 1:18) Pananglitan, lagmit naghunahuna kang magpayunir o mobalhin sa dapit diin dako ang panginahanglan. Apan mahimong ayha pa ka tabangan ni Jesus, pinaagi sa espiritu sa Diyos, dihang makahimo ka nag lakang sa pagkab-ot sa imong tumong. Sa pag-ilustrar: Ayha lang mapaliko sa drayber ang iyang kotse, sa wala o tuo, kon kini nagdagan na. Sa susama, mahimong giyahan kita ni Jesus sa pagpauswag sa atong ministeryo kon kita milihok na—kon kita naningkamot na sa pagkab-ot sa atong tumong.
(Buhat 16:37) Apan si Pablo miingon kanila: “Ila kaming gibunalan nga wala pa husaya atubangan sa publiko, nga mga tawong Romano, ug gibalhog kami sa bilanggoan; ug karon ila na kaming pagawason sa tago? Dili gayod! hinuon paanhia sila ug pagawason kami.”
nwtsty study note sa Buh 16:37
mga tawong Romano: Sa ato pa, mga lungsoranon sa Roma. Si Pablo ug lagmit si Silas maoy mga lungsoranon sa Roma. Sumala sa balaod sa Roma, ang usa ka lungsoranon may katungod kanunay nga husayon sa hustong paagi ug dili gayod silotan diha sa publiko kon wala pa siya mahukmi nga sad-an. Ang usa ka lungsoranon sa Roma dunay mga katungod ug pribilehiyo bisag asa siya moadto sa imperyo. Siya ilalom sa balaod sa Roma, dili sa mga balaod sa sakop nga mga siyudad. Kon pasakaan siyag sumbong, puwede siyang magpahusay base sa lokal nga balaod; apan duna gihapon siyay katungod nga dunggon sa korte sa Roma. Kon sentensiyahan siyag kamatayon, may katungod siyang moapelar sa emperador. Nalukop pagsangyaw ni apostol Pablo ang Imperyo sa Roma. Sa rekord sa Bibliya, katulo niya gigamit ang iyang mga katungod ingong lungsoranon sa Roma. Una niya kining gigamit dinhi sa Filipos dihang iyang gipahibalo ang mga huwes sa Filipos nga ilang giyatakan ang iyang katungod dihang siya gibunalan.—Para sa laing duha ka higayon, tan-awa ang study notes sa Buh 22:25; 25:11, nwtsty-E.
Pagbasa sa Bibliya
(Buhat 16:25-40) Apan sa mga tungang gabii si Pablo ug si Silas nanag-ampo ug nanagdayeg sa Diyos pinaagig awit; oo, ang mga binilanggo nakadungog kanila. 26 Sa kalit nahitabo ang usa ka dakong linog, mao nga ang mga patukoranan sa bilanggoan nangatay-og. Dugang pa, ang tanang pultahan nabuksan dihadiha, ug ang mga gapos sa tanan nangatangtang. 27 Ang magbalantay sa bilanggoan, nga nahigmata gikan sa pagkatulog ug nakakita sa mga pultahan sa bilanggoan nga nabuksan na, mihulbot sa iyang espada ug diriyot nang magpakamatay, kay naghunahuna siya nga ang mga binilanggo nakaikyas. 28 Apan si Pablo mipatugbaw sa usa ka makusog nga tingog, nga nag-ingon: “Ayaw unsaa ang imong kaugalingon, kay ania ra kaming tanan!” 29 Busa siya nangayog suga ug midagan paingon sa sulod ug, nga nangurog, siya mihapa atubangan kang Pablo ug Silas. 30 Ug iyang gidala sila sa gawas ug miingon: “Senyores, unsay kinahanglan kong buhaton aron maluwas?” 31 Sila miingon: “Tumuo ka sa Ginoong Jesus ug ikaw maluwas, ikaw ug ang imong panimalay.” 