MGA BATAN-ON NANGUTANA

Importante ba nga Mosikat Online?

Ang tin-edyer nga si Elaine miingon: “Dihang nakita nako nga daghan kaayog followers online ang akong mga eskolmet, nakahunahuna ko, ‘Wow, sikata nila oy!’ Sa tinuod lang, naibog pod baya ko gamay.”

Mibati na ba ka ana? Kon mao, kini nga artikulo makatabang nimo nga malikayan ang dili maayong mga epekto sa pagpaningkamot nga mosikat online.

Unsay mga kapeligrohan?

Ang Proverbio 22:1 nag-ingon nga “ang maayong ngalan mao ang pilion imbes ang daghang bahandi.” Busa Ok ra kon gusto kag maayong reputasyon—bisan gani ang pagtinguha nga maangayan ka sa uban.

Pero usahay, moresulta kanag grabeng tinguha nga mosikat. Peligroso ba na? Oo. Matikdi ang giingon sa 16 anyos nga si Onya:

“Naay mga tawo nga bisag unsa na lay himoon aron lang mosikat. Naa gani miambak gikan sa ikaduhang andana sa among eskuwelahan.”

Aron makakuhag atensiyon, ang ubang batan-on nag-video sa ilang delikado nga mga buhat ug gi-post kini online. Pananglitan, naay mga batan-on nga nag-upload sa ilang mga video nga nangaon silag liquid nga sabon nga gisulod sa capsule—butang nga dili gyod angayng himoon!

Ang giingon sa Bibliya: “Ayaw kamo pagbuhat [ug] bisag unsa gikan . . . sa walay hinungdan nga tinguha sa pagpanghambog.”—Filipos 2:3, Maayong Balita Biblia.

Hunahunaa kini:

Unsa ka importante para nimo nga mosikat online?
Ipameligro ba nimo ang imong panglawas o kinabuhi aron lang makakuhag atensiyon ug magustohan sa uban?

Ang giingon sa uban

“Kon himoon na sa mga tawo ang bisan unsa aron lang mosikat, delikado na nâ. Naghunahuna tingali sila nga kon naa silay partikular nga paagi sa pagsulti, sininaan, o linihokan—bisan sa online—mosikat sila. Dili gyod maayo ang resulta kon imong ibaylo ang imong mga tinuohan ug prinsipyo aron lang mosikat.”—Leianna.

‘Sikat tan-awon, pero dili diay’

Dili tanan ang nagpameligro sa ilang kinabuhi aron lang mosikat. Si Erica, 22 anyos, naghisgot kon unsa pay gihimo sa uban aron mosikat:

“Naay mga tawo nga magsigeg post ug mga picture nga kon tan-awon morag daghan kaayo silag suod nga higala nga pirme nilang kauban. Maong sikat sila tan-awon, pero dili diay.”

Si Cara, 15 anyos, miingon nga ang uban manglimbong aron hunahunaon sa mga tawo nga sikat sila:

“Naay mga tawo nga mag-post ug mga picture nga morag naa sila sa party, pero ang tinuod, naa ra sila sa balay.”

Si Matthew, 22 anyos, miangkon nga mihimo sab siyag sama niana:

“Nag-post kog picture, ug ang gibutang nako nga location kay Mount Everest bisag wala pa ko sukad makaadto sa Asia!”

Ang giingon sa Bibliya: “Gusto namong magmatinud-anon sa tanang butang.”—Hebreohanon 13:18.

Hunahunaa kini:

Kon naggamit kag social media, naga-post ba kag dili tinuod aron lang mosikat?
Ang imo bang mga picture ug comment sa social media nagpakita kon kinsa gyod ka ug kon unsay imong mga prinsipyo?

Ang giingon sa uban

“Ang uban maningkamot gyod pag-ayo aron lang makadawat ug daghang like. Pero unsa nga reputasyon ang imong gusto—kanang mailhan ka nga lain ug sinultihan ug sininaan o hambogiro sa imong mga nabatonan? O mas gusto nimong mailhan ka sa imong maayong mga kinaiya o tinud-anay nga interes sa uban? Siyempre malipay gyod ka kon ganahan ang mga tawo nimo, pero seguroa nga ma-proud ka sa rason kon nganong ganahan sila nimo.”—Hannah.

