Kada tuig, daghang batan-on nga gimatuto ingong mga Saksi ni Jehova ang mabawtismohan. Naghunahuna ba pod ka nga magpabawtismo? Kon mao, kinahanglan una nimong masabtan ang kahulogan sa pagpahinungod ug bawtismo.

• Unsa ang bawtismo?

• Unsa ang pagpahinungod?

• Nganong importante ang bawtismo?

• Ang giingon sa ubang batan-on

• Dili tinuod ug ang tinuod

Unsa ang bawtismo?

Ang bawtismo nga gitumong sa Bibliya maoy bug-os nga pagtuslob sa tubig—dili lang kay pagwisik ug tubig—ug importante kaayo ang gisimbolohan niini.

• Ang pagtuslob sa tubig panahon sa bawtismo nagpakita sa publiko nga dili na ka magkinabuhi sumala lang sa kon unsay makapalipay nimo.

• Ang paghaw-as sa tubig nagpakita nga nagsugod kag bag-ong kinabuhi nga nakapokus sa pagbuhat kon unsay makapalipay sa Diyos.

Pinaagi sa pagpabawtismo, imong gipakita sa publiko nga imong giila nga si Jehova dunay awtoridad sa pagtakdag sukdanan kon unsay husto ug sayop, ug opisyal nimong gipakita nga nanaad ka nga kanunay nimong himoon ang iyang kabubut-on.

Hunahunaa kini: Nganong angay nimong ipakita sa publiko nga gusto nimong sundon si Jehova sa tibuok kinabuhi? Tan-awa ang 1 Juan 4:19 ug Pinadayag 4:11.

Unsa ang pagpahinungod?

Sa dili pa ka magpabawtismo, kinahanglang ipahinungod nimo ang imong kaugalingon kang Jehova. Sa unsang paagi?

Sa imong personal nga pag-ampo, isulti kang Jehova ang imong saad nga moalagad ka niya hangtod sa hangtod ug imong himoon ang iyang gusto bisag unsa pay mahitabo o himoon sa uban.

Pinaagi sa pagpabawtismo, imong gipakita sa publiko nga nagpahinungod na ka sa pribado. Kini nagpakita nga dili na ikaw ang tag-iya sa imong kinabuhi kondili si Jehova na.—Mateo 16:24.

Hunahunaa kini: Nganong mahimong mas maayo ang imong kinabuhi kon si Jehova nay tag-iya sa imong kinabuhi? Tan-awa ang Isaias 48:17, 18 ug Hebreohanon 11:6.

Nganong importante ang bawtismo?

Gipakita ni Jesus nga kinahanglan ang bawtismo aron mahimong iyang tinun-an. (Mateo 28:19, 20) Busa, ang bawtismo kinahanglanon gihapon alang sa mga Kristohanon. Gani, ang Bibliya nag-ingon nga gikinahanglan kini aron maluwas.—1 Pedro 3:21.

Pero kinahanglan nga ang imong motibo sa pagpabawtismo mao ang imong gugma ug apresasyon kang Jehova. Ang imong tinamdan kinahanglan nga parehas sa salmista, nga misulat: “Unsay akong ibalos kang Jehova sa tanang maayo nga iyang gibuhat alang kanako? ... Motawag ko sa ngalan ni Jehova. Tumanon nako ang akong mga panaad kang Jehova.”—Salmo 116:12-14.

Hunahunaa kini: Unsang maayong butang ang gibuhat ni Jehova para nimo, ug unsay imong ibalos niya? Tan-awa ang Deuteronomio 10:12, 13 ug Roma 12:1.

Kon nagsunod ka sa mga prinsipyo sa Bibliya ug nakighigala na sa Diyos, normal lang nga maghunahuna ka bahin sa bawtismo. Unsaon nimo pagkahibalo nga andam na ka?a

Niini nga artikulo

• Unsa ka daghan ang angay nakong mahibaloan?

• Unsay angay nakong buhaton?

• Ang giingon sa ubang batan-on

Unsa ka daghan ang angay nakong mahibaloan?