32 Ug gisulti nila ang pulong ni Jehova ngadto kaniya uban kanilang tanan nga diha sa iyang balay. 33 Ug iyang gikuha sila nianang taknaa sa kagabhion ug gihugasan ang ilang mga labod; ug, ang tanan gayod, siya ug ang mga iya gibawtismohan sa walay langan. 34 Ug iyang gidala sila ngadto sa iyang balay ug giandaman sila ug lamesa, ug siya nagmaya sa hilabihan uban sa tibuok niyang panimalay karon nga siya mituo na sa Diyos. 35 Sa pagkaadlaw na, ang mga mahistrado sibil nagpadala ug mga kostable aron sa pag-ingon: “Buhii kanang mga tawhana.” 36 Busa ang magbalantay sa bilanggoan mitaho sa ilang mga pulong ngadto kang Pablo: “Ang mga mahistrado sibil nagpadalag mga tawo aron kamong duha buhian. Busa, karon, gula ug lakaw kamo nga malinawon.” 37 Apan si Pablo miingon kanila: “Ila kaming gibunalan nga wala pa husaya atubangan sa publiko, nga mga tawong Romano, ug gibalhog kami sa bilanggoan; ug karon ila na kaming pagawason sa tago? Dili gayod! hinuon paanhia sila ug pagawason kami.” 38 Busa ang mga kostable mitaho niining mga sultiha ngadto sa mga mahistrado sibil. Kini sila nangahadlok sa pagkadungog nila nga ang maong mga tawo maoy mga Romano. 39 Tungod niana sila nangadto ug nangaliyupo kanila ug, human sila mapagawas, ilang gihangyo sila nga mobiya sa siyudad. 40 Apan sila migula sa bilanggoan ug miadto sa balay ni Lydia, ug sa dihang ilang nakita ang mga igsoon ilang gidasig sila ug mibiya.
Disyembre 24-30
BAHANDI GIKAN SA PULONG SA DIYOS | BUHAT 17-18
“Sundoga si Apostol Pablo sa Pagsangyaw ug Pagpanudlo”
(Buhat 17:2, 3) Busa sumala sa nabatasan ni Pablo siya misulod niini, ug sulod sa tulo ka igpapahulay siya nangatarongan kanila gikan sa mga Kasulatan, 3 nga nagpatin-aw ug nagpamatuod pinaagig mga pangutlo nga kinahanglang si Kristo mag-antos ug bangonon gikan sa mga patay, ug nag-ingon: “Kini mao ang Kristo, kining Jesus nga akong ginamantala kaninyo.”
nwtsty study notes sa Buh 17:2, 3
nangatarongan: Wala lang basta isulti ni Pablo ang maayong balita kanila. Iya kining gipatin-aw ug gipamatud-an gikan sa mga Kasulatan, nga mao ang Hebreohanong Kasulatan nga gisulat ubos sa paggiya sa Diyos. Wala lang niya basta basaha ang Kasulatan; siya nangatarongan base niini, ug gipasibo niya ang iyang pangatarongan sa iyang mamiminaw. Ang Gregong pulong nga di·a·leʹgo·mai nagkahulogan nga “pagpakigbahin sa panaghisgot; pagpakig-estorya; pagpatin-aw.” Kini may ideya sa pagpakighisgot uban sa mga tawo. Kining Gregong pulong gigamit sab sa Buh 17:17; 18:4, 19; 19:8, 9; 20:7, 9.
nagpamatuod pinaagig mga pangutlo: Ang Gregong pulong literal nga nagkahulogang “ibutang sa kiliran (itapad).” Kini lagmit nagpakita nga ang mga tagna bahin sa Mesiyas sa Hebreohanong Kasulatan gikomparar pag-ayo ni Pablo ngadto sa mga panghitabo sa kinabuhi ni Jesus, ug iyang gipatin-aw kon sa unsang paagi natuman kang Jesus ang maong mga tagna.
