Pagpangawat ug Baligya—Dili-Makadaot nga Paukyab o Seryosong Krimen?
HANDURAWA ang mosunod nga situwasyon. Naabli ang atubangan nga pultahan sa department store, ug niana misulod ang duha ka dalagita nga nagsinina ug nunot sa uso. Mipaingon sila sa nahimutangan sa mga kosmetiko. Usa ka unipormadong guwardiya ang misunod apan mihunong sa dihang mga diyes metros ang iyang gilay-on kanila, nga nagtindog nga nagbinaklid. Iyang gibantayan ang mga dalagita samtang nagtan-aw-tan-aw sila sa mga lipstik ug mascara.
Gipasiplatan nila ang guwardiya, nga nagbantay kanila. Gibati nila ang kaukyab. Ang usa sa mga dalagita miadto sa nahimutangan sa mga kiyutiks ug mipunit ug duha ka botelya. Naglibog konohay siya kon hain sa duha ka pula nga kiyutiks ang iyang pilion. Iyang gibutang ang usa ka botelya ug gipunit ang lain nga mas lugom ug kolor.
Gipaubos sa guwardiya ang iyang panan-aw ug dayon miliso siya aron motan-aw sa pikas bahin. Dihadiha, ang mga dalagita nagdungan pagsulod sa mga lipstik ug kiyutiks ngadto sa ilang mga bag. Kalmadong tan-awon ang ilang mga nawong, apan gibati nila ang hilabihang kaukyab. Nagpabilin usa sila sa pasilyo sulod sa pipila pa ka minutos, ang usa nagtan-aw-tan-aw sa mga limbas sa kuko, samtang ang lain nagtan-aw-tan-aw sa mga lapis nga pangbadlis sa kilay.
Ang duha nagtinan-away, nagyangoay, dayon mipadulong sa atubangan sa tindahan. Ang guwardiya mipadaplin, ug mipahiyom sila kaniya sa dihang milabay sila. Mipaingon sila sa mga sudlanan ug cellphone nga atbang gayod sa kahera, ug gitan-aw nila ang displey. Naghagawhaway sila bahin sa panit nga sudlanag cellphone. Unya mipaingon sila sa pultahan.
Sa matag tikang, mosamot ang ilang kaukyab nga sagol kahadlok. Sa dayon nang gawas sa mga dalagita, morag gusto nilang mosinggit, apan nagpakahilom sila. Sa dihang nakagawas na gyod sila, namula pag-ayo ang ilang mga nawong sa tumang kaukyab. Ang ilang kaukyab nag-anam ka wala, ug nakaginhawa silag lawom. Ang mga dalagita nagdalidali paglakaw, apan dili sila makapugong sa pag-agik-ik. Usa ray ilang gihunahuna: ‘Wala kami masakpi!’
Ang duha ka dalagita hinanduraw lamang, apan ikasubo nga ang situwasyon tinuod gayod. Gibanabana nga ang pagpangawat ug baligya mahitabo ug usa ka milyong beses kada adlaw sa Tinipong Bansa lamang, apan problema kini sa tibuok yuta. Sa ato unyang mahibaloan, kini makapahinabo ug dakong kadaot. Apan, kadaghanan sa kawatan ug baligya dili manumbaling sa kadaot nga ilang ipahinabo. Bisan gani ang daghang tawo nga makaarang sa pagbayad mas gustong mangawat. Ngano man?