Ang pagpangandam para sa bawtismo dili parehas sa pagpangandam sa eksam sa eskuwelahan. Busa, wala ni magpasabot nga kinahanglang memoryado nimo ang tanan nimong nakat-onan. Pero, kinahanglang gamiton nimo ang imong “gahom sa pagpangatarongan” aron palig-onon ang imong pagtuo nga tinuod ang gitudlo sa Bibliya. (Roma 12:1) Pananglitan:

• Kombinsido ba ka nga naay Diyos ug angay nimo siyang simbahon?

  Ang giingon sa Bibliya: “Kadtong moduol sa Diyos kinahanglang motuo nga siya buhi ug nga siya maoy tigganti sa mga sinserong nangita kaniya.”—Hebreohanon 11:6.

  Pangutan-a ang kaugalingon: ‘Nganong nagtuo ko sa Diyos?’ (Hebreohanon 3:4) ‘Nganong angay nako siyang simbahon?’—Pinadayag 4:11.

  Nagkinahanglan kag tabang? Tan-awa ang “Paglalang o Ebolusyon?—Bahin 1: Nganong Angayng Motuo ug Diyos?”

• Kombinsido ba ka nga ang mensahe sa Bibliya gikan sa Diyos?

  Ang giingon sa Bibliya: “Ang tibuok Balaang Kasulatan gisulat pinaagi sa paggiya sa Diyos ug mapuslanon sa pagtudlo, sa pagbadlong, sa pagtul-id, sa pagdisiplina diha sa pagkamatarong.”—2 Timoteo 3:16.

  Pangutan-a ang kaugalingon: ‘Nganong nagtuo ko nga dili ideya sa mga tawo ang akong mabasa sa Bibliya?’—Isaias 46:10; 1 Tesalonica 2:13.

  Nagkinahanglan kag tabang? Tan-awa ang “Sa Unsang Paagi Matabangan Ko sa Bibliya?—Bahin 1: Pagsusi sa Imong Bibliya.”

• Kombinsido ba ka nga gigamit ni Jehova ang Kristohanong kongregasyon sa pagtuman sa iyang kabubut-on?

  Ang giingon sa Bibliya: “Iya [sa Diyos] ang himaya pinaagi sa kongregasyon ug pinaagi ni Kristo Jesus sa tanang henerasyon hangtod sa kahangtoran.”—Efeso 3:21.

  Pangutan-a ang kaugalingon: ‘Giisip ba nako ang akong nakat-onan sa Bibliya diha sa Kristohanong mga tigom nga gikan sa mga tawo o gikan kang Jehova?’ (Mateo 24:45) ‘Motambong ba kog tigom bisag dili makatambong ang akong mga ginikanan (kon gitugotan ka nila)?’—Hebreohanon 10:24, 25.

  Nagkinahanglan kag tabang? Tan-awa ang “Nganong Motambong sa mga Tigom sa Kingdom Hall?”

Unsay angay nakong buhaton?

Dili kinahanglan nga perpekto ka aron mabawtismohan. Pero, kinahanglan nimong ipakita nga gusto gyod nimong ‘mopalayo sa kon unsay daotan ug buhaton ang maayo.’ (Salmo 34:14) Pananglitan:

• Gisunod ba nimo ang mga sugo ni Jehova?

  Ang giingon sa Bibliya: “Mentinaha ang maayong konsensiya.”—1 Pedro 3:16.

  Pangutan-a ang kaugalingon: ‘Giunsa nako pagpakita nga ang akong “katakos sa panghunahuna” nabansay sa ‘pag-ila sa maayo ug daotan’?’ (Hebreohanon 5:14) ‘Naa bay mga higayon nga wala ko magpadala sa presyur sa paghimog daotan? Ang ako bang gipili nga mga higala nagdasig nako sa paghimo kon unsay maayo?’—Proverbio 13:20.

  Nagkinahanglan kag tabang? Tan-awa ang “Unsaon Nako Pagbansay ang Akong Konsensiya?”

• Nakasabot ba ka nga manubag ka sa imong binuhatan?