(Buhat 17:17) Busa siya misugod sa pagpangatarongan diha sa sinagoga sa mga Hudiyo ug sa ubang mga tawo kinsa nagsimba sa Diyos ug sa matag adlaw diha sa tiyanggihan ngadto kanilang atua didto.
nwtsty study note sa Buh 17:17
sa tiyanggihan: Ang tiyanggihan (Grego, a·go·raʹ) sa Atenas nahimutang sa amihanan-kasadpan sa Acropolis ug may gidak-ong mga 5 ka ektarya. Ang tiyanggihan dili lang basta palitanan ug baligyaanan. Kini mao ang sentro sa ekonomiya, politika, ug kultura sa siyudad. Ganahan ang mga taga-Atenas nga moadto niining sentro sa publikong dapit aron maghisgot ug tugkaronon nga mga ideya.
(Buhat 17:22, 23) Karon si Pablo mibarog taliwala sa Areopago ug miingon: “Mga taga-Atenas, akong nakita nga sa tanang butang kamo daw mas mahadlokon sa mga bathala kay sa uban. 23 Pananglitan, samtang ako naglakaw ug naniid pag-ayo sa mga butang nga inyong ginasimba nakaplagan ko usab ang usa ka halaran nga diha niana gisulat ‘Alang sa Usa ka Diyos nga Wala Mailhi.’ Busa kini nga sa kawalay-kahibalo inyong ginahatagan ug diyosnong pagkamahinalaron, kini ang akong ginamantala kaninyo.
nwtsty study note sa Buh 17:22, 23
Alang sa Usa ka Diyos nga Wala Mailhi: Ang Gregong mga pulong nga A·gnoʹstoi the·oiʹ maoy bahin sa usa ka kinulit sa halaran sa Atenas. Gipakita sa mga taga-Atenas ang ilang kahadlok sa mga diyosdiyos pinaagi sa pagtukod ug daghang templo ug halaran. Gani, naghimo silag mga halaran sa dili personang mga diyosdiyos sama sa Kabantog, Pagkamakasaranganon, Enerhiya, Pangdani, ug Kaluoy. Kay nahadlok tingali nga ilang masayloan ang usa ka diyos ug sa ingon dili makabaton sa iyang pag-uyon, nagdedikar silag usa ka halaran “alang sa Usa ka Diyos nga Wala Mailhi.” Pinaagi sa maong halaran, giangkon sa mga tawo nga dunay naglungtad nga Diyos kinsa wala silay nahibaloan. Mataktikanhong gigamit ni Pablo ang maong halaran ingong basehan sa iyang pagsangyaw aron mailhan sa iyang mga mamiminaw ang Diyos—ang matuod nga Diyos—nga niadtong tungora lang nila nailhan.
Pagpangitag Espirituwal nga Bahandi
(Buhat 18:18) Apan, human makapabilin ug ubay-ubay pang mga adlaw, si Pablo nanamilit sa mga igsoon ug milawig ngadto sa Sirya, ug uban kaniya si Priscila ug Aquila, sanglit iya mang gipamub-an ang iyang buhok sa ulo didto sa Cencrea, kay siya adunay panaad.
Mga Pangunang Punto Gikan sa Basahon sa Mga Buhat
18:18—Unsang panaad ang gihimo ni Pablo? Ang pipila ka eskolar nag-ingon nga si Pablo nanaad isip Nasareo. (Num. 6:1-21) Apan ang Bibliya wala magsulti kon unsay panaad ni Pablo. Dugang pa, ang Kasulatan walay gisulti kon ang maong panaad gihimo ni Pablo sa wala pa o human sa iyang pagkakabig, o kon mao pay iyang paghimo o pagtapos sa maong panaad. Bisan unsa pay kahimtang, dili sala ang paghimo sa maong panaad.
