Si Moises nagpuyo ug 40 ka tuig sa Midian. Naminyo siya ug duna siyay mga anak. Usa ka adlaw niana, nagpakaon siya sa mga karnero duol sa Bukid sa Sinai ug nakakita siyag katingalahang butang. Dihay tanom nga nagkalayo, pero wala masunog! Miduol si Moises ug dihay tingog gikan sa tanom nga miingon: ‘Moises! Ayawg duol. Huboa ang imong sandalyas kay balaan nga lugar ang imong gitindogan.’ Si Jehova ang miestorya pinaagig anghel.

Nahadlok si Moises maong iyang gitabonan ang iyang nawong. Ang Diyos miingon: ‘Nakita nako ang pag-antos sa mga Israelinhon. Pagawason nako sila sa Ehipto ug dad-on nako sila sa usa ka nindot nga yuta. Ug ikaw ang mahimong lider nila.’ Seguro nakurat gyod si Moises.

Miingon si Moises: ‘Unsay akong isulti kon mangutana sila kon kinsay nagpadala nako?’ Ang Diyos mitubag: ‘Sultihi sila nga si Jehova, ang Diyos ni Abraham, ni Isaac, ug ni Jacob maoy nagpadala nimo.’ Dayon si Moises miingon: ‘Unsaon man kon dili sila motuo nako?’ Dunay gihimo si Jehova aron mosalig si Moises sa Iyang tabang. Gisugo ni Jehova si Moises nga iitsa ang iyang sungkod, ug nahimo kining bitin! Dihang gigunitan ni Moises ang ikog sa bitin nahimo na pod kining sungkod. Si Jehova miingon: ‘Kon makita ni nila, motuo sila nga akoy nagpadala nimo.’

Si Moises miingon: ‘Dili ko maayong manulti.’ Si Jehova misaad: ‘Tudloan ti ka kon unsay imong isulti, ug paubanon nako si Aaron para motabang nimo.’ Busa mibalik si Moises sa Ehipto uban sa iyang asawa ug mga anak kay may pagsalig siya nga si Jehova motabang niya.

Ang mga Israelinhon gipugos sa pagtrabaho ingong mga sulugoon. Gipadala ni Jehova si Moises ug Aaron para sultihan si Paraon: ‘Pagawsa ang akong katawhan aron makasimba sila nako sa kamingawan.’ Hambogirong mitubag ang Paraon: ‘Wala koy labot sa giingon ni Jehova, ug dili nako pagawson ang mga Israelinhon.’ Unya gidaogdaog niyag samot ang mga Israelinhon. Naay gihimo si Jehova aron mausab ang hunahuna sa Paraon. Kabalo ka unsa? Iyang gisilotan ang Ehipto ug napulo ka beses. Si Jehova miingon kang Moises: ‘Gahig ulo ang Paraon. Inigkabuntag, naa siya sa Suba sa Nilo. Adtoa siya ug sultihi nga tungod kay wala niya pagawsa ang akong katawhan, mahimong dugo ang tubig sa Nilo.’ Misunod si Moises ug miadto sa Paraon. Nagtan-aw si Paraon dihang gibunal ni Aaron ang iyang sungkod sa suba, ug nahimo kining dugo. Dayon nanimaho ang suba, namatay ang mga isda, ug dili na mainom ang tubig sa Nilo. Pero wala gihapon pagawsa sa Paraon ang mga Israelinhon.

Human sa pito ka adlaw, gipabalik ni Jehova si Moises sa Paraon aron sultihan: ‘Kon dili nimo pagawson ang akong katawhan, mapunog baki ang Ehipto.’ Giisa ni Aaron ang iyang sungkod ug nanggawas ang daghan kaayong baki. Naay mga baki bisag asa—sa mga balay, higdaanan, ug kan-anan! Giingnan ni Paraon si Moises nga hangyoon si Jehova sa pagpahunong sa maong silot. Dayon nanaad ang Paraon nga iyang pagawson ang mga Israelinhon. Gipahunong ni Jehova ang maong silot, ug gitapok sa mga Ehiptohanon ang daghan kaayong patay nga baki. Puwerteng bahoa sa ilang lugar. Pero wala gihapon pagawsa sa Paraon ang mga Israelinhon.

Dayon miingon si Jehova kang Moises: ‘Ibunal ni Aaron ang iyang sungkod sa yuta ug ang abog mahimong mga tagnok.’ Dihadiha dunay tagnok, o gagmayng insekto nga mamaak, bisan asa. Ang ubang Ehiptohanon miingon kang Paraon: ‘Silot kini sa Diyos.’ Pero wala gihapon mosugot ang Paraon nga mobiya ang mga Israelinhon.