Unsa ka importante ang followers ug likes?

Daghan ang nagtuo nga aron mosikat online, kinahanglang daghan kaayo kag followers ug likes. Si Matthew, nga gihisgotan ganiha, miingon nga mao sab nay iyang gituohan sa una:

“Mangutana ko sa uban, ‘Pila nay imong followers?’ o ‘Pila ang pinakadaghang like nga imong nadawat sukad?’ Para modaghan ang akong followers, bisag kinsa na lay akong gi-follow kay namasin ko nga i-follow pod ko nila. Namatikdan nako nga desperado na kong mosikat, ug misamot ni tungod sa social media.”

Collage: 1. Tin-edyer nga babaye nalipay dihang nakita niya ang gidaghanon sa mga nag-like sa iyang post sa social media. 2. Ang maong batan-on nagkaon ug chocolate gikan sa panaksan nga punog kendi ug chocolate. 3. Gigunitan sa batan-on ang iyang tiyan kay naglain ang iyang pamati. — Ang pagkahimong sikat online samag junk food—mag-enjoy ka kadali pero dili gyod ka matagbaw

Si Maria, 25 anyos, nakamatikod nga ang panglantaw sa uban sa ilang kaugalingon nagdepende sa gidaghanon sa ilang followers ug likes:

“Kon mag-post ug selfie ang usa ka babaye, unya wala kaayoy mag-like, maghunahuna dayon siya nga pangit siya. Siyempre, sayop na. Pero mao nay reaksiyon sa daghan. Mora bag gi-bully na hinuon nila ang ilang kaugalingon.”

Ang giingon sa Bibliya: “Dili ta magpaimportante sa kaugalingon, nga mag-aghat ug kompetisyon ug magsinahay.”—Galacia 5:26.

Hunahunaa kini:

Kon naggamit kag social media, ginakompara ba nimo ang imong kaugalingon sa uban?
Mas importante ba nimo ang pagbaton ug daghang followers kay sa pagbaton ug tinuod nga mga higala nga nagmahal nimo?

Ang giingon sa uban

“Aron mosikat ka online, kinahanglang mobilib ang mga tawo nimo, pero sagad nagpasabot na nga kinahanglang parehas ka nila. Tungod ana, basin mas magpokus na ka sa kon unsay panglantaw sa uban nimo ug kon unsay imong himoon aron mas ganahan sila nimo. Normal lang nga gusto nimong maangayan ka sa uban, pero kon magpokus na lang ka sa pagkahimong sikat, posibleng kana na lay naa sa imong hunahuna ug himoon na nimo ang tanan aron lang mosikat.”—Joshua.

Likayi ang “pasimpleng pagpanghambog”

Nakamatikod ba ka nga naay mga tawo nga moreklamo kunohay, pero nanghambog diay?

“Makalagot ning naay bag-ong kotse kay daghan ang gustong mosakay!”
“Laina oy, tanan na lang sila moingon nga bagay kuno nako nga namayat ko!”

Ang nagsulti nagreklamo kunohay aron ingnon nga mapainubsanon—pero ang tinuod nanghambog siya.

Pasidaan: Kon himoon nimo ni nga paagi sa pagpanghambog, maglagot hinuon ang mga tawo nimo, kay mailhan nila ang imong tinuod nga motibo. Ang mga tawo dili ganahan niadtong deretsong manghambog, pero sagad mas dili sila ganahan sa mga tawo nga pasimpleng manghambog.

Sa sunod nga mag-post kag comment o picture sa social media, likayi ang pasimpleng pagpanghambog. Sunda ang maalamong tambag sa Bibliya: “Padayega kanimo ang laing tawo, ug dili ang imong kaugalingong baba.”—Proverbio 27:2.