Pangutana

◼ Unsay mga bentaha nga mopakig-uban sa kongregasyon nga maoy naghupot sa teritoryo nga atong gipuy-an?

Pinaagi sa kahikayan sa kongregasyon, atong madawat ang pagpalig-on nga ‘modasig kanato ngadto sa paghigugma ug sa maayong mga buhat.’ (Heb. 10:​24, 25) Pinaagi sa kongregasyon atong makat-onan ang kamatuoran ug kita masangkapan sa pagtuman sa atong buluhaton sa paghimog mga tinun-an. (Mat. 28:​19, 20) Madasig usab kita nga matinumanong molahutay sa mga pagsulay ug matagan-an kita ug mahigugmaong mga magtatan-aw nga motabang kanato sa pagsagubang sa grabeng mga pagpit-os ug mga kabalaka. Dayag nga ang kongregasyon hinungdanon sa atong pagpabiling buhi sa espirituwal. Apan, aduna bay mga bentaha sa pagpakig-uban sa kongregasyon nga maoy naghupot sa teritoryo nga atong gipuy-an?

Ang mga sirkumstansiya sa matag usa dili pareho, ug ang maong mga kahimtang sama sa sekular nga trabaho, di-magtutuong kapikas, ug transportasyon mahimong makaapektar sa kataposang desisyon sa usa bahin niini. Bisan pa niana, dunay dayag nga mga bentaha, sa espirituwal man o sa laing paagi, kon ang usa ka tawo moasosyet sa kongregasyon nga naghupot sa teritoryo nga iyang gipuy-an. Ang mga ansiyano makakontak dayon sa tanang magmamantala panahon sa mga emerhensiya. Ang miaging Mga Pangutana nagpasiugda sa ubay-ubay nga uban pang mga bentaha.​—Hunyo 1991, Mayo 1976, ug Marso 1967.

Sa katibuk-an, mas kombenyente ang pagtambong sa mga tigom sa duol, nga magtugot kanato sa pag-abot nga sayosayo aron makapakig-estorya sa uban, makaatiman sa kinahanglanong mga butang, ug makapakig-ambit sa pangbukas nga awit ug pag-ampo. Kon ang bag-ong mga interesado nagpuyo sa atong kasilinganan, kasagarang mas sayon alang kanato ang pagkontak kanila, pagdumalag mga pagtuon sa Bibliya, ug pagtultol kanila ngadto sa mga tigom nga labing kombenyente alang kanila.

Masaligon kita nga ang mga ulo sa pamilya mainampoong magkonsiderar niining butanga, nga timbangtimbangon pag-ayo ang tanang butang nga nalangkit sa pagtino kon unsay labing maayo alang sa espirituwal ug pisikal nga kaayohan sa ilang pamilya.​—1 Tim. 5:8.