Ang mga Israelinhon mibiya sa Bukid sa Sinai ug miagi sa desyerto sa Paran paingon sa Kades. Gisultihan ni Jehova si Moises didto: ‘Pagsugo ug 12 ka lalaki, usa sa kada tribo, aron mangespiya sa Canaan, ang yuta nga akong ihatag sa mga Israelinhon.’ Busa mipili si Moises ug 12 ka lalaki ug giingnan sila: ‘Adto mo sa Canaan ug tan-awa kon maayo bang magtanom didto. Tan-awa kon kusgan ba o huyang ang mga tawo ug kon nagpuyo ba sila sa mga tolda o sa mga siyudad.’ Ang 12 ka espiya, apil si Josue ug Caleb, miadto sa Canaan.

Human sa 40 ka adlaw, mibalik ang mga espiya nga nagdalag igos, granada, ug ubas. Sila miingon: ‘Maayo ang yuta, pero kusgan ang mga tawo ug taas ang mga paril sa ilang mga siyudad.’ Dayon si Caleb miingon: ‘Mapildi nato sila. Mangadto na ta didto!’ Kabalo ba ka nganong nakasulti ana si Caleb? Kay siya ug si Josue may pagsalig kang Jehova. Pero ang 10 ka espiya miingon: ‘Ayaw! Dagko ang mga tawo didto, morag mga higante! Mora tag mga apan-apan kompara nila.’

Naluya ang mga Israelinhon. Nagbagulbol sila: ‘Mamili tag laing lider ug mamalik sa Ehipto. Nganong moadto man ta anang dapita ug magpakamatay?’ Si Josue ug Caleb miingon: ‘Tumana ninyo si Jehova, ug ayaw mog kahadlok. Tabangan ta ni Jehova.’ Pero dili mopatuo ang mga Israelinhon. Gusto pa gani nilang patyon si Josue ug Caleb!

Unsay gihimo ni Jehova? Iyang giingnan si Moises: ‘Gihimo nako ang tanan para sa mga Israelinhon, pero dili gihapon sila mosunod nako. Tungod niini, 40 ka tuig sila nga maglibotlibot sa kamingawan, ug dinhi sila mangamatay. Ang ilang mga anak lang ug si Josue ug Caleb ang makapuyo sa yuta nga akong ihatag nila.’

Samtang ang mga Israelinhon naa sa kamingawan, si Kore, Datan, Abiram, ug ang 250 nila ka kauban mirebelde kang Moises. Sila miingon: ‘Dili na mi gustong mosunod nimo! Kinahanglan ba gyod nga ikaw among lider ug si Aaron ang hataas nga saserdote? Si Jehova nagauban natong tanan, dili lang kanimo ug ni Aaron.’ Wala malipay si Jehova sa ilang gihimo. Para niya, mirebelde sila kaniya!

Giingnan ni Moises si Kore ug ang iyang mga kauban: ‘Adto mo sa tabernakulo ugma, ug dad-a ang inyong insensaryo. Ipakita ni Jehova kon kinsay iyang gipili.’

Pagkasunod adlaw, si Kore ug ang 250 ka lalaki miadto kang Moises didto sa tabernakulo. Nagsunog silag insenso, bisag dili sila mga saserdote. Giingnan ni Jehova si Moises ug Aaron: ‘Palayo mo kang Kore ug sa iyang mga kauban.’

Miadto si Kore kang Moises didto sa tabernakulo, pero wala mouban si Datan, Abiram, ug ilang pamilya. Giingnan ni Jehova ang mga Israelinhon nga mopalayo sa tolda ni Kore, Datan, ug Abiram. Mipalayo dayon ang mga Israelinhon. Si Datan, Abiram, ug ilang pamilya naa sa gawas sa ilang tolda. Kalit nga natunga ang yuta ug gilamoy silang tanan! Didto sa tabernakulo, nasunog si Kore ug ang iyang kaubang 250 ka lalaki tungod sa kalayo nga gipadala ni Jehova.

Gisultihan ni Jehova si Moises: ‘Kuhaa ang sungkod sa lider sa matag tribo, ug sulati kini sa ilang ngalan. Pero isulat sa sungkod sa tribo ni Levi ang ngalan ni Aaron. Ibutang ang mga sungkod sa sulod sa tabernakulo. Mamulak ang sungkod sa tawo nga akong gipili.’

Pagkasunod adlaw, gikuha ni Moises ang tanang sungkod ug gipakita sa mga lider. Namulak ug namungag hinog nga mga almendras ang sungkod ni Aaron. Pinaagi niini, gipakita ni Jehova nga si Aaron ang iyang gipili ingong hataas nga saserdote.