TUN-ANAN 8

Epektibong mga Ilustrasyon

Mateo 13:34, 35

SUMARYO: Pauswaga ang imong pagpanudlo pinaagig simpleng mga ilustrasyon nga makapainteres sa imong mamiminaw ug magtudlog importanteng mga punto.

KON UNSAON PAGHIMO:

Pagpilig simpleng mga ilustrasyon. Sama kang Jesus, paggamit ug gagmayng butang aron ipatin-aw ang dagkong butang, ug sayon sabtong mga butang aron ipatin-aw ang lisod sabtong mga butang. Ayaw pagdugang ug dili importanteng mga detalye nga makapakomplikado sa ilustrasyon. Paneguroa nga ang mga detalye sa imong ilustrasyon mapadapat gyod sa leksiyon nga imong ginatudlo aron dili maglibog ang imong mamiminaw.

Magmapaniiron. Paniid sa palibot, tun-i ang atong mga publikasyon, ug pamati sa hanas nga mga magtutudlo. Samtang himoon kini, paghunahunag mga ilustrasyon nga magamit nimo aron mouswag ang imong pagpanudlo. Ibutang sa imong file kini nga mga ilustrasyon.
Hunahunaa ang imong mamiminaw. Pagpilig mga ilustrasyon nga konektado sa mga kalihokan ug interes sa imong mamiminaw. Pag-amping nga ang imong mga ilustrasyon dili makapaulaw o makapasakit sa uban.
Itudlo ang pangunang punto. Pagpokus sa pag-ilustrar sa pangunang mga punto, dili sa gagmayng detalye. Paneguroa nga ang mahinumdoman sa mamiminaw dili lang ang ilustrasyon kondili ang leksiyon sab niini.