(Buhat 18:21) hinuon siya nanamilit ug misulti kanila: “Ako mobalik ra kaninyo pag-usab, kon buot ni Jehova.” Ug siya milawig gikan sa Efeso
nwtsty study note sa Buh 18:21
kon buot ni Jehova: Ekspresyon nga nagpasiugda nga kinahanglang ilakip ang kabubut-on ni Jehova sa tanang ginahimo ug planong himoon. Kini nga prinsipyo kanunayng anaa sa hunahuna ni apostol Pablo. (1Co 4:19; 16:7; Heb 6:3) Ang tinun-ang si Santiago nagdasig sab sa iyang mga magbabasa sa pag-ingon: “Kon pagbuot ni Jehova, kami mabuhi ug usab magbuhat niini o niana.” (San 4:15) Pero ang maong mga ekspresyon dili kay basta isulti lang; bisan kinsa nga sinserong moingon “kon buot ni Jehova” kinahanglang maningkamot nga molihok uyon sa kabubut-on ni Jehova. Ang ekspresyon dili kinahanglang isulti kanunay kondili sagad himoon diha sa kasingkasing.—Buh 21:14; 1Co 4:19; San 4:15; tan-awa ang sgd, seksiyon 2.
Pagbasa sa Bibliya
(Buhat 17:1-15) Karon mipanaw sila agi sa Ampipolis ug Apolonia ug nakaabot sa Tesalonica, diin didtoy usa ka sinagoga sa mga Hudiyo. 2 Busa sumala sa nabatasan ni Pablo siya misulod niini, ug sulod sa tulo ka igpapahulay siya nangatarongan kanila gikan sa mga Kasulatan, 3 nga nagpatin-aw ug nagpamatuod pinaagig mga pangutlo nga kinahanglang si Kristo mag-antos ug bangonon gikan sa mga patay, ug nag-ingon: “Kini mao ang Kristo, kining Jesus nga akong ginamantala kaninyo.” 4 Ingong resulta ang pipila kanila nahimong mga magtutuo ug nakig-uban sila kang Pablo ug Silas, ug usa ka dakong panon sa mga Grego nga nagsimba sa Diyos ug daghan sa inilang mga babaye ang mihimo sa ingon. 5 Apan ang mga Hudiyo, nga nasina, nagpauban sa ilang pundok ug mga tawong daotan gikan sa mga tigyampungad sa tiyanggihan ug nagporma ug usa ka magubtanong panon ug ilang gigubot ang siyudad. Ug ilang gisulong ang balay ni Jason ug gipangita sila aron dad-on ngadto sa naukay nga panon sa mga tawo. 6 Sa dihang wala nila makaplagi sila, ilang gitaral si Jason ug ang pipila ka igsoon ngadto sa mga magmamando sa siyudad, nga nanagsinggit: “Kining mga tawhana nga nagpagubot sa gipuy-ang yuta ania usab dinhi, 7 ug giabiabi sila ni Jason. Ug kini silang tanan milihok nga supak sa mga mando ni Cesar, nga nag-ingon nga adunay laing hari, si Jesus.” 8 Sa pagkatinuod ilang gipagubot ang panon sa katawhan ug ang mga magmamando sa siyudad dihang nadungog nila kining mga butanga; 9 ug human makapangayo una ug igong piyansa gikan kang Jason ug sa uban sila ilang gipalakaw. 10 Dihadiha sa pagkagabii ang mga igsoon nagpagikan kang Pablo ug Silas ngadto sa Berea, ug sa ilang pag-abot didto, misulod sila sa sinagoga sa mga Hudiyo. 11 Karon ang ulahi mas hamilig-hunahuna kay niadtong sa Tesalonica, kay ila mang gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga. 12 Busa daghan kanila ang nahimong mga magtutuo, ug mao man usab ang daghan sa tinamod nga Gregong mga babaye ug mga lalaki. 13 Apan sa dihang nasayran sa mga Hudiyo sa Tesalonica nga ang pulong sa Diyos gimantala usab ni Pablo sa Berea, sila nangadto usab didto aron sibahan ug gubton ang katawhan. 14 Niana ang mga igsoon nagpagikan gilayon kang Pablo sa paglakaw paingon sa dagat; apan si Silas ug Timoteo nagpabilin didto. 15 Hinunoa, kadtong naghatod kang Pablo nagdala kaniya hangtod sa Atenas ug, human makadawat ug sugo nga paadtoon kaniya si Silas ug si Timoteo sa labing madali, sila mibiya.