  Ang giingon sa Bibliya: “Ang matag usa nato manubag sa Diyos.”—Roma 14:12.

  Pangutan-a ang kaugalingon: ‘Matinud-anon ba ko sa akong kaugalingon ug sa uban?’ (Hebreohanon 13:18) ‘Modawat ba ko sa akong mga sayop, o ginatagoan ba nako ni o ginabasol ang uban?’—Proverbio 28:13.

  Nagkinahanglan kag tabang? Tan-awa ang “Unsay Akong Himoon Bahin sa Akong mga Sayop?”

• Suod ba nimo nga higala si Jehova?

  Ang giingon sa Bibliya: “Duol sa Diyos, ug siya moduol kaninyo.”—Santiago 4:8.

  Pangutan-a ang kaugalingon: ‘Unsay akong ginahimo aron masuod ko kang Jehova?’ Pananglitan, ‘Pirme ba kong magbasag Bibliya?’ (Salmo 1:1, 2) ‘Regular ba kong moampo?’ (1 Tesalonica 5:17) ‘Espesipiko ba ang akong mga pag-ampo? Ang ako bang mga higala, higala sab ni Jehova?’—Salmo 15:1, 4.

  Nagkinahanglan kag tabang? Tan-awa ang “Sa Unsang Paagi Matabangan Ko sa Bibliya?—Bahin 2: Himoang Makalingaw ang Pagbasag Bibliya” ug “Nganong Kinahanglan Kong Moampo?”

TIP: Aron maandam ka para sa bawtismo, basaha ang kapitulo 37 sa librong Mga Pangutanang Gisukna sa mga Batan-on—Mga Tubag nga Mosaler, Tomo 2. Konsideraha ang worksheet sa panid 308 ug 309.

Kulbaan ba kang maghunahuna nga magpahinungod kang Jehova ug magpabawtismo? Kon oo, tabangan ka niining artikuloha nga mawala ang imong kahadlok nga magpabawtismo.

Niini nga artikulo

• Basig makahimo kog seryosong sala human sa akong bawtismo

• Basig dili nako mahimo ang mga responsibilidad sa usa ka bawtismadong alagad

• Basig dili ko takos nga moalagad kang Jehova

• Ang giingon sa ubang batan-on

Basig makahimo kog seryosong sala human sa akong bawtismo

Kon nganong nabalaka: Tingali naa kay kaila nga nakahimog seryosong sala ug na-disfellow sa kongregasyon. (1 Corinto 5:11-13) Ug nabalaka ka nga basig mahitabo pod na nimo.

“Dihang nakahunahuna ko nga magpabawtismo, nahadlok ko nga basig makahimo kog seryosong sala pagkahuman. Maulawan gyod ang akong mga ginikanan kon mahitabo na.”—Rebekah.

Makatabang nga teksto: “Pabiyaa ang tawong daotan sa iyang dalan . . . Pabalika siya kang Jehova, nga maluoy kaniya, sa atong Diyos, kay siya madagayaong magpasaylo.”—Isaias 55:7.

Hunahunaa kini: Bisag kinahanglang i-disfellow ang mga nakasala nga wala maghinulsol, pakitaag kaluoy ni Jehova kadtong mapainubsanong maghinulsol ug modawat sa disiplina.—Salmo 103:13, 14; 2 Corinto 7:11.

Dugang pa, hinumdomi ni: Bisag dili ka perpekto, masuklan nimo ang tentasyon sa tabang sa Diyos. (1 Corinto 10:13) Kon buot hunahunaon, ikaw ang modesisyon sa imong himoon, dili ang ubang tawo.

“Nahadlok ko nga basig makahimo kog seryosong sala human sa bawtismo. Pero akong naamgohan nga sayop pod kon dili ko magpabawtismo. Dili diay ko angayng magpapugong sa akong mga gikahadlokan sa kon unsay angay nakong himoon karon.”—Karen.

Ang punto: Makadesisyon ka nga likayan ang seryosong sala—sama sa gihimo sa kadaghanang alagad ni Jehova.—Filipos 2:12.

