GEBAL

[lagmit, Teritoryo; Utlanan], GEBALNON

1. Ang Gebal, usa ka siyudad nga Fenicianhon sa kabaybayonan sa Mediteranyo, gituohang mao ang modernong Jebeil, mga 28 km (17 mi) sa AAS sa Beirut. Giisip sa mga historyador ang Gebal, ang Byblos sa mga Grego, nga usa sa labing karaang mga siyudad sa Tungang Sidlakan.​—Tan-awa ang Jos 13:​5, ftn sa Rbi8.

Gilakip ni Jehova “ang yuta sa mga Gebalnon” uban sa mga rehiyon nga ilogonon pa sa Israel sa adlaw ni Josue. (Jos 13:1-5) Ang mga kritiko nag-ingon nga kini dili tukma, sanglit ang siyudad sa Gebal atua sa halayong A sa Israel (mga 100 km [60 mi] sa A sa Dan) ug lagmit wala gayod mailalom sa paggahom sa Israel. Gituohan sa pipila ka eskolar nga lagmit ang Hebreohanong teksto nadaot dinhi niini nga bersikulo ug giisip nga ang asoy kanhi mabasa nga “ang yuta nga kasikbit sa Lebanon,” o ‘hangtod sa utlanan sa mga Gebalnon.’ Hinunoa, angayng matikdan usab nga ang mga saad ni Jehova sa Josue 13:2-7 maoy kondisyonal. Busa lagmit wala gayod mapanag-iya sa Israel ang Gebal tungod sa pagkadili-masinugtanon sa Israel.​—Itandi ang Jos 23:​12, 13.

Ang mga Gebalnon mitabang kang Solomon sa ika-11 nga siglo W.K.P. sa pag-andam sa mga materyales alang sa pagtukod sa templo. (1Ha 5:18) Gilakip ni Jehova ang “mga tigulang sa Gebal” niadtong kinsa mitabang nga magpabilin ang gahom ug himaya sa patigayon sa karaang Tiro.​—Eze 27:9.

2. Usa ka lahi nga Gebal ang gitala uban sa Ammon ug Amalek diha sa Salmo 83:​7, ug lagmit nahimutang sa H o sa S sa Patayng Dagat. Bisan tuod wala mahibaloi ang tukmang nahimutangan niini, ang pipila ka eskolar nagtuo nga kini nahimutang duol sa Petra, mga 100 km (60 mi) sa AAS sa Gulpo sa ʽAqaba.