Unsay Salida Karong Ting-init?

UNSAY gusto nimong buhaton sa ting-init? Kon medyo moinit na ang klima, basin ganahan kang magsuroysuroy sa gawas​—tingali moadto sa baybayon o sa parke.

Apan, kadtong anaa sa industriya sa pelikula naglaom nga milyonmilyong tawo ang mogugol ug daghang panahon sa ting-init sulod sa mga sinehan. Adunay labing menos 35,000 ka eskrin sa sinehan sa Tinipong Bansa lamang, ug sa di pa dugayng katuigan mga 40 porsiyento sa kita sa takilya niining nasora ang nahipos panahon sa ting-init.a “Ang kita niining panahona sama ka dako sa kita sa mga tindahan panahon sa Pasko,” matod ni Heidi Parker sa Movieline nga magasin.

Dili kini ingon niini kaniadto. Diyutay lang ang manan-awg sine kaniadto sa T.B. panahon sa ting-init, nga tungod niana napugos ang daghang sinehan sa paglimite sa ilang eskedyul sa pagpasalida o sa pagsira pa gani nianang panahona. Apan pagka-1975, ang mga sinehan nga may air-conditioner nakadani sa daghang tawo sa pagpabugnaw sulod sa sinehan. Tingbakasyon usab kini sa mga bata busa naghunahuna ang mga tighimog pelikula nga posibleng manan-aw usab ang mga bata ug sine. Sa wala madugay, mitungha ang blockbuster, o mga pelikula nga gihugopan sa takilya, panahon sa ting-init.b Nakausab kini sa paagi sa paghimo ug pag-anunsiyo sa mga pelikula, ingon sa ato unyang makita.

[Mga footnote]