Disyembre 31–Enero 6
BAHANDI GIKAN SA PULONG SA DIYOS | BUHAT 19-20
“Tagda ang Inyong Kaugalingon ug ang Tibuok Panon”
(Buhat 20:28) Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.
Bantayi ang Panon sa Diyos nga Gisalig Kaninyo
5 Ang apostol misulat nga ang mga ansiyano angayng ‘magbantay sa panon sa Diyos nga ilalom sa ilang pag-atiman.’ Hinungdanon nga ilang ilhon nga ang panon iya ni Jehova ug ni Jesu-Kristo. Ang mga ansiyano manubag kon giunsa nila pagbantay ang panon sa Diyos. Ibutang ta nga hangyoon ka sa imong suod nga higala nga bantayan ang iyang mga anak samtang wala siya. Dili ba nimo sila atimanon ug pakan-on? Kon ang usa masakit, dili ba nimo siya patambalan? Sa susama, ang mga ansiyano kinahanglang “magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buh. 20:28) Hinumdoman nila kanunay nga ang matag karnero gipalit pinaagi sa bililhong dugo ni Kristo Jesus. Kay may tulubagon, ang mga ansiyano magpakaon, manalipod, ug mag-atiman sa panon.
(Buhat 20:31) “Busa padayong magtukaw, ug hinumdomi nga sulod sa tulo ka tuig, gabii ug adlaw, wala ako mohunong sa pagpahimangno sa matag usa uban ang mga luha.
Mga Ansiyano—‘Isigkamagbubuhat Alang sa Atong Kalipay’
15 Dili sayon ang buluhaton sa mga ansiyano. Usahay, kulang silag tulog sa paghunahuna ug pag-ampo alang sa mga igsoon, o sa paghatag ug espirituwal nga tabang kanila. (2 Cor. 11:27, 28) Bisan pa niana, ang mga ansiyano malipayong nagtuman sa ilang responsabilidad, sama kang Pablo. Siya misulat sa mga taga-Corinto: “Ikalipay ko ang paghatag sa tanan . . . lakip ang akong kaugalingon aron [sa] pagtabang kaninyo.” (2 Cor. 12:15, Ang Bag-ong Maayong Balita Biblia) Tungod sa iyang gugma sa mga igsoon, bug-os gihatag ni Pablo ang iyang kaugalingon sa paglig-on kanila. (Basaha ang 2 Corinto 2:4; Filip. 2:17; 1 Tes. 2:8) Dili ikatingala nga gimahal siya pag-ayo sa mga igsoon!—Buh. 20:31-38.
(Buhat 20:35) Sa tanang butang gipasundayag ko kaninyo nga pinaagi sa ingon nga paghago kinahanglang inyong abagan kadtong mga maluya, ug hinumdoman ang mga pulong sa Ginoong Jesus, sa dihang siya miingon, ‘Adunay labaw nga kalipay sa paghatag kay sa pagdawat.’”
bt 172 ¶20
“Ako Hinlo Gikan sa Dugo sa Tanang Tawo”
20 Ang pagkinabuhi ni Pablo sukwahi gayod sa pagkinabuhi sa mga tawo nga sa ulahi nagpahimulos sa panon. Nagtrabaho siya aron masuportahan ang iyang kaugalingon ug aron dili makapabug-at sa kongregasyon. Nag-alagad si Pablo alang sa iyang mga isigkamagtutuo, dili aron madato. Giawhag ni Pablo ang mga ansiyano sa Efeso nga mahimong andam sa pagsakripisyo. “Kinahanglang inyong abagan kadtong mga maluya,” iyang gisultihan sila, “ug hinumdoman ang mga pulong sa Ginoong Jesus, sa dihang siya miingon, ‘Adunay labaw nga kalipay sa paghatag kay sa pagdawat.’”—Buh. 20:35.
