“Kini ang Organisasyon ni Jehova”
Ang usa ka pamilya sa Pinlandia nga taudtaod nang nakig-uban sa mga Saksi ni Jehova gisupak sa daghang tawo. “Ila mong hukhokan sa inyong kuwarta,” sila gipasidan-an sa mga tawo. Ang uban miingon, “Mawad-an gyod mo sa inyong balay.” Naatol pod nga usa ka gabii niana ang tinukod nga gibutangan sa heating system sa pamilya nadaot pag-ayo tungod sa sunog—dako kini nga kapildihan ilabina sa tugnaw nga klima sa amihanan.
Ang insyurans talagsa rang mohulip sa kantidad sa mga materyales sa pagtukod pag-usab. Daw gipamatud-an sa maong sunog ang daotang mga panagna sa mga silingan. Nanghupaw ang amahan nga nahinumdom, “Hilabihan gyod namong guola.” Bisan pa niana, wala usba sa magtiayon ang ilang plano nga magpabawtismo sulod na lang sa tulo ka semana.
Nasabtan sa lokal nga kongregasyon nga mao na kadto ang higayon sa pagpadapat sa tambag sa Bibliya: “Minahal nga mga anak, maghigugmaay kita, dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Giplano dayon sa mga isigkamagtutuo ang pag-ayo sa tinukod. Ang sangang buhatan sa mga Saksi ni Jehova sa Pinlandia naghatag ug praktikal nga pamaagi kon unsaon kadto pagbuhat. Gidibuho ang mga blueprint, gikuha ang mga permiso sa pagtukod, gilista ang gikinahanglang mga materyales, ug dayon gipanawag ang mga boluntaryo.
Mga usa ka bulan human sa sunog, nagsugod na ang trabaho. Pagka-Miyerkoles, gihugno sa lokal nga mga Saksi ang nahibilin sa nasunog nga tinukod. Pagka-Biyernes, sa tabang sa mga Saksi gikan sa ubang mga kongregasyon, mibarog na ang tigbayon sa bag-ong tinukod. Sa iyang pag-adto sa lungsod, nahimamat sa amahan ang usa ka opisyal sa ilang lugar nga nagpakisayod kon iya bang gitrapalan ang nadaot nga tinukod aron dili maulanan. “Wala, wala may gitrapalan,” ang amahan mapasigarbohong mitubag, “apan tuay 30 ka lalaki sa atop!”
Pagka-Sabado, mga 50 ka kugihang mga igsoong lalaki ug babaye sa kongregasyon nangabot ug malipayong mitabang. Ang usa ka silingan nga mitabang usab mikomento: “Kagabii, akong gipalandong nga kamo talagsaon kaayong mga tawo! Inyo gayong giatiman ug gitabangan ang usag usa.”
Nahuman ang trabaho niadtong gabhiona. Ang bag-ong tinukod nakatubag gayod sa mabiaybiayong mga pasidaan nga nadawat sa pamilya. Usa ka ansiyano sa kongregasyon nahinumdom sa dihang siya ug ang amahan mibarog aron motan-aw sa ilang gihagoan: “Pagkalalim sa akong gibati sa dihang akong giagbayan ang among bag-ong nabawtismohang igsoon ug giingnan, ‘Kini ang organisasyon ni Jehova.’”
[Hulagway sa panid 31]
Kadaot sa sunog
[Hulagway sa panid 31]
Panahon sa pag-ayo