Nagkinahanglan kag tabang? Tan-awa ang “Unsaon Nako Pagsukol ang Tentasyon?”

Basig dili nako mahimo ang mga responsibilidad sa usa ka bawtismadong alagad

Kon nganong nabalaka: Tingali naa kay mga kailang batan-on nga mibiya sa ilang pamilya ug mga higala aron mohimog dugang sa pag-alagad kang Jehova. Nabalaka ka nga mao pod nay dahomon sa uban nga imong himoon.

“Ang bawtismadong Kristohanon puwede nang modawat ug dugang nga mga pribilehiyo, pero ang uban dili pa andam nga modawat niana o kaha dili itugot sa ilang kahimtang.”—Marie.

Makatabang nga teksto: “Angayng susihon sa matag usa ang iyang kaugalingong binuhatan, aron malipay siya sa iyang mga buhat ug dili tungod sa pagtandi sa iyang kaugalingon sa uban.”—Galacia 6:4.

Hunahunaa kini: Imbes ikompara ang imong kaugalingon sa uban, pagpokus sa giingon sa Marcos 12:30: “Higugmaa si Jehova nga imong Diyos sa tibuok mong kasingkasing.”

Matikdi nga kinahanglan kang moalagad kang Jehova sa tibuok nimong kasingkasing—dili tungod kay mao nay gusto sa uban. Kon gimahal gyod nimo si Jehova, mangita kag paagi nga makaalagad niya sa pinakamaayo nga imong mahimo.

“Seryosong responsibilidad ang pagpabawtismo, pero dili ni makapalisod sa imong kinabuhi. Kon makig-uban ka sa maayong mga higala, tabangan ka nila. Sa tinuod lang, mas magmalipayon ka kon anam-anam kang modawat ug mga responsibilidad. Kon ginalikayan nimo ang pagpabawtismo, makadaot lang na nimo.”—Julia.

Ang punto: Apresyaha ang gugma nga gipakita ni Jehova kanimo. Kanay magpalihok nimo nga ihatag ang imong kinamaayohan kang Jehova.—1 Juan 4:19.

Nagkinahanglan kag tabang? Tan-awa ang “Responsable ba Ako?”

Basig dili ko takos nga moalagad kang Jehova

Kon nganong nabalaka: Si Jehova ang kinalabwan sa tibuok uniberso; kon ikompara, ang mga tawo morag way bili! Gani, basig naghunahuna ka kon nahibalo ba si Jehova nga naglungtad ka.

“Saksi ni Jehova ang akong ginikanan, maong nabalaka ko nga nahimo lang kong higala ni Jehova tungod nila ug dili tungod kay gikabig ko ni Jehova.”—Natalie.

Makatabang nga teksto: “Walay tawo nga makaari kanako gawas kon siya gikabig sa Amahan, kinsa nagpadala kanako.”—Juan 6:44.

Hunahunaa kini: Kon naghunahuna kang magpabawtismo, nagpakita na nga gusto ni Jehova nga mas masuod ka kaniya. Dili ba angay lang nga dawaton nimo ang iyang imbitasyon?

Hinumdomi sab nga si Jehova—dili ikaw o si bisan kinsa—ang mopili kon kinsay iyang kabigon. Ug ang Bibliya nagpasalig nga kon ‘moduol [ka] sa Diyos, siya moduol kanimo.’—Santiago 4:8.

“Kay nakaila ka kang Jehova ug gikabig ka niya, pamatuod na nga gimahal ka niya. Kon maghunahuna ka nga dili ka takos nga moalagad niya, pahinumdomi ang imong kaugalingon nga dili siya uyon ana. Ug si Jehova kanunayng husto.”—Selina.

Ang punto: Kon nakab-ot na nimo ang mga kuwalipikasyon sa Bibliya para sa bawtismo, puwede na kang moalagad kang Jehova. Ug hinumdomi nga si Jehova takos modawat sa imong pagsimba.—Pinadayag 4:11.

Nagkinahanglan kag tabang? Tan-awa ang “Nganong Kinahanglan Kong Moampo?”