Pagpangitag Espirituwal nga Bahandi
(Buhat 19:9) Apan sa dihang ang pipila nagpatig-a ug wala motuo, nga nagsulti nga madaoton mahitungod sa Dalan atubangan sa panon sa katawhan, siya mibiya kanila ug gilain ang mga tinun-an gikan kanila, nga sa adlaw-adlaw naghatag ug mga pakigpulong diha sa awditoryum sa eskuylahan sa Tirano.
bt 161 ¶11
“Padayong Mikaylap ug Nagmadaogon”
11 Lagmit si Pablo adlaw-adlaw nga naghatag ug pakigpulong sa maong awditoryum gikan sa mga alas 11:00 sa buntag hangtod sa mga alas 4:00 sa hapon. (Buh. 19:9) Kining mga orasa lagmit mao ang kinainitan ug kinamingawan sa dihang ang kadaghanan mohunong sa ilang trabaho aron mokaon ug mopahimudlay. Kon sa duha ka tuig gisunod ni Pablo ang maong estriktong eskedyul, lagmit kapig 3,000 ka oras ang iyang nagamit sa pagpanudlo. Busa kini ang laing hinungdan nga ang pulong ni Jehova padayong mikaylap ug nagmadaogon. Kugihan ug mapailin-ilinon si Pablo. Iyang gipasibo ang iyang eskedyul sa pagwali sumala sa panginahanglan sa mga tawo sa maong dapit. Unsay resulta? “Ang tanang nagpuyo sa distrito sa Asia nakadungog sa pulong sa Ginoo, mga Hudiyo ug mga Grego.” (Buh. 19:10) Pagkabug-os ang iyang pagpamatuod!
(Buhat 19:19) Sa pagkatinuod, ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan. Ug ilang gikuwenta sa tingob ang bili niini ug ilang nakaplagan nga kini mikabat ug kalim-an ka libo ka pirasong plata.
“Padayong Mikaylap ug Nagmadaogon”
15 Tungod sa kaulawan nga naagoman sa mga anak ni Esceva, daghan ang nahadlok sa Diyos ug tungod niana daghan ang nahimong magtutuo ug mibiya sa espiritismo. Naimpluwensiyahan pag-ayo sa salamangka ang kultura sa mga taga-Efeso. Kaylap kaayo didto ang panglamat, anting-anting, ingon man mga orasyon nga sagad sinulat. Niadtong higayona, daghang taga-Efeso ang natukmod sa pagsunog sa publiko sa ilang mga basahon bahin sa salamangka—bisan pag ang bili niadto lagmit mokabat karon ug libolibo ka dolyares. Si Lucas mitaho: “Busa sa gamhanang paagi ang pulong ni Jehova padayong mikaylap ug nagmadaogon.” (Buh. 19:17-20) Nagmadaogon gayod ang kamatuoran batok sa bakak nga mga pagtulon-an ug sa demonismo! Ang maong matinumanong mga tawo maayo gayong panig-ingnan alang kanato. Kita nagkinabuhi usab sa usa ka kalibotan diin kaylap ang espiritismo. Kon nakaamgo kita nga aduna kitay mga butang nga konektado sa espiritismo, angay natong sundogon ang gihimo sa mga taga-Efeso—sunogon dayon nato kana! Magpalayo gayod kita sa maong dulumtanang mga buhat, bisag unsa pay mahitabo.
Pagbasa sa Bibliya
(Buhat 19:1-20) Sa naglakat ang mga hitabo, samtang si Apolos didto sa Corinto, si Pablo milatas sa ilayang mga dapit ug milugsong ngadto sa Efeso, ug nakakaplag ug pipila ka tinun-an; 2 ug siya miingon kanila: “Nakadawat ba kamo ug balaang espiritu sa dihang kamo nahimong mga magtutuo?” Sila miingon kaniya: “Aw, wala gayod kami makadungog sukad kon aduna bay balaang espiritu.” 3 Ug siya miingon: “Nan, sa unsa ba kamo gibawtismohan?” Sila miingon: “Sa bawtismo ni Juan.” 4 Si Pablo miingon: “Si Juan nagbawtismo sa bawtismo nga simbolo sa paghinulsol, nga nagsulti sa katawhan sa pagtuo diha sa usa nga moabot sunod kaniya, sa ato pa, diha kang Jesus.” 5 Sa pagkadungog niini, sila gibawtismohan sa ngalan sa Ginoong Jesus. 6 Ug sa napandongan na sila ni Pablo sa iyang kamot, ang balaang espiritu mikunsad nganha kanila, ug sila misugod sa pagpanulti sa laing mga pinulongan ug nanagna. 7 Tanantanan, dihay mga napulog-duha ka tawo. 8 Nga misulod sa sinagoga, siya misulti uban ang kaisog sulod sa tulo ka bulan, nga naghatag ug mga pakigpulong ug nagagamit ug pangombinsir mahitungod sa gingharian sa Diyos. 9 Apan sa dihang ang pipila nagpatig-a ug wala motuo, nga nagsulti nga madaoton mahitungod sa Dalan atubangan sa panon sa katawhan, siya mibiya kanila ug gilain ang mga tinun-an gikan kanila, nga sa adlaw-adlaw naghatag ug mga pakigpulong diha sa awditoryum sa eskuylahan sa Tirano. 10 Kini nahitabo sulod sa duha ka tuig, mao nga ang tanang nagpuyo sa distrito sa Asia nakadungog sa pulong sa Ginoo, mga Hudiyo ug mga Grego. 11 Ug ang Diyos nagpadayon sa paghimo ug talagsaong gamhanang mga buhat pinaagi sa mga kamot ni Pablo, 12 mao nga bisag ang mga panapton ug mga tapis nga gikan sa iyang lawas gidala ngadto sa mga tawong masakiton, ug ang mga sakit mibiya kanila, ug migula ang daotang mga espiritu. 13 Apan dihay nanaglibod nga mga Hudiyo nga nanghingilin ug mga demonyo ang misulay usab sa paglitok sa ngalan ni Ginoong Jesus niadtong may daotang mga espiritu, nga nag-ingon: “Ako ugdang nga nagmando kaninyo pinaagi ni Jesus nga ginawali ni Pablo.” 14 Karon dihay pito ka anak nga lalaki sa usa ka tawo nga si Esceva, usa ka Hudiyohanong pangulo nga saserdote, nga nagbuhat niini. 15 Apan sa pagtubag ang daotang espiritu miingon kanila: “Ako nakaila kang Jesus ug ako nasinati kang Pablo; apan kinsa man kamo?” 16 Niana giluksohan sila sa tawo nga gisudlan sa daotang espiritu, gibuntog nga tinagsatagsa, ug gidaog sila, mao nga sila nangalagiw nga hubo ug samdan gikan niadtong balaya. 17 Kini nahibaloan sa tanan, sa mga Hudiyo ug sa mga Grego nga nagpuyo sa Efeso; ug giabot ug kahadlok silang tanan, ug ang ngalan sa Ginoong Jesus padayong napadako. 18 Ug daghan niadtong nahimong mga magtutuo mangadto ug managsugid ug sa dayag managtaho sa ilang mga binuhatan. 19 Sa pagkatinuod, ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan. Ug ilang gikuwenta sa tingob ang bili niini ug ilang nakaplagan nga kini mikabat ug kalim-an ka libo ka pirasong plata. 20 Busa sa gamhanang paagi ang pulong ni Jehova padayong mikaylap ug nagmadaogon.