Si Jose ikaduha sa kinamanghorang anak ni Jacob. Nabantayan sa mga magulang ni Jose nga paborito siya sa ilang papa. Unsa kahay ilang gibati? Nasuya ug naglagot sila kang Jose. Sa ulahi, may talagsaong mga damgo si Jose ug iya kining gisulti sa iyang mga igsoon. Para nila, ang iyang mga damgo nagpasabot nga moabot ang adlaw nga moyukbo sila kaniya. Maong nisamot ang ilang kasuko!

Usa ka adlaw niana, ang mga igsoon ni Jose nagpakaon sa mga karnero duol sa siyudad sa Sekem. Gipaapas ni Jacob si Jose aron susihon kon naunsa na sila. Pagkakita nila kang Jose, nagsabotsabot sila: ‘Nia ang tigdamgo. Patyon nato siya!’ Gibira nila siya ug gihulog sa lalom nga bangag. Pero ang ilang igsoong si Juda miingon: ‘Ayaw siyag patya! Ato lang siyang ibaligya ingong sulugoon.’ Maong ilang gibaligya ug 20 ka pirasong silver si Jose sa mga Midianhong negosyante nga moadtoay sa Ehipto.

Dayon gituslob sa mga igsoon ni Jose ang iyang sinina sa dugo sa kanding. Unya ila kining gidala sa ilang amahan ug miingon: ‘Dili ba sinina ni sa imong anak?’ Busa nagtuo si Jacob nga gipatay si Jose sa mapintas nga hayop. Naguol kaayo siya. Walay makahupay niya.

Si Jose gibaligya didto sa Ehipto ingong sulugoon sa opisyal nga si Potipar. Pero gitabangan ni Jehova si Jose. Nakita ni Potipar nga si Jose maayong motrabaho ug kasaligan. Busa si Jose ang gisaligan ni Potipar sa tanan niyang butang.

Nakita sa asawa ni Potipar nga guwapo ug maayog barog si Jose. Kada adlaw niyang gitental si Jose nga makigdulog niya. Unsay gihimo ni Jose? Mibalibad siya ug miingon: ‘Dili ko! Dili na maayo. Gisaligan ko sa akong amo, ug asawa ka niya. Kon makigdulog ko nimo, makasala ko sa Diyos!’

Usa ka adlaw niana, gipugos sa asawa ni Potipar si Jose nga modulog niya. Iyang gibira ang sinina ni Jose pero midagan si Jose. Pag-uli ni Potipar, ang iyang asawa misumbong nga lugoson unta siya ni Jose. Apan dili to tinuod. Nasuko pag-ayo si Potipar ug iyang gipapriso si Jose. Pero wala gyod malimot si Jehova kang Jose.

Dihang napriso si Jose, ang hari sa Ehipto nga gitawag ug Paraon nagdamgo, pero walay makasulti niya sa kahulogan. Giingnan sa usa ka sulugoon ang Paraon nga si Jose makasaysay sa kahulogan sa iyang damgo. Busa gipatawag dayon sa Paraon si Jose.

Giingnan siya sa Paraon: ‘Sultihi ko sa kahulogan sa akong damgo.’ Si Jose mitubag: ‘Pito ka tuig nga daghag pagkaon sa Ehipto, dayon sa sunod nga pito ka tuig dunay kagutom. Pagpilig brayt nga tawo nga maoy magtigom ug pagkaon aron dili magutman ang imong katawhan.’ Ang Paraon miingon: ‘Ikaw ang akong gipili! Mahimo kang ikaduha sa pinakataas ug posisyon sa Ehipto!’ Nganong nakasaysay si Jose sa damgo sa Paraon? Gitabangan siya ni Jehova.

Pito ka tuig nga nagtigom ug pagkaon si Jose. Dayon natuman ang iyang giingon, ug dihay kagutom sa tibuok yuta. Ang mga tawo sa laing lugar namalit ug pagkaon kang Jose. Nabalitaan sa iyang amahang si Jacob nga naay pagkaon sa Ehipto, busa iyang gipapalit didto ang iyang napulo ka anak.

Miadto ang mga anak ni Jacob ug nailhan dayon sila ni Jose. Pero wala sila kaila niya. Miyukbo sila kaniya, nga maoy gidamgo ni Jose sa bata pa siya. Gustong mahibaloan ni Jose kon nagbag-o na ba ang iyang mga igsoon. Busa iya silang giingnan: ‘Mga espiya mo. Gusto ninyong mahibaloan kon asang bahina sa among nasod ang huyang ug depensa.’ Sila miingon: ‘Dili! Taga-Canaan mi ug 12 mi ka magsoon. Patay na ang usa namo ka igsoon, ug ang kamanghoran kauban sa among amahan.’ Dayon si Jose miingon: ‘Motuo ko ninyo kon dad-on ninyo dinhi ang inyong kamanghoran.’ Busa mipauli sila.

Dihang nahurot na ang pagkaon sa pamilya ni Jacob, gipabalik niya ang iyang mga anak sa Ehipto. Kauban na nila ang kamanghoran nga si Benjamin. Gisulayan sila ni Jose. Gibutang niya sa sako ni Benjamin ang iyang kopa nga silver ug dayon iyang gipasanginlan nga nangawat ang iyang mga igsoon. Nakurat sila kay nakit-an sa mga sulugoon ang kopa sulod sa sako ni Benjamin. Nagpakiluoy sila kang Jose nga sila ang silotan ug dili si Benjamin.

Nakita ni Jose nga buotan na iyang mga igsoon. Dili na niya mapugngan ang iyang gibati. Siya mihilak ug miingon: ‘Ako si Jose nga inyong igsoon. Buhi pa ba si Papa?’ Puwerte nilang kurata, ug iya silang giingnan: ‘Ayaw mog kaguol sa inyong gihimo nako. Ang Diyos maoy nagbuot ani aron maluwas ang inyong kinabuhi. Dad-a dayon dinhi si Papa.’

Miuli sila aron sultihan ang ilang amahan sa maayong balita ug aron dad-on siya sa Ehipto. Human sa daghan kaayong tuig, nagkita ra gyod si Jose ug ang iyang amahan.