Unsa ang Pagsimba?

Ang pagsimba mahimong magkahulogan ug “buhat nga nagpakitag pagtahod ug gugma sa usa ka diyos.” Sa orihinal nga pinulongan sa Bibliya, ang mga pulong nga gihubad ug “pagsimba” mahimong magtumong sa usa nga nagtahod pag-ayo, o nagpasakop, sa mga linalang. (Mat. 28:9) Ang maong mga pulong mahimong magpasabot sab ug relihiyosong buhat para sa Diyos o sa bathala. (Juan 4:23, 24) Sa konteksto mahibaloan kon unsay ipasabot sa maong mga pulong.

Si Jehova, ang Maglalalang ug Soberano sa Uniberso, mao lang ang takos sa atong eksklusibong debosyon. (Pin. 4:10, 11) Gisimba nato si Jehova pinaagi sa pagtahod sa iyang pagkasoberano ug sa pagpasidungog sa iyang ngalan. (Sal. 86:9; Mat. 6:9, 10) Ang pagkasoberano ni Jehova ug ang iyang ngalan kanunayng gihisgotan sa basahon sa Ezequiel. Ang pamulong nga “Soberanong Ginoong Jehova” gigamit 217 ka beses sa Ezequiel pa lang, ug ang pamulong nga “makaila . . . nga ako si Jehova,” 55 ka beses.​—Ezeq. 2:4; 6:7.

Pero ang atong pagsimba dili kay pagbati lang; ang tinuod nga pagsimba nagkinahanglag buhat. (Sant. 2:26) Dihang gipahinungod nato ang atong kinabuhi kang Jehova, nanaad ta nga sa matag bahin sa atong kinabuhi ato siyang sundon ingong atong Soberano ug tahoron pag-ayo ang iyang ngalan. Hinumdomi nga sa tubag ni Jesus sa ikatulong tentasyon, gipakita niya nga ang pagsimba konektado sa “sagradong pag-alagad.” (Mat. 4:10) Ingong magsisimba ni Jehova, gusto kaayo tang moalagad niya.a (Deut. 10:12) Naghatag tag sagradong pag-alagad sa atong Diyos dihang makigbahin ta sa mga buluhaton nga direktang konektado sa atong pagsimba ug nagkinahanglag sakripisyo. Unsa nga mga buluhaton?

Ang sagradong pag-alagad mahimo sa daghang paagi, ug ang tanan bililhon kang Jehova. Naghimo tag sagradong pag-alagad dihang mosangyaw ta, makigbahin sa mga tigom sa Kingdom Hall, ug magmentinar ug magtukod ug mga tigomanan. Naghatag sab tag sagradong pag-alagad dihang makigbahin ta sa pamilyahanong pagsimba, mosuportar sa paghatag ug hinabang sa atong mga isigkamagtutuo nga nanginahanglan, moboluntaryo sa mga kombensiyon, o moalagad sa Bethel. (Heb. 13:16; Sant. 1:27) Kon panguna sa atong hunahuna ug kasingkasing ang putling pagsimba, kita mohatag ug “sagradong pag-alagad adlaw ug gabii.” Malipay ta sa pagsimba sa atong Diyos, si Jehova!​—Pin